Mulavuleke ekeekhai

1. Etthu xeeni nikhanle ahu oopaka wiira niirele mpantta mutthenkeso wa Yehova?

OKATHI nimphavela ahu omusuwela munna aahiiso murokora, ninnipaka nikoho ntoko nla: “Mwiixuntte sai ekeekhai?” Atthu akina anaakhula wiira “kiyariwe ni Anamoona a Yehova.” Nave akina anaakhula wiira “kiixuntte niinaano ekeekhai.” Xeeni ninrumeela ahu nuulumo noowi ekeekhai? Ninnirumeela okhala wiira ekeekhai ya mbiibiliyani enneettiha okumi ahu. Ninnisuwela wiira naaphavelaka wiirela mpantta mutthenkeso wa Yehova, nihaana ophenta ekeekhai ni okhala moovarihana ni ekeekhai eyo. Nto eyo, enihela muhina okhala oororomeleya ni itthu ninlavula ahu ni nimpaka ahu. — Esal. 15:​1-3.

2. a) Yesu aasuweliwa wiira aalavula exeeni? b) Atthu akina yoonela sai ikeekhai iixuttiha awe?

² Khula okathi Yesu aanilavula ekeekhai. Hata awanani awe ikwaha sikina yahaasiveliwa ni moolumo awe, masi awo yaanisuwela wiira itthu Yesu aalavula awe saari sa ekeekhai. (Math. 22:16) Olavulaka sa moota atthu akina yoonela aya ikeekhai iixuttiha awe, Yesu aahimmye so: “Kiruuhale ohiiwanana mulopwana ni paapa awe, mwaana mwaamuthiyana ni maama awe, muthiyana ootheliwa ni amaathi awe.” (Math. 10:35) Yesu aanisuwela wiira atthu akina khiyaarowa ophavelaka owiriyana ihapari yena ni awiixutti awe yaalaleya aya. (Math. 23:37) Nave aanisuwela wiira ihapari aalaleya awe, saamukumiherya ikurupu piili. Ikurupu sene tiiya: Ale anisiveliwa ikeekhai sa mbiibiliyani ni ale ahinisiveliwa. — 2 Ates. 2:​9-11.

3. Mwaha ola, ninrowa wiixutta exeeni?

³ Nimutakihaka Yesu, okathi wootheene hiyo ninniimananiha olavula ekeekhai, hata atthu akina ahisiveliwaka. Nave ninnilaleya ikeekhai sa mbiibiliyani, hata atthu akina ahisiveliwaka ihapari ninlaleya ahu. Masi nihaana okhalana ephoole okathi ninlavula ahu ekeekhai ohela muhina okathi ninlaleya ahu ihapari sooreera. Mwaha ola, wanipacerya ninrowa waakhula nikoho nla: Ninrowa ophwanya woowi ekeekhai? Nuumala-vo ninrowa wiixutta, xeeni ninreerela ahu olavula ekeekhai? Moota woolavula ekeekhai ni okathi woolavula ekeekhai. Waakhuliwa wa makoho ala, onoonikhaliherya osuwela moota nikhanle ahu oolavula ekeekhai mwa enamuna enrowa waaphwanyiha mureerelo atthu akina. Nave anoonikhaliherya osuwela okathi wooreerela olavula ekeekhai.

NINROWA OPHWANYA WOOWI EKEEKHAI?

4. Xeeni nnihimya ahu wiira Yehova Maphattuwelo a ekeekhai?

⁴ Yehova tori Maphattuwelo a ekeekhai. Itthu sootheene onihimya awe, ti sa ekeekhai. Mwa ntakiheryo, owo onnihimya ekeekhai okathi onilavula awe etthu eri yooloka ni yoohiloka. (Esal. 19:9; 119:​142, 151) Itthu sootheene aahimyale awe, sinniiraneya. (Yes. 55:​10, 11) Yehova onnipaka itthu sootheene onileiherya awe. (Mmr. 23:19) Nave Biibiliya onihimya wiira Muluku khonootha! (Ahep. 6:18) Tivonto Yehova onisuweliwa awe okhala “Muluku a ekeekhai”. — Esal. 31:5.

5. Xeeni nnihimya ahu wiira vanniweryaneya omusuwela “Muluku a ekeekhai”? Mutthokiherye. (Miteko 17:27)

⁵ Atthu akina anuupuwela wiira khivanikhweya omusuwela Yehova, “Muluku a ekeekhai”. Masi hiyo ninnikupali wiira vanniweryaneya omusuwela. Itthu sinceene ninweha ahu, sinnooniherya wiira Muluku ookhala. (Arom. 1:20) Okathi murummwa Paulo aalavula awe ni atthu a wAthena yaawo yaasuwela itthu sinceene, owo aahimmye wiira Muluku oniphavela wiira atthu “amphwanye” okhala wiira “ori vakhiviru wa khula mmosa a hiyo.” (Musome Miteko 17:27.) Yehova onnaakhaliherya atthu oowiiyeviha, yaawo aniphavela omusuwela. — Yoh. 6:44.

6. a) Ikeekhai xeeni siri mbiibiliyani? b) Niireke munnixukhurela mwaha wa wiixutta ikeekhai iyo?

⁶ Enamuna emosa nikhanle ahu oomusuwela Yehova ori omusoma Biibiliya. Atthu yaamulepa Biibiliya, yaalepa itthu yaarummwale aya ni Muluku. (2 Ped. 1:​20, 21) Nto nikupaliki wiira itthu sootheene siri mbiibiliyani, ti sa ekeekhai. Mwa ntakiheryo, nihaana okupali itthu Biibiliya onihimya awe sa opattuxiwa wa erimu ni elapo ni itthu sikumi siri valaponi. (Maph. 1:​1, 26) Nave-tho, nikupaliki ele Biibiliya onihimya awe sa moota epacenrye aya etampi, ohaawa ni okhwa. (Arom. 5:12; 6:23) Nikupaliki ni murima wootheene, vaavo Yehova onihimya awe wiira omurumaka Mwanawe, onoomaliha mixankiho sootheene sikumiheriwe ni Satana, maana Satana “topacenrye wootha.” (Yoh. 8:44; Arom. 16:20) Nave niroromeleke wiira Yesu onimwaapwetexa atakhali, waahihimuxa atthu akhwiiye, ottikiherya elapo okhala eparayiisu ni onikhaliherya okhala atthu oohittheka. (Yoh. 11:​25, 26; 1 Yoh. 3:8) Tthiri Yehova oonivaha eparakha yuulupale! Eparakha ene tiila: Owo ooniixuttiha ekeekhai ni oonivaha eparakha ya owiixuttiha atthu akina. — Math. 28:​19, 20.

XEENI NINLAVULA AHU EKEEKHAI?

7-8. Niireke etthu enniiriha olavula ekeekhai yookhalana efaita? Nvahe ntakiheryo. (Marko 3:​11, 12) (Nwehe ifootu.)

⁷ Ntoko nithokorenrye ahu wanipacerya, naaphavelaka wiirela mpantta mutthenkeso wa Yehova, nihaana olavulaka ekeekhai. Masi naaphavelaka omusiveliha, nihaana opaka itthu sikina ohiya paahi olavula ekeekhai. Mwaha wa xeeni? Mwaha woowi, Yehova onniweha etthu enniiriha olavula ekeekhai. Nwehe etthu yiiraneyale okathi Yesu aalaleerya awe valaponi. (Mmusome Marko 3:​11, 12.) Okathi aalaleerya awe waattamela ephareya ya oGalileya, muttitthi wa atthu waahithukumana wiira onwiriyane. Eriyari ya atthu awo, yaahikhala atthu yaavariwe ni malaikha ootakhala. Malaikha awo yaahiwiiriha okhoroma ohoolo wa Yesu anakhuwela ariki: “Nyuwo mwa Mwaana a Muluku.” Niireke malaikha ale yaalavula ekeekhai? Aayo. Nto etthu xeeni yaawiiriha olavula ekeekhai? Woonasa wene, awo yaaphavela ororomeliwaka ni atthu ni owiiriha ohimukokhorela Yehova. Vannooneya wiira nnaamwi yaalavula ekeekhai, masi etthu yaawiiriha opaka eyo, yaari yoohiloka. Maana yaaphavela mureerelo aya. Nto Yesu aanisuwela eyo. Tivonto, khaasiveliwe ni etthu eyo yaapaka aya ni aahaaleela wiira ahitthikele omulaleya.

⁸ Yoowiiraneya ela enniixuttiha exeeni? Enniixuttiha wiira Yehova onnivaha efaita etthu enniiriha olavula ekeekhai. Nto nihaana oweha akhala wiira etthu enniiriha owiixuttiha ekeekhai atthu akina ti yooloka. Nave okathi atthu akina annittottopela aya, mwaha wa muhupi ninlaleya ahu, ovuwa wootheene nihaana onvaha Yehova. — Math. 5:16; mulikanyihe ni Miteko 14:​12-15.

9. Exeeni ninreerela ahu osyaka ni mwaha wa xeeni?

⁹ Nrowe niwehe etthu ekina enrowa onikhaliherya osyaka wiivuwiha. Nkahaya nuupuwele wiira mutokweene mmosa orina iparakha sinceene mmutthenkesoni oonileela esiiri. Nuumala-vo, nnaaleela atthu akina. Nto atthu awo yoona wiira itthu naalenle ahu ti sa ekeekhai, animoonaka wiira ninnisuwela isiiri sinceene sa mutthenkeso. Nave awo animoonaka wiira nookhalana efaita yinceene. Nto eyo khiyaarowa omusivela Yehova. (Mir. 11:13) Mwaha wa xeeni? Mwaha woowi, hata itthu ninlavula ahu siri ene sa ekeekhai, nimpaka eyo mwa enamuna yoohiloka. Nave khanrina etireitu ya olaleya isiiri.

MOOTA WOOLAVULA EKEEKHAI

10. Moolumo a Paulo ari Akolosi 4:​6, anitaphulela exeeni?

¹⁰ Mmusome Akolosi 4:6. Murummwa Paulo aahaatumererya makristau a oKolosi, wiira moolumo aya “ekhaleke ooreera”. Moolumo ala anitaphulela exeeni? Nttaava na ekereku, moolumo arumeeliwe eversiikulu ela, anitaphulela olavula itthu ohiya paahi sinrowa waaphwanyiha mureerelo ale anniwiriyana, masi-tho waareerela murima ni olavula itthu sinaasivela.

11-12. Xeeni ninreerela ahu okhalana ephoole okathi ninwiixuttiha ahu atthu Biibiliya? Mutthokiherye. (Nwehe ifootu.)

¹¹ Okathi ninwiixuttiha ahu atthu akina, nihaana weettela miruku sa Paulo. Ikeekhai sa mbiibiliyani, sinnilikanyihiwa ni espaata yoowiitha. Okhala wiira ikeekhai iyo, sinniwerya wooniherya miyuupuwelo ni itthu siniphavela murima. (Ahep. 4:12) Masi naahimurumeele saana Biibiliya, pooti waakhulumula aahiiso onyakulihana ni atthu akina. Moota xeeni?

¹² Muupuwele wiira okathi woolaleerya munnimphwanya mutthu onisiveliwa ekeekhai, masi onikokhorela ilatarato, onimulya Natali ni Paasikha. Hiyo pooti omurumeela Biibiliya wiira nimooniherye mutthu owo wiira ti voohiloka okokhorela ilatarato, omulya Natali ni Paasikha. Mwaha woowi itthu iya khasinivarihana ni Biibiliya. (Yes. 44:​14-20; 2 Akor. 6:​14-17) Akhala wiira nnoopaka eyo ekwaha yoopacerya ninvaanela ahu ni mutthu owo, nnoomwiixuttiha ekeekhai masi khaninrowa omurumeela Biibiliya mwa enamuna enrowa omukhaliherya mutthu owo.

13. Olavula moolumo ooweleeliwa ni maakha, onitaphulela exeeni?

¹³ Murummwa Paulo aahimyale wiira moolumo ahu aahaana okhala ooweeleeliwa ni maakha. Masi eyo khentaphulela wiira nihaana ovevereiha aahiiso wiipithiha ikeekhai. Nto murummwa Paulo aaphavela ohimya exeeni? Aaphavela ohimya wiira moolumo ahu aahaana okhala “ooweeleeliwa ni maakha”, niire so, enamuna ninlaleya ahu ihapari sooreera, saasiveleke atthu anniwiriyana. (Yoobi 12:11) Okathi mukina pooti oxankiha opaka eyo. Nkahaya muupuwele wiira muniphavela owaapeela atthu akina. Khamukhanle oohimya wiira itempeero munrowa anyu orumeela sinimwaasivela atthu awo, mwaha woowi sinnoosivelani. Mwa enamuna emosa-ru, khanikhanle oohimya wiira moota ninlavula ahu onimwaasivela atthu ootheene. Khivaarowa okhala vooloka wuupuwela siiso. Mwa ntakiheryo, ikultuura sikina, atthu khanoovelela olavula mooluluwanya hata okathi anivaanela aya ni atthu aalupale. Masi mapuro makina, olavula mooluluwanya onooniwa okhala mutthu oohittittimiha ni ooveeha. Tivonto murummwa Paulo aahimyale awe wiira nihaana osuwela “moota woomwaakhula khula mutthu.” Eyo enitaphulela wiira nihilavuleke mwa enamuna ennisivela paahi, masi nilavuleke mwa enamuna enaasivela atthu akina.

OKATHI WOOLAVULA EKEEKHAI?

14. Niireke Yesu aahiwiixuttiha ekwaha emosa-ru itthu sootheene aasuwela awe? Mutthokiherye.

¹⁴ Okathi wootheene Yesu aalavula awe ni awiixutti awe, aalavula mooreera murima. Nto eyo yaanimukhaliherya owiixuttiha itthu sinceene. (Mar. 6:34) Masi saahikhala itthu sikina yaapirisari aya wiixutta. Yesu kheererya owiixuttiha ekwaha emosa-ru itthu sootheene aasuwela awe. Owo aanisuwela mikhalelo saya ni itthu yaahaawerya aya. Nave aanisuwela okathi wooreera owiixuttiha ikeekhai sa mbiibiliyani. Yesu aahimyale wiira saahikhala ikeekhai sikina yaahaarowa aya owerya wiiwexexa okathi ene yoole. (Yoh. 16:12) Yesu onniixuttiha exeeni?

15. Niireke nihaana owiixuttiha anaskola ahu ekwaha emosa paahi itthu sootheene ninsuwela ahu? Mutthokiherye. (Miruku 25:11) (Nwehe efootu.)

¹⁵ Ntakiheryo na Yesu nnooniherya wiira atthu nnaalaleerya ahu, nihiwiixuttiheke ekwaha emosa paahi itthu sootheene ninsuwela ahu. Nto ninrowa otthara sai ntakiheryo na Yesu? Ntoko Yesu, nihaana osuwela makhalelo a atthu nnaalaleerya ahu. Nkahaya mmuupuwele mutthu yoole onisiveliwa omulya Natali ni Paasikha. Hiyo noosuwela wiira ifesta iyo khasinivarihana ni Biibiliya ni khasinimusivela Muluku. Nkahaya muupuwele mpacenrye ene omusomiha mutthu owo, ehalaka esumana emosa wala piili wiira niphiye nihiku na Natali. Niireke vaamuloka omutthokiherya ele Biibiliya onihimya awe ni omuleela wiira ohimulye Natali? Ekeekhai wiira atthu akina nnaasomiha ahu Biibiliya annaakuva weettela ele aniixutta aya. Masi akina onnivira okathi wiira yeettele ele aniixutta aya. Nnoowerya waakhaliherya anaskola ahu a Biibiliya opaka marukunuxo anireerela, vakhala wiira nnoowiixuttihaka okathi wooreerela itthu anipirisari aya osuwela. — Musome Miruku 25:11.

16. Ninrowa waakhaliherya sai anaskola ahu, weettela ekeekhai?

¹⁶ Itthu sikina sinniphwanyiha ohakalala ti owiixuttiha atthu akina ikeekhai voohimya sa Yehova. Nto etthu xeeni nikhanle ahu oopaka wiira naakhaliherye weettela ekeekhai? Nihaana waavaha ntakiheryo nooloka. (3 Yoh. 3, 4) Mweettelo ahu, ohaana wooniherya wiira ninnikupali itthu Muluku oleihenrye awe siri mbiibiliyani. Nave nihaana olavula ekeekhai mwa enamuna yooloka, nilavulaka mooreerela murima wiira niwiixuttihe atthu akina ekeekhai okathi wooreerela. Nave-tho, okathi ninttottopeliwa ahu, ovuwa wootheene nihaana onvaha Yehova. Vakhala wiira nnoopaka eyo, nnimooniherya wiira nimmukokhorela Yehova, yoowo ori Muluku a ekeekhai.