Fevereiro

Anna arina mikhalelo sooloka, aakhalana efaita yinceene mmulokoni. Mulopwana ooreera murima, onniimananiha okhaliha murettele. Akhala wiira muniphavela osuweliwa ntoko mutthu ooreera murima, mwaawiriyaneke atthu akina ni nvaheke ephoole miyoonelo saya. Vakhala wiira muri muthukumano wa axitokweene, niireke mwaamukhaliherya soothanla sa axitokweene akina, vakhala wiira khasinvirikanya malamulo ni sooruma sa mbiibiliyani? Muhithipeleleke opaka itthu mwa enamuna muniphavela anyu. Muhaana ovaha ephoole miyoonelo sa atthu akina. (Maph. 13:​8, 9; Mir. 15:22) Ohiya omakelaka waavaanyiha atthu akina, mukhaleke ooreera murima ni olavula mwa enamuna yooloka. Vakhala wiira mwa mutthu a murettele, munrowa wiimananihaka okhaliha murettele hata okathi wooxankiha. (Yak. 3:​17, 18) Vakhala wiira munoolavulaka saana ni atthu ootheene waahela muhina ale ahikhale Anamoona a Yehova, munoowerya waakhaliherya okhala oomaaleleya ni ovukula onanariwa. — Aph. 8:​1-3; Mir. 25:15; Math. 5:​23, 24. w24.11 23 etti. 13

Ekeekhai wiira Kristu “ohookhwa ekwaha emosa paahi”, masi hata vari siiso, owo nlelo onnipaka itthu sinceene mmureerelo ahu. (Arom. 6:10) Itthu xeeni onipaka awe mmureerelo ahu? Nlelo Yesu onninivaha itthu sinceene sooreera, seiyo ninwerya ahu ophwanya, okhala wiira oonoopola. Nrowe niwehe etthu onivara awe olelo-va mmureerelo ahu. Owo onirumeela ntoko Mwene ahu, Namukuttho Muulupale ni muru wa muloko. (1 Akor. 15:25; Aef. 5:23; Ahep. 2:17) Yesu tonihoolela muteko wa othukumanyiwa wa ale oothanliwa ni muttitthi muulupale, muteko yoowo onrowa omala ohinatthi ophiya wanikisa wa maxakha maalupale. (Math. 25:32) Nave-tho, owo onnimurumeela murumeyi oororomeleya ni ankhili, wiira onivaheke itthu sinnikhaliherya ohihiya omurumeela Yehova moororomeleya mahiku ala ookiserya. (Math. 24:45) Nave okathi onrowa awe olamulelaka iyaakha 1 000, Yesu nlelo onoovara itthu mmureerelo ahu. Mweekeekhai, Yehova onvaha Mwanawe mmureerelo ahu! w25.01 24 itti. 12

Okathi Yehova onnilevelela awe, owo onnittipiha soottheka sahu ni khonuupuwela-tho. Nto mwaha wa yeeyo, nnoowerya okhalana ompatthani wooloka ni Tiithi ahu a wiirimu Yehova. Nave okathi omosa-ru, ninniweha wiira olevelela wa Yehova yoovaha yuulupale para hiyo. Siiso, owo onniwooniherya apinaatamu oottheka ophenta wuulupale ni omoriwa wawe ikharari, nnaamwi ahiphwanelaka. Hiyo nihaana omuxukhurela vanceene Muluku ahu Yehova, mwaha woowi onnaalevelela “atthu ni murima wootheene”! (Esal. 130:4; Arom. 4:8) Masi naaphavelaka wiira Yehova onilevelele, nihaana opaka etthu yuulupale. Yesu aahimmye so: “Vakhala wira khamunaalevelela ale anootthekelani, nave Tiithi inyu ori wiirimu, khonoolevelelani.” (Math. 6:​14, 15) Ninniweha wiira hiyo, nihaana otakiha olevelela wuulupale wa Tiithi ahu Yehova. w25.02 13 itti. 18-19

Nkahaya nwuupuwele atthu yaakhala oSodoma ni oGomora. Lothi, mulopwana axariya aakhala eriyari ya atthu awo. Masi niireke Lothi aahiwerya waalaleerya atthu ootheene yaakhala muttetthe ole? Nnaari. Moohaanyiherya, atthu awo yaari otepa otakhala, masi hata vari siiso, niireke atthu awo yaanisuwela etthu yooloka ni yoohiloka? Vanikhala wiira nnaari, maana akina a yaawo yaahiimananiha waatuphela aletto a Lothi. Biibiliya onihimya wiira atthu awo yaahela muhina “okhuma amiravo mpakha atthu oowuuluvala.” (Maph. 19:4; 2 Ped. 2:7) Niireke nihaana ohimya wiira Muluku ahu oomoriwa ikharari Yehova, oolakela wiira khonrowa omuhihimuxa nnakhala mmosa a atthu ale? Khanikhanle oohimya eyo. Yehova aahimuleela Abrahamu wiira epooma ele khiyaakhanle nnakhala atthu muloko yaari axariya. (Maph. 18:32) Atthu awo khahiyo yaari axariya, nto Yehova ahikhalana ehakhi ya waapwetexa mwaha wa miteko saya. Niireke nihaana ohimya wiira khuuvo onrowa ohihimuxiwa okathi anrowa aya okhuma mmahiye . . . ale avanre miteko sootakhala? Nnaari, khanikhanle oohimya eyo! w24.05 2 etti. 3; 3 etti. 8

Mwaha wa oturukeya makhalelo, atthu akina yaaheemererya muteko yoowo waawiirinhe okhala ottaiwene ni emusi aya. Masi nuuvira okathi, ahoona wiira yoothanla ele khahiyo yaari ya miruku. Muhinatthi weemererya muteko, muhuupuweleke paahi musurukhu munrowa nyu waakhelaka masi muupuweleke vakhala wiira muteko owo onimookhaliheryani nyuwo ni emusi anyu olipiha waataana wanyu ni Yehova. (Luka 14:28) Mwiikoheke so: ‘Exeeni enrowa omwiiraneela ole othelanne aka kakhala ottaiwene? Kiireke muteko ola onookeemererya orowela mithukumano sootheene, olaleerya ni oviriha okathi kiri ene ni anna ni arokora?’ Vakhala wiira mookhalana anamwane, vaamureerela wiikoha so: ‘Kiireke kinoowerya waakhaliherya anaaka okhalana waataana wooloka ni Yehova ni omwiiwelela?’ (Aef. 6:4) Okathi munipaka anyu soothanla, mutthareke moonelo wa Yehova ohiya otthara miruku sa amusi ni apatthani yaawo ahiniiwelela malakiheryo a mbiibiliyani. w25.03 29 etti. 12

Mukristau ohirina waamini woolipa, pooti omora ottharaka “soowiixuttiha sowoothiwa” sinihimmwa ni ale anilaleya mihupi soowoothiwa aahiiso owokiwa ni anamavirikanya. Pooti waakhalelaka nrima atthu akina, okumiherya ohiiwanana mmulokoni, okhala mutthu oowaakuva oveeheya mwaha wa itthu atthu akina anipaka aya aahiiso omorela muraakho waarowa omwiiriha opaka etampi yuulupale. (1 Akor. 3:3) Biibiliya onnimulikanyiha mutthu orina waamini woolipa ni moota mutthu oninnuwa awe. (Aef. 4:15) Mwaana, onniprisari okhaliheriwa okhala wiira khonsuwela etthu. Mwa ntakiheryo, mmuupuwele maama oninvarela mwaana awe moono okathi anitupha aya estaraata enivira ikaaro. Vaavo mwaana owo oninnuwa awe, maama owo onnimweemererya wiira otupheke estaraata mekhawe. Masi maama owo khonrowa ohiya omuupuxerya mwaana awe, wiira ohaana oweha mipantta soomiili sa estaraata ohinatthi otupha ni okhalana ephoole ni ikaaro. Mwaana owo annuwa vale, onoosuwela etthu yoopaka ohinatthi otupha estaraata. Moolikanasa, mukristau orina waamini woolipa, onoorowa osuwela moota woopaka soothanla sooloka ottharaka malakiheryo a mbiibiliyani ni okhalana moonelo wa Yehova. Nuumala-vo, mukristau owo onoowerya ovarihela muteko itthu siixuntta awe. w24.04 3 itti. 5-6

Mwa iyaakha sinceene, aletto a Yehova yaari yaale paahi yaakhala ni yena wiirimu. Moottharelana, Yehova aahincererya eheema awe, aapattuxa apinaatamu valaponi wiira nave akhale aletto awe. Akina a aletto awo, yaari ala: Enookhi, Nowe, Abrahamu ni Yoobi. Biibiliya onihimya wiira awo yaari apatthani eekeekhai a Muluku, okhala wiira yaanimwiiwelela aahiiso ‘yeetta ephiro ya Muluku.’ (Maph. 5:24; 6:9; Yoobi 29:4; Yes. 41:8) Okhuma khalai, Yehova khonihiya waalattula apatthani awe wiira akhale aletto awe. (Ezek. 37:​26, 27) Mwa ntakiheryo, eprofesia ya Ezekiyeli, enniniixuttiha wiira Muluku onniphavela ni murima awe wootheene wiira arumeyi awe eekeekhai, ekhalane opatthani woolipa ni yena. Owo onnileiherya wiira onimwaavaha nivarihano aahiiso waataana ohinimala, ontthuna waaruhela murettele. Eprofesia ela, ennihimya okathi arumeyi a Yehova ale arina nlipelelo na orowa wiirimu ni ale arina nlipelelo na okhala valaponi, anrowa aya okhalaka moowiirana muheemani mwa Yehova, ntoko “nikoto nimosa.” (Yoh. 10:16) Eprofesia ela enniiraneya olelo-va! w24.06 2 etti. 2, 4; 3 etti. 5

Ntoko arumeyi a Muluku, nihaana okhaliherya Omwene wa Muluku. Masi ikwaha sikina wiira nipake eyo nimpirisari olipa murima. (Math. 6:33) Mwa ntakiheryo, olumwenku ola wootakhala ninkhala ahu, nimpirisari okhala oolipa murima, wiira niiwelele malakiheryo a Yehova ni olaleya ihapari sooreera sa Omwene. Nave nihaana okhala oolipa murima wiira nihiirele mpantta olumwenku ola, khula ookathi onootepa okawanyeya myaha sa epoliitika. (Yoh. 18:36) Arumeyi anceene a Yehova, annipweteiwa mireerelo saya, olupatthiwa, nave akina annitthukweliwa mukhatteya mwaha wa ohiirela mpantta myaha sa epoliitika ni ohirowa owana ekhotto. Hiyo nave, nnoowerya okhala oolipa murima, niixuttaka ni matakiheryo arumeyi a Yehova yaarina mukhalelo owo ni yaamukhaliherya Yehova ni Omwene awe moororomeleya. Mwene ahu Yesu Kristu, moolipa murima aahikhootta wiirela mpantta myaha sa epoliitika sa olumwenku ola wa Satana. (Math. 4:​8-11; Yoh. 6:​14, 15) Khula okathi Yehova aanimukhaliherya Yesu okhala oolipa murima, ni aaninvaha ikuru aapirisari awe wiira opakeke itthu sooloka. w24.07 3 etti. 4; 4 etti. 7

Yehova aaheemererya wiira etthu ele yooriipiha murima yaawiiranenle Adamu ni Eva, elempwe para mureerelo ahu. Eyo enninikhaliherya osuwela nthowa naya Yehova enimunanara aya vanceene etampi. Etampi ennihonona waataana wahu ni Yehova ni ennikumiherya okhwa. (Yes. 59:2) Satana onnimunyokha Yehova ni onnaanyokha apinaatamu. Tivo aawiirinhe awe Adamu ni Eva opaka etampi. Nave, mpakha olelo-va, onniwiiriha apinaatamu opaka etampi. Okathi Adamu ni Eva yaatthenke aya, woonasa wene Satana uupuwela wiira aahihonona etthu Yehova aalakenle awe para apinaatamu. Masi owo khaasuwela wiira Yehova toophenta vanceene. Muluku khothurunke etthu olakenle awe owiirela anaaya Adamu ni Eva. Muluku onnaaphenta apinaatamu. Tivo, moowaakuveya aahaavaha nlipelelo ootheene aya. (Arom. 8:​20, 21) Yehova aanisuwela wiira yaamukhala atthu yaarowa othanla omphenta ni omwiiwelelaka yena. Ntoko Tiithi aya ni Mpattuxa aya, Yehova anwiiriha atthu awo omwaattamelaka yena ni aamwaakhaliherya wiira yoopoliwe mwaha wa itampi saya ni anwaakiherya okhwa. w24.08 3 itti. 3-4

Anamunceene animurumeela Yehova, waatteliwa miteko. Hiyo ninnivara muteko wiira niikhaliherye ni waakhaliherya amusi ahu. (1 Tim. 5:8) Anna akina, ahaana waakhapelela anamuyari aya yuuluvanle aahiiso aniwereyasiwa. Nave-tho nihaana okhalana okathi wiira nikhapelele okumi ahu. Ohiya-vo, nookhalana-tho miritti sikina mmulokoni. Muteko muulupale nirina ahu, ori okhalela nthiti olaleerya. Omusoma Biibiliya ti etthu eri yootepa “okhalana efaita” mukristau onireerela awe opaka, tivonto nihaana ovaha efaita. Nlavulaka sa mulopwana oohakalala, Esaalimu yoopacerya enihimya so: “Etthu enimusivela vanceene ti nlamulo na Yehova, Owo onnisoma ni ephoole nlamulo na Muluku, othana ni ohiyu.” (Esal. 1:​1, 2) Eyo enitaphulela wiira nihaana wiivaha okathi wiira nimusome Biibiliya. Masi okathi xeeni wooreerela wiira nimusome Biibiliya? Nyuwo mukhanle oothanla okathi mukhanle anyu opaka eyo. Masi ohimya ekeekhai okathi wooreerela, ti yoole muniwerya anyu omusoma. w24.09 3 itti. 5-6

Niireke mukristau orina waamini woolipa onnipirisari okhaliheriwa ni mutthu mukina? Aayo. Anna ni arokora arina waamini woolipa, ikwaha sikina annipirisari okhaliheriwa. Mukristau ohirina waamini woolipa, oniphavela wiira atthu akina amuleeleke etthu yoopaka wala opakeliwa soothanla. Moovirikana ni vo, mukristau orina waamini woolipa onnaavekela miruku atthu akina arina waataana wooloka ni Yehova. Nave onnisuwela wiira Yehova oniphavela wiira khula mutthu oteexeke muritti awe. Ootheene ahu, naatthu oovirikana. Mwa enamuna emosa-ru, makristau arina waamini woolipa aakhalana mikhalelo soovirikana. Akina toosuwela, tooreera murima, toolipa murima, toovaha ni toomoriwa ikharari. Makristau manli arina waamini woolipa, pooti okhalana muxankiho mmosa-ru masi anapaka soothanla soovirikana moovarihana ni malakiheryo a mbiibiliyani. Eyo enniiraneya ni khula mutthu, moovarihana ni moota iixuttinha awe murima awe. Ti maana aya, vahinreerela aya ophukelana mukina ni mukhwawe mwaha wa soothanla soovirikana apanke aya. Nave awo ahaana wiimananiha ophavela okumiherya murettele. — Arom. 14:10; 1 Akor. 1:10. w24.04 4 itti. 7-8

Exeeni mukhanle anyu oopaka akhala wiira nlelo munnoona wiira khamurina efaita? Etthu mukhanle anyu oopaka, ori osoma iversiikulu sa mbiibiliyani sinrowa wookhaliheryani woona wiira Yehova onnoovahani efaita ni wuupuwelela. Muhiilikanyiheke ni atthu akina ni muhiwehexexeke itthu muhiniwerya anyu opaka. Yehova khonlipelela wiira munrowa opakaka itthu muhiniwerya anyu. (Esal. 103:​13, 14) Nyuwo khamurina nthowa vakhala wiira mutthu oowiirihani etthu yoohiloka! Masi muupuweleke wiira Yehova onimwaaphukela ale aniwiirela akhwaaya itthu sootakhala ni onimwaakhaliherya ale anipuheriwa. (1 Ped. 3:12) Muhiliyale wiira Yehova pooti woorumeelani wiira mwaakhaliherye atthu akina. Owo ohoovahani eparakha wiira nvareke hoothe muteko woolaleerya. (1 Akor. 3:9) Mwaha wa itthu sooxankiha siwiiranenleni, pooti wookhweelani wiiwexexa aahiiso osuwela moonelo wa atthu akina, yaawo sinaaphwanya mixankiho. Munoowerya opaka itthu sinceene wiira mwaakhaliherye. w24.10 7-8 itti. 6-7

Yehova onniweha moota atthu akina annithokorerya aya. Biibiliya onihimya wiira “Yehova ennimusivela exariya.” (Esal. 37:28) Yesu ooleiherya wiira Yehova “khonrowa opisa owiirela exariya” arumeyi awe, okathi wooreerela. Moohipisa, Yehova onoomaliha mixankiho sootheene ni inamuna sootheene sa ohixariya. (Esal. 72:​1, 2) Nenna-va, nihaana olipelela okathi Yehova onrowa awe omaliha mixankiho sootheene. Masi ohinatthi ophiya okathi owo, Yehova onninleela etthu nimpirisari ahu opaka vaavo ninthokoreriwa ahu moohixariya. (2 Ped. 3:13) Wiira nihitepe wiikumiherya mixankiho, Yehova onninleela etthu nikhanle ahu oopaka okathi ninthokoreriwa ahu moohixariya. Ohiya-vo, omurumeelaka Mwanawe Yesu Kristu, Yehova oonivaha ntakiheryo na moota nikhanle ahu oovilela ohixariya. Nave mbiibiliyani, Yehova onninivaha miruku seiyo sinnikhaliherya okathi atthu akina annithokorerya aya moohixariya. w24.11 2-3 itti. 3-4

Okathi ole Yesu aalavunle awe wiira muttitthi ole ovahiwe yoolya, mwaha owo waari muxankiho muulupale okhala wiira yaahikhala alopwana oowiiraka 5.000. Nave naahela muhina athiyana ni anamwane yaari opuro ole, woonasa wene, yaahikhala atthu oowiiraka 15.000. (Math. 14:21) Andreya aahimmye so: “Ookhala-va mmiravo mmosa orina iphaawu thanu ni ihopa piili saamukhaani. Niireke sinimwaaphiyerya atthu oowaatta siisa?” (Yoh. 6:9) Ephaawu ya esevaata, yaari eyoolya yaalyiwa khula nihiku, nave ihopa saamukhaani woonasa wene, saari sa maakha ni soowuuma. Nave iphaawu aarina awe mmiravo ole, saari vakhaani ni khivaarowa oweryaneya atthu ootheene ophwanya! Ooniheryaka wiira aahaakhela muttitthi ole, Yesu aahiruma okilaathi vamalaxini makithi ari ene ikurupu sene. (Mar. 6:​39, 40; Yoh. 6:​11-13) Yoowiiraneya ela, ennooniherya wiira Yesu aahimuxukhuru Tiithi awe mwaha wa iphaawu ni ihopa. Vaari vooloka omuxukhurela Tiithi awe, maana owo taakumihenrye eyoolya ele. Tthiri nla, ntakiheryo nooloka ninreerela ahu otthara na ovekela nihinatthi olya. Nto Yesu aahiruma okaiwa eyoolya ele, ni atthu ootheene yaari opuro ole yaahilya ni yaahivona. w24.12 2-3 itti. 3-4

Okathi Yesu aari awe valaponi, owo aahinvuwiha Tiithi awe, ooniheryaka wiira Yehova taamukhaliherya opaka miiriirya iye. (Mar. 5:​18-20) Nave-tho, Yesu aahinvuwiha Yehova, mwa enamuna aamulavula awe Tiithi awe ni moota aawoonela awe atthu akina. Ekwaha emosa, Yesu iira iixuttihaka musinagoga. Mmosa a atthu ale yanwiriyana, aari muthiyana aavariwe ni nlaikha nootakhala mwa iyaakha 18. Nto nlaikha nle, naahiiriha erutthu ya muthiyana ole wuurama, ohiinawerya weemela moowookololowa. Tthiri eyo yaari etthu yooriipiha murima! Omoonelaka othunku, Yesu aahimwaattamela muthiyana ole onamulavuliha mooreerela murima, iiraka: “Muthiyana, moopenuxiwa eretta anyu.” Moottharelana, Yesu aahimwiixaatherya matata awe. Okathi ene yoole, muthiyana ole aahookololowa “khupacerya onvuwiha Muluku”. Muthiyana ole, aahimuxukhurela Muluku mwaha woomukhaliherya okhala saana! (Luka 13:​10-13) Nto okhala wiira aahikhaliheriwa, eyo yaahimwiiriha onvuwiha Yehova. Ni hiyo, sookhala itthu sinniiriha onvuwiha Yehova. w25.01 2-3 itti. 3-4

Niireke vanniweryaneya olokiherya itthu sootheene Adamu ni Eva ahononne aya? Aayo, vanniweryaneya. Masi apinaatamu mekhaya-ru khaniwerya olokiherya. (Esa. 49:​7-9) Nto nahaakhaliherinwe, khinaarowa olipelela itthu sooreera sinrowa wiiraneya muhoolo ni khinaarowa olipelela ohihimuxiwa. Moohaanyiherya, naamookhwa nihilipelelaka etthu ntoko inama. (Mus. 3:19; 2 Ped. 2:12) Tiithi ahu oophenta, onvaha mwanawe wiira oliverye etampi ya Adamu. Olavulaka sa yoovaha eyo, Yesu aahimmye so: “Muluku oophentexa olumwenku, mpakha onvaha Mwanawe mmoseene, wira otheene ale anooniherya omwaamini yoowo, ahipwetexiwe, masi akhalane okumi woohimala.” (Yoh. 3:16) Mukuttho wa Yesu, onninivaha eparakha yookhala mahiku ootheene. Ninniphwanya mareeliho mwaha wa yoowoopola, maana soovonya aahiiso “itampi” sahu, sooleveleliwa. w25.02 3 itti. 3-6

Exeeni yaamukhalihenrye Saulo othanla opatisiwa? Ori ene wiirimu, Yesu aahilavula ni Saulo, nuumala-vo, waahikhumelela waarya weiwo waamwiirinhe Saulo ohoona. (Mit. 9:​3-9) Saulo aahiviriha mahiku 3 ohiwuryaka ni ohilyaaka etthu. Moohaanyiherya, owo aanuupuwelela vanceene etthu ele yaamwiiranenle. Nto eyo yaahimukupaliha Saulo wiira Yesu aari Mesiya, ni atthareli awe yeettela etiini yeekeekhai. Tthiri khasireere itthu nikhanle ahu oowiixutta ni yoowiiraneya ya Saulo. Wiixinnuwiha ni owoova atthu, wammwiiriha okhootta opatisiwa. Masi owo kheemerenrye wiira eyo yiiraneye. Saulo aahilakela okhala mukristau, hata aasuwenle wiira aarowa olupatthiwaka. (Mit. 9:​15, 16; 20:​22, 23) Nuumala opatisiwa, owo khaahiyale omuroromela Yehova wiira ammukhaliheryaka ovilela khula muxankiho. (2 Akor. 4:​7-10) Waamini wanyu pooti weehereriwa nuumala nyuwo opatisiwa ntoko Namoona a Yehova. Masi muhiliyale wiira khula okathi Yehova ni Yesu Kristu, anrowa wookhaliheryakani wiira nvilele ni muhihiye ororomeleya. — Afil. 4:13. w25.03 4 itti. 8-9

Omusoma Biibiliya etthu yooreera. Masi wiira nttottele mureerelo yoosoma ahu ya Biibiliya, sookhala itthu sikina ninreerela ahu opaka. Muupuwele ela: Epula yookhalana efaita yuulupale valaponi. Masi akhala wiira enoorupa epula yinceene mwa okathi vakhaani paahi anookhala maasi manceene. Nto akhala wiira eyo enimwiiraneya, epula enivikaniha orupa khenivareleya-tho muteko. Ti vooloka okathi epula enrupa aya vakhaani-vakhaani okhala wiira maasi anninaaniha etthaya oratta ene wiira miri sinnuweke saana. Mwa enamuna emosa-ru nihimusomeke Biibiliya moowaakuveya, maana opaka eyo, ele enisoma ahu khenrowa oniphwanyiha mureerelo. (Yak. 1:24) Niireke mootoko omusoma Biibiliya nuumala-vo nweha wiira mwaamusoma mwaakuveyasaka? Etthu xeeni mukhanle anyu oopaka? Musomeke moohaakuveya. Opaka eyo enimookhaliheryani wiiwexexa ele munisoma anyu. Nto nyuwo pooti othanla wuncererya okathi onimusoma anyu Biibiliya, wiira muupuweleleke ele enisoma anyu. w24.09 4 itti. 7-9

Okathi anaakhela aya malakiheryo, axitokweene ahaana osoma ni ephoole ni wiimananiha wiira avariheleke muteko. Ohiya paahi waakhela malakiheryo a moota woopaka mithukumano mmulokoni ni ovekela, awo annaakhela malakiheryo a moota wookhapelela ipwittipwitthi sa Kristu. Vaavo axitokweene anitthara aya malakiheryo anivahiwa aya ni mutthenkeso, anna ni arokora annoona wiira anniphentiwa ni annikhapeleliwa ni Yehova. Okathi nnaakhela ahu malakiheryo ni axitokweene, nihaana wiimananiha otthara. Akhala wiira nnoopaka eyo, vanookhala vookhweya axitokweene ovara saana muteko ni weettiha muloko. Biibiliya onnileela wiira nihaana owiiwelela ale annihoolela moohinlaseya. (Ahep. 13:​7, 17) Masi ikwaha sikina pooti okhala vooxankiha opaka eyo. Mwaha wa xeeni? Mwaha woowi axitokweene awo annihoolela atthu oottheka. Nto vakhala wiira ninrowa owehexexaka ifaalya saya, nihinaweha mikhalelo saya sooreera, ohimya ekeekhai ninrowa omukhaliheryaka nwanani ahu. Mwa enamuna xeeni? Nwanani ahu, oniphavela wiira naanyiheryeke wiira Yehova onnirumeela mutthenkeso awe wiira oneettiheke. Vaakhanle wiira nanwehexexaka ifaalya sa anna annihoolela, ohimya ekeekhai naarowa wuupuwelaka itthu soohiloka voohimya sa mutthenkeso ahu. Nto eyo yaamuniiriha waanyiheryaka mutthenkeso wa Yehova. w24.04 10 itti. 11-12

Niireke atthu ootheene anrowa oopwetexiwa okathi wa maxakha maalupale, khanrowa-tho okhalana nlipelelo na ohihimuxiwa? Biibiliya, onnitthokiherya oratteene wiira yaale anrowa omurukunuwela Yehova, anoopwetexiwa okathi wa Armagedoni ni khanrowa okhalana-tho eparakha ya ohihimuxiwa. (2 Ates. 1:​6-10) Masi okathi wa maxakha maalupale, atthu akina pooti okhwa mwaha wa mathowa oovirikana. Mwa ntakiheryo, animookhwa mwaha wa eretta, wuuluvala, mwaha wa asitenti aahiiso wiiviwa ni mutthu mukina. Masi exeeni enrowa owiiraneela atthu awo? (Mus. 9:11; Zak. 14:13) Niireke atthu awo anrowa okhala vamosa ni “ale ahikhanle anaxariya”, yaawo anrowa ohihimuxiwa elapo esya? (Mit. 24:15) Hiyo khaninsuwela waakhuliwa waya. Masi, sookhala itthu sikina ninsuwela ahu sinrowa wiiraneya muhoolo. Mwa ntakiheryo, noosuwela wiira okathi wa Armagedoni, atthu anrowa ophukeliwa moovarihana ni moota yaathokorerya aya axinnawe Kristu. (Math. 25:40) Nave ale yaakhaliherya makristau oothanliwa vamosa ni Kristu, anrowa ophukeliwa ntoko ipwittipwitthi. — Wis. 12:17. w24.05 10-11 itti. 9-11

Biibiliya onihimya wiira ninkhala “mahiku ookiserya”, makhalelo ari aya ooxankiha ni oowoopiha. (2 Tim. 3:1) Ohiya paahi ovilela mixankiho sinaaphwanya atthu ootheene, mwaha wookhala olumwenku ola wootakhala, arumeyi a Yehova annivilela mwaha wa olupatthiwa. Nto exeeni enniiriha ohihiya omurumeela Yehova nnaamwi siniphwanyaka mixankiho iyo? Etthu emosa ennikhaliherya mwaha woosuwela wiira Yehova, “Muluku mukumi.” (Yer. 10:10; 2 Tim. 1:12) Yehova Muluku eekeekhai nave yena onniweha mixankiho sinniphwanya ni khula okathi onniphavela onikhaliherya. (2 Wah. 16:9; Esal. 23:4) Vaavo nnuupuwelela ahu wiira Muluku onninthokorerya ni khula okathi onninikhaliherya, eyo enniniiriha ovilela khula muxankiho onniphwanya. w24.06 20 itti. 1-2

Khula okathi nihaana ororomelaka mutthenkeso wa Yehova. Okathi anikumiheriwa aya marukunuxo a moota nniiwexexa ahu ikeekhai sa mbiibiliyani aahiiso a moota nimmurumeela ahu Yehova, ale annihoolela mmutthenkesoni, annipaka marukunuxo moowaakuveya. Annipaka eyo, okhala wiira etthu aniphavelexa aya omuhakalaliha Yehova. Nave anniimananiha opaka soothanla avarihelaka muteko Nuulumo na Muluku. Nto arumeyi ootheene a Yehova, ahaana opaka eyo. Murummwa Paulo aahimmye wiira: “Muhihiye otthara moolumo ooreera.” (2 Tim. 1:13) “Moolumo ooreera” anitaphulela soowiixuttiha sa makristau siniphwanyaneya mbiibiliyani. (Yoh. 17:17) Nto moolumo awo tanniixuttiha itthu sootheene ninkupali ahu. Tivonto, mutthenkeso wa Yehova onniniixuttiha moota woovarexexa soowiixuttiha iyo. Akhala wiira nnoopaka eyo, nnoophwanya mareeliho. w24.07 11-12 itti. 12-13

Murummwa Pedru aahiixutta oratteene ele enitaphulela aya orukunuxa murima ni olevelela. Tivo, aahiwiixuttiha atthu akina etthu aixuttihiwe awe. Ovinre ene okathi vakhaani nuumala efesta ya Pentekoositi, Pedru aahilavula mwaha ohoolo wa ayuda anceene yahaamwaamini Muluku, otthokiheryaka wiira awo yaahimwiiva Mesiya. Owo aahaatumererya atthu ale, oriki: “Tivo, murukunuxe murima anyu, muturuke mweettelo anyu, wiira Yehova ooleveleleni itampi sanyu ni ooruuheleni mahiku a murettele”. (Mit. 3:​14, 15, 17, 19) Pedru aahiixuttiha wiira natampi onnirukunuxa murima attharuwa vale. Eyo enitaphulela wiira owo onnituruka muupuwelo awe ni mweettelo awe woohiloka, onnihiya opaka itthu soohiloka, nave onnipacerya opaka itthu sinimusivela Muluku. Murummwa Pedru aahooniherya wiira Yehova aamwaalevelela ni murima wootheene. Eyo enitaphulela wiira aamuttipiha itampi saya mpakha omala-mala. Okathi ninttharuwa ahu itampi sahu, hata siri ene suulupale, ti voolipiha osuwela wiira Yehova onoonilevelela ni murima wootheene! w24.08 12 etti. 14

Nakhalana waamini wiira Yehova onoopwetexa olumwenku ola voohipisa, hiyo khaninrowa woona wiira okhalana musurukhu ni mireerelo sinceene, teri etthu erina efaita yuulupale. Okathi wa maxakha maalupale, musurukhu aahiiso mihakhu khasinrowa okhalana efaita. Biibiliya onihimya wiira “eparatha aya enooriheliwa muramphani” mwaha woowi anoosuwela wiira “hata eparatha, hata eweero aya kisinrowa owoopola nihiku noonanariwa wa Apwiya”. (Ezek. 7:19; Piipiliya Emakhuwa.) Ohiya wiithukumanyerya mihakhu, nihaana opaka soothanla sinrowa okhaliherya okumi ahu nave-tho okhaliherya emusi ahu ni sinrowa onikhaliherya ohihiya omurumeela Yehova. Khivaarowa okhala vamiruku orumeela musurukhu munceene aahiiso oviriha okathi munceene nikhapelelaka itthu sa weerutthuni. Nihaana okhalana ephoole wiira nihivaheke efaita yinceene itthu nirina ahu. (Math. 6:​19, 24) Vaavo vanaattamela aya wanikisa, hiyo nihaana othanla vakhala wiira nimmuroromela Yehova aahiiso mihakhu. w24.09 11 itti. 13-14

Woonasa wene, hiyo pooti owerya oxintta sooweha sikina moowaakuveya. Masi sikina pooti oviriha okathi munceene niimananihaka oxintta. Nrowe nthokorerye etthu yiiraneyale ni murummwa Pedru. Owo aahimukhootta Yesu ikwaha tthaaru ooniheryaka wiira aaniwoova atthu. (Math. 26:​69-75) Muhoolo mwaya, Pedru aahixintta woova ni aahooniherya olipa murima vaavo aalaleerya awe musineedrio ohoovaka. (Mit. 5:​27-29) Nuuvira iyaakha, “owoovaka ale oowinnuwihiwa” owo aahihiya olya vamosa ni makristau yahaakhanle ayuda. (Akal. 2:​11, 12) Eyo enooniherya wiira Pedru aahitthikela owoova atthu. Woonasa wene, khaaxinttale moomalela yooweeha ele. Hiyo pooti wuupuwelaka wiira noowerya oxintta yooweeha naarina ahu. Tivonto, nnoowerya okhootta yooweeha, nitthara miruku sa Yesu sini: “Muthipeleleke owehaweha.” (Math. 26:41) Hata muupuwelaka wiira mwa mutthu oolipa, muhihiye osyaka sooweeha sikhanle oowiirihani opaka etampi. Muhihiye ovarihela muteko itthu sinookhaliheryani okhala oolipa. — 2 Ped. 3:14. w24.07 18-19 itti. 17-19

Yesu, mulopwana onisuweliwa okhala ootepexa ovaha. Okathi aari awe valaponi, owo aahipaka miiriirya sinceene wiira aakhaliherye ale yaapirisari. (Luka 9:​12-17) Nave-tho, oonivaha etthu ya faita yuulupale, eyo piiyo, okumi awe. (Yoh. 15:13) Nuumala ohihimuxiwa, owo khaahiyale okhala oovaha. Aahihimya wiira aamunvekela Yehova wiira onivahe munepa woowaarya wiira oniixuttihe ni onimaalihe. Nto Yesu, aahipaka eyo. (Yoh. 14:​16, 17; 16:13) Orumeelaka mithukumano, Yesu khonihiya oniixuttiha moota woowaapaka awiixutti elapo yootheene. (Math. 28:​18-20) Murummwa Paulo, ohimmye wiira nuumala Yesu orowa wiirimu, “aahaaruma alopwana awo wiira akhale soovaha.” (Aef. 4:​7, 8) Paulo otthokihenrye wiira Yesu, aahaaruma alopwana awo ntoko soovaha wiira akhaliheryeke muloko mwa inamuna soovirikana. (Aef. 1:​22, 23; 4:​11-13) Ekeekhai wiira alopwana awo toottheka ni ikwaha sikina annivonya. (Yak. 3:2) Masi Pwiya ahu Yesu Kristu, onnaarumeela alopwana awo wiira anikhaliherye. Awo yoovaha yuulupale para hiyo. w24.10 18 itti. 1-2

Davidi aahimuleela mwanawe wiira aamukhumelaka saana akhala wiira khaarowa ohiya omwiiwelela Yehova. Masi mooriipiha murima, nuuvira okathi Salomoni aahipacerya waakokhorela amuluku a ethiru. Mwaha waivaavo, Yehova aahihiya omukhaliherya Salomoni, nave owo khaawerya waalamulela atthu ni exariya. (1 Mam. 11:​9, 10; 12:4) Exeeni nniixutta ahu? Wiiwelela onniniphwanyiha mareeliho. (Esal. 1:​1-3) Ekeekhai wiira olelo-va, Yehova khonnileiherya wiira ninrowa okhala atthu oosuwelexiwa aahiiso oothaaciri ntoko Salomoni. Masi vakhala wiira nnoomwiiwelela Tiithi ahu Yehova, nnookhalana ankhili yaawo anrowa onikhaliherya opaka soothanla sooloka. (Mir. 2:​6, 7; Yak. 1:5) Nave malakiheryo a Yehova anoonikhaliherya opaka soothanla sooloka voohimya sa muteko, osoma, musurukhu ni matthekulelo. Weettela malakiheryo a Yehova, anoonikhaliherya osyaka mixankiho. (Mir. 2:​10, 11) Niira siiso, nnoowerya opaka soothanla sooloka, nave nnoosuwelaka etthu yoopaka wiira nikhalane emusi yoohakalala. w24.11 10-11 itti. 11-12

Anamuyari, ahaana ophavelasa okathi wiira alavule ni anaaya voohimya sa Biibiliya, aahiiso etthu eniwiiriha okupali wiira Muluku ookhala. Pooti ophwanya okathi owo, vaavo anrowa aya oxukuryaka eparkhi, exarti, ni emuseu. Nyuwo pooti omooniherya mwaninyu owo, etthu ya khalai yeeyo enivarihana ni ele Biibiliya onihimya awe. Eyo pooti omukhaliherya mwaninyu, okupali wiira ele Biibiliya oniixuttiha awe ekeekhai. Nookhala nluku nenlo nrina iyaakha 3.000 nlempwale nsina na Muluku, nenlo ninsuweliwa ntoko Pedra Moabita. Niireke mwaninyu onnisuwela? Mwaphavela oweha nluku nla na oMowabi, nyuwo pooti orowa mpantta oni: “A Bíblia e o Nome Divino”, nimphwanyaneya oSeedi ya Olumwenku Wootheene ya Anamoona a Yehova oWarwick, oNova York. Nluku nla, ninnooniherya wiira mwene a oMowabi iitthaniwa Mexa aahimurukunuwela mwene a wIsarayeli. Nave ti yeeyo Biibiliya onihimya awe. (2 Mam. 3:​4, 5) Okathi mwaninyu onrowa awe owehaka wiira ele Biibiliya oniixuttiha awe ekeekhai, waamini wawe onrowa otepaka olipa. w24.12 14 etti. 4; 15 etti. 6