Obadiya aanimuttittimiha Yehova

Obadiya aari murumeyi a empa ya mwene ootakhala aihaniwa Akhabi, yoowo eemerenrye okokhoreliwa Bayali wIsarayeli wootheene. Okhuma omiravo awe, Obadiya “aanimoova vanceene Yehova”. (1 Mam. 18:​1-13) Okathi pwiyamwene Yezabeli aarumme awe wiiviwa maprofeta ootheene a Yehova, Obadiya anisuwela wiira moolipa murima aahaana waakhaliherya maprofeta ale. Yaari etthu yoowoopiha omwiipithiha profeta mmosa. Masi Obadiya aahiwiipithiha maprofeta 100 ni aanaavaha yoolya okathi wa etala yuulupale! Vaahimuxankiha Obadiya opaka eyo, ohiwehiwaka ni maprofeta manceene, yaawo yaamurumeela mwene ni pwiyamwene. — 1 Mam. 18:19.

Obadiya onniixuttiha exeeni? Nnaamwi Obadiya aamoova Akhabi, masi omuttittimiha wawe Muluku waari wuulupale. Nto eyo yaahimwiiriha oleva okumi awe wiira aakhaliherye maprofeta a Yehova. Nave hiyo nihaana omuttittimiha vanceene Yehova, otepexa wene vakhala wiira elapo ninkhala ahu muteko ahu onnikhoottihiwa ni kuvernu. Eyo enoonikhaliherya waalipiha ni waakhaliherya anna ni arokora okathi sinaaphwanya aya mixankiho.