Niireke mutthu pooti woopowa mwaha wa omwaamini Yesu paahi?

Moota Biibiliya onaakhula awe

Makristau annikupali wiira Yesu ohookhwa mwaha wa itampi sa apinaatamu. (1 Pedru 3:18) Wiira mutthu owerye woopowa, khonlipa paahi ni okupali wiira Yesu moopoli. Malaikha ootakhala annisuwela wiira Yesu “Mwaana a Muluku”, masi awo anrowa opwetexiwa. — Luka 4:41; Yuda 6.

• Etthu xeeni kikhanle aka oopaka wiira koopowe?

• Niireke mutthu pooti woopowa mwaha wa opaka “nivekelo na anamattheka”?

• “Nivekelo na anamattheka” nipacenrye sai?

Etthu xeeni kikhanle aka oopaka wiira koopowe?

• Waamini wiira Yesu ooleva okumi awe wiira ottipihe itampi sahu. (Miteko 16:30, 31; 1 Yohani 2:2) Eyo enihela muhina, waamini wiira Yesu ootoko okhala ni okupali itthu sootheene Biibiliya onihimya awe voohimya sa yena.

• Osuwela ikeekhai sa mbiibiliyani. (2 Timootheyo 3:15) Biibiliya onihimya wiira murummwa Paulo ni Sila, yaahimuleela kwarta wiira: Mmwaaminiki Pwiya Yesu, munimoopowa. “Nuumala-vo, awo yaahimulaleerya nuulumo na Yehova”a. (Miteko 16:31, 32) Eyo enooniherya wiira khivaaweryaneya kwarta ole omwaamini Yesu ohiixuttihinwe toko, ikeekhai soopacerya sa Nuulumo na Muluku. Owo aahaana osuwela ikeekhai sa mbiibiliyani. —1 Timootheyo 2:3, 4.

• Orukunuxa murima. (Miteko 3:19) Mutthu ohaana oriipiwa murima ni ottharuwa itthu soohiloka aapaka awe khalai. Okathi mutthu onittharuwa awe, atthu akina anniweha wiira mutthu owo ooturuka mweettelo awe, ni oopacerya ovara miteko sinooniherya orukunuxa wawe murima. — Miteko 26:20.

• Opatisiwa. (Matheyo 28:19) Yesu aahimmye wiira ale yaarowa ophavela okhala atthareli awe, yaahaana opatisiwa. Kwarta nimulavunle ahu, aahipatisiwa. (Miteko 16:33) Mwa enamuna emosa-ru, nuumala Pedru wiixuttiha voohimya sa Yesu, atthu ootheene “yaale yaakhenle ni murima wotheene moolumo a Pedru, yaahipatisiwa.” — Miteko 2:40, 41.

• Omwiiwelela Yesu. (Aheeperi 5:9) Ootheene ale aniiwelela sooruma sa Yesu, annooniherya wiira atthareli awe. (Matheyo 28:20) Annikhala “atthu aneettela masu awo, ohiya alipa-oowiiwa paahi”. —Yakobo 1:22.

• Ovilela mpakha wanikisa. (Marko 13:13) Wiira yoopowe, atthareli a Yesu ahaana “ovilela”. (aheeperi 10:36) Mwa ntakiheryo, murummwa Paulo aaniiwelela sooruma sa Yesu ni aari oororomeleya wa Yehova. Nave aanivilela okhuma okathi aakenle awe ekristau, mpakha okhwa wawe. —1 Akorinto 9:27.

Niireke mutthu pooti woopowa mwaha wa opaka “nivekelo na anamattheka”?

Itiini sikina, atthu annipaka “nivekelo na anamattheka” ni “nivekelo na woopowa”. Okhala wene, atthu anipaka mavekelo ala, annisuwela wiira aattheka ni aannikupali wiira Yesu ohookhwa wiira ottipihe itampi saya. Nave awo anninvekela Yesu wiira ovolowe mookumini ni vamurimani vaya. Masi Biibiliya khonilavula, nnakhala khonniruma opaka “nivekelo na anamattheka”.

Atthu akina anuupuwela wiira yapaka “nivekelo na anamattheka”, anoorowa woopowa muhoolo. Ekeekhai ti yoowi, khinivo nivekelo nimmwiiriha mutthu woopowa. Mwaha wa okhala apinaatamu oottheka, khula okathi ninnittheka. (1 Yohani 1:8) Ti nthowa naya Yesu aarumme awe atthareli awe wiira, avekeleke moohihiyererya, wiira Muluku aalevelele itampi saya. (Luka 11:2, 4) Nave makristau makina yaahikhalana nlipelelo na orowa olamulelaka wiirimu, masi mwaha wa ohiya omurumeela Yehova, aaperteri eparakha eyo. —aheeperi 6:4-6; 2 Pedru 2:20, 21.

“Nivekelo na anamattheka” nipacenrye sai?

Asomi anceene khanisuwela moota nipacenrya aya “nivekelo na anamattheka”. Atthu akina anikupali wiira nivekelo nlo nipacenrye opakiwa ni atthu a etiini Protestante. Nave akina anihimya wiira nipacenrye ni itiini sa eseekulu 18 ni 19. Hata nihisuwenle moota nipacenrya aya nivekelo nla, etthu ninsuwela ahu tiila: Khaninvarihana ni ele Biibiliya onihimya awe, aahiiso, ninnivirikanya ele Biibiliya oniixuttiha awe.