MOOLUMO OOKISERYA

Mulipihe murima

Edição Impressa

1. Itthu xeeni sikina nikhanle ahu oowiixutta mbiibiliyani sa olipa murima?

Mwaakhule va

Eliivuru ela, noothokorerya matakiheryo a atthu oolipa murima ni moota nikhanle ahu ootthara ntakiheryo naya. Masi niireke vanniweryaneya wiixutta itthu sikina sa olipa murima? Aayo. Biibiliya onnaaromola atthu anceene oolipa murima, yaawo nihaalavunle ahu eliivuru ela. Nave, onnikhala okathi sinnikhumelela aya itthu, nnapirisari olipa murima. Nto mwaha ola, ninrowa olavula seiyo.

2. Arumeyi xeeni akina a Muluku yaari oolipa murima?

Mwaakhule va

² Niireke munniwuupuwela arumeyi akina a Muluku yoonihenrye olipa murima, yaawo nihaalavunle ahu eliivuru ela? Woonasa wene, munniwuupuwela maprofeta aniromoliwa Soolempwa sa Eheeperi ntoko: Yesaya, Yeremiya, Ezekiya, Yoona aahiiso Malakiya. Tthiri okathi aalepa awe ekapiitulu 11 ya Aheeperi, murummwa Paulo aaniwuupuwela arumeyi awo a Muluku. Owo aahimyale wiira arumeyi akina oororomeleya a Muluku, yaahiveehiwa, yaahiwaxuliwa ni yaahiriheliwa mukhatteya. Nave aalavulaka arumeyi akina, owo aahimyale so: Awo “yaahithoiwa, yaahilupatthiwa, yaahihaaxiwa.” Nave-tho, akina yaahiiviwa. (Ahep. 11:36, 37) Nnaamwi saaphwannye mixankiho iyo sootheene, moolipa murima awo yaanimuroromela Yehova.

3-4. Athiyana anli ahiniromoliwa masina aya, yaamukhalihenrye sai mwene Davidi?

Mwaakhule va

³ Biibiliya khonaaromola arumeyi ootheene a Muluku yaari oolipa murima. Mwa ntakiheryo, nkahaya nwuupuwele athiyana anli, yaawo yaakhala okathi wa mwene Davidi. Awo yaahimukhaliherya Davidi, okathi mwanawe aihaniwa Absalomi aaphavela awe omwaakha omwene. Mwaha wa wiixinnuwiha ni otakhala wa Absalomi, Davidi aahitthyawela oYerusalemu. Davidi aahinvekela namukuttho Sadoki, wiira awehe etthu Absalomi aaphavela awe opaka. Okathi Sadoki aasuwenle awe etthu Absalomi aaphavela awe opaka, moolipa murima owo aahimuruma muthiyana orowa waaleela arumeyi oororomeleya a Davidi. Biibiliya khonihimya nsina na muthiyana owo, masi owo aahileva okumi awe wiira ahimye muhupi aarummwale awe. Okathi arumeyi ale yaarowa aya omuleela Davidi, mmiravo mmosa aahaaweha ni aahirowa omuleela Absalomi. Nuumala-vo, awo yaahirowa wiipitha mpoosu. Moowaakuveya muthiyana mukina mwaneene epoosu aahikhuneela epoosu eyo ni aahaaneya eyoolya wiira ahooniwe. Biibiliya khonihimya nsina na muthiyana owo, masi etthu ninsuwela ahu ti yoowi, moolipa murima owo aahaakhapelela arumeyi a Davidi wiira ahiiviwe ni anakhotto a Absalomi. Tthiri olipa murima wa athiyana ale oororomeleya, waahikhaliherya wiira okhapeleliwe mwene aathanliwe ni Yehova! — 2 Sam. 15:23-37; 17:8-22.

Iteseenyu: Athiyana anli ahiniromoliwa masina aya, yaawo moolipa murima yaamukhalihenrye mwene Davidi. 1. Murumeyi muthiyana olavulaka ni arumeyi a Davidi. 2. Muthiyana aakhalihenrye arumeyi a Davidi okathi yaari aya epoosu ya iyawe, uupuwelaka okathi alopwana anli anirowa aya. — Murumeyi muthiyana ni mwaarawe mwaneene epoosu, yaari athiyana oolipa murima

⁴ Mbiibiliyani, khareere matakiheryo a alopwana ni athiyana oolipa murima. Akina yaari athaaciri ni yaahikhalana iparakha sinceene, vano akina yaari oohaawa ni khiyaasuweliwa vanceene. Masi ootheene aya, yaahikhalana efaita yinceene, olipa murima ni omwaamini Yehova. Nto ntakiheryo naya, pooti onikhaliherya hiyo olelo-va.

Efaita erina aya ovekela

5-7. Etthu xeeni yaamukhalihenrye Paulo olipa murima wiira ovilele olupatthiwa?

Mwaakhule va

⁵ Ninrowa owerya sai otthara matakiheryo a atthu oolipa murima ari mbiibiliyani? Ti vooloka osuwela wiira alopwana ni athiyana awo, yaari oolipa murima ohiya mwaha woowi yaayariwe ari ene oolipa murima. Niireke awo yaamurumeela Yehova mwaha wa ikuru saya? Nnaari. Awo yaahaana opaka etthu wiira akhale oolipa murima. Etthu xeeni eyo?

⁶ Nkahaya mmuupuwele murummwa Paulo. Okathi Paulo ni Sila yaari aya oFilipi, muttitthi wa atthu waahiwaakha ikuwo saya ni waahaawaxula. Nuumala-vo, awo yaahitthukweliwa mukhatteya ni metto saya saahitthukiwa vathaapwani. (Mit. 16:12, 19-24) Nuumala otaphuliwa mukhatteya, niireke Paulo aahoova ni aahihiya olaleerya? Okhala wiira Paulo aari pinaatamu ntoko hiyo, pooti wiira owo aanoova. Masi, owo aanisuwela wiira Yehova aaphavela wiira ohihiye olaleerya. Nto aahirowa olaleerya epooma ya oTesaloonika. Etthu xeeni yaamukhalihenrye Paulo okhalana ikuru ni olipa murima wiira orowe oTesaloonika?

⁷ Nuuvira okathi, murummwa Paulo aalempe so: “Ntoko munisuwela anyu, nnaamwi woopaceryani naahaawale ni naahaaxiwe oFilipi, Muluku oonivaha olipa murima wiira noolaleeryeni ihapari sooreera, nnaamwi nivaanyihiwaka vanceene.” (1 Ates. 2:2) Paulo aanisuwela wiira aahaana olipa murima wiira opake ele Yehova anvekenle awe. Masi olipa wawe murima aaphwannye woowi? Niireke waari mwaha wa ikuru sawe? Nnaari. Muluku tanvahale olipa murima. Moowiiyeviha, Paulo aahinvekela Yehova wiira onvahe olipa murima. Nto Yehova aahimukhaliherya okhala mutthu oolipa murima.

8. Xeeni ninreerela ahu otthara ntakiheryo na Paulo naaphavelaka okhala oolipa murima?

Mwaakhule va

⁸ Mmutakihaka Paulo, nyuwo pooti onvekela Yehova wiira oovaheeni olipa murima. Muhoove muupuwelaka wiira khamunwerya okhala mutthu oolipa murima, mwaha woowi khamurina ikuru. Ohiya opaka eyo, mmutakihaka Paulo munvekeleke Yehova wiira oovaheeni olipa murima. — Mit. 4:29.

9. Xeeni ninreerela ahu onvekela Yehova wiira wuncererye waamini wahu?

Mwaakhule va

⁹ Pooti onvekela Yehova wiira oovaheeni mukhalelo onivarihana ni olipa murima. Mukhalelo ene tuula: Waamini. Waamini, mukhalelo mmosa onikumiheriwa ni ikuru soowaarya sa Yehova. (Akal. 5:22, 23) Nave waamini oniirela mpantta ikaruma sootheene sa ekhotto ya Muluku, makristau anireerela aya owara. (Aef. 6:16) Waamini, wookhalana owerya wuulupale. Tivonto Biibiliya onihimya awe wiira onnixintta olumwenku. (1 Yoh. 5:4) Omwaamini Yehova, onninikhaliherya okhala mutthu oolipa murima. Vaavo ninkupali ahu wiira Yehova onoonikhaliherya okathi wa mixankiho, hiyo ninnilipa murima. Ootheene ahu, nihaana onvekela Yehova etthu emosa-ru, arummwa yaanvekenle aya, ariki: “Muncererye waamini wahu.” — Luka 17:5.

“Mulipihe murima!”

10-11. Xeeni Paulo aatumerenrye awe aheeperi okhala oolipa murima?

Mwaakhule va

¹⁰ Okathi murummwa Paulo aalepenle awe aheeperi yaakhala oYerusalemu ni mittetthe sikina, owo aanisuwela wiira samwaaphwanyaka mixankiho. Yesu aahihimya wiira epooma ele yampwetexiwa ni waahala okathi vakhaani wiira eyo yiiraneye. (Luka 19:41-44; 21:20-24) Xeeni Paulo aatumerenrye awe olipa murima? Owo aahiwuupuxerya yooleiherya ya Yehova. Yooleiherya eyo eri wanipacerya wa eliivuru ya Aheeperi. Yehova aahimmye so: “Miyo nkinikhala-khala koohiyakani, nave nkinikhala-khala koonyanyalakani.” Yooleiherya eyo yanwiiriha ohimya wiira: “Yehova tonikikhaliherya. Miyo nkinrowa woova etthu.” — Ahep. 13:5, 6.

¹¹ Biibiliya khonihimya itthu sootheene siiraneyale okathi Yerusalemu aapwetexiwe awe mwaakha 70. Hata nihisuwelaka itthu sootheene, masi ninnisuwela wiira makristau oororomeleya, yaahitthara miruku sa Paulo. Awo yaahilipa murima ni yaahiiwelela miruku sa Yesu sa otthyawela omwaako okathi wooreerela. — Luka 21:20, 21.

12. a) Munrowa owerya sai olipa murima okathi wa mixankiho? b) Matakiheryo xeeni a atthu oolipa murima nirina ahu olelo-va, ni exeeni mulakenle anyu opaka? (Nwehe ekaaxa eni: “Mutakiheke olipa waya murima”)

Mwaakhule va

¹² Hiyo nave, pooti oniphwanyaka mixankiho niinaano-va aahiiso muhoolo. (Ezek. 38:1, 2, 10-12; Math. 24:21) Ninrowa owerya sai olipa murima? Muhiliyale wiira Yehova ooleiherya onikhapelela. (Ezek. 38:19-23; 2 Ates. 3:3) Owo khonikhala-khala aanyanyalaka ale animphenta ni animwaamini. Yehova pooti wooleelani etthu amulenle awe Yooxuuwa, oriki: “Mulipe murima paahi ni mwiilipihe vanceene.” (Yox. 1:7, 9, 18) Nave muhikhala-khale muliyalaka ele Yesu aahimmye awe oriki: “Mulipihe murima!” Yesu ooleiherya wiira onoonikhaliherya orumeelaka ikuru soowaarya sa Yehova. Nto owo khonirowa ohiya opaka ele oleihenrye awe. Ikuru iyo soowaarya sinoonikhaliherya olipa murima wiira niwerye ovilela khula muxankiho onrowa oniphwanya. (Yoh. 14:26; 15:26, 27; 16:33) Tthiri nyuwo munoowerya olipa murima!

Ifootu: Moolipa murima anna ni arokora avilelaka mixankiho. 1. Murokora mwali, ori ene musaala ovarenle ene ekaternu awe ni ebroxuura, “Será que a vida teve um Criador?” 2. Ari ene ekampo anikhala atthu atthyanwe elapo aya, ahakalanle ene, anamuyari anvarenle ene mwanaya mwaamuthiyana. 3. Ohakalanle ene munna mmiravo owehaka ota ori ene mukhatteya. — Moohicikha makhalelo ahu, orumeelaka ikuru sawe soowaarya, Yehova ooleiherya onikhaliherya olipa murima wiira niwerye ovilela khula muxankiho

Mutakiheke olipa waya murima

Martin ni Gertrud Poetzinger

Saavinre paahi miyeeri 3 nnimeya Martin ni Gertrud athelanne ene. Yiira arumeelasaka ntoko mapioneero okathi itthu saaturukeyale aya. Okathi wa olamulelo wa Adolf Hitler, awo yaahivalaanyiwa. Martin aahivariwa mwaakha wa 1936, ni aahiroihiwa ekampo yaavariwa muteko mookhanyereriwa oDachau. Nuuvira okathi, Gertrud aahivariwa. Nto saahivira iyaakha 9 ahiwehanaka mukina ni mukhwaawe. Iyaakha iye sootheene, Martin khaasuwela akhala wiira Gertrud aari mukumi ni Gertrud khaasuwela akhala wiira Martin aari mukumi. Masi ootheene aya, yaahilakela ohihiya okhala oororomeleya. Muhoolo mwaya, Martin aahiroihiwa ekampo ekina yaavariwa muteko mookhanyereriwa ya oMauthausen, weiwo ahaareere awe ohasuliwa. Vano Gertrud, aahilamuliwa oviriha iyaakha 3 nnimeya ori ene mukhatteya mekhawe. Nuumala-vo, aahiviriha iyaakha 4 ekampo yaavariwa muteko mookhanyereriwa ya oRavensbrück. Okathi ekhotto yaamanle aya, Gertrud aahisuwela wiira Martin aari mukumi. Nto Gertrud aahilavula ni komantanti onvekela wiira iyawe okumihiwe mukhatteya. Tivonto, Martin ni Anamoona a Yehova akina yaahitaphuliwa opuro yaahasuliwa aya, ekampo ya oMauthausen. Nuumala iyaakha iye ovira, Martin ni Gertrud yaahitthikela okhala hoothe ni ovara muteko wa Muluku wa okathi wootheene. Moottharelana, awo yaahirowa ebeteli ya oBrooklyn oNova York, weiwo Martin iirela awe mpantta Nikhuuru Noolamulela na Anamoona Yehova. Owo aamakela waaleela anna wiira: “Olipa murima etthu yootepa oreera mutthu onireerela awe okhalana!” Oowanli aya yaahimurumeela Yehova moohakalala ni moororomeleya mpakha okhwa waya.

“Olipa murima etthu yootepa oreera mutthu onireerela awe okhalana!”— Martin Poetzinger

Valentina Garnovskaya

Ekwaha yoopacerya Valentina aasuwenle awe Anamoona a Yehova, waari mwaakha wa 1945. Okathi owo, Valentina aarina iyaakha 20 ni aahilaleeriwa ni munna mmosa okhalaka oBelarus. Munna ole aanimwiixuttiha myaha sa mbiibiliyani, nto Valentina aanisiveliwa itthu aixutta awe. Nave munna ole aahitthikela ikwaha sikina wiira omuleele itthu sa mbiibiliyani. Mooriipiha murima, Valentina khaatthikenle onweha munna ole. Nave, okhala wiira muteko wa Anamoona a Yehova waanikhoottihiwa ni kuvernu a elapo ele, vaanixankiha waaphwanya aahiiso waasuwela Anamoona a Yehova. Hata vaari siiso, moolipa murima Valentina aanaaleela atthu akina itthu aixuttale awe. Mwaha woopaka eyo, Valentina aahitthukweliwa mukhatteya iyaakha 8. Nuumala otaphuliwa mukhatteya mwaakha wa 1953, Valentina aahitthikela waaleela atthu myaha sa mbiibiliyani. Nto mwaha woopaka eyo, aahitthikela otthukweliwa mukhatteya ni aarowa oviriha iyaakha 10 ovaraka muteko, ikampo sinivariwa muteko mookhanyereriwa. Okathi aari awe ekampo emosa enivariwa muteko mookhanyereriwa, Valentina aahaasuwela arokora anceene, yaawo yaarina eliivuru yaakhoottihiwa, eyo piiyo, Biibiliya. Nihiku nimosa, murokora mmosa aahimooniherya Valentina, Biibiliya. Ele yaari ekwaha yoopacerya Valentina anwehale awe Biibiliya, okhuma okathi yoole aavaanela awe ni munna ole, iyaakha vakhaani saavinre! Nuumala otaphuliwa mukhatteya mwaakha wa 1967, Valentina aahipatisiwa. Owo aanikhalela nthiti olaleerya, mpakha otthikela ovariwa ni otthukweliwa mukhatteya mwaakha wa 1969. Okathi owo aahilamuliwa oviriha iyaakha 3 otthukweliwe ene mukhatteya. Hata vaari siiso, Valentina khaahiyale olaleerya moolipa murima. Okathi aakhwiiye awe mwaakha wa 2001, Valentina iira aakhalihenrye ene atthu 44 wiixutta ekeekhai ya mbiibiliyani. Uupuwelelaka itthu sootheene simwiiranenle, Valentina ohimyale so: “Miyo nkitonko okhalana empa. Itthu sootheene kaarina aka kaahela mmaalani. Hata vari siiso, kaanihakalala mwaha woomurumeela Yehova.”

“Miyo nkitonko okhalana empa. Itthu sootheene kaarina aka kaahela mmaalani. Hata vari siiso, kaanihakalala mwaha woomurumeela Yehova.”— Valentina Garnovskaya

Alfredo Fernández

Okathi Alfredo aalattuliwe awe orowa etoropa wArgentina, owo aarina iyaakha 19. Nto mwaha wa murima awe wiixuttihiwe ni Biibiliya, Alfredo aahilakela ohikhaliherya ikhotto. Nave owo aahikhootta wiilepiha ni owara ifartamento sa atoropa. Nto Alfredo aahitthukweliwa mukhatteya mwaha wookhootta orowa etoropa. Ori ene mukhatteya, makwarta yaanimuhasula, ommana ni ikwaha sikina yaanihimya wiira yaarowa omwiiva. Hata vari siiso, Alfredo khaahiyale omusoma Biibiliya ni olepa itthu aixutta awe. Okathi aaphukeliwa awe, xuwiixi aahimyale wiira ammutaphula Alfredo vakhala wiira anwara ifartamento sa etoropa. Moolipa murima, Alfredo aahikhootta owara ifartamento sa etoropa ni aahittikiheriwa mukhatteya. Okhala wiira khaareere omaniwa, owo aahiwereiwa vanceene. Meetiku a ekhatteya ele, aahimyale wiira ekwaha yookiserya aarowa awe onweha Alfredo, waarowa okhala mukaxawuni. Alfredo aahoona wiira moohipisa aamookhwa, nto aahilakela olepa ekarta para amusi awe. Owo aalempe so: “Makhomaso amusi: Miyo kinnoophentani vanceene, nkitonko wuupuwela woolepelani ekarta ntoko ela. Masi kihoona oreerela woolepelani, mwaha wa makhalelo kirina aka.” Alfredo aahaaxukhurela mwaha wa omulipiha, okathi wootheene aari awe mukhatteya. Nuumala-vo, aahilepa wiira: “Kinnimuxukhurela vanceene Yehova, Muluku ahu mwaha wa wiirela mpantta emusi ela . . . Kinnisuwela wiira khivanirowa wookhweelani osoma ekarta ela. Masi kinoovekelani wiira muheemererye woona owereya ni oriipiwa murima owiirihakani okhulumuwa, masi muhaana oxintta mixankiho iyo. Munvarexexeke Biibiliya, maana owo onninimaaliha . . . Muhikhala-khale muliyalaka wiira okhwa ti wa okathi vakhaani paahi, nto okathi munrowa anyu okuupuwelaka, muhiliyale wiira koororomeleya wa Yehova mpakha wanikisa. Kinlipelela wiira eyo yookhalihenryeni ohihiya ororomeleya.” Nuumala ovira iyaakha 3, mwaakha wa 1982 Alfredo aahikhwa orina ene iyaakha 21. Owo khaahiyale ororomeleya mpakha wanikisa wa okumi awe.

“Kinoovekelani wiira muheemererye woona owereya ni oriipiwa murima owiirihakani okhulumuwa, masi muhaana oxintta mixankiho iyo.”— Alfredo Fernández

Karen Oehm

Karen aahimurumeela Yehova omiravo awe wootheene. Owo aari mutthu oohakalala ni oopatthaneya. Waanimusivela vanceene orumeela ntoko pioneera. Muhoolo mwaya, nuumala otheliwa ni Rainer, awo yaarumeela ebeteli ya wEstados Unidos. Okathi aarina awe iyaakha 55, Karen aahoona wiira aahikhalana oretta wuulupale. Oretta owo onisuweliwa okhala esclerose lateral amiotrófica (ELA). Oretta owo onnihonona iseelula sa mutthu, onamwiiriha vakhaani-vakhaani ohiwerya weetta, wiittikinya ni ovara itthu sikina mpakha okhwa. Okhuma wanipacerya wa oretta ole, Karen aahilakela wiimananiha ovara ele aawerya awe moovarihana ni makhalelo awe. Owo aaniimananiha opaka yoosoma awe ya Biibiliya, olaleerya ni opaka marukunuxo vaavo oretta awe waatepa aya wunnuwa. Okathi aapacenrye awe ohiwerya olavula, Karen aahiixutta omurumeela komputatoore oniwerya olepa moolumo vateelani orumeelaka maitho. Nto eyo, yaanimukhaliherya olepa ileetera mpakha ohimya etthu aaphavela awe. Nnaamwi vaari vooxankiha opaka eyo, Karen aaniwerya olepa ikomentaario sawe para mithukumano ni olaleerya orumeelaka ikarta. Nfirimeera awe mmosa, yoowo ori Namoona a Yehova onihimya so: “Karen khotonko ohimya wiira: ‘Xeeni etthu ela ehalaka okiiraneela miyo?’” Sihalaka isumana piili wiira okhwe, owo aahimulepela ekarta muthiyana mmosa, yoowo aamusomiha awe Biibiliya. Ekarta ele aamalihale ohimyaka so: “Vakhala wiira munniriipiwa murima ni okhulumuwa, miyo kiri va, pooti ovaanela khula okathi muniphavela anyu.” Nfirimeera awe mukina ohimmye so: “Owo khotonko wiixinliha mwaha wa oretta awe. Hata aasuwela wiira khaarowa openuwa, owo khaatepexa oriipiwa murima mpakha okhulumuwa. Aanaamini vanceene yooleiherya ya ohihimuxiwa. Nto okupali iwo waahimukhaliherya ohikhulumuwa, maana aanisuwela wiira Yehova onrowa omuhihimuxa ni omukhaliherya okhalana okumi wooloka.” Okhala wiira yaari maphapo aahiiso mampasa, okathi Karen aawereiwa awe, muhima awe aahimukoha wiira: “Etthu xeeni enookhaliheryani ovilela?” Karen aamwaakhunle so: “Yehova onninivaha ikuru nimpirisari ahu wiira nivilele.” Tthiri eyo ti etthu yiiraneyale mpakha okhwa wawe. Nuumala Karen okhwa, iyawe aahikumiha ikarta sinceene Karen aalempe awe wiira aalipihe ni waamaaliha apatthani ni amusi.

“Yehova onninivaha ikuru nimpirisari ahu wiira nivilele.” — Karen Oehm

13. Etthu xeeni eniwiirihani ohihiya olipa murima?

Mwaakhule va

¹³ Nkahaya muupuwele, okathi elapo yootheene enrowa aya okhala murettele ni anrowa aya ohihimuxiwa atthu ootheene akhwiiye. Okathi owo, nnimwaasuwela alopwana ni athiyana oolipa murima naathokorenrye ahu eliivuru ela ni ale nihaathokorenrye ahu. Olumwenku ola wa Satana, atthu anceene aahasuliwa, nave akina ahiiviwa mwaha wa waamini waya. Okathi anrowa aya ohihimuxiwa elapo esya, awo khanirowa othanana mwaha woothanla omurumeela Yehova. Ankhi nyuwo? Vaavo munrowa anyu okhaliheryaka muteko onrowa ovariwa wiira elapo ela ekhale eparayiisu, niireke munoothanana mwaha wa olipa murima ni omphenta Yehova mahiku ala ookiserya? Nnaari! Nto mwiimananiheke ohihiya olipa murima mpakha wanikisa. Yoothanla anyu eyo, enimoophwanyihani ohakalala mahiku ootheene!

Anna, arokora ni anamwane ahakalalaka ari ene mparayiisu. Akina alyihaka miici, vano akina anwehaka mwaamunama oniihaniwa caracal, akina apakaka epiisa, akina avaanelaka ni akina yiipaka.