Moota woowiiwexexa soowiiraneya sa mbiibiliyani

Mbiibiliyani sookhala soowiiraneya sinceene, seiyo sinniixuttiha itthu sa efaita yuulupale. Etthu enrowa onikhaliherya wiiwexexa ni ottottela mureerelo soowiiraneya iyo, ori wuupuwelela ni omananiha oweha itthu siiraneya. Nrowe niwehe malakiheryo anrowa onikhaliherya wiiwexexa soowiiraneya ninsoma ahu mbiibiliyani.

• Musomeke moowiiwanyeya. Omusoma Biibiliya mowiiwanyeya, onimookhaliheryani oweha itthu siiraneya. Okathi munimusoma anyu Biibiliya ni emusi, mukawaneke iversiikulu soosoma, moovarihana ni atthu anilavula. Opaka eyo enimookhaliheryani wiiwexexa oratteene yoowiiraneya eyo.

• Mmananiheke wuupuwela itthu siiraneya. Mmananiheke osuwela miyuupuwelo ni etthu yaawiiriha opaka etthu eyo enilavuliwa yoowiiraneya eyo. Mwa ntakiheryo, mwiikoheke so: ‘Etthu exeeni emwiirihale olavula aahiiso opaka etthu eyo? Kaari mwa miyo kaarowa wuupuwela sai ni kaarowa opaka exeeni?’

• Mpakeke eteseenyu. Opaka eteseenyu hata ehikhanle yooreera, enimookhaliheryani wuupuwelela yoowiiraneya eyo ya mbiibiliyani ni ohiliyala etthu musomme anyu.