Muheemererye Etthu Yookhoottiheryakani Opatisiwa

1. Mareeliho xeeni mutthu oniphwanya awe vaavo onipatisiwa awe?

NIIREKE munnimphenta Yehova, yoowo oovanheni itthu sooreera ohela muhina okumi anyu? Niireke munniphavela omooniherya omphenta wanyu? Enamuna yooloka mukhanle anyu oopaka eyo, ori wiivahererya wa Yehova ni opatisiwa. Eyo enimookhaliheryani wiirela mpantta emusi ya Yehova. Mwiira siiso, Tiithi anyu ni mpatthani anyu Yehova, onrowa oweettihakani ni wookhaliheryani maana muniirela mpantta emusi awe. (Esal. 73:24; Yes. 43:​1, 2) Ohiya-vo, vaavo muniivahererya anyu wa Yehova ni opatisiwa, munniphwanya nlipelelo na okumi woohimala. — 1 Ped. 3:21.

2. Mwaha ola ninrowa othokorerya exeeni?

² Niireke yookhala etthu enookhoottiheryani opatisiwa? Vakhala wiira munaakhula wiira aayo, muhiliyale wiira khamukhanle mekhinyu. Okhuma khalai, atthu imilyau sinceene, yaahaana opaka marukunuxo ni mweettelo aya ni enamuna yuupuwela aya, wiira aphwanelele opatisiwa. Olelo-va, awo annimurumeela Yehova mooluttuweliwa ni moohakalala. Etthu xeeni mukhanle anyu oowiixutta ni ale yaapatisiwe okathi wa arummwa? Mwaha ola, nnoothokorerya mixankiho yaarina aya, ni etthu nniixutta ahu ni ntakiheryo naya.

ASAMARIYA YAAHITHANLA OPATISIWA

3. Mixankiho xeeni aSamariya yaareerela aya oxintta wiira apatisiwe?

³ Asamariya a okathi wa Yesu, yeettela etiini yoovirikana ni eyuda. Awo yaakhala epooma ya oSikhemi wa oSamariya onorti wa oYudeya. Ahinatthi opatisiwa, awo yaahaana osuwela oratteene Nuulumo na Muluku. Asamariya, yaakupali wiira iliivuru Maphattuwelo mpakha Otumererya, ti saakhuma wa Muluku, nave woonasa wene, ni eliivuru ya Yooxuuwa. Asamariya, yuupuwela wiira Mesiya aamoorwa moovarihana ni yooleiherya ya Muluku eri Otumererya 18:​18, 19. (Yoh. 4:25) Nave wiira apatisiwe, awo yaahaana weemererya wiira Yesu ari Mesiya aaleiheriwe, nto “aSamariya anceene” yaahipaka eyo. (Yoh. 4:39) Ohiya vo, okhala wiira makristau a okathi wa arummwa yaari ayuda, aSamariya akina, yaahaana oturuka moonelo woohiloka yaarina aya ni ayuda. — Luka 9:​52-54.

4. Moovarihana ni Miteko 8:​5, 6, 14, aSamariya yoonenle sai muhupi wa Filipe?

⁴ Exeeni yaakhalihenrye aSamariya othanla opatisiwa? Nuumala Filipe namalaleya opaceriha waalaleerya atthu voohimya sa “Kristu”, aSamariya akina “yaahaamini nuulumo na Muluku”. (Musome Miteko 8:​5, 6, 14.) Awo khiyaakhoottale onwiriyana Filipe nnaamwi aari muyuda. Woonasa wene, awo yaanuupuwela soolepa sinihimya wiira Muluku khonaathanla atthu. (Otum. 10:​17-19) Nave awo yaahikupali wiira Filipe aanikhaliheriwa ni Muluku, okhala wiira aahipaka miiriirya sinceene, ntoko waapenuxa aretta ni woomola malaikha ootakhala. — Mit. 8:7.

5. Ntakiheryo na aSamariya, ninniixuttiha exeeni?

⁵ Asamariya ale yanwerya okhootta muhupi Filipe aalaleya awe, okhala wiira aari muyuda ni khiyaatonko wiiwa ihapari aalaleya awe. Masi awo khiyaapanke eyo. Asamariya, yaahithanla opatisiwa nuumala okupali wiira itthu Filipe aixuttiha awe, saari seekeekhai. Biibiliya onihimya so: “Okathi Filipe aalaleya awe ihapari sooreera sa Omwene wa Muluku, ni aalaleya awe nsina na Yesu Kristu, alopwana ni athiyana yaahimwaamini, nave yaahipatisiwa”. (Mit. 8:12) Niireke munnikupali wiira Nuulumo na Muluku ti neekeekhai? Nave niireke munnikupali wiira Anamoona a Yehova, annooniherya niphento nenlo Yesu aahimmye awe wiira atthareli awe eekeekhai, yaarowa wooniheryaka? (Yoh. 13:35) Tivonto, muhoovelele opatisiwa mukupaliki wiira Yehova onimooreelihani.

6. Yoowiiraneya ya Ruben, enrowa wookhaliheryani sai?

⁶ Ruben, yoowo onikhala wAlemanha, ohuuwale etthoko ya Anamoona a Yehova. Okathi aari awe mmiravo, owo aanaanyiherya vakhala wiira Muluku ookhala. Etthu xeeni yaamukhalihenrye oturuka moonelo awe? Owo aahoona wiira khaasuwela itthu sinceene voohimya sa mwaha ole, tivo aahilakela wiixutta itthu sikina. Owo onihimya so: “Kaanipaka yoosoma aka ya omwaneene wiira kisuwele ekeekhai. Kaahaana osoma ikwaha sinceene myaha saalavula woohimya sa othatuwa”. Nave owo aahisoma eliivuru eni: Existe um Criador Que Se Importa com Você? Eliivuru ele, yaahimukhaliherya Ruben olipiha omwaamini wawe Muluku. Otikinihiwe ene, owo aahimmye so: “Vatthu-va! Yehova tthiri ookhala”. Nuumala oxukurya eseedi ya olumwenku wootheene ya Anamoona a Yehova, Ruben aahihakalala woona moota anna ni arokora yaaphentana aya. Okathi aatthikenle awe wAlemanha, Ruben aahipatisiwa orina ene iyaakha 17. Vakhala wiira munnaanyiherya voohimya sa Muluku, Biibiliya aahiiso mwaha mukina, mutokoseke iliivuru sinimutthokiherya Biibiliya. Akhala wiira ‘munoosuwela saana’ ekeekhai, eyo enimookhaliheryani omala-maliha itthu munaanyiherya anyu. (aEef. 4:​13, 14) Nuuvira okathi, munrowa wiiwaka soowiiraneya sinceene voohimya sa ophenta ni wiiraana wa atthu a Yehova olumwenku wootheene, waahela muhina anna ni arokora a muloko anyu. Nto eyo, enoowiirihani wuncererya waaphenta wanyu anna ni arokora a olumwenku wootheene.

SAULO A OTARSO AAHITHANLA OPATISIWA

7. Muupuwelo xeeni woohiloka Saulo aareerela awe oturuka?

⁷ Nrowe nthokorerye ntakiheryo na Saulo a oTarso. Owo aanisuwela oratteene nlamulo na ayuda ni aari mutthu aasomme vanceene. (aGal. 1:​13, 14; aFil. 3:5) Okathi ole, ayuda anceene yaakupali wiira makristau yaari anammwareya. Eyo yaahimwiiriha Saulo opacerya waalupattha vanceene makristau. Vaavo aapaka awe eyo, owo uupuwela wiira aanimuhakalaliha vanceene Muluku. (Mit. 8:3; 9:​1, 2; 26:​9-11) Vaakhanle wiira Saulo aamooniherya omwaamini Yesu ni opatisiwa ntoko mukristau, owo aanisuwela wiira aamulupatthiwaka.

8. a) Exeeni yaamukhalihenrye Saulo othanla opatisiwa? b) Moovarihana ni Miteko 22:​12-16, Ananiya aamukhalihenrye sai Saulo? (Nwehe eteseenyu.)

⁸ Exeeni yaamukhalihenrye Saulo othanla opatisiwa? Yesu ori ene wiirimu aahilavula ni Saulo, nuumala-vo, waahikhumelela waarya weiwo waamwiirinhe Saulo ohoona. (Mit. 9:3-9) Saulo aahiviriha mahiku 3 ohiwuryaka ni ohilyaaka etthu. Moohaanyiherya, owo aanuupuwelela vanceene etthu ele yaamwiiranenle. Nto eyo yaahimukupaliha Saulo wiira Yesu aari Mesiya, ni atthareli awe yeettela etiini yeekeekhai. Owo aahiriipiwa murima, mwaha wa weemererya wiiviwa wa Siteefano! (Mit. 22:20) Nuuvira mahiku 3, mulopwana mmosa ooreera murima aihaniwa Ananiya, aahirwa okumana ni Saulo ompenuxa ni omukhaliherya wiira aahaana opatisiwa moohipisa. (Musome Miteko 22:12-16.) Moowiiyeviha, Saulo aahinwiriyana Ananiya ni aahipatisiwa. — Mit. 9:17, 18.

9. Nniixutta exeeni ni ntakiheryo na Saulo?

⁹ Tthiri khasireere itthu nikhanle ahu oowiixutta ni yoowiiraneya ya Saulo. Wiixinnuwiha ni owoova atthu, wammwiiriha okhootta opatisiwa. Masi owo kheemerenrye wiira eyo yiiraneye. Saulo aari mutthu oowiiyeviha ni aahipaka marukunuxo mookumini mwawe, wiira okhale mutthareli a Kristu. (Mit. 26:​14, 19) Owo aahilakela okhala mukristau, hata aasuwenle wiira aarowa olupatthiwaka. (Mit. 9:​15, 16; 20:​22, 23) Nuumala opatisiwa, owo khaahiyale omuroromela Yehova wiira ammukhaliheryaka ovilela khula muxankiho. (2 aKor. 4:​7-10) Waamini wanyu pooti weehereriwa nuumala nyuwo opatisiwa ntoko Namoona a Yehova. Masi muhiliyale wiira khula okathi Yehova ni Yesu Kristu, anrowa wookhaliheryakani wiira nvilele ni muhihiye ororomeleya. — aFil. 4:13.

10. Yoowiiraneya ya murokora Anna, enrowa wookhaliheryani sai?

¹⁰ Nuumala maama awe opatisiwa, Anna yoowo innuwe wEuropa, aahipacerya omusoma Biibiliya orine ene iyaakha 9, okhala wiira paapa awe aahimweemererya. Nuumala amusi awe osuwela wiira aahipacerya omusoma Biibiliya ni Anamoona a Yehova, yaahipacerya omulupattha. Amusi awe, yuupuwela wiira yaamuuliwa muru, akhala wiira Anna aamukhala Namoona a Yehova. Okathi Anna aaphiyerinhe awe iyaakha 12, owo aahinvekela paapa awe wiira omweemererye opatisiwa. Paapa awe, aahimukoha vakhala wiira ele yaari yoothanla aapanke awe mmensawe aahiiso ookhala mutthu aamukhanyererya. Owo aahaakhula so: “Miyo kinnimphenta vanceene Yehova”. Nto paapa awe aaheemererya wiira yena pooti opatisiwa. Nuumala Anna opatisiwa, amusi awe khiyaahiyale omuhasula. Mmusi awe mmosa, aahimmye so: “Fataari mwaarina mweettelo woohiloka ni ompaha sikaro, ohiya okhala Namoona a Yehova”. Murokora Anna, aawenrye sai ovilela muxankiho ole? Owo ohimmye so: “Yehova ookikhaliherya okhala oolipa, nave amaama ni apaapa, khareere okikhaliherya”. Murokora Anna ookhalana elista ya itthu Yehova omukhalihenrya awe mookumini mwawe. Ikwaha sikina, owo onniweha elista eyo wiira uupuweleleke moota Yehova omukhalihenrye awe. Akhala wiira munoova olupatthiwa, muhiliyale wiira Yehova onimookhaliheryani. — aHeeb. 13:6.

KORNEELIO AAHITHANLA OPATISIWA

11. Exeeni yaakhanle omwiiriha Korneelio opiserya opatisiwa?

¹¹ Sookhala itthu sikina nniixutta ahu ni ntakiheryo na Korneelio. Owo, aari mukhulupale aahoolela anakhotto a ekurupu ya atoropa 100 a oRoma. (Mit. 10:1) Mwaha waivaavo, owo aanittittimihiwa vanceene ni atoropa ni atthu akina mmuttettheni. Nave owo “aanaakhaliherya alipa-oohaawa”. (Mit. 10:2) Yehova aahimuruma murummwa Pedru wiira amulaleerye ihapari sooreera Korneelio. Niireke okhulupale aarina awe waahimwiiriha opiserya opatisiwa?

12. Exeeni yaamukhalihenrye Korneelio othanla opatisiwa?

¹² Exeeni yaamukhalihenrye Korneelio othanla opatisiwa? Biibiliya onihimya so: “Owo ni atthu otheene a etthoko awe, yaanimukokhorela Muluku”. Nave-tho, Korneelio aanimuxonttela Muluku mahiku ootheene. (Mit. 10:2) Nuumala Pedru omulaleerya Korneelio ihapari sooreera, owo ni atthu a emusi awe yaahimwaamini Kristu ni yaahipatisiwa. (Mit. 10:​47, 48) Korneelio aari oolikana ene opaka marukunuxo yaareerela, wiira omukokhoreleke Yehova hoothe ni amusi awe. — Yoox. 24:15; Mit. 10:​24, 33.

13. Nniixutta exeeni ni ntakiheryo na Korneelio?

¹³ Ntoko Saulo, Korneelio ampiserya opatisiwa mwaha wa okhulupale aarina awe. Masi owo kheemerenrye wiira eyo yiiraneye. Niireke muhaana opaka marukunuxo mookumini mwanyu wiira mpatisiwe? Akhala wiira ti siiso, muhiliyale wiira Yehova onimookhaliheryakani. Owo onooreeliha wiimananiha wanyu wiiwelela malakiheryo a mbiibiliyani, wiira mmurumeeleke.

14. Yoowiiraneya ya Tsuyoshi, enrowa wookhaliheryani sai?

¹⁴ Tsuyoshi, yoowo onikhala oJapão, aahaana opaka marukunuxo yaavarihana ni muteko awe wiira opatisiwe. Owo aari namakhaliherya a tiretoore a eskola yootepa osuwelexiwa, yaawiixuttiha atthu okhapelela ifilori. Tiretoore, aanilokiherya ifilori wiira sarumeeliweke okathi wa masikho ni aniirela mpantta masikho awo yaavarihana ni etiini budista. Okathi tiretoore ahaakhala awe, owo taamuranttela. Masi nuumala wiixutta ele Biibiliya onihimya awe sa alipa-ookhwa, owo aahisuwela wiira khaarowa opatisiwa, aahihiye wiirela mpantta soolema iye saavarihana ni etiini budista. Owo aahithanla ohiirela-tho mpantta soolema iye. (2 aKor. 6:​15, 16) Tsuyoshi aahirowa olavula ni tiretoore awe voohimya sa yoothanla aapanke awe. Exeeni yaakhumelenle? Owo aahivikaniha ovara muteko ole masi ohiirelaka mpantta masikho ale. Nuuvira eyaakha emosa omusomaka Biibiliya, owo aahipatisiwa.a Vakhala wiira munnipirisari opaka marukunuxo voohimya sa muteko munivara anyu wiira mmuhakalalihe Yehova, mukupaliki wiira owo onimoovahani nyuwo ni emusi anyu itthu munipirisari anyu. — Esal. 127:2; Math. 6:33.

ATTHU A OKORINTO YAAHITHALA OPATISIWA

15. Itthu xeeni saarowa owiiriha atthu akina a oKorinto ohipatisiwa?

¹⁵ Atthu yaakhala epooma ya oKorinto, yaaniphenta mihakhu ni yaahikhalana mweettelo woohiloka. Anamunceene, yaapaka itthu Muluku oninyokha awe. Nto atthu yaakhala epooma ele, vaamwaaxankiha opacerya omurumeela Yehova nuumala wiiwa ihapari sooreera. Nuumala murummwa Paulo ophiya epooma ele ni opacerya olaleya ihapari sooreera voohimya sa Kristu, “aKorinto anceene yaiwale . . . yaahaamini, ni yaahipatisiwa”. (Mit. 18:​7-11) Muhoolo mwaya, Pwiya Yesu aahimukhumelela Paulo moolohani, onamuleela so: “Aakhala atthu anceene epooma ela anrowa okaamini”. Paulo aahivikaniha olaleerya epooma ele eyaakha emosa nnimeya.

16. Marukunuxo xeeni atthu akina a oKorinto yaareerela aya opaka wiira apatisiwe? (2 aKorinto 10:​4, 5)

¹⁶ Exeeni yaakhalihenrye atthu a oKorinto othanla opatisiwa? (Mmusome 2 aKorinto 10:​4, 5.) Nuulumo na Muluku ni munepa woowaarya, saahaakhaliherya opaka marukunuxo maalupale mookumini mwaya. (aHeeb. 4:12) Atthu a aKorinto yeemerenrye ihapari sooreera voohimya sa Kristu, yaahiwerya ohiya mweettelo aya woohiloka ntoko ohapaliwa, wiiya ni orupihana alopwana-ru aahiiso athiyana-ru. — 1 aKor. 6:​9-11.b

17. Exeeni nniixutta ahu ni ntakiheryo na atthu a oKorinto?

¹⁷ Nnaamwi atthu akina a oKorinto yaareerela opaka marukunuxo maalupale mweekumini mwaya, awo khiyuupuwela wiira vaari vooxankiha ohiya mweettelo aya wiira akhale makristau. Awo yaahiimananiha vanceene wiira yeetteleke estaraata yaamukhaani, yeeyo eniphwanyiha okumi woohimala. (Math. 7:13, 14) Niireke munniimananiha wiira mpake marukunuxo maalupale para opatisiwa? Muhikhulumuwe! Mmuxontteleke Yehova wiira oovaheeni munepa awe woowaarya. Opaka eyo, enimookhaliheryani osyaka opaka itthu soohiloka.

18. Yoowiiraneya ya Monika, enrowa wookhaliheryani sai?

¹⁸ Monika, yoowo onikhala oGeórgia, oopaka marukunuxo maalupale wiira ohiye olavula moolumo ooveeha ni oweha matthekulelo oohiloka wiira opatisiwe. Owo onihimya so: “Etthu ekikhalihenrye ohiya mweettelo ole woohiloka, yaari onvekela Yehova. Owo aanisuwela wiira kaaniphavela opaka etthu yooloka, nto khula okathi aanikikhaliherya ni aanikeettiha”. Monika opatisiwe orina ene iyaakha 16. Niireke ookhala mweettelo woohiloka muniprisari anyu ohiya, wiira mmurumeeleke Yehova mwa enamuna oniphavela awe? Muhihiye onvekela Yehova wiira ookhaliheryeni opaka marukunuxo. Yehova onnivaha munepa awe woowaarya voohiphima. — Yoh. 3:34.

MWAKHALANA WAAMINI, MUNOOWERYA OVILELA MIXANKIHO

19. Exeeni enrowa wookhaliheryani oxintta mixankiho sinlikana ni miyaako? (Nwehe efootu.)

¹⁹ Moohicikha mixankiho sinoophwanyani ni marukunuxo munireerela anyu opaka wiira mpatisiwe, mukupaliki wiira Yehova onnoophentani ni oniphavela wiira mwiireleke mpantta emusi awe. Yesu aahaaleela awiixutti awe wiira: “Mwakhalana waamini onlikana ni enuku yaamukhaanixa, munooruma mwaako ola wira: ‘Mukhume-va, murowe vale’. Nto mwaako owo, onookhuma, nave khiivo munrowa anyu wooceela”. (Math. 17:20) Okhala wiira atthu ale khiyaavirinhe iyaakha sinceene ari ene ni Yesu, awo yaanipirisari olipiha waamini waya. Masi Yesu aahaaleiherya wiira yakhalana waamini, Yehova aamwaakhaliherya oxintta mixankiho suulupale saalikana ni miyaako. Nave-tho Yehova onimookhaliheryani opaka eyo!

20. Matakiheryo a arumeyi a Yehova a khalai ni a mahiku ala aniromoliwa mwaha ola, anrowa wookhaliheryani sai?

²⁰ Vakhala wiira yookhala etthu enookhoottiheryani opatisiwa, muhipiseke opaka marukunuxo anireerela wiira muxintte muxankiho owo. Matakiheryo a makristau a khalai ni a mahiku ala, pooti woomaalihani ni woolipihani. Ninlipelela wiira matakiheryo awo animookhaliheryani wiivahererya wa Yehova ni opatisiwa. Tthiri, eyo yoothanla yoolaka mukhanle anyu oopaka mookumini mwanyu!