Nahimiya
4 Sanbbalaxi nuuni dirssaa zaarettidi gimbbiyogaa siyidosaara, yiillotiisinne hanqquwa suulliis,* qassi Ayhudata qilliicciyogaa doommiis. 2 I ba ishanttu sinttaaninne Samaariya olanchchatu sinttan hagaadan giis: “Ha pattenna Ayhudati ay oottiiddi deꞌiyonaa? Hagaa eti banttarkka oottanee? Eti yarshshuwa yarshshanee? Mexi issi gallassan eti oosuwa wurssanee? Eti taman xuugettidanne meqerettida shuchchaa, baanan kamettida kuurettidabaa giddoppe kessidi haranttuwa goꞌettanee?”
3 A matan eqqida Ammona asa gidiya Xobbee, “Eti gimbbiiddi deꞌiyobaa bolli worakanay kiyiyakkokka, gimbbee laaletti bayana” yaagiis.
4 Nu Xoossawu, hayyanaa siya, ayssi giikko, nuuni tooshettida; neeni eta cashshaa eta huuphiyawu* zaara, qassi etabay bonqqettanaadaaninne eti hara biitti omooddettanaadan ootta. 5 Eti gimbbiyageeta cayido gishshawu, eta mooruwa kammoppa, woy eta nagaraa ne sinttappe quccoppa.
6 Hegaa gishshawu, nuuni dirssaa aggennan gimbbida, qassi kayyettida soho ubbaa kunttidi dirssaa geesawu baggaa gimbbida; qassi asay oosuwa aggennan wozanappe oottiis.
7 Sanbbalaxi, Xobbee, Araba asati, Ammona asatinne Ashddooda asati Yerusalaame dirssaa bottokoniyo oosoy eesuwan oosettiiddi deꞌiyogaanne kayyettida sohoti barettiiddi deꞌiyogaa siyido wode keehi yiillotidosona. 8 Eti Yerusalaame yiidi olanawunne cabbuwa kessanawu issippe maqettidosona. 9 Shin nuuni nu Xoossaa woossida, qassi nuna etappe naaganaadan gallassinne qammi naagiyageeta ubbatoo essida.
10 Gidoppe attin, Yihudaa asay hagaadan giyogaa doommiis: “Wolqqa oosuwa oottiyageetussi* akatay ixxiis, hegaa bollikka meqerettida shuchchay kuurettiis; nuuni dirssaa gimbbanawu mule danddayokko.”
11 Qassi nu morkketi ubbatoo hagaadan goosona: “Eti aybanne erennan woy nuna beꞌennan nuuni eta giddo gelidi, eta worananne oosuwa teqqana.”
12 Eta matan deꞌiya Ayhudati katamaa yiido paydo ubban, “Eti ubba ginaara yiidi nuna qohana” yaagidi zaari zaaridi* nuuyyo yootoosona.
13 Yaaniyo gishshawu, dirssaappe guyye baggaara morkketi eesuwan nuna qohana danddayiyo ziqqiya sohuwan asay ubbatoo eqqanaadan oottaas; qassi eti bantta bisuwa, tooraanne wonddafiya oyqqidi, so asan so asan issippe eqqanaadan oottaas. 14 Taani eti yayyiyogaa beꞌido wode sohuwara dendda eqqada, xoqqa maataawatuyyo, sima maataawatuyyonne hara asawu hagaadan gaas: “Etawu yayyoppite. Gitanne hoola giyo Yihoowa hassayite, qassi intte ishanttussi, intte attuma naatussinne macca naatussi, intte machchotussinne intte keettawu olettite.”
15 Nu morkketi, eti oottiiddi deꞌiyobaa nuuni eridoogaa akeekidosonanne tumu Xoossay eta halchchuwa laalidoogaa siyidosona, hegaappe simmin, nuuni ubbaykka dirssaa gimbbiyo oosuwawu simmida. 16 He gallassaappe doommidi, ta asaappe baggay oosuwa oottoosona, qassi etappe baggay tooraa, gonddalliyanne wonddafiya oyqqidi, birataappe merettidabaa maayidi eqqoosona. Qassi, daannati dirssaa gimbbiya Ayhudatuppe guyyeera eqqidi eta maaddoosona. 17 Deexobaa tookkiyageeti issi kushiyan oottiiddi, hankko kushiyan ola miishshaa* oyqqoosona. 18 Gimbbiyageeti ubbay bantta xeessan bisuwa gixxidi gimbboosona, qassi malkkataa punniyagee ta miyyiyan eqqees.
19 Taani xoqqa maataawatuyyo, sima maataawatuyyonne hara asawu hagaadan gaas: “Oosoy gitanne aaho, qassi nuuni gimbbiya bolli issoy issuwappe haakkidi oottoos. 20 Malkkatay punettiyogaa intte siyiyo wode nu deꞌiyosaa shiiqite. Nu Xoossay nuuyyo olettana.”
21 Hegaa gishshawu, nuuppe baggati oosuwa minnidi oottiyo wode, attida baggati wonttimaattaappe doommidi xoolinttee kiyana gakkanaashin tooraa oyqqidi naagoosona. 22 He wode taani asawu hagaadan gaas: “Asay ubbay ba ashkkaraara qammaa Yerusalaamen aqo, eti qamman nuna naagananne gallassan oosuwa oottana.” 23 Hegaa gishshawu, tana, ta ishantta, ta ashkkarata, woy tana kaalliya naagiyageeta gidin, nuuni nu maayuwa mule kessi erokko; qassi nuuni ubbay nu ola miishshaa ushachcha kushiyan oyqqi uttida.