Makoho anikohiwa ni ale anisoma irevista sahu

Okathi xeeni onrowa aya olaleiwa murettele ni ovareleleya?

Ntoko nithokorenrye ahu erevista Owehawehaa mpantta wa “Makoho anikohiwa ni ale anisoma irevista sahu”, moohipisa Yehova onrowa ohela “etthu onuupuwela awe” vamurimani va “manyaka 10”, eyo piiyo, ikuvernu sootheene. Eyo enitaphulela wiira manyaka 10, anrowa ovaha okhulupale ni owerya “enama yoowali yooxeerya”, eyo piiyo, Nações Unidas. Enama eyo yoowali enniitthaniwa-tho okhala “elatarato ya enama yoowali”. (Wis. 13:​14, 15; 17:​3, 16, 17) Nto “manyaka 10” ni enama yoowali, yoovahiwa owerya wa opwetexa itiini soowootha olumwenku wootheene. Okathi xeeni onrowa aya olaleiwa murettele ni ovareleleya?b Niireke onrowa olaleiwa vahinatthi aahiiso nuumala opwetexiwa itiini soowootha? — 1 Ates. 5:3.

Waakhuliwa waya ti nno: Hiyo khanisuwenle okathi onrowa aya olaleiwa murettele ni ovareleleya. Vaakhanle wiira noosuwela itthu sootheene, khinaapirisariki okhala atthu oowehaweha. Tivonto Yesu aaleelale awe ikwaha sinceene awiixutti awe wiira “muthipeleleke owehaweha”. (Math. 24:42; 25:13; 26:41) Vano nrowe nithokorerye eprofesia Yehova aamuleelale awe murummwa Paulo.

Paulo aalempe so: “Okathi atthu anrowa aya ohimyaka wiira: ‘Nookhalana murettele ni noovareleleya!’, nto anoopwetexiwa niinaano-ru ni vootutuxerya”. (1 Ates. 5:​2, 3) Ikwaha sinceene iliivuru sahu saatthokiherya moolumo ala a Paulo mwa enamuna ela: Olaleiwa wa murettele ni ovareleleya, waarowa okhala ahalaka vakhaani opacerya maxakha maalupale. Maxakha awo, anrowa opacerya ni opwetexiwa wa Babiloonia Muulupale, eyo piiyo, itiini sootheene soowootha. Naahimya wiira olaleiwa wa murettele ni ovareleleya, yaarowa okhala esiinale ya opacerya maxakha maalupale.

Masi nuumala ovarerya mwaha ola, nooweha wiira yookhala enamuna ekina ya moota nniiwexexa ahu. Woonasa wene, murettele ni ovareleleya onrowa olaleiwa nuumala opwetexiwa itiini soowootha. Xeeni nnuupuwela ahu siiso? Nrowe nithokorerye makoho anittharelana anniiriha wuupuwela siiso.

Moota xeeni itiini soowootha sinikhaliherya aya ikhotto? Biibiliya onitthokiherya so: “Mwa nyuwo, [‘muthiyana namararuwa’, Babiloonia Muulupale] yoophwanyiwa ephome ya maprofeta ni ale oororomeleya ni ootheene ale yiiviwe mulaponi”. (Wis 17:​1, 5; 18:24) Soowiiraneya sa mulaponi, sinnooniherya wiira itiini soowootha sinnikhaliherya ikhotto. Nave ikwaha sinceene, sinniwiiriha atthu wiivanana. Nto okhala wiira itiini iyo sinnikhaliherya ikhotto, khasiniwerya okumiherya murettele ni ovareleleya. Eyo enniiriha okhumelela nikoho nla: Niireke murettele ni ovareleleya onrowa olaleiwa paahi nuumala Babiloonia Muulupale opwetexiwa? Pooti okhala yeeyo, masi khaninsuwela saana.

Etthu xeeni enrowa wiiraneya nuumala olaleiwa murettele ni ovareleleya? Paulo ohimyale so: “Anoopwetexiwa niinaano-ru ni vootutuxerya”. (1 Ates. 5:3) Enoota ya Biibiliya a estuutu eri eversiikulu ela, enihimya so: “Eversiikulu ela, Paulo onnooniherya wiira nuumala olaleiwa murettele ni ovareleleya, onrowa okhala okathi vakhaani aahiiso pooti ohikhala okathi, wiira apwetexiwe ale anrowa olaleya murettele owo. Opwetexiwa waya onrowa okhala wootutuxerya ni khanrowa woopowa.” Nto okathi ahooleli a ipoliitika anrowa aya olaleya murettele ni ovareleleya, woonasa wene nuumala itiini soowootha opwetexiwa, ahooleli awo anrowa opwetexiwa niinaano-ru.

Arumeyi a Yehova anrowa woonela sai okathi sinrowa aya opacerya wiiraneya itthu iyo? Murummwa Paulo aalempe so: “Masi nyuwo axinnaka, khamukhanle mweepiphini ntoko alatarau, wiira nihiku nlo noophwanyeeni vootutuxerya.” (1 Ates. 5:4) Vakhala wiira murettele ni ovareleleya onrowa olaleiwa nuumala opwetexiwa itiini soowootha, arumeyi a Yehova anoosuwela wiira anapoliitika ahanle opwetexiwa. Nave, okhala wiira ahooleli a ikuvernu anrowa olaleya murettele ni ovareleleya, awo anrowa wuupuwelaka wiira aavareleleya. Masi opwetexiwa waya onrowa okhala mootutuxerya.

Etthu ninsuwela ahu tiila: Moohipisa “manyaka 10” ni enama yoowali, anrowa ovahiwa owerya wa opwetexa itiini soowootha. Eyo enimwiiriha opacerya maxakha maalupale. Nave ninnisuwela wiira onookhala okathi anrowa aya olaleya wiira nookhalana “murettele ni noovareleleya”. Eyo enrowa wiiraneya okathi xeeni? Noolavula itthu piili woonasa wene sikhanle oowiiraneya. Yoopacerya: Pooti wiira olaleiwa murettele onrowa wiiraneya vahinatthi opwetexiwa itiini soowootha. Ya nenli: Pooti wiira olaleiwa murettele onrowa wiiraneya nuumala opwetexiwa itiini soowootha. Ikwaha sinceene ninniwerya wiiwexexa iprofesia sa mbiibiliyani, okathi siniiraneya aya aahiiso nuumala wiiraneya. Nto nihaana olipelela wiira noone moota itthu sinrowa aya wiiraneya. — Mulikanyihe ni Yohani 12:16.

Etthu yootepa okhalana efaita khahiyo okathi onrowa aya olaleiwa murettele ni ovareleleya, masi ohihiya ororomeleya wahu. Nto wiira niilokiherye, nihaana owehawehaka ni wuupuwela saana, hata nihisuwelaka moota iprofesia iyo sinrowa aya wiiraneya muhoolo. — 1 Ates. 5:6.