Atthu oowuuluvala annikhaliherya muloko mwa inamuna sinceene
Connie, yoowo orina iyaakha 83, onihimya so: “Kuupuwelaka itthu kivanre aka khalai, kinnihakalala osuwela wiira koovara itthu sinceene okathi kaari aka mmiravo. Masi vano kihuuluvala ni nkiniwerya ovara itthu sinceene.”
Woonasa wene, mwaha wa wuuluvala khamuniwerya opaka itthu sinceene. Nnaamwi mwa iyaakha sinceene mmurumenle ene Yehova moororomeleya, pooti okhalana moonelo woohiloka mwaha wa ohiweryaka ovara itthu sinceene. Mwa ntakiheryo, nyuwo pooti opaceryaka olikanyiha itthu mwaawerya anyu ovara khalai ni itthu muniwerya anyu ovara niinaano-va. Akhala wiira munuupuwela siiso, exeeni enrowa wookhaliheryani ohihiya ohakalala?
YEHOVA ONIPHAVELA WIIRA MPAKEKE EXEENI?
Mwiikoheke so: ‘Exeeni Yehova oniphavela awe wiira kipakeke?’ Moolumo ari Otumererya 6:5 animoolipihani. Yaawo anihimya so: “Mumphenteke Yehova Muluku anyu ni murima anyu wootheene ni okumi anyu wootheene ni ikuru sanyu sootheene.”
Moovarihana ni eversiikulu ela, Yehova oniphavela wiira mmurumeeleke ni murima anyu wootheene ni okumi anyu wootheene ni ikuru sanyu sootheene. Wuupuwela eyo, enimookhaliheryani ohiilikanyiha ni atthu akina. Nave, enimookhaliheryani ohilikanyiha itthu muniwerya anyu ovara vano ni itthu mwaavara anyu khalai.
Nkahaya muupuwele ela: Okathi mwaari anyu mmiravo, itthu xeeni mwaawerya anyu ovara mmutthenkesoni mwa Yehova? Arumeyi anceene a Yehova, annaakhula wiira aavara muteko wa Yehova mpakha yaawerya aya. Nave nyuwo pooti ohimya wiira moovara miteko sa Yehova moovarihana ni makhalelo anyu. Etthu xeeni vano muniwerya anyu ovara para Yehova? Woonasa wene, munnivara ele muniwerya anyu moovarihana ni makhalelo anyu a olelo-va. Muupuwela siiso, munimoona wiira munnivara miteko sa Yehova ntoko mwaavara anyu khalai. Khalai, mwaaniimananiha, nave olelo-va munniimananiha ovara ele muniwerya anyu.
Mwaaniimananiha vanceene ovara muteko wa Yehova okathi mwaari anyu mmiravo ni vano muuluvanle anyu nlelo munniimananiha ovara ele muniwerya anyu.
ITTHU MWIIXUNTTE ANYU SINIMWAAKHALIHERYA AKINA
Ohiya wuupuwelaka itthu muhiniwerya anyu ovara, vano muuluvanle anyu muupuweleke moota mukhanle anyu oowaakhaliherya atthu akina. Ohimya ekeekhai, vano munoowerya opaka itthu muhaawerya anyu okathi mwaari anyu mmiravo. Mwa ntakiheryo, nwehe itthu sinittharelana mukhanle anyu oovara:
Mwaaleeleke atthu akina itthu mwiixuntte anyu. Nkuupuwelani itthu Biibiliya onihimya awe iversiikulu sinittharelana:
Mwene Davidi: “Miyo kaari mmiravo, nto vano kihuuluvala; masi nkinamoone naxariya onyanyaliwe ene; nnakhala nkinawoone anaawe avekaka eyoolya.” — Esal. 37:25.
Yooxuuwa: “Vano, miyo kihanle okhwa. Nto nyuwo moosuwela oratteene ni murima anyu wootheene ni okumi anyu wootheene, wiira itthu sootheene sooreera Yehova, Muluku anyu, ooleihenryaaweni, sihiiraneya. Tthiri itthu sootheene sihiiraneya. Khiivo nnakhala etthu emosa ehiiraneyale.” — Yox. 23:14.
Davidi ni Yooxuuwa yaahiviriha iyaakha sinceene amurumeelaka Yehova ni yaahiweha itthu sinceene mookumini mwaya. Nto etthu Davidi ni Yooxuuwa ahimyale aya, ti yookhalela mwaha woowi, yaalavunle etthu yaawiiranenle. Pooti wiira etthu emosa-ru, ehiiraneya mookumini mwanyu. Tivonto, vakhala wiira itthu munihimya anyu sinnivarihana ni itthu siwiiranenleni, moolumo anyu tookhalela.
Akhala wiira mpacenrye khalai omurumeela Yehova, nyuwo pooti olavula itthu Yehova owiirenlyaaweni aahiiso moonale anyu owiirelaka atthu akina. Niireke munnuupuwela okathi moonale anyu moota Yehova aakhalihenrye awe arumeyi awe mwa enamuna yahaalipelela aya? Akhala wiira munnuupuwela, mwaaleeleke atthu akina itthu iyo! Mwiira siiso, munimwaakhaliherya vanceene. Munoowerya waalipiha anna ni arokora, vaavo munaaleela anyu itthu siwiiranenleni okathi mwaavara anyu miteko sa Yehova. — Arom. 1:11, 12.
Enamuna ekina mukhanle anyu oowaalipiha atthu akina, ori orowela mithukumano Empa ya Omwene. Mwiira siiso, munimwaalipiha anna ni arokora ni nyuwo munoolipihiwa. Connie, yoowo nimulavunle ahu wanipacerya wa mwaha ola, onihimya so: “Orowela mithukumano Empa ya Omwene, onnikikhaliherya ohikhulumuwa. Kinnihakalala okathi anna ni arokora anooniherya aya wiira annikiphenta Empa ya Omwene. Nto, kinnaaxukhurela kaavahaka itthu saamukhaani. Nave kinnimananiha ovara miteko sa Muluku hoothe ni anna ni arokora.”
YEHOVA ONNIVAHA EFAITA ITTHU MUNIPAKA ANYU
Mbiibiliyani, aakhala matakiheryo a atthu anceene yahaawerya ovara itthu sinceene mwaha wa makhalelo aya. Hata vari siiso, Yehova aanaaphenta. Nkahaya mmuupuwele mulopwana oowuuluvala aihaniwa Simeyoni, yoowo ari wIsarayeli ni aakhanle okathi Yesu aayariwe awe. Okathi Simeyoni aarowa awe otemplo, owo aanaaweha amiravo avaraka miteko sa efaita yinceene mutemplo. Masi Simeyoni oonela sai? Woonasa wene, uupuwela wiira khaarina efaita para Yehova, mwaha woowi khaawerya ovara miteko sinceene ntoko amiravo ale. Masi Yehova aamoonela sai? Owo aanimuthokorerya Simeyoni okhala murumeyi awe oororomeleya ni aahinvaha eparakha ya onweha Yesu okathi aari awe mwaana. Ohiya-vo, Yehova aahimuruma Simeyoni ohimya wiira Yesu aarowa okhala Mesiya aaleiheriwe! (Luka 2:25-35) Tthiri Yehova khaawehexexa wuuluvala wa Simeyoni. Masi aaweha waamini woolipa aarina awe. Nave “ikuru soowaarya saari nuuwo.”
Yehova aahinvaha eparakha Simeyoni ya onweha Yesu okathi aari awe mwaana ni aahimuruma ohimya wiira Yesu aarowa okhala Mesiya aaleiheri
Mukupaliki wiira Yehova onnivaha efaita muteko munivara anyu moororomeleya, hata muhiweryaka ovara itthu sinceene. Nto Yehova “vannimusivela vanceene naavahaka ni murima wootheene, maana onilipelela wiira mutthu ovaheke ele eniwerya awe, ohiya ele ehiniwerya awe.” — 2 Akor. 8:12.
Nto mwiimananiheke opaka itthu muniwerya anyu. Mwa ntakiheryo, muupuweleke inamuna soovirikana sa muteko woolaleerya mukhanle anyu oovara, hata okhalaka okathi vakhaani paahi. Nave nyuwo pooti waalipiha anna ni arokora mwaalikarelaka aahiiso waalepela ekarta. Miteko saamukhaani sinooniherya ophenta, pooti waalipiha anna ni arokora, otepexa wene akhala wira sinipakiwa ni mutthu opacenrye khalai omurumeela Yehova ntoko nyuwo.
Hata atthu oowuuluvala ahirina ikuru sinceene, awo anoowerya ovara itthu sinceene para Yehova. Nwehe yoowiiraneya ya murokora mmosa a elapo emosa ya wÁfrica, ekaaxa eni: “Biibiliya aahoopola okumi awe.”
Muhiliyale wiira ntakiheryo nanyu na omurumeela Yehova iyaakha sinceene ni ohihiya wanyu omurumeela moororomeleya, pooti waalipiha atthu akina. Nyuwo moovaha ntakiheryo nuulupale na ovilela. Nto mukupaliki wiira “Muluku naxariya, owo khonrowa oliyala muteko anyu ni ophenta wanyu nsina nawe, mwaarumeelaka ni muhihiyaka waarumeela ale oororomeleya.” — Ahep. 6:10.
MUHIHIYE WAAKHALIHERYA ATTHU AKINA
Asomi akina, anihimya wiira alopwana ni athiyana oowuuluvala, yaawo aniimananiha waakhaliherya atthu akina, annikhalana okumi wooloka, annuupuwela oratteene ni annikhala okathi munceene.
Ekeekhai wiira waapakela itthu sooloka atthu akina, khonimaliha mixankiho sinikhumelela mwaha wa wuuluvala. Omwene wa Muluku paahi, tonrowa omaliha wuuluvala ni okhwa. — Arom. 5:12.
Vano mwiimananiheke opaka ele Yehova onoovekelaaweni, eyo enihela muhina waakhaliherya atthu akina omusuwela yena. Mwiira siiso, munoolipiha waamini wanyu ni enimookhaliheryani okhalana okumi wooloka. Anna ni arokora oowuuluvala, musuweleke wiira Yehova onnivaha efaita muteko munivara anyu. Nave anna ni arokora annivaha efaita ntakiheryo nanyu nooloka na waamini.