Muhakalaleke nnaamwi mulupatthiwaka

1. Etthu xeeni Yesu aahimmye awe, ni xeeni vari aya vootikiniha?

MWAHA aalavula awe vamwaako, Yesu aahimmye so: “Oohakalala ti nyuwo khula okathi muninyokhiwa”. (Luka 6:22) Atthu yaiwale moolumo ale a Yesu, woonasa wene, yaahitikinihiwa. Okhala wene, khuuvo onimusivela onyokhiwa. Nto xeeni Yesu ohalaka olavula eyo? Nla nikoho nookhalela, okhala wiira atthareli a Yesu olelo-va, annilupatthiwa ni atthu anceene. Mwaha ola, nnimwaakhula makoho manli: Noopacerya, xeeni ninlupatthiwa ahu? Na nenli, etthu xeeni enniiriha okhala oohakalala nnaamwi nilupatthiwaka?

XEENI NINLUPATTHIWA AHU?

2-3. a) Xeeni arumeyi a Yehova anilupatthiwa aya? b) Niwooneleke sai ale annilupattha? (Yohani 16:​2, 3)

² Ninnilupatthiwa mwaha woomurumeela Yehova. Olavulaka sa ale anaalupattha ni aniwiiva awiixutti awe, Yesu aahimmye wiira atthu awo, “khanimusuwela Tiithi, nnakhala khanikisuwela miyo.” (Mmusome Yohani 16:​2, 3.) Tani oniwiiriha arumeyi a Yehova olupatthiwa? Moohaanyiherya, ti Satana Diabo. Okhala wiira owo tori “muluku a olumwenku ola”. (2 Akor. 4:​3, 4) Satana, onniwiiriha atthu akina ohiphavela omusuwela Muluku. Nave onniwiiriha atthu awo waalupattha ale animusuwela ni animphenta Yehova. (Yoh. 8:​42-44) Osuwela eyo enninikhaliherya oturuka moota ninwoonela ahu ale annilupattha. Vaavo ninsuwela ahu wiira atthu awo aniwokiwa ni Satana, eyo enninikhaliherya ohaanyokha.

³ Nrowe nthokorerye ntakiheryo na munna Pavel,a yoowo onikhala elapo muteko ahu onikhoottihiwa aya. Mwaha woomurumeela Yehova moororomeleya, owo aahimaniwa ni aahitthukweliwa mukhatteya. Pavel onihimya so: “Kinnisuwela wiira Satana ni malaikha awe, taniiriha wiira atthu akina anikhoottiheryeke omurumeela Yehova. Vanikhala wiira atthu anivara mukhatteya khanninyokha. Masi awo, anivara paahi muteko aya.” Munna mmosa onikhala oCroácia, yoowo aavilenle olupatthiwa ni anamuyari awe, onihimya so: “Vano miyo kinnisuwela wiira Satana tori nwanani aka, ohiya anamuyari aka.” — Aef. 6:12.

4. Ntakiheryo na Yesu ni Siteefano, ninniixuttiha exeeni? (Nwehe efootu.)

⁴ Hiyo khannaanyokha ale annilupattha. Masi etthu nikhanle ahu oopaka, ori waavekelela. (Math. 5:44) Nrowe niwehe etthu nniixutta ahu ni ntakiheryo na Yesu ni na Siteefano. Yesu aahikhomeliwa vamwirini va nihaaxeryo ni anakhotto a oRoma. Hata okathi ole oona owereya vanceene, Yesu aavekenle so: “Tiithi, mwaalevelele”. (Luka 23:34) Yesu anvekela Tiithi awe wiira aalevelele anakhotto ale yaarummwale wiira amwiive. Nave aaniwuupuwela atthu ale yaakhuwela wiira owo iiviwe, akhanyereriwaka ni ahooleli a itiini. Yesu, aanisuwela wiira atthu ale khiyaasuwela etthu yaapaka aya. Nave Siteefano, aahinvekela Muluku wiira aalevelele atthu ale yaarowa omwiiva. (Mit. 7:​58-60) Niireke Muluku aahaakhula nivekelo na Yesu ni Siteefano? Aayo. Atthu anceene yiirenle mpantta ophukeliwa ni wiiviwa wa Yesu, nuuvira okathi, yaahittharuwa itampi saya, yaahipacerya omwaamini Yesu ni yaahipatisiwa. (Mit. 2:​36-41) Nave Saulo a oTarso, yoowo iirenle mpantta wiiviwa wa Siteefano, nuuvira okathi aahittharuwa itampi sawe ni aahikhala mukristau. — 1 Tim. 1:13.

5. Yoowiiraneya ya César eniwiixuttihani exeeni?

⁵ Nave olelo-va, okathi nninvekela ahu Yehova wiira aalevelele ale annilupattha, owo onnaakhula mavekelo ahu. Nrowe nthokorerye yoowiiraneya ya César onikhala oVenezuela. Mwaha wookhala Namoona a Yehova, César aaninyokhiwa vanceene ni Paapa awe. César onihimya so: “Maama aka aari ooreera murima ni aanaaphenta vanceene apaapa. Owo aanihela nipuro noopacerya Omwene wa Muluku ni aanimuthokorerya saana paapa aka. Amaama yaahikiixuttiha miyo, axuulupale aka ni axihima aka wiira nihaana omuttittimiha ni omwiiwelela paapa ahu. Masi naahaana opaka eyo vakhala wiira itthu aanivekela awe khisaatthekela malamulo a Yehova.” Nto nuuvira iyaakha, paapa awe aahirukunuxa murima awe. César onihimya-tho so: “Nihiku nimosa, nuumala onvekela Yehova, miyo kaahimukoha paapa aka akhala wiira aaniphavela omusoma Biibiliya ni miyo. Moohakalaliha, paapa aka aaheemererya.” Nuuvira okathi, paapa awe César aahipatisiwa. Masi, khahiyo wiira atthu ootheene annilupattha annirukunuxa murima ni annipatisiwa. Atthu akina, okathi aniweha aya mweettelo ahu wooloka ni moota nnaattittimiha ahu, eyo enniwiiriha oturuka muupuwelo aya. Ninnihakalala vanceene, okathi eyo eniiraneya aya! Ninniphavela vanceene oweha moota Yehova onrowa awe waakhaliherya atthu awo, omusuwela yena. Okhala wiira owo tori “Mulipa-oophuka milattu a olumwenku wootheene” ni oomoriwa ikharari. — Maph. 18:25.

6. Moovarihana ni Marko 13:​13, etthu xeeni ekina enniiriha olupatthiwa?

⁶ Ninnilupatthiwa mwaha woomukhaliherya Yesu. Yesu aahimmye wiira makristau eekeekhai, yaamulupatthiwaka “mwaha wa nsina” nawe. (Mmusome Marko 13:13.) “Nsina” na Yesu nintaphulela exeeni? Nintaphulela omutthu awe ni etireitu orina awe ya okhala Mwene a Omwene wa Muluku. Hiyo ninnilupatthiwa ni atthu yaale aniroromela ikuvernu sa apinaatamu. Atthu awo, khanimuroromela Yesu, yoowo othanliwe ni Yehova wiira olamuleleke. Masi olupatthiwa onniphwanya olelo-va, khonrowa okhala wa mahiku ootheene, okhala wiira Yesu opacenrye olamulela mwaakha wa 1914. Nto moohipisa, onrowa opwetexa ikuvernu sootheene sa apinaatamu.

7-8. Etthu xeeni ekina eniwiiriha arumeyi a Yehova olupatthiwa? (Yohani 15:​18-20) (Nwehe ifootu.)

⁷ Ninnilupatthiwa mwaha woowi khaninkhaliherya olumwenku. Yesu aahimmye wiira awiixutti awe, yaamulupatthiwaka mwaha woowi khiyaarowa wiirelaka mpantta olumwenku ola. (Mmusome Yohani 15:​18-20.) Ntoko makristau oopacerya, hiyo khannuupuwela, opaka itthu aahiiso olavula ntoko atthu a olumwenku ola. Mwaha waivaavo, anna ni arokora annilupatthiwa omutekoni aahiiso oskola. (1 Ped. 4:​3, 4) Masi ninnihakalala vanceene, vaavo nninweha ahu mutthu yoole aanilupattha opaceryaka opaka marukunuxo ni ottittimihaka sookupali sahu.

⁸ Nrowe nithokorerye yoowiiraneya ya Ignacio, yoowo onikhala wAmérica Central. Mwa iyaakha sinceene, purusoore awe aaninveeha ni omutheya mwaha woomurumeela Yehova. Masi ohinatthi Ignacio omaliha oskola, purusoore awe aahimukoha wiira: Muniwerya sai weettela malakiheryo a mbiibiliyani hata mulupatthiwaka? Ignacio aakhunle so: Malakiheryo a mbiibiliyani, tanikikhapelela. Nto owo aahimulattula purusoore awe orowela mithukumano. Moohakalaliha, purusoore ole aaheemererya! Owo waahimusivela moota aakheliwe awe ni khaahiyale orowela mithukumano. Nuuvira okathi, purusoore ole aanilupatthiwa okhala wiira aahipacerya omusoma Biibiliya. Masi hata vari siiso, khaahiyale orowa vahoolo ni muhoolo mwaya, aahipatisiwa.

9-10. a) Etthu xeeni enooniherya wiira khanniirela mpantta olumwenku ola wa Satana? b) Ntakiheryo na Paulo, ninniixuttiha exeeni?

⁹ Etthu ekina enooniherya wiira khanniirela mpantta olumwenku ola wa Satana, okhala wiira khaninkhaliherya myaha sa ipoliitika nnakhala ikhotto. (Yoh. 18:36) Masi, ninneettela miruku siri Aroma 13:​1, maana ninniwiiwelela makhulupale a mulaponi. Nave, okhala wiira na makristau oororomeleya wa Yehova, khaninkhaliherya nnakhala mpantta mmosa wa ipoliitika. Mwaha wa xeeni? Mwaha woowi nimmuroromela Yehova ni Omwene awe, yoowo Mwene aya ori Kristu, Yesu. Anamoona a Yehova anceene aatthukweliwa mukhatteya mwaha wa waamini waya. Hata vari siiso, anna ni arokora awo khanihiya olaleerya. Nto mwaha woopaka eyo, annooniherya wiira annitthara ntakiheryo na Paulo, yoowo aavirihale iyaakha otthukweliwe ene. (Mit. 24:27; 28:​16, 30) Masi Paulo aanaalaleerya ihapari sooreera atthu akina, waahela muhina makwarta a mukhatteya, makhulupale a otripunaale, makuvernatoro ni mamwene. Nave woonasa wene, aahimulaleerya mwene Nero. — Mit. 9:15.

¹⁰ Nave anna ni arokora atthukweliwe olelo-va, khanihiya waalaleerya ihapari sooreera ale aniphavela waawiriyana. Awo annaalaleerya maxuwiixi, makhulupale a kuvernu ni makwarta a mukhatteya. Mwa ntakiheryo, munna mmosa aahiviriha iyaakha 6 otthukweliwe ene mwaha wa ohiirela mpantta ipoliitika. Okathi wootheene aavirihale awe ori ene mukhatteya, owo khoona ntoko opuniriwa. Masi oona okhala yoothanleliwa aavekeliwe awe ni Yehova wiira aaphwanye atthu yaaphavela owiriyana ihapari sooreera. Ti voohakalaliha orumeeliwa ni Yehova wiira naaphwanye atthu aniphavela wiiwa ihapari sooreera! (Akol. 4:3) Nrowe nithokorerye itthu sikina sinniiriha ohakalala hata nilupatthiwaka mwaha woomurumeela Yehova.

XEENI NNIHAKALALA AHU HATA NILUPATTHIWAKA?

11. Olupatthiwa, onlipiha sai waamini wahu? Nvahe ntakiheryo.

¹¹ Hiyo noosuwela wiira olupatthiwa onimaleliha iprofesia sa mbiibiliyani. Eprofesia yoopacerya ya mbiibiliyani, Yehova aahihimya wiira Satana ni osuulu awe, eyo piiyo, ale animukhaliherya, yaarowa omulupatthaka khula mmosa onimphenta ni onimurumeela Yehova. (Maph. 3:15) Nave ikwaha sinceene, Yesu aahihimya wiira eprofesia eyo yaamwiiraneya. Nto itthu aahimyale awe, soolempwa Ivanxeelyo 4. (Math. 10:22; Mar. 13:​9-12; Luka 6:​22, 23; Yoh. 15:20) Nave atthu akina yaamulepa Biibiliya yaahihimya eyo. (2 Tim. 3:12; Yak. 1:2; 1 Ped. 4:​12-14; Yuda 3, 17-19) Nto okathi ninlupatthiwa ahu, hiyo khannitikinihiwa. Masi ninnihakalala osuwela wiira iprofesia sa mbiibiliyani sinniiraneya. Nto eyo, enninikhaliherya osuwela wiira nimmukokhorela Muluku eekeekhai. Murokora mmosa yoowo onikhala elapo muteko ahu onikhoottihiwa aya, onihimya so: “Nuumala wiivahererya wa Yehova, kaahisuwela wiira wamphiya okathi kaarowa aka olupatthiwa. Nto nuumala opacerya olupatthiwa, nkaatikinihiwe nave nkoova.” Iyawe murokora ole, aari mmosa a atthu yaamulupattha. Iyawe aanimuhaaxa ni aahimpaha Biibiliya awe ni iliivuru sawe. Nnaamwi aalupatthiwa vanceene ni iyawe, murokora ole khaakhulumunwe, masi waamini wawe waamutepa olipa. (Ahep. 10:39) Murokora owo onihimya-tho so: “Biibiliya onihimya wiira arumeyi a Muluku, yaamurowa olupatthiwaka, nto miyo kaanisuwela wiira eyo yaamukiiraneela. Olupatthiwa mwaha woomurumeela Yehova, wookikhaliherya okupali wiira kineettela etiini yeekeekhai tthiri.”

12. Etthu xeeni yaamukhalihenrye munna mmosa ovilela hata aalupatthiwa?

¹² Hata nisuwelaka wiira nnoorowa olupatthiwaka, pooti okhala vooxankiha ovilela. Olavulaka sa okathi aatthukeliwe awe, munna mmosa ohimmye so: “Ikwaha sikina, kaaniriipiwa murima ni kaamakela wunla.” Etthu xeeni yaamukhaliherya? Owo ohimmye so: “Khula voosiisu kaaninvekela Yehova. Khula okathi yiiraneya aya etthu yoohiloka, kaanivekela. Nave okathi yiiraneya aya etthu yaakiriipiha murima kaaniiwalela oxoworo kinapacerya ovekela.” Munna owo aanuupuwelela matakiheryo a arumeyi a Yehova a khalai ni a mahiku ahu ala, yaawo yaavilela hata alupatthiwaka. Nto eyo yaanimukhaliherya ohikhulumuwa ni okhalana murettele yoowo Yesu aaleihenrye awe awiixutti awe. — Yoh. 14:27; 16:33.

13. Etthu xeeni ennikhaliherya ovilela olupatthiwa?

¹³ Omphenta wahu Yehova ni atthu akina, onninikhaliherya ovilela. Yesu khaahiyale omphenta Tiithi awe ni murima wootheene. Nave owo aanaaphenta apatthani awe. (Yoh. 13:1; 15:13) Omphenta Yehova ni atthu akina, onninikhaliherya ovilela okathi ninlupatthiwa ahu. Moota xeeni? Wiira naakhule nikoho nla, ninrowa othokorerya ntakiheryo na Paulo.

14. Exeeni yaamukhalihenrye Paulo okhala oororomeleya?

¹⁴ Ohalaka vakhaani okhwa, Paulo aahimulepela ekarta mpatthani awe aihaniwa Timootheyo, ohimyaka so: “Ikuru soowaarya Muluku onivanhe awe khasinniiriha woova, masi sinninivaha owerya, [ni] ophenta”. (2 Tim. 1:7) Paulo aaphavela ohimya exeeni ni moolumo ala? Owo aaphavela ohimya wiira, omphenta Yehova, pooti omwiiriha mukristau okhala oolikana ene wiira ovilele mixankiho. (2 Tim. 1:8) Omphenta Yehova, waahimukhaliherya Paulo okhala oororomeleya ni oolipa murima mpakha okhwa wawe. — Mit. 20:​22-24.

15. Olelo-va, anna ni arokora anooniherya sai wiira anniphentana mukina ni mukhwaawe? (Nwehe efootu.)

¹⁵ Mweekeekhai, hiyo ninnaaphenta vanceene anna ni arokora yaawo anivilela moororomeleya nnaamwi alupatthiwaka. Olelo-va, anna ni arokora akina, annileva okumi aya wiira yaakhaliherye axinnaya. Nave Akila ni Priska, yaahileva okumi aya wiira amukhaliherye Paulo. (Arom. 16:​3, 4) ORússia, anna ni arokora annirowa waaxukurya annaya yaawo atthukweliwe. Mwa ntakiheryo, awo yaahirowa omuxukurya murokora mmosa yoowo atthukweliwe. Nuumala waaweha okathi yaarwaale aya otribunaali, murokora ole aahihakalala vanceene ohinoona yoohimya. Ophenta wa anna ni arokora, waahimulipiha vanceene okathi ole wooxankiha. Tthiri, ninnihakalala vanceene waaweha anna ni arokora aniphentaka hata atthu akina anilupatthaka!

16. Xeeni murummwa Pedru aahimyale awe wiira ale anivilela mwaha woomurumeela Muluku, annihakalala? (1 Pedru 4:14)

¹⁶ Yehova onnihakalala okathi onniweha awe nivilelaka olupatthiwa. (Mmusome 1 Pedru 4:14.) Murummwa Pedru, aahimyale wiira ale anivilela mwaha woomurumeela Muluku, annihakalala. Moota xeeni? Mwaha woowi “ikuru soowaarya sa Muluku” siri ni yaawo. Nuumala Pentekoositi a mwaakha wa 33, Nuumala Kristu Orwa, makwarta a mutemplo yaahirummwa wiira yamutthukwe Pedru ni arummwa akina mwaha woowi yaanilaleerya. Masi Pedru aahaakiherya waamini wawe moolipa murima. Nto eyo enooniherya wiira Pedru aanisuwela ele enitaphulela aya ovilela mwaha woolupatthiwa ni etthu yoopaka wiira omuhakalalihe Muluku. (Mit. 5:​24-29) Hata Pedru ni awiixutti yaawaxuliwe, awo khiyaahiyale olaleerya. Masi awo yaanihakalala, “okhala wiira yaahoona okhala eparakha ohaawa, mwaha wa nsina na Yesu.” Nave, hiyo nnoohakalalaka vakhala wiira nnoovilela olupatthiwa. — Mit. 5:​40-42.

17. Ohiyu wookiserya aarowa awe wiiviwa, exeeni Yesu aalenle awe awiixutti awe?

¹⁷ Ohiyu wookiserya aarowa awe wiiviwa, Yesu aahaalela awiixutti awe wiira: “Ole onikiphenta, onoophentiwa ni Tiithi aka. Nave, miyo kinomphenta mutthu owo”. (Yoh. 14:21) Ninnilipelela ophiya okathi atthu ootheene anrowa aya omphentaka Yehova ni Yesu, nave ninrowa ahu ophentiwaka, ohiya olupatthiwaka mwaha woomurumeela Yehova! (2 Ates. 1:​6-8) Nilipelelaka okathi owo, nihaana ohiliyala itthu sinceene niixuntte ahu, seiyo sinniiriha ohakalala hata nilupatthiwaka.