Makoho Anikohiwa ni Ale Anisoma Irevista Sahu
Muteko woolaleerya, onrowa ovariwa mpakha silini?
Yesu aahimmye so: “Ihapari iya sooreera sa Omwene sinoolaleiwa elapo yotheene, wira atthu otheene yiiwe. Vano, olumwenku ola omaleke”. (Math. 24:14) Nuulumo na ekereku noowi “omaleke” nitaphuleliwe eversiikulu ela ni eversiikulu 6 ni 13 ti te’los. Nuulumo nna, ninthoonyerya omala moomalela wa olumwenku ola wa Satana, okathi wa ekhotto ya Armagedoni. (Wis. 16:14, 16) Eyo enooniherya wiira khaninrowa ohiya olaleya ihapari sooreera mpakha ophiya okathi ohalaka vakhaani omala olumwenku ola, okathi wa ekhotto ya Armagedoni. Nno olokiheriwa wa moota naiwexexa ahu khalai.
Khalai, nuupuwela wiira naarowa ohiya olaleya ihapari sooreera okathi yaarowa aya opacerya maxakha maalupale, yaawo anrowa opacerya ni opwetexiwa wa Babilonia Muulupale. (Wis. 17:3, 5, 15, 16) Khalai, nuupuwela wiira maxakha maalupale yaarowa omaliha “eyakha y’eparakha y’Apwiya [Yehova]”, aahiiso okathi Yehova aarowa awe waavaha eparakha atthu ya weemererya ihapari sooreera. (Yes. 61:2) Nave nuupuwela wiira, ale yaarowa woopowa okathi wa maxakha maalupale, atthu yaale yoonihenrye ororomeleya waya ya Yehova ahinatthi opacerya maxakha maalupale. Nave nuupuwela wiira atthu awo yaalikana ni ayuda, yaawo yooponwe okathi wa opwetexiwa wa Yerusalemu mwaakha wa 607 Kristu ohinatthi orwa. Ayuda ale yooponwe, yaanimukokhorela Yehova ni yaaninyokha itthu sootakhala, tivonto yaahiheliwa esinaale. (Ezek. 5:11; 9:4) Masi nlikanyiho nlo, khaninvarihana ni moolumo a Yesu ari Matheyo 24:14, yaawo anooniherya wiira atthu akina animweemererya ihapari sooreera ohalaka okathi vakhaani wiira omale moomalela olumwenku ola wa Satana, okathi wa Armagedoni.
Vano moota nniiwexexa ahu eliivuru ya Matheyo 24:14, enniniiriha oturuka enamuna naiwexexa ahu muhupi wa ophukela, yoowo onilikanyihiwa ni maluku maalupale a maralala eliivuru ya Wiisupulula 16:21. Nuumala ovarerya oratteene soolepa iya, nihoona wiira iyo sinilavula etthu emosa-ru. Moota xeeni? Waakhuliwa waya, onivarihana ni moota atthu anoonela aya muhupi wa Omwene. Murummwa Paulo olempe wiira, para “ale anrowa woopowa”, muhupi owo, ori ntoko ihapari sooreera, maana onlikana ni “wunkhela wa okumi”. Masi para awanani a Muluku, muhupi owo waarowa okhala wootakhala, maana onlikana ni “wunkhela wa okhwa”. (2aKor. 2:15, 16) Awanani awo, anninyokha muhupi wa Omwene, okhala wiira onnihimya ekeekhai ya olumwenku ola, yoowo onaasivela, eyo piiyo, moohipisa olumwenku ola onilamuleliwa ni Satana onrowa opwetexiwa. — Yoh. 7:7; 1Yoh. 2:17; 5:19.
Wiisuupulula 16:21, onihimya wiira “olemela wa khula nluku na maralala awo, waattamela etalento emosa”. Woonasa wene, eyo enooniherya wiira okathi wa maxakha maalupale, muteko woolaleerya onookhalana efaita yinceene, niire so, nsina na Yehova nnoosuweliwa vanceene ovikana khalai. (Ezek. 39:7) Niireke okathi owo onrowa awe opwetexiwa Babilonia Muulupale, atthu akina anrowa woonaka muhupi wa omwene ntoko etthu yoowunkhela? Woonasa wene, eyo enimwiiraneya. Pooti wiira atthu awo animuupuwela aahiiso anoosuwela wiira mwa iyaakha sinceene Anamoona a Yehova yaanilaleya wiira etiini yoowootha enoopwetexiwa.
Eyo enninuupuxerya etthu yiiraneyale wExiitu nuumala okhumelela ihukhumu 10. Nuumala Yehova ‘wahukhumu amuluku othene a wEjitu’, “atthu akina anjene” yahaakhanle aisarayeli yaahaatthara atthu a Muluku. (Okhu. 12:12, 37, 38) Woonasa wene, atthu ale yahaakhanle aisarayeli yaahikhala mpantta wa Yehova nuumala wiiraneya ihukhumu 10 Moise aahimyale awe.
Khula mutthu onrowa okhala mpantta wa Yehova nuumala opwetexiwa Babiloonia Muulupale, onookhalana eparakha ya waakhaliherya axinnawe Kristu, yaawo anrowa wiiraka ari ene valaponi. (Math. 25:34-36, 40) Ekeekhai wiira eparakha ya othokoreriwa okhala epwittipwitthi enrowa omala ehalaka vakhaani opacerya ekhotto ya Armagedoni, okathi yoowo makristau oothanliwa anrowa aya wiiraka yaakhenle ene etthuvo aya wiirimu.
Moohaanyiherya, wiiwexexa nno wa niinaano, onnooniherya ophenta ni omoriwa ikharari wa Yehova. Tthiri owo “khoniphavela wira mutthu opwetexiwe, nnakhala mmosa. Masi oniphavela wira atthu otheene arukunuxe murima”. — 2Ped. 3:9.