Nyuwo munnuupuwela?
Niireke moosoma oratteene irevista sootheene sa Owehaweha sa mwaakha ola? Akhala wiira ti siiso, nwehe akhala wiira munniwerya waakhula makoho anittharelana:
Itthu xeeni sinniiriha onvuwiha Yehova
Mwaha woowi ninnimphenta ni omuttittimiha vanceene Yehova. Nave, ninninvuwiha okhala wiira nimphavela wiira atthu akina amusuwele. — Owehaweha 01/2025, epaaxina 3.
Napakeliwa etthu eniwereyale, ninrowa wooniherya sai okhala mutthu oolevelela?
Nihaana ohimya moonelo ahu. Nave nihaana osyaka opweha mathowa vamurimani ni onanariwa, nto niira siiso, nnoosyaka otepa oriipiwa murima. — Owehaweha 02/2025, ipaaxina 15-16.
Ntakiheryo xeeni nooloka mwiixutti Marko aavahale awe amiravo?
Marko aaneemererya ni murima wootheene miteko aavahiwa awe. Hata okathi aariipiwa awe murima ni onyoonyiheya mwaha wa itthu saakhumelela, Marko khaahiya waakhaliherya atthu akina. Owo aahikhalana waataana wooloka ni murummwa Paulo ni makristau makina yaarina waamini woolipa. — Owehaweha 04/2025, epaaxina 27.
Yesu aaphavela ohimya exeeni vaavo avekenle awe oriki: “Miyo kihaasuweliha nsina nanyu, nave kinootepa waasuweliha”? (Yohani 17:26)
Awiixutti a Yesu yaanisuwela nsina na Muluku. Masi Yesu aahaasuweliha ele nintaphulela aya nsina nno, ohela muhina ele oniphavela awe, miteko sawe ni mikhalelo sawe. — Owehaweha 05/2025, ipaaxina 20-21.
Nakhala atthu oowiiyeviha, etthu xeeni ninrowa ahu osuwelaka?
Ninnisuwela wiira sookhala itthu nihinsuwela ahu. Mwa ntakiheryo, khaninsuwela nihiku olumwenku ola onrowa awe omala ni moota Yehova onrowa awe onikhaliherya. Nave khaninsuwela etthu enrowa oniiraneela meelo ni moota Yehova onnisuwela awe. — Owehaweha 06/2025, ipaaxina 15-18.
Etthu xeeni enrowa onikhaliherya ottottela mureerelo myaha siniroiheliwa atthu ootheene?
Nihaana wiikoha so: ‘Moolumo xeeni arumeeliwe wiira akhaliheriwe atthu osuwela ikeekhai sa mbiibiliyani? Kiireke aakhala malikanyiho ooreerela, kikhanle aka oorumeela wiira kiwiixuttihe atthu akina ikeekhai sa mbiibiliyani? Ti pani aarowa osiveliwa mwaha ola ni okathi xeeni kaarowa aka omuleela?’ — Owehaweha 07/2025, epaaxina 19.
Enamuna Yehova aamuthokorenrye awe Davidi, enniixuttiha exeeni sa olevelela wawe?
Davidi aahipaka itampi suulupale, masi nuumala ottharuwa ni murima wootheene, Yehova aahimulevelela. (1 Mam. 9:4, 5) Nuumala Muluku omulevelela mutthu, owo khonirumeela itampi iyo wiira omuhukhumu muhoolo mwaya. — Owehaweha 08/2025, epaaxina 17.
Akhala wiira naxikola anyu a Biibiliya khoniiwexexa eponto emosa, etthu xeeni mukhanle anyu oopaka?
Hata nuumala omutthokiherya oratteene ele Biibiliya oniixuttiha awe sa mwaha owo, masi nlelo ohiniiwexexa, muroweke iponto sikina, nuuvira okathi mutthikeleke eponto eyo. — Owehaweha 09/2025, epaaxina. 24.
Biibiliya onihimya wiira etampi yookhalana “owerya” wa woototha. (Ahep. 3:13) Moota xeeni?
Etampi pooti oniiriha opaka itthu soohiloka. Eyo pooti oniiriha othipelela waanyiherya akhala wiira Muluku onniniphenta. — Owehaweha 10/2025 epaaxina 16.
Itthu xeeni 3 sinrowa onikhaliherya ovekela ni murima wootheene?
1) Muupuweleleke mikhalelo sa Yehova. 2) Muupuweleke etthu enooxankihani ni mulavuleke yeeyo, ntoko mwaaphavelaka omulevelela mutthu ootthekenleni. 3) Muhivekeleke mwaakuveyaka. Eyo pooti onikhaliherya omuleela Yehova itthu sootheene siri vamurimani vahu. — Owehaweha 10/2025, ipaaxina 19-20.
Ninrowa waakhaliherya sai atthu oowuuluvala?
Hiyo pooti waaxukurya aahiiso waalikarela atthu oowuuluvala. Nave pooti wiivahererya waahoola ospitaale. Aahiiso pooti olaleerya hoothe mwa inamuna soovirikana. — Owehaweha 11/2025, ipaaxina 6-7.
Itthu xeeni sinrowa onikhaliherya opaka ekasamento eninvuwiha Yehova?
Mwiiweleleke malamulo a kuvernu. Mwiimananiheke wiira atthu ootheene yooniheryeke mikhalelo sinikumiheriwa ni ikuru soowaarya sa Muluku. Nwareke ikuwo sookhalela ni mukhootteke soolema sihinivarihana ni Biibiliya. Nvaaneleke oratteene ni mwa nttittimiho okathi munimpaka anyu palano a ekasamento. — Owehaweha 12/2025, ipaaxina 21-24