Muhihiye olipiha ekasamento anyu

1. Xeeni apatthani ooloka ari aya eperesenti enikhuma wa Yehova?

APATTHANI ooloka, eperesenti enikhuma wa Muluku. (Yak. 1:17) Apatthani awo, annimphenta Muluku, nave anniniphenta. Awo annihakalala okathi nnihakalala ahu, anninimaaliha okathi ninriipiwa ahu murima ni anninivaha miruku sa ekeekhai okathi nimpirisari ahu. Nto nihaana waaroromela okhala wiira toororomeleya. Tthiri apatthani siisa, “annitteeliha murima”! — Mir. 27:9.

2. Xeeni vari aya vooloka anamathelana olipihaka ompatthani aya? (Matheyo 19:6)

² Ti vooloka mulopwana ni mwaarawe okhala apatthani ooloka. Masi awo ahaana osuwela wiira opatthani owo khonikhumela mekhaya, anipirisari wiimananiha wiira alipihe. Nto akhala wiira khanipaka itthu sikhanle oolipiha ompatthani aya aahiiso ekasamento aya, khula mmosa pooti wuupuwelaka wiira ori mekhawe ni khonrowa ohakalalaka. Masi akhala wiira anoolipihaka ekasamento aya, anaamuhakalala. (Mmusome Matheyo 19:6.) Mwaha ola, nnooweha moota anamathelana akhanle aya oolipiha ekasamento aya. Masi wanipacerya, ninrowa oweha moota munna oohithela aahiiso murokora oohitheliwa, okhanle awe oomuthanla mwa miruku ole onrowa awe othelana.

MOOTA WOOMUTHANLA MWA MIRUKU

3-4. Exeeni enrowa omukhaliherya mukristau omuthanla mwa miruku ole onrowa awe othelana? (Miruku 18:22)

³ Nihinatthi opaka yoothanla yuulupale, nihaana wuupuwela mwa miruku mixankiho ni mireerelo sinrowa okhumelela ni yoothanla eyo. Yoothanla ahu, pooti waafetari okumi ahu wootheene. Tivonto vari aya vooloka, wuupuwela saana nihinatthi opaka yoothanla.

⁴ Omuthanla mutthu ninrowa ahu othelana, onlikana ni omuthanla mpatthani para okumi ahu wootheene. Nto nihaana osuwela wiira eyo yoothanla yuulupale ninrowa ahu opaka. Okhala wiira Yehova tokumihenrye ekasamento, nihaana otthara malakiheryo awe wiira nipake yoothanla eyo. Yehova, oniphavela wiira mulopwana omphwanye muthiyana ooloka nave muthiyana, omphwanye mulopwana ooloka. Khula okathi, Yehova onnisuwela itthu sinniphwanyiha mureerelo. (Musome Miruku 18:22; Yes. 48:​17, 18) Nto malakiheryo a mbiibiliyani, pooti omukhaliherya mukristau omuthanla mwa miruku ole onrowa awe othelana.

5. Xeeni vari aya vooloka othelana ni mutthu oopatisiwa?

⁵ Nuumala opatisiwa, ninnikhala apatthani a Yehova. (Esal. 25:14) Nto akhala wiira mumphavela othela aahiiso otheliwa, muhaana omuthanla mutthu ori mpatthani a Yehova aahiiso oopatisiwa. (1 Akor. 7:39) Mwapaka eyo, munimooniherya wiira munnittittimiha malamulo a Yehova. Ohiya-vo, munoomuthokoreryaka ntoko eperesenti enikhuma wa Muluku. (Mir. 19:14) Nave munoosyaka mixankiho sikhanle ookhumelela mwaha wa othelana ni mutthu ohinimurumeela Yehova. (2 Akor. 6:14) Hata muhiweryaka omphwanya murokora aahiiso munna onoosivelani, khivaarowa okhala va miruku othelana ni mutthu ohinimurumeela Yehova. Nave khivaarowa okhala va miruku othelana ni mutthu nuupuwelaka wiira muhoolo onimwiixutta ekeekhai.

6-7. Mwaaphavelaka othela aahiiso otheliwa, makoho xeeni munireerela anyu wiikoha?

⁶ Masi eyo khenitaphulela wiira khula mukristau oopatisiwa onrowa okhala mutthu ooloka para okhala iyanyu aahiiso mwaarinyu. Nto akhala wiira monweha oosivenleni,a vaamuloka wiipakela makoho ala: Onaathokorerya sai atthu onikhalana awe? Kiireke mutthu ooreera murima ni oottittimiha? Apatthani awe tani? Oniphuka sai mixankiho? Kiireke oniphavela wiira itthu sipakiweke ntoko oniphavela awe? Kiireke onneemererya miyoonelo sa atthu akina, akhala wiira Biibiliya khonihimya mooluluwanya mwaha owo? Onoonela sai musurukhu?

⁷ Nave mwiikoheke so: Kiireke mutthu owo onnimphenta vanceene Yehova? Kiireke onniimananiha owara “omutthu wa niinaano”? Kiireke onaamukikhaliherya ohihiya omurumeela Yehova? Kiireke nirina soolakela simosa-ru? Kiireke ninrowa okhala apatthani a ekeekhai? (Akol. 3:​9, 10) Akhala wiira mwa murokora, mwiikoheke so: Kiireke munna owo onookhala muhooleli a etthoko ooloka? (1 Akor. 11:3) Akhala wiira mwa munna, nave mwiikoheke so: Kiireke murokora owo onaamukittittimiha ni okikhaliherya ni soothanla saka? Muhaana wiivaha okathi wiira musuwele waakhuliwa wa makoho awo. Akhala wiira munninamorari, murumeeleke okathi owo wiira mmusuwele saana munna aahiiso murokora owo.

8-9. Exeeni ekhale oomukhaliherya munna aahiiso murokora oninamorari, opaka yoothanla yooloka? (Nwehe efootu.)

⁸ Etthu enrowa wookhaliheryani opaka yoothanla yooloka, ori osuwela saana mikhalelo sa mutthu owo okathi woonamorari. Mwaakoheke atthu akina mikhalelo sa mutthu owo. Nave nyuwo pooti waakoha anna ni arokora a muloko awe moota animoonela aya. Mwa ntakiheryo, niireke toowiiyeviha, ooreera murima ni onnaathokorerya saana atthu akina? Murokora Sarah yoowo onikhala oGuiana Francesa otheliwe ni munna oniitthaniwa Daniel, onihimya so: “Wiira kisuwele mikhalelo sa Daniel, kaahilavula ni munna aarumeela ntoko pioneero hoothe ni Daniel, axitokweene a muloko awe, apatthani yaanisuwela ni arokora a muloko awe.” Mooreerela murima, pooti omukoha mutthu owo oninamorari ni nyuwo, akhala wiira yookhala etthu emwiiranenle aahiiso enimwiiraneela mookumini mwawe, munireerela anyu osuwela.

⁹ Akhala wiira munnileeliwa mikhalelo sawe soohiloka, muhaana ovarerya saana mwaha owo. Nto eyo enimookhaliheryani opaka yoothanla yooloka, akhala wiira pooti othipelela onamorari aahiiso nnaari.b Ittima sinittharelana, ninrowa othokorerya miruku sinrowa waakhaliherya anamathelana.

NVIRIHEKE OKATHI MUNCEENE MURI ENE HOOTHE

10. Xeeni vari aya vooloka anamathelana oviriha okathi munceene ari ene hoothe?

¹⁰ Anamathelana anoolipiha ompatthani aahiiso ekasamento aya, akhala wiira anoovirihaka okathi munceene ari ene hoothe, hata ikwaha sikina yaatteliwaka miteko. Okathi owo, pooti oleelana moota avirihale aya nihiku nlo, otthekula, wooniheryana ophentana waya ni oleelana itthu sikina.

11. Etthu xeeni ekhanle ookumiherya mixankiho mukasamentoni?

¹¹ Akhala wiira anamathelana apatthani a ekeekhai, awo khonaasivela oviriha okathi munceene ahikhanle hoothe. Ekeekhai wiira ikwaha sikina pooti ohiweryaneyaka okhala hoothe. Masi oviriha okathi munceene ahikhanle hoothe, pooti okhala etthu yoowoopiha. Mwa ntakiheryo, atthu akina anneemererya ovara muteko elapo ekina, nto eyo enniwiiriha orakamelana ni emusi aya. Nnaamwi opaka eyo ekhaliheryaka emusi okhalana musurukhu, masi oviriha okathi munceene ahikhanle hoothe, pooti okumiherya mixankiho sinceene mukasamentoni.

12-13. a) Itthu xeeni anamathelana akina anipaka aya wiira aviriheke okathi ari ene hoothe? (Nwehe efootu.) b) Efaita xeeni orina awe ole muthelanne anyu para nyuwo? (Nwehe ekaaxa eni: “Ole muthelanne anyu, ookhalana efaita.”)

¹² Nwehe itthu sikina anamathelana anipaka aya wiira aweryeke oviriha okathi munceene ari ene hoothe. Leah, yoowo onikhala elapo ya oGuam, onihimya so: “Miyo ni iyaka, onisivela ovara miteko hoothe. Ikwaha sinceene ninrowa ahu otthekula, ninrowa hoothe.” Roxanne onikhala wEstados Unidos, onihimya so: “Okhala wiira ninnaatteliwa miteko, nto ninnimpaka palano vahinatthi wiira nisuwele okathi ninrowa ahu okhala hoothe.” (Mulikanyihe ni Amoosi 3:3.) Damien yoowo onikhala oFrança, onihimya so: “Ninnisuwela etthu khula mmosa enimusivela nave ninniimananiha wiira oowanli ahu nisiveliweke ni etthu eyo.” (Math. 7:12) Katie, yoowo onikhala wEstados Unidos, onihimya so: “Okathi ninvaanela ahu, ikwaha sikina, khinnaakuxa atelefooni ahu. Nto eyo ennimukhaliherya khula mmosa a hiyo omuthokorerya saana mukhwaawe.”

¹³ Etthu yootepexa okhalana efaita, ori ovara miteko sa Muluku hoothe. Myriam onikhala oFrança, onihimya so: “Hiyo nimpacerya nihiku nimusomaka Biibiliya hoothe. Nuumala-vo, khula mutthu onnihimya itthu iixuntte awe ni moota onrowa awe weettela. Okathi nimpaka ahu eyo, ninnihakalala vanceene. Nave okisivela okathi iyaka onivekela awe niri ene hoothe. Okathi owo, kinniwerya osuwela moota onimphenta awe Yehova.” Katie, yoowo nimuromonle ahu ettima evinre, onihimya so: “Onisivela vanceene ovara hoothe muteko woolaleerya. Nave khula mmosa a hiyo, omusivela onwiriyana mukhwaawe olavulaka voohimya sa Yehova. Nto ootheene ahu ninniixuttihana itthu soovirikana.” — Mir. 27:17.

MUKHALEKE HOOTHE HATA OKATHI WA MIXANKIHO

14-15. Xeeni anamathelana anipirisari aya wiimananiha ophuka mixankiho sa mukasamentoni mwaya? Nvahe nlikanyiho.

¹⁴ Mwaha wookhala atthu oottheka, anamathelana, sinaamwaaphwanya mixankiho mukasamentoni mwaya. Biibiliya onihimya wiira “ale anithelana anookhalana mixankiho mookumini mwaya.” (1 Akor. 7:28) Enoota eri Biibiliya a estuutu, eversiikulu ela, “enihimya mixankiho sikhanle oowaaphwanya anamathelana ootheene.” Okathi sinikhumelela aya, ti vooloka anamathelana ophuka mixankiho iyo ni ohihiya okhala hoothe.

¹⁵ Nkuupuwelani nlikanyiho nla: Vakhala wiira epereetiyu yooreera ennihononeya, axineene anipirisari olokiherya wiira etthikele ntoko yaari aya. Awo pooti oviriha okathi aahiiso orumeela musurukhu munceene wiira alokiherye. Masi awo kakhanle oohiya hata siviraka iyaakha sinceene. Mwaha wa xeeni? Mwaha woowi epereetiyu eyo yookhalana efaita yuulupale. Mwa enamuna emosa-ru, ikasamento sootheene, sookhalana efaita. Hata anamathelana yaale nniwoona ahu wiira toowiiwanana, annikhalana mixankiho mukasamentoni mwaya. Ntoko siisaale epereetiyu ehononeyale enipirisari aya olokiheriwa wiira etthikele okhala saana, nave ekasamento erina mixankiho, pooti otthikela okhala saana. Masi anamathelana awo pooti opirisariki oviriha okathi ni wiimananiha vanceene wiira alokiherye ekasamento aya. Yehova onnihakalala vanceene vaavo onaaweha awe anamathelana yiimananihaka opaka eyo ni ahihiyaka okhala hoothe. (Mal. 2:16) Okathi anipaka aya eyo, annooniherya wiira anniphentana ni ottittimihana. Nave annooniherya wiira annimphenta Yehova yoowo okumihenrye ekasamento.

16. Moovarihana ni 1 Akorinto 13:​4-8a, etthu xeeni enrowa waakhaliherya anamathelana arina mixankiho mukasamentoni mwaya? (Nwehe efootu ni ekaaxa eni: “Myaha sikhanle ookhaliherya ekasamento.”)

¹⁶ Sakhumelela mixankiho mukasamentoni mwanyu, muhuupuweleke wiira muhaana ovalaana. (1 Akor. 7:​10, 11) Ohiya-vo, mwiikoheke so: Etthu xeeni kikhanle aka oopaka wiira kilipihe ekasamento aka? Musomeke soolepa sa mbiibiliyani sinrowa wookhaliheryani wooniherya ophenta. Nave muupuweleke moota woovarihela muteko yoolepa ya 1 Akorinto 13:​4-8a. (Mmusome.) Nto ohiya wuupuwela ovalaana aahiiso omwalana, mwiimananiheke wiira mutthikele ophentana. Mmananiheke osuwela etthu mukhanle anyu oopaka wiira mulokiherye ekasamento anyu. Munvekeleke Yehova wiira ookhaliheryeni. Mutokoseke murumeelaka iliivuru sahu, iviitiyu, mwaavekeleke nikhaliheryo axitokweene ni anna ni arokora arina waamini woolipa. Biibiliya onihimya wiira ekasamento enlikana ni mukhoyi woorithiwa ikwaha tthaaru. Yehova, tori mukhoyi wa faita ni wootepexa olipa wa ekasamento anyu. Nto akhala wiira munoopaka itthu ntoko oniphavela awe, ekasamento anyu enrowa okhala yoolipa. — Mus. 4:12.

17. Ale anuupuwela othela aahiiso otheliwa ni anamathelana, anrowa owerya sai okhala oohakalala?

¹⁷ Yehova oniphavela wiira arumeyi awe ootheene ahakalaleke, waahela muhina ale anuupuwela othela aahiiso otheliwa ni anamathelana. Nto akhala wiira khamuthenle aahiiso khamutheliwe, masi munniphavela, muhaana omuthanla mwa miruku ole munrowa anyu othelana. Okhala wiira tonrowa okhala mpatthani anyu okumi anyu wootheene. Nave akhala wiira moothela, wala mootheliwa, muhihiye olipiha ekasamento anyu. Munvekeleke Yehova wiira ookhaliheryeni ophuka mixankiho sikhanle ookhumelela. Mwiira siiso, munaamuhakalala ni ole muthelanne anyu! — Mus. 9:9.