LEKSYON 51
Paonan-o Mo Mapapalipay hi Jehova Pinaagi han Imo Panyakan?
Han ginlarang kita ni Jehova, gintagan kita niya hin makaruruyag nga regalo—an abilidad ha pagyakan. Importante ba ha iya kon paonan-o naton gin-gagamit ito nga regalo? Oo! (Basaha an Santiago 1:26.) Salit paonan-o naton magagamit an aton abilidad ha pagyakan ha paagi nga makakapalipay kan Jehova?
1. Paonan-o naton angay gamiton an regalo nga abilidad ha pagyakan?
An Biblia nasiring nga “padayon nga dasigon [naton] an usa kag usa ngan parig-unon an usa kag usa.” (1 Tesalonica 5:11) May mga kilala ka ba nga nanginginahanglan hin pagdasig? Ano an puydi mo himoon basi gumaan an ira pag-abat? Pasariga hira nga importante hira ha imo. Bangin puydi mo isumat ha ira kon ano an imo naaapresyar ha ira. May nahuhunahuna ka ba nga teksto nga makakadasig ha imo kakilala? Damu nga teksto an puydi mo magamit. Hinumdumi liwat nga may daku nga epekto diri la an mga pulong nga imo ginagamit kondi pati an paagi han imo pagyakan. Salit pangalimbasog pirme nga magyakan ha buotan ngan malumo nga paagi.—Proberbios 15:1.
2. Ano nga klase hin panyakan an kinahanglan naton likyan?
An Biblia nasiring: “Diri gumawas ha iyo baba an dunot nga pulong.” (Basaha an Efeso 4:29.) Nagpapasabot ini nga diri kita nagamit hin magraot nga pulong o nagyayakan hin nakakatamay ngan nakakainsulto nga mga pulong basi pasakitan an iba. Kinahanglan likyan liwat naton an pagtsismis ngan pagpakaraot.—Basaha an Proberbios 16:28.
3. Ano an makakabulig ha aton nga magyakan ha nakakaparig-on nga paagi?
Kasagaran nga an mga butang nga aton ginyayakan nagpapakita kon ano gud an aada ha aton kasingkasing o hunahuna. (Lucas 6:45) Salit kinahanglan nga bansayon naton an aton kalugaringon nga magpokus ha positibo nga mga butang—mga butang nga matadong, putli, makapaaghat han gugma, ngan darayawon. (Filipos 4:8) Basi makapokus hini nga mga butang, kinahanglan magin maaramon kita ha pagpili han aton kaliawan ngan mga sangkay. (Proberbios 13:20) Makakabulig liwat ito nga maghunahuna anay kita antes magyakan. Hunahunaa kon ano an magigin epekto han imo mga pulong ha iba. An Biblia nasiring: “An mga pulong nga diri ginhuhunahuna pariho han mga buno hin espada, pero an dila han mga maaramon usa nga tambal.”—Proberbios 12:18.
DUGANG NGA USISAHA
Hibaroi kon paonan-o magyayakan ha paagi nga nakakapalipay kan Jehova ngan nakakadasig ha iba.
4. Kontrola an imo panyakan
Usahay, kita ngatanan nakakayakan hin mga butang nga ginbabasolan naton ha urhi. (Santiago 3:2) Basaha an Galacia 5:22, 23, katapos, hisguti niyo ini nga mga pakiana:
Hain hini nga mga kalidad an mahimo mo ig-ampo basi makabulig ha imo nga makontrol an imo panyakan? Paonan-o mahimo makabulig ha imo ini nga mga kalidad?
Basaha an 1 Corinto 15:33, katapos, hisguti niyo ini nga pakiana:
Ano an mahimo magin epekto han imo ginpipili nga mga sangkay ngan kaliawan ha imo panyakan?
Ano an mahimo makaapekto ha imo panyakan?
Basaha an Eclesiastes 3:1, 7, katapos, hisguti niyo ini nga pakiana:
San-o bangin maaramon nga magpabilin nga hilom o maghulat hin mas maopay nga panahon nga iyakan an usa nga butang?
5. Magyakan hin positibo mahitungod ha iba
Paonan-o naton malilikyan nga makainsulto ha iba o makayakan hin nakakasakit nga mga pulong? I-play an VIDEO, katapos, hisguti niyo an masunod nga mga pakiana.
Ha video, kay ano nga karuyag hini nga brother nga bag-uhon an paagi han iya pagyakan mahitungod ha iba?
Ano an iya ginbuhat basi magbag-o?
Basaha an Eclesiastes 7:16, katapos, hisguti niyo ini nga pakiana:
Ano an angay naton hinumdoman kon nasusulay kita nga magyakan hin negatibo mahitungod ha iba?
Basaha an Eclesiastes 7:21, 22, katapos, hisguti niyo ini nga pakiana:
Paonan-o ini nga mga bersikulo makakabulig ha imo nga diri sobra nga magreak kon may magyakan hin negatibo mahitungod ha imo?
6. Magyakan ha buotan nga paagi ha imo pamilya
Karuyag ni Jehova nga makiistorya kita ha aton pamilya ha buotan ngan mahigugmaon nga paagi. I-play an VIDEO, katapos, hisguti niyo an masunod nga pakiana.
Ano an makakabulig ha imo nga magyakan ha imo pamilya ha buotan nga paagi?
Basaha an Efeso 4:31, 32, katapos, hisguti niyo ini nga pakiana:
Ano nga panyakan an nakakaparig-on ha pamilya?
Ginpahayag ni Jehova kon ano an iya gin-abat mahitungod ha iya Anak, hi Jesus. Basaha an Mateo 17:5, katapos hisguti niyo ini nga pakiana:
Paonan-o mo masusubad hi Jehova ha paagi han imo pakiistorya ha imo pamilya?
Pamiling hin mga higayon nga makahatag ka hin kumendasyon ha iba
AN IBA NASIRING: “Ginyakan ko la an aadi ha akon hunahuna. Waray ako labot kon diri naayon an iba han akon ginyakan.”
Nauyon ka ba hito? Kay ano?
SUMARYO
An aton ginyayakan puydi makabulig o makasakit ha iba. Kinahanglan naton hunahunaon hin maopay kon ano an aton iyayakan, kon san-o naton ito iyayakan, ngan kon paonan-o naton ito iyayakan.
Repaso
Ano an pipira nga paagi nga mahimo makabulig ha iba an imo panyakan?
Ano nga klase hin panyakan an karuyag mo likyan?
Ano an makakabulig ha aton basi an aton panyakan pirme magin buotan ngan makaparig-on?
DUGANG NGA IMPORMASYON
Ano an makakabulig ha aton nga magyakan hin positibo?
Hibaroi kon ano an makakabulig ha imo nga likyan an pamuyayaw.
Kitaa kon paonan-o mo malilikyan an pagtsismis.
Hibaroi kon paonan-o ginbuligan ni Jehova an usa nga lalaki nga nakukurian nga iundang an pamuyayaw.
“Ginhunahuna Ko hin Maopay Kon Ano an Dadangatan han Akon Kinabuhi” (An Barantayan, Agosto 1, 2013)