MALAKIHERYO A MOOTA WOOSOMA

Mwiiwexexeke malikanyiho a mbiibiliyani

Mbiibiliyani ninniphwanya malikanyiho manceene. Atthu anceene khaniwerya wiiwexexa etthu anitaphulela aya malikanyiho awo. (Math. 13:13) Nto etthu xeeni mukhanle anyu oopaka wiira mwiiwexexe malikanyiho Biibiliya onirumeela awe? Mweererye otthara malakiheryo ala:

• Musuweleke etthu enilavuliwa ni ele enirumeeliwa para opakiwa nlikanyiho nlo. Malikanyiho awo, annilikanyiha itthu piili soovirikana. Mwa ntakiheryo, Wiisuupulula 3:​3, onihimya wiira Yesu onrowa orwa ntoko latarau.

• Muupuweleleke ovarihana waya. Musuweleke moota itthu iyo piili sinivarihana aya.

• Nvareryeke vakhala wiira etthu mwiixuntte anyu ti yeeyo eniphavela ohimmwa ni nlikanyiho nlo. Ikwaha sikina atthu anceene khaniiwexexa etthu nlikanyiho nlo nimphavela aya wiixuttiha. Mwa ntakiheryo, nlikanyiho nilavunle ahu osulu, khanimphavela ohimya wiira Yesu onirweela wiiya. Ohiya-vo, nimphavela wiixuttiha wiira ntoko siisaale latarau onirwa awe ewoora nihinuupuwela ahu, nave Yesu onrowa orwa okathi nahaalipelela ahu.