Mukhaleke oolipa murima ni oororomeleya ntoko Benaya

Benaya, aari nakhotto oolipa murima, aamurumeela mwene Davidi ni muhoolo mwaya aamurumeela mwene Salomooni. Benaya aari mwaana a namukuttho muulupale. Okhala wene, anamukuttho ni alevi, khiyaarowa okhottoni ni khiyaarumeela ikapwitthi. Masi Benaya aanirowa ni aari oolipa murima. Mwa ntakiheryo, owo aahimwiiva kharamu munlittini nave aahiwana ni nakhotto ootupa ni aikuru. Davidi, aanimuroromela vanceene Benaya ni aahimuthanla wiira okhale ntoko kwarta aamukhapelela. — 2 Sam. 23:​20-23.

Hata nuumala Absalomi ni Adoniya ommwareela Davidi, Benaya khaahiyale omuroromela Davidi. (2 Sam. 8:18; 15:18; 1 Mam. 1:8) Hata nuumala Davidi wuuluvala, Benaya khaahiyale okhala oororomeleya wa Davidi. Mwa ntakiheryo, aahimukhaliherya wiira Salomooni okhale mwene. (1 Mam. 1:​32-40) Nnaamwi atthu akina yaahiyale okhala oororomeleya, Benaya khaahiyale omuroromela Yehova ni mamwene yaathanliwe ni Yehova.

Nave hiyo nihaana okhala oolipa murima wiira niwerye owana ni Satana ni ale animukhaliherya. Nave-tho, nihihiye wiiwelela malakiheryo a Yehova. (Aef. 6:11; 1 Ped. 5:​8, 9) Hata atthu akina ahiyaka omurumeela Yehova, hiyo khaninrowa ohiya, okhala wiira ninniroromela wiira owo onoonireeliha. — 2 Sam. 22:26.