Niireke Muluku Ookhala?
Waakhula wa Biibiliya
Aayo. Mbiibiliyani, sookhala itthu sinceene sinooniherya wira Muluku ookhala. Nave Biibiliya onnintumererya wira nimwaaminiki Muluku ohiya okupali mookhanyereriwa itthu itiini siniixuttiha aya, masi muhaana orumeela “muupuwelo anyu” ni osuwela wekeekhai. (aRoma 12:1; 1 Yohani 5:20) Nkahaya nwehe miyuupuwelelo sinivarihana ni Biibiliya sinittharelana:
Okhala wira olumwenku ti wootthokiheya ni sookhala itthu sikumi, eyo enooniherya wira ookhala Mpattuxa. Biibiliya onihimya so: “Mweekeekhai, khula empa enitekiwa ni mutthu, masi Muluku topattunxe itthu sotheene”. (aHeeberi 3:4) Nnaamwi muupuwelo owo ori ene wookhweya, asomi anceene annikupali wira muupuwelo owo wookhalana owerye wuulupale.a
Okhala wene, apinaatamu anniphavela osuwela yoolakela ya okumi. Hata aphwannye ene itthu sa werutthuni ni aniphavela aya, itthu iyo khasinimala. Eyo enihela muhina ele Biibiliya onihimya awe wira nihaana wiimananiha “omusuwela Muluku” ni omukokhorela. (Matheyo 5:3; Wiisuupulula 4:11) Wiimananiha wahu omusuwela Muluku onnooniherya ohiya paahi wira ookhala Muluku masi-tho wira owo Mpattuxa oophenta ni oniphavela tthiri wira nimusuwele.—Matheyo 4:4.
MBiibiliyani sookhala iprofesia sinceene silempwale iyaakha sinceene sivinre, seiyo siiraneyale ntoko saahimmwale aya. Eyo ennooniherya oratteene wira iprofesia iyo sinikhuma wa Muluku.—2 Pedru 1:21.
Atthu yaamulepa Biibiliya, yaanisuwela myaha sa siensia seiyo atthu yaakhala okathi owo yaahaasuwela aya. Mwa ntakiheryo, khalai atthu anceene yuupuwela wira elapo eri vasulu va enama, ntoko etthepo, phako wala ebooyi. Masi Biibiliya onihimya wira Muluku “onatala elapo ehirina yovarelela”. (Yobi 26:7) Nave Biibiliya onihimya wira elapo eri ntoko “nreko” wala boola. (Yesaya 40:22, Biblya Exirima) Atthu anceene annikupali wira Muluku taakhalihenrye atthu yaamulepa Biibiliya otthokiherya oratteene makhalelo a elapo.
Biibiliya paahi toniwerya waakhula makoho manceene oovila. Nto akhala wira mutthu khoniphwanya waakhuliwa wa makoho awo, eyo ennimwiiriha wuupuwelaka wira Muluku khokhanle. Mwa ntakiheryo: Akhala wira Muluku toophenta ni oowerya sotheene xeeni atthu antepa aya ohaawa? Xeeni ikwaha sinceene itiini siniwiiriha aya atthu opaka itthu soohiloka ohiya owiiriha opaka itthu sooloka?—Tito 1:16.
a Mwa ntakiheryo, olavulaka sa makhalelo a olumwenku astrônomo oniihaniwa Allan Sandage ohimmye so: “Kinoona wira khivaniweryaneya itthu sotheene sootthokiheya siri moolumwenkuni okhumela mekhaya paahi. Vannooneya wira ookhala mutthu otthokinhe. Miyo nkinikupali wira Muluku ookhala, masi hata vari siiso, kinoona wira ohimya wira ookhala mpattuxa enamuna emosa ya otthokiherya wira itthu sikhanle khasikhumelenle mekhaya”