Nnaamwi Kuuliwa Muru, Kaahikhala Misionaaria

Kiyariwe oViena, wÁustria, mwaakha wa 1951. Anamuyari aka yeetta ekerexa katoolika. Nnaamwi kaari mutthu oowuuliwa muru, kaanikupali wiira Muluku ookhala ni kaaninvekela ikwaha sinceene. Kirina ene iyaakha 9, paapa aka, aahipacerya osomihiwa Biibiliya ni Anamoona a Yehova. Nuuvira okathi vakhaani, maama aka aahipacerya wiirela mpantta yoosoma eyo.

Moohipisa, naahipacerya orowela mithukumano, muloko wa oDöbling, oViena. Miyo ni emusi aka, naanivara miteko sinceene hoothe. Naanimusoma Biibiliya ni orowela mithukumano sa mmulokoni ni naanikhaliherya okathi wa Asembeleya. Okhuma enamwane aka, paapa aka anikiixuttiha omphenta vanceene Yehova. Okathi ole, paapa aka aaninvekela Yehova wiira okikhaliherye miyo ni muhimaka okhala mapioneera. Masi miyo nkaaphavela okhala pioneera.

ETTHU EKIKHALIHENRYE OKHALA PIONEERA

Kipatisiwe kirina ene iyaakha 14, mwaakha wa 1965. Masi vaanikixankiha waalaleerya atthu kahaasuwela aka. Ikwaha sikina kuupuwela wiira amiravo akina tootepexa oloka okivikana miyo. Nto kaaniphavela wiira naawo akhale apatthani aka. Nuuvira okathi vakhaani kipatisiwe ene, kaahipacerya waapaka apatthani atthu yahaamurumeela Yehova. Vaanikisivela vanceene weetta ni apatthani aka awo, masi nkaakhala saana mwaha woowi kaahisuwela wiira khahiyo vaari vooloka weetta ni atthu ahinimurumeela Yehova. Nto vaanikixankiha ohiya weetta ni atthu awo. Exeeni yaakikhalihenrye?

Okathi ole, murokora mmosa aarina iyaakha 16 iitthaniwa Dorothée, aahithaamela muloko ahu. Vaanikisivela vanceene moota aakhalela awe nthiti muteko woolaleerya empa ni empa. Miyo kaari muulupale onvikana yena, masi nkaakhalela nthiti muteko woolaleerya. Nto kaanuupuwela so: ‘Anamuyari aka Anamoona a Yehova, masi Dorothée onimurumeela Yehova mekhawe. Owo aakhala ni maama awe aawereyasiwa, masi hata vari siiso, khaacompela muteko woolaleerya!’ Ntakiheryo nawe nooloka, naahikiiriha ophavela wuncererya miteko kanvarelaka Yehova. Miyo ni Dorothée naahikhala mapioneera. Wanipacerya, naari mapioneera ookhaliherya, okathi ole yiitthaniwa mapioneero a okathi wa ifeeriya. Nuuvira okathi naahikhala mapioneera rekular. Okhala wiira Dorothée waanimusivela vanceene olaleerya, nave miyo kaahipacerya osiveliwa muteko woolaleerya. Owo taakikhalihenrye omphwanya naxikola aka oopacerya a Biibiliya. Nuuvira okathi vaanikikhweela opaceriha ovaanela ni atthu empa ni empa, mustaraatani ni mapuro makina.

Mwaakha woopacerya kaarumeela aka ntoko pioneera rekular, munna mmosa a wÁustria iitthaniwa Heinz aahithaamiheriwa muloko ahu. Owo iixuntte ekeekhai oCanadá, okathi aamuxukurya awe muulupale awe, yoowo aari Namoona a Yehova. Nuumala-vo, owo aahithanliwa okhala pioneero espesial ni aahithaamiheriwa muloko ahu oViena. Kaahipacerya osiveliwa ni Heinz. Owo aaphavela okhala misionaario, masi okathi ole miyo nkaaphavela okhala misionaaria. Wanipacerya, miyo nkaamooniherya wiira kaanisiveliwa ni yena. Nuuvira okathi miyo ni Heinz naahipacerya onamorari ni nithelana ni naahipacerya orumeela ntoko mapioneero, wÁustria.

ETTHU EKIKHALIHENRYE OKHALA MISIONAARIA

Heinz aamakela okileela wiira aaphavela okhala misionaario. Masi khaakikhanyererya okhala misionaaria. Heinz aanikikhaliherya wuupuwela okhala misionaaria. Mwa ntakiheryo, owo aahikikoha so: “Okhala wiira khanrina anamwane, munoonela sai wuncererya muteko nninvarela ahu Yehova?” Okhala wiira kaari mutthu oowuuliwa muru, kaanoova okhala misionaaria. Nnaamwi kaawenrye okhala pioneera hata kuuliwaka muru, kuupuwela wiira nkaarowa owerya okhala misionaaria. Masi Heinz aanikipixerya murima ni aanikikhaliherya wuupuwela okhala misionaaria. Owo aanikitumererya wuupuwela moota kaarowa aka waakhaliherya atthu akina, ohiya owehexexa wuuliwa waka muru aahiiso itthu kahaawerya aka opaka. Tthiri miruku iye saahikikhaliherya.

Vakhaani-vakhaani, kaahipacerya ophavela okhala misionaaria. Nuuvira okathi, naahilepa eformulaario wiira nirowele eskola ya oGileadi. Wanipacerya, munna aahoolela oBeteli aahinileela wiira naahaana osuwela olavula saana enkelexi. Nto kaahiviriha iyaakha tthaaru kiimananihaka osuwela olavula oratteene enkelexi. Nuuvira okathi naahilattuliwa wiira nakhaliherye muloko waalavula nttaava servo-croata, oSalzburgo, wÁustria. Naahiviriha iyaakha 7 naalaleeryaka atthu anceene yaalavula nttaava servo-croata. Nave iyaka aahithanliwa okhala mutokweene a esirkwiitu. Mwaakha mmosa naahixukurya miloko saalavuliwa nttaava nlo. Nttaava servo-croata ti nooxankiha olavula, masi hata vari siiso, naahikhalana soosoma sa Biibiliya sinceene.

Mwaakha wa 1979, anna a ofiliyaali yaahinivekela wiira nirowe oBulgária mwa okathi vakhaani. Okhala wiira muteko ahu waanikhoottihiwa, awo yaanivekenle wiira nikhaleke ntoko niri “ifeeriya”. Awo yaahinivekela wiira nihiye olaleerya, masi moohisuweliwa nikuxe iliivuru sinimutthokiherya Biibiliya naavahe arokora 5 yaakhala elapo ya oSófia, ekapitaali ya oBulgária. Kaanoova vanceene, masi Yehova aahikikhaliherya ovara muteko ole kaarummwale aka. Kaahoona wiira arokora ale 5, yaari oolipa murima ni yaanihakalala hata yaasuwela wiira ovara muteko ole, wanwiiriha ovariwa ni mapoliisia ni otthukweliwa. Ntakiheryo naya na olipa murima, nookikhaliherya ovara khula muteko mutthenkeso wa Yehova onikivekela aya.

Naahitthikela-tho olepa epetisau para eskola ya oGileyaadi, mukwaha ola naaheemereriwa. Nuupuwela wiira naarowa osoma eskola ele ya nttaava na enkelexi wEstados Unidos. Masi Novembro a 1981, efiliyaali ya wAlemanha yaaheemereriwa opaka eskola ya oGileyaadi. Nto eskola eyo, yaapakiwa ni nttaava na wAlemanha, nenno kiniiwexexaka oratteene. Masi naarowa othanleliwa orowa elapo xeeni?

ORUMEELA ELAPO YAAWANIWA EKHOTTO

Naahithanleliwa orowa orumeela oQuênia! Masi anna a efiliyaali ya oQuênia, yaahinikoha vakhala wiira nanwerya othaamela elapo ekina yoowaattamela, wUganda. Iyaakha 10 saavinre, kumantanti a elapo ele iitthaniwa Idi Amin, aahimoomola kuvernu, yena onahala olamulelaka wUganda. Nuuvira iyaakha vakhaani, olamulelo awe waahiwiiva atthu anceene ni waahaakumiherya ohaawa atthu akina. Mwaakha wa 1979, awanani awe yaahimoomola wUganda ni yaahipakiwa ekuvernu esya. Kaahoova vanceene orowa orumeela elapo yaawaniwa ekhotto. Masi eskola ya oGileyaadi yaahikikhaliherya omuroromela Yehova, nto naaheemererya yoothanleliwa ele.

Makhalelo a wUganda yaari ooxankiha. Anuário a 2010, Heinz aahihimya makhalelo a elapo ele oriki: “Kuvernu, khaawerya-tho waavaha atthu maasi, energia ni itthu sikina sinaakhaliherya atthu okhala akumi. Atelefooni khiyaavara muteko, nave atthu yaanihaaxana ni wiivana, otepexa wene ohiyu. Vapaceryaka-ru oriipa, khula mutthu aakhala owaani olipelelaka aahiiso ovekelaka wiira ohikhale mutthu aarowa orwa omwiiyerya aahiiso omwiiva”. Hata saakhanle mixankiho iyo, anna ni arokora a wUganda khiyaahiyale omurumeela Yehova moororomeleya.

Mwaakha wa 1982, naahiphiya oKampala, ekapitaali ya wUganda. Miyeeri 5 soopacerya, naakhala vatthokoni wa Sam ni Christina Waiswa, yaawo yaarina anamwane 5 ni amusi aya akina 4. Okhala wene, awo yaalya ekwaha emosa paahi vanihikuni, masi hata vari siiso, awo yaanisiveliwa owaakhela aletto. Okathi naakhala ahu vatthokoni wa Waiswa, naahiixutta itthu sinceene sinikhalihenrye ni yoothanleliwa ahu. Mwa ntakiheryo, naahiixutta orumeela maasi vakhaani wiira nirape ni orumeela makina nuumala opaka miyoso suulupale. Mwaakha wa 1983, naahithaamela empa ekina epairo ya oKampala, weiwo waari woovareleleya.

Waaninsivela vanceene olaleerya oKampala. Kinnuupuwela wiira mweeri mmosa paahi, naahaakawela atthu irevista saavikana 4.000. Masi etthu yaatepa onisivela, waari waaweha atthu yeemereryaka ekeekhai, awo annimuttittimiha Muluku ni vannaasivela ovaanela voohimya sa Biibiliya. Okhala wene, miyo ni Heinz khula mmosa aanikhalana soosoma sa Biibiliya 10 aahiiso 15. Anaxikola ahu a Biibiliya, yaahiniixuttiha itthu sinceene. Mwa ntakiheryo, khula esumana awo yaanirowela mithukumano sa mmulokoni mwentto ni khiyaatonko wiixinliha.

Mwaakha wa 1985 ni 1986, saashikhumelela ikhotto piili wUganda. Naamakela waaweha atoropa anamwane, akunxe ene ikapwitthi ni epanke ene ikontoroole yaawehaka tani yaakhanle oovira. Okathi naarowa ahu olaleerya naaninvekela Yehova wiira onivahe ankhili, omaaleleya ni onikhaliherye osyaka itthu soowoopiha. Nto Yehova aahaakhula mavekelo ahu. Okathi namphwanya ahu mutthu aaphavela wiiwa ihapari sa Omwene, naaniliyala woova wahu.

Nave naanisiveliwa waalaleerya atthu yaathaamenle wUganda. Mwa ntakiheryo, naanimusomiha Biibiliya meetiku iitthaniwa Murat Ibatullin ni mwaarawe aihaniwa Dilbar, awo yaari a oTartaristão, oRússia. Murat ni mwaarawe yaahipatisiwa, mpakha olelo-va annimurumeela Yehova. Nave kaahikhalana eparakha ya omusomiha Biibiliya Tatjana Vileyska, yoowo aakhuma wUcrânia ni aaphavela wiixiiva. Nuumala Tatjana opatisiwa, owo aahitthikela wUcrânia nave aanikhaliherya opuro onitaphuleliwa iliivuru.a

MUTEKO WA OMISIONAARIO ELAPO EKINA

Mwaakha wa 1991 niri ene ifeeriya, efiliyaali ya wÁustria yaahinileela wiira naahikhalana yoothanleliwa esya, eyo piiyo, orowa orumeela oBulgária. Nuumala omala enamuna ya olamulelo eniitthaniwa comunismo, muteko ahu waaheemereriwa oBulgária. Ntoko kihimyale aka ittima sivinre, miyo ni Heinz naaniroiha iliivuru sinimutthokiherya Biibiliya elapo ele okathi muteko ahu waakhoottihiwa aya. Masi vano naahiroihiwa elapo ele wiira nalaleeryeke.

Anna yaahinileela wiira niheemele opuro mukina, mpakha ophiya oBulgária. Nto khinaarina okathi wiira neemele wUganda, wiira nakuxe mirupa sahu ni waalaxerya apatthani ahu, masi naaronwe eBeteli ya wAlemanha nikuxa ekaaro nneetta nrowaka oBulgária. Nto naahithanleliwa orowa okhaliherya ekurupu yaarina anamalaleerya 20 elapo ya oSófia.

Nto oBulgária saahiniphwanya-tho mixankiho sikina. Muxankiho woopacerya, okhala wiira khinaasuwela olavula nttaava na elapo ele. Ohiya-vo, saaphwanyaneya iliivuru piili paahi sa nttaava na oBulgária, eyo piiyo, Conhecimento Que Conduz à Vida Eterna, ni Eliivuru Aka ya Miyaha sa Biibiliya. Nto mwaha waivaavo, vaaninixankiha moota woopaceriha soosoma sa Biibiliya. Hata saakhanle mixankiho iya, anna ni arokora e ekurupu ele, yaanikhalela nthiti muteko woolaleerya. Nto ahooleli a ekerexa Ortodoxa khiyaasiveliwa ni muteko ahu, nto yaahipacerya onilupattha.

Mwaakha wa 1994, kuvernu khaaweemererya Anamoona a Yehova ntoko etiini. Nto atthu yuupuwela wiira naari ekurupu ya atthu ootakhala. Anna akina yaahitthukweliwa mukhatteya. Ikaruma sinilaleya ihapari, saahilaleya itthu soowoothiwa sihimyaka wiira Anamoona a Yehova anniwiiva anamwane ni annaatumererya Anamoona akina wiixiiva. Nto yaanikixankiha miyo ni Heinz olaleerya. Nave okathi naalaleerya ahu, awo khiyaanilavuliha saana, yaaniwiitthana mapoliisia ni yaanirumeela khula etthu yoona aya wiira anivonye. Vaanixankiha oruuha iliivuru elapo ele ni ophwanya empa wiira naalukari para nipake mithukumano sahu. Nave waahikhala okathi mapoliisia yaanihiiha aya ompaka konkresu. Miyo ni Heinz khinaalimalenle ohasuliwa siisaale. Atthu a elapo ele yaahivirikana ni atthu a wUganda, yaawo yeemererya omusoma Biibiliya! Etthu xeeni yaanikhalihenrye ovilela muxankiho ole?

Oviriha okathi niri ene ni anna ni arokora waahinikhaliherya vanceene. Awo yaanisiveliwa ekeekhai ni yaanihakalala okhala hoothe ni hiyo. Naari oowiiraana ni naanikhapelelana mukina ni mukhwaawe. Hiyo naahiixutta waaphenta atthu ni ohakalala ni khula eparakha naavahiwa ahu.

Nuuvira iyaakha vakhaani, waahipacerya okhweya olaleerya. Mwaakha wa 1998 naahipacerya osuweliwa ni kuvernu ntoko etiini ni saahikhala iliivuru sinceene nttaava na oBulgária. Mwaakha wa 2004, efiliyaali ahu ya oBulgária yaahitetikariwa, nto olelo-va oBulgária sookhala miloko 57 ni aakhala anamalaleerya anivikana 2. 953. Mwaakha ovinre, atthu 6.475 yaahirweela muthukumano wa Wuupuwelela okhwa wa Yesu. Kinnuupuwela wiira khalai oSófia yaari arokora 5 paahi, masi olelo-va sookhala miloko 9. Miyo ni Heinz nooweha oBulgária yiiraneyaka eprofesia ela eni: “Etthoko anyu yamukhanixa enokhala muttitthi munjene”. — Yes. 60:22.

OWANANA MIXANKIHO SAKA

Mwa iyaakha sinceene, miyo kinniwereyasiwa. Ikwaha sinceene, mameetiku yaamakela oweha wiira kaahikhalana tumor. Ekwaha emosa, awo yaahoona wiira kaahikhalana tumor mmuru. Nto kaahaana ompaka radioterapia. Nuumala-vo, kaahirowa wÍndia weiwo kaavirinhe aka iwoora 12 kooperariwaka wiira okumihiwe tumor. Nuumala wooperariwa, naahirowa okhala ebeteli ya wÍndia mpakha openuwa. Nuumala-vo, naahitthikela oBulgária.

Okathi ene yoowo, Heinz waahimphwanya oretta ohuulaanale oniitthaniwa Huntington. Nto vaanimuxankiha Heinz weetta, olavula ni weeteteiha erutthu awe. Okathi oretta awe waamutepela awe, okathi wootheene kaahaana omukhaliherya. Ikwaha sikina kaanixanka ni kuupuwela wiira nkaarowa owerya omukhapelela. Masi mmiravo mmosa iitthaniwa Bobi aanimukuxa wiira yalaleerye hoothe. Heinz khaawerya olavula oratteene ni weeteteiha erutthu awe. Masi hata vari siiso, Bobi khuuleliwa muru omukuxa Heinz wiira yalaleerye. Khula okathi kaaphavela aka, Bobi aanikikhaliherya omukhapelela Heinz. Nnaamwi miyo ni Heinz naathanlale ohaayara anamwane olumwenku ola, masi Yehova aahinivaha Bobi ntoko mwanihu! — Mar. 10:​29, 30.

Nave Heinz aahikhalana oretta wa kanser. Mooriipiha murima, iyaka ole kamphenta aka vanceene okhwiiye mwaakha wa 2015. Kihinkheliwa vanceene iyaka. Khula okathi owo aanikikhaliherya ni mixankiho saka. Kaamuupuwelaka vanikhala ntoko wiira khokhwiiye! (Luka 20:38) Khula nihiku, miyo kinnuupuwela moolumo awe ooreerela murima ni miruku sawe sooloka aakivaha awe. Kinnixukhurela vanceene iyaakha sootheene sivinre nimurumeelaka Yehova hoothe.

KINNIMUXUKHURELA YEHOVA MWAHA WOOKIKHALIHERYA

Khula okathi saakiphwanya aya mixankiho, Yehova aanikivaha ikuru wiira kiwerye ovilela. Nave owo ookikhaliherya oxintta wuuliwa waka muru ni okhala misionaaria onaaphenta atthu. (2Tim. 1:7) Kikhaliheriwaka ni Yehova, miyo ni muhima aka, ninvara muteko wa Muluku wa okathi wootheene. Olelo-va, owo ni iyawe aniruumeela osirkwiitu wEuropa axukuryaka miloko sinilavuliwa nttaava sérvia. Mavekelo ootheene paapa ahu aapanke awe okathi naari ahu anamwane, ahaakhuliwa!

Omusoma Biibiliya, onnikiphwanyiha omaaleleya. Okathi wa mixankiho, miyo kihiixutta ‘otepa ovekela’ ntoko Yesu iirale awe. (Luka 22:44) Ophenta ni oreera murima wa anna ni arokora a muloko wa oSófia, onooniherya waakhuliwa wa mavekelo aka. Ikwaha sinceene awo annikilattula wiira niviriheke okathi niri ene hoothe, nto eyo enooniherya wiira annikiphenta vanceene. Nto itthu iyo sootheene sinnikihakalaliha vanceene. Tthiri vannikisivela vanceene wuupuwelela yooleiherya ya ohihimuxiwa. Ikwaha sikina kinnuupuwelela kiri ene elapo esya, kiri ene etthoko ya anamuyari aka, nihiku awo yaathelana aya. Muhima aka olokiheryaka eyoolya. Vano miyo ni Heinz neemenle ene ni ekhavalo. Wuupuwelela eyo, ennikikhaliherya osyaka miyuupuwelo soohiloka ni ennikiiriha omuxukhurela Yehova ni murima wootheene.

Okathi kinuupuwelela aka itthu sootheene sikiiranenle ni wuupuwela itthu sootheene Yehova oleihenrye awe sa muhoolo, moonelo aka onoolikana ni moonelo wa Davidi, yoowo aahimmye Esaalimu 27:​13, 14, oriki: “Kaarowa okhala sai, kahaamini wiira kaamoona oreera murima wa Yehova, nlelo kiri ene mukumi? Mmulipeleleke Yehova; mulipe murima ni mwiilipihe. Aayo, mmulipeleleke Yehova”.