Nahimiya
5 Gidikkonne, attuma asaynne eta machchoti bantta Ayhuda ishatu bolli keehi cabbottidosona. 2 Issoti issoti hagaadan giidosona: “Nuuyyo daro attuma naatinne macca naati deꞌoosona. Nuuni miidi deꞌuwan deꞌanawu kattaa demmana bessees.” 3 Harati hagaadan giidosona: “Kosha wodiyan nuuni kattaa demmanawu nu shooqaa, nu woyne gadiyanne nu keettaa oyttida.” 4 Qassi harati hagaadan giidosona: “Nuuni kawuwa giiraa qanxxanawu nu shooqaanne nu woyne gadiya oyttidi miishshaa talꞌꞌida. 5 Nu ishati nu xapho nu suutta,* qassi nu naati eta naatu mala; gidikkonne, nuuni nu attuma naatanne macca naata aylletettawu immana koshshiis, qassi nu macca naatuppe amaridaageeti haꞌꞌikka aylletettan deꞌoosona. Shin nu shooqaynne nu woyne gadee haratu kushiyan deꞌiyo gishshawu, hegaa teqqanawu nuuyyo wolqqi baawa.”
6 Taani eta maganaa siyido wode keehi yiillotaas. 7 Yaatiyo gishshawu, taani hegeeta ta wozanan qoppaas, qassi xoqqa maataawatanne sima maataawata, “Intte ubbay intte ishanttuppe dichchaa* ekkeeta” yaagada seeraas.
Hegaa bollikka, eti oottidobaa gaasuwan gita yaaꞌaa shiishshaas. 8 Yaatada etawu hagaadan gaas: “Hara biittaa asawu bayzettida nu Ayhuda ishantta danddayettida keenan wozida; yaatin intte ishantta intte aybissi bayzzeetii, qassi eti nuuyyo guyye bayzettana bessii?” Yaagin etawu giyobi xayiis; qassi gaasoyiyoba aybanne demmana danddayibookkona. 9 Taani hagaadan gaas: “Intte oottiiddi deꞌiyobay loꞌꞌo gidenna. Nu morkketi, hara biittaa asati nuna qilliiccennaadan intte oottiyo ubbaban Xoossawu yayyana* bessennee? 10 Hegaa bollikka, taani, ta ishatinne ta ashkkarati dichchaa oychchennan miishshaanne kattaa etawu talꞌꞌoos. Hayyanintta, ane ha worissanawu talꞌꞌiyobaa aggoos. 11 Hayyanintta, eta shooqaa, eta woyne gadiya, eta wogaraa gadiyanne eta keettaa, qassi intte etappe dichchaa ekkido miishshaappe, kattaappe, ooratti agido woyniyappenne zaytiyappe xeetaappe issi kushiya* hachchi etawu zaarite.”
12 Yaatin eti hagaadan giidosona: “Nuuni hageeta aybanne oychchennan etawu zaarana. Neeni yootidoogaadan nuuni oottana.” Hegaa gishshawu, taani kahineta xeegada ha qaalaa naaganaadan he asata caaqettaas. 13 Qassi ta maayuwa dakkuwa* qoqqofada hagaadan gaas: “Ha qaalaa polenna oonanne tumu Xoossay A keettaappenne A aquwappe hagaadan qoqqofo, qassi I hagaadan qoqqofettidi mela atto.” Yaatin galchchay ubbay “Aminꞌꞌi!”* yaagidosona. Eti Yihoowa sabbidosona, qassi asay ba gelido qaalaadan oottiis.
14 Hegaa bollikka, Yihudaa biittan eta haariyagaa gidanaadan Kawuwa Arxxekisesi tana sunttido gallassaappe doommidi, A haaruwawu 20tta layttaappe 32tta layttaa gakkanaashin, 12 layttawu, taani woy ta ishati haariyagawu imettana bessiya qumaa mibookko. 15 Shin taappe kase haaridaageeti asawu toohuwa deexettidosona, eti qumawunne woyniyawu 40 bira shekiliya* etappe ubba gallassi ekkidosona. Eta ashkkaratikka asaa huqqunnidosona. Shin taani Xoossawu yayyiyo gishshawu hegaadan oottabeykke.
16 Hegaa bollikka, taani ha dirssaa gimbbiyo oosuwa maaddaas, qassi nuuni ayba gadenne ekkibookko; ta ashkkarati ubbay oosuwawu yan shiiqidosona. 17 Ayhudatuppenne sima maataawatuppe 150tinne hara biittaappe nuukko yiidaageeti ta masoofiyappe miidosona. 18 Ubba gallassi issi booray, doorettida usuppun dorssaynne kafoti taayyo* giigoosona. Qassi tammu gallassan gallassan issitoo woyne qommo ubbay daroy nuussi giigees. Hegaadaana gidikkonne, taani haariyagawu imettana bessiya qumaa oychchabeykke, ayssi giikko, asawu toohoy wonikka deexxi uttiis. 19 Ta Xoossawu, ha asaa gishshawu taani oottido ubbabawu tana kehaban* hassaya.