Septyembre

Dapat maniguro kita nga diri la makab-ot an pagin hamtong kondi magpabilin liwat nga sugad hito. Nagkikinahanglan ito nga likyan naton an sobra nga pagkompyansa. (1 Cor. 10:12) Kinahanglan ‘padayon nga sarihan’ naton an aton kalugaringon basi masiguro nga padayon kita nga nag-uuswag. Ha surat ni apostol Pablo ha mga taga-Colosas, ginpabug-atan niya utro nga kinahanglan magpabilin nga hamtong. Bisan kon nagin hamtong na hira nga mga Kristiano, ginpahamangnoan hira ni Pablo nga diri malimbongan han panhunahuna han kalibotan. (Col. 2:​6-10) Ngan hi Epafras, nga sigurado nga nakilala hin maopay ha kabugtoan hito nga kongregasyon, padayon nga nag-ampo nga ha “kataposan bug-os nga makatindog” unta hira, o magin hamtong. (Col. 4:12) Ano an punto? Nasabtan nira Pablo ngan Epafras nga nagkikinahanglan hin personal nga pangalimbasog ngan bulig han Dios basi makapabilin nga hamtong. Karuyag nira nga an mga taga-Colosas magpabilin nga hamtong, o adulto, nga mga Kristiano bisan pa han mga problema nga ira gin-aatubang. w24.04 6-7 ¶16-17

Kon nakultibar naton an tama nga kahadlok kan Jehova, hihigugmaon gud naton hiya ngan diri gud kita maghihimo hin bisan ano nga makakapasubo ha iya. Karuyag gud naton mahibaroan an kaibahan han tama ngan sayop, han kamatuoran ngan kabuwaan, basi magkaada kita han pag-uyon ni Jehova. (Prob. 2:​3-6; Heb. 5:14) Kon mas mahahadlok kita ha mga tawo kay ha Dios, mahimo kita maipahirayo ha kamatuoran. Pansina an ehemplo han 12 nga lider nga nag-espiya ha iginsaad ni Jehova nga tuna nga ihahatag ha mga Israelita. An napulo han mga espiya, mas daku an kahadlok ha mga Canaanita kay ha ira gugma kan Jehova. Ginsidngan nira an ira mga igkasi-Israelita: “Diri naton kaya sumagka basi makiggirra ha katawohan, kay mas makusog hira kay ha aton.” (Num. 13:​27-31) Basado la han panhunahuna han mga tawo, mas makusog an mga Canaanita. Pero waray maghunahuna kan Jehova an bisan hin-o nga nasiring nga diri mapipirde han mga Israelita an ira mga kaaway. w24.07 9 ¶5-6

Makakasiguro gud ba kita nga tama an ngatanan nga desisyon ni Jehova kon naghuhukom hiya ha mga tawo? Oo! Sugad han nasabtan hin maopay ni Abraham, hi Jehova an perpekto, maaramon ha ngatanan, maloloy-on nga “Hukom han bug-os nga tuna.” Gin-train niya an iya Anak ngan ginhatag ha iya an responsabilidad han paghukom ha ngatanan. (Juan 5:22) An Amay ngan an Anak pariho nakakabasa kon ano an aada ha kasingkasing han usa nga tawo. (Mat. 9:4) Ha ngatanan nga kahimtang, bubuhaton nira kon ano an “husto”! Magin determinado kita nga sumarig nga hi Jehova maaram han pinakamaopay. Maaram kita nga diri kita kwalipikado ha paghukom—pero hiya kwalipikado gud! (Isa. 55:​8, 9) Salit iginsasarig naton an ngatanan nga paghukom ha iya ngan ha iya Anak, an Hadi nga perpekto nga iginpapakita an hustisya ngan kalooy han iya Amay.​—Isa. 11:​3, 4. w24.05 7 ¶18-19

May mahibabaroan kita ha pagkaimportante han pagkaada sinsero nga kasingkasing tikang ha siyahan nga pagkita nira Jesus ngan Natanael. Han gindara ni Felipe an iya sangkay nga hi Natanael basi makilala hi Jesus, may maopay gud nga nahitabo. Bisan kon siyahan pa gud la nga pagkita ni Jesus kan Natanael, hi Jesus nagsiring: “Kitaa, usa nga tinuod nga Israelita nga diri nanlilimbong.” (Juan 1:47) May nakita hi Jesus kan Natanael nga diri ordinaryo nga pagin sinsero. Pariho ha aton, hi Natanael diri perpekto. Pero diri hiya hipokrito, lugod tangkod hiya ha ngatanan nga butang. Naimpres hi Jesus ngan ginkumendasyonan niya hi Natanael tungod hito. An kadam-an han mga sugo nga nagpapalipay kan Jehova nakalista ha Salmo 15 konektado ha kon paonan-o naton gintatratar an iba. An Salmo 15:3 nasiring nga an bisita ha tolda ni Jehova “diri . . . nagpapakaraot pinaagi han iya dila, diri hiya nagbubuhat hin maraot ha iya amyaw, ngan diri niya ginlilibak an iya kasangkayan.” Kon pakarauton naton an iba mahimo gud ito makadaot ha ira.​—San. 1:26. w24.06 10 ¶7, 9; 11 ¶10

Kon nangangandam ka hin maopay para ha ministeryo posible gud nga magin mas komportable ka ha pakiistorya ha iba. Ginbuligan ni Jesus an iya mga disipulo nga mangandam antes hira sugoon ha pagsangyaw. (Luc. 10:​1-11) Tungod kay gin-aplikar han mga disipulo an igintutdo ha ira ni Jesus, nagin malipayon gud hira ha ira mga nahimo. Paonan-o kita mahimo mangandam para ha ministeryo? Kinahanglan naton hunahunaon kon paonan-o naton epektibo nga maisasaysay an kamatuoran ha aton kalugaringon nga mga pulong. Makakabulig liwat nga hunahunaon an duha o tulo nga komon nga reaksyon hadton makakaistorya ha teritoryo ngan kon paonan-o kita mabaton ha tagsa nga sitwasyon. Ngan kon nakikiistorya kita ha mga tawo, puydi kita mangalimbasog nga magin relaks, humiyom, ngan magin makisangkayon. w24.04 16 ¶6-7

An pinakaimportante nga rason kon kay ano nga nagsasangyaw kita han maopay nga sumat kay hinigugma naton hi Jehova nga Dios ngan an iya baraan nga ngaran. Ginhuhunahuna naton an aton ministeryo sugad nga usa nga paagi han pagdayaw ha aton hinigugma nga Dios. Kinasingkasing nga mauyon kita nga hi Jehova nga Dios takos ha pagkarawat han himaya, dungog, ngan gahum tikang ha iya maunungon nga mga magsiringba. Iginhahatag naton ha iya an himaya ngan an dungog kon iginsusumat naton ha iba an makakombinse nga mga ebidensya nga hiya an “naglarang han ngatanan nga butang,” ngan utang naton ha iya an aton kinabuhi. Iginhahatag naton ha iya an gahum—an aton gahum—kon gin-gagamit naton an aton panahon, kusog, ngan panag-iya basi makasangyaw tubtob ha aton mahihimo. (Mat. 6:33; Luc. 13:24; Col. 3:23) Ha simple nga pagkayakan, naruruyag kita ha pag-istorya mahitungod ha Dios nga aton hinigugma. Napapagios liwat kita nga isumat ha iba an mahitungod ha iya ngaran ngan kon ano hiya nga klase hin Dios. w24.05 17 ¶11

Gintatagan kita yana ni Jehova hin kamurayawan ngan pagin kontento ngan tatagan kita hin kinabuhi nga waray kataposan ha tiarabot. Bug-os kita nga makakasarig kan Jehova, nga may hingyap hiya ngan gahum ha pagbalos ha aton. Ngan ito nga pagsarig magpapagios ha aton nga magpabilin nga busy ha aton pagsingba, sugad la han ginbuhat han matinumanon nga mga surugoon han Dios ha naglabay. Ito an ginbuhat ni Timoteo han siyahan nga siglo. (Heb. 6:​10-12) Sinarig hi Timoteo ha buhi nga Dios. (1 Tim. 4:10) Salit naningkamot hiya para kan Jehova ngan ha iba. Ha ano nga mga paagi? Gin-aghat hiya ni apostol Pablo nga mag-uswag ha pagtutdo ha ministeryo ngan ha kongregasyon. Ginsidngan liwat hi Timoteo nga magpakita hin maopay nga ehemplo ha mga igkasi-tumuroo, batan-on man o edaran. Ngan gintokahan liwat hiya hin pipira nga magkuri nga asaynment, nga nag-uupod han paghatag hin mapwersa pero mahigugmaon nga sagdon hadton nanginginahanglan hito. (1 Tim. 4:​11-16; 2 Tim. 4:​1-5) Makakasiguro hi Timoteo nga hi Jehova magbabalos ha iya.​—Roma 2:​6, 7. w24.06 22-23 ¶10-11

Agsob gamiton ni Jehova an iya mga propeta basi pahamangnoan ngan tadungon an iya katawohan. Pananglitan, an Dios nagsiring pinaagi kan Jeremias: “Balik, O rebelyoso nga Israel . . . Diri ako magkikita nga nasisina ha iyo, kay maunungon ako . . . Diri ako magtitipig hin kasina ha kadayonan. Basta karawata la an imo sala, kay nagrebelde ka kan Jehova.” (Jer. 3:​12, 13) Pinaagi kan Joel, hi Jehova nagsiring: “Balik ha akon ha bug-os niyo nga kasingkasing.” (Joel 2:​12, 13) Ginsugo niya hi Isaias nga magsiring: “Limpyuhi an iyo kalugaringon; kuhaa tikang ha akon atubangan an iyo magraot nga mga buhat; ayaw na kamo pagbuhat hin maraot.” (Isa. 1:​16-19) Ngan pinaagi kan Ezekiel, hi Jehova nagpakiana: “Nalilipay gud ba ako ha kamatayon han maraot nga tawo? . . . Diri ba mas karuyag ko nga bayaan niya an iya mga binuhatan ngan padayon nga mabuhi? Diri ako nalilipay ha kamatayon han bisan hin-o, . . . salit balik kamo ngan mabuhi.” (Ezek. 18:​23, 32) Nalilipay hi Jehova nga makita an mga tawo nga nagbabasol kay karuyag niya hira nga padayon nga mabuhi—ha waray kataposan! w24.08 9 ¶5-6

An ngatanan han katawohan han Dios nakakakarawat han espirituwal nga pagkaon, instruksyon, ngan proteksyon nga ira kinahanglan. An usa nga ehemplo nga hi Jehova waray ginpapaurog amo an iya pagsiguro nga an ngatanan nga tawo ha bug-os nga kalibotan makabasa ha Biblia. An Baraan nga Kasuratan orihinal nga iginsurat ha tulo nga linggwahe: Hebreo, Aramaico, ngan Griego. Adton nakakabasa ba han orihinal nga mga linggwahe han Biblia may-ada mas duok nga relasyon kan Jehova kay hadton diri? Syempre, diri gud. (Mat. 11:25) Diri kita gin-iimbitar ni Jehova sugad nga iya kasangkayan tungod la kay mga edukado gud kita o maaram kita magyakan han orihinal nga mga linggwahe han Biblia. Imbes nga ihatag ni Jehova an iya kinaadman ha mga edukado gud la, ginsiguro niya nga magkaada hito an ngatanan nga tawo ha bug-os nga kalibotan, edukado man hira o diri. An iya giniyahan nga Pulong, an Biblia, naihubad na ha yinukot nga linggwahe; salit an katawohan ha bug-os nga kalibotan makakapahimulos han mga katutdoan hito ngan mahibabaro kon paonan-o hira magigin mga sangkay niya.​—2 Tim. 3:​16, 17. w24.06 6-7 ¶13-15

An kabungkagan han Judio nga sistema han mga butang nga igintagna ni Jesus nagtitikahirani na. Dapat gamiton han mga Kristiano an nabibilin nga panahon basi iandam an ira kalugaringon pinaagi ha pagparig-on han mga kalidad sugad han pagtoo ngan pagpailob. (Heb. 10:25; 12:​1, 2) Maatubang kita hin kasakitan nga mas makuri gud kay han naeksperyensyahan han Hebreo nga mga Kristiano. (Mat. 24:21; Pah. 16:​14, 16) Pansina an pipira nga praktikal nga sagdon nga iginhatag ni Jehova hito nga mga Kristiano nga puydi liwat kita magpahimulos. Gin-aghat ni apostol Pablo an iya mga igkasi-tumuroo nga usisahon hin mas maopay an Pulong han Dios. (Heb. 5:14–6:1) Gamit an Hebreo nga Kasuratan, iginsaysay ni Pablo ha iya kabugtoan kon kay ano nga labaw an paagi han pagsingba han Kristiano kay han Judaismo. Maaram hi Pablo nga an dugang nga kahibaro ngan an mas hilarom nga pagsabot ha kamatuoran mabulig hito nga mga Kristiano nga makilala ngan isalikway an buwa nga mga pangatadongan basi diri hira maisimang. w24.09 8-9 ¶2-3; 10 ¶6

An mga disipulo ni Jesus nagkinahanglan hin pagdasig. Kay ano? Kay an iba may ginbayaan nga balay, pamilya, negosyo basi umupod kan Jesus. (Mat. 19:27) An iba gintratar hin maraot tungod kay nagin mga disipulo niya hira. (Juan 9:22) Ginhimo nira ini nga mga sakripisyo kay natoo hira nga hi Jesus an iginsaad nga Mesias. (Mat. 16:16) Pero han ginpatay hi Jesus, nanluya hira tungod kay an ira ginlalaoman waray matuman. Waray ruhaduha, nakita ni Jesus nga an kasubo han iya mga disipulo diri sugad nga kaluyahan ha espirituwal kondi sugad nga normal nga reaksyon kon namamatayan. Salit hito mismo nga adlaw han ginbanhaw hiya, nagtikang hiya pagdasig ha iya kasangkayan. Pananglitan, nagpakita hiya kan Maria Magdalena samtang nagtitinangis hiya ha lubnganan ni Jesus. (Juan 20:​11, 16) Nagpakita liwat hiya ha duha nga disipulo nga nagbabaktas tipakadto ha Emaus. Ngan nagpakita hiya kan apostol Pedro. w24.10 13 ¶5-6

Mga kag-anak, ig-andam an iyo anak nga depensahan an iya pagtoo nga may-ada Maglalarang. Mahimo makabulig ha iyo an pagrepaso nga magkaupod ha mga artikulo ha jw.org ha serye nga “Tanong ng mga Kabataan—Paglalang o Ebolusyon?” Katapos, hisguti an mga pangatadongan nga inaabat han imo anak nga labi nga makakakombinse ha iba basi masabtan an kamatuoran mahitungod ha Maglalarang. Dasiga hiya nga gumamit hin simple nga lohika ngan pangatadongan kon may naruruyag nga makiistorya mahitungod hito nga topiko. Pananglitan, bangin sumiring an usa nga kaeskwela: “Natoo la ako ha akon nakikita, ngan waray ko pa gud makita an Dios.” An usa nga batan-on nga Kristiano mahimo sumiring: “Imadyina nga nagbabaktas ka ha usa nga kagurangan nga hirayo ha syudad ngan nakakita ka hin usa nga sementado nga bubon, o atabay. Ano an imo mahuhunahuna? Kon may baltok nga naghimo han bubon, mas labi na an uniberso!” w24.12 18 ¶16

Kita ngatanan nagkikinahanglan hin giya ha paghimo hin importante nga mga desisyon ha kinabuhi. Damu han sugad nga giya an makukuha naton tikang ha mga tigurang ngan ha iba nga hamtong nga mga Kristiano. Kon mas magurang gud hira kay ha aton, diri ta dapat hunahunaon dayon nga an ira sagdon diri na praktikal ha aton yana. Karuyag ni Jehova nga mahibaro kita hin leksyon tikang ha mga lagas. Tungod kay mas maiha na hira nga buhi kay ha aton, mas damu na an ira eksperyensya ngan mas hilarom na an ira pagsabot ngan kinaadman. Ha panahon han Biblia, gin-gamit ni Jehova an matinumanon nga mga lagas basi dasigon ngan giyahan an iya katawohan. Pananglitan, pansina hira Moises, David, ngan apostol Juan. Nabuhi hira ha iba-iba nga panahon, ngan iba-iba gud an ira kahimtang. Han hirani na hira mamatay, naghatag hira hin maaramon nga sagdon ha mga burobata. Ginpabug-atan han tagsa hinin matinumanon nga mga lagas an pagkaimportante han pagin masinugtanon ha Dios. Batan-on man kita o lagas, makakapahimulos kita ha pagrepaso ha ira sagdon.​—Roma 15:4; 2 Tim. 3:16. w24.11 8 ¶1-2

Ha panahon ni Noe, igindiri han Dios nga kaunon han mga tawo an dugo. (Gen. 9:​3, 4) Ito nga pagdiri gin-utro ni Jehova ha iya Balaud ha Israel. An bisan hin-o nga nakaon han dugo “kinahanglan patayon.” (Lev. 7:27) Gintutdoan ni Jesus an mga Judio ha pagtuman han Balaud. (Mat. 5:​17-19) Salit diri gud niya igsusugo ha mga Judio nga kaunon an iya literal nga unod o imnon an iya dugo tikang ha iya mga ugat. Nagyayakan hi Jesus ha simboliko nga paagi, sugad han iya ginhimo antes pa han ginsumatan niya an usa nga Samaritana: “An tubig nga ihahatag ko . . . maghatag hin kinabuhi nga waray kataposan.” (Juan 4:​7, 14) Diri hi Jesus nasiring nga an Samaritana magkakaada hin kinabuhi nga waray kataposan pinaagi la ha pag-inom hin literal nga tubig. Sugad liwat hito an iya punto han nakiistorya hiya ha mga tawo ha Capernaum nga mabubuhi hira ha waray kataposan kon kaunon nira an iya literal nga unod ngan inumon an iya literal nga dugo. w24.12 9 ¶4-6

Dapat magbantay an Kristiano nga mga bana nga diri subaron an sayop nga panhunahuna ha kababayin-an. Kay ano? Tungod kay kon ano an ginhuhunahuna han usa agsob nga amo ito an iya ginbubuhat. Ginpahamangnoan ni apostol Pablo an dinihogan nga mga Kristiano ha Roma nga ‘diri na magpamolde hini nga sistema han mga butang.’ (Roma 12:​1, 2) Han nagsurat hi Pablo ha mga taga-Roma, klaro nga may kongregasyon na didto hin pipira ka tuig. Pero makikita ha ginsiring ni Pablo nga an pipira ha kongregasyon impluwensyado la gihapon han mga kustomre ngan panhunahuna han kalibotan. Amo ito an rason nga ginsagdonan niya hira nga bag-uhon an ira panhunahuna ngan panggawi. Ito nga sagdon aplikado gud ha Kristiano nga mga bana yana. Makasurubo kay an pipira ha ira impluwensyado han panhunahuna han kalibotan ngan gin-aabuso pa ngani an ira asawa. w25.01 9 ¶4

An mga tigurang busy yana. Mga ebanghelisador hira. (2 Tim. 4:5) Madasigon hira nga nangunguna ha ministeryo, ha pag-organisar han pagsangyaw nga buruhaton ha ira teritoryo, ngan ha pag-train ha aton basi magin epektibo kita ha pagsangyaw ngan pagtutdo. Mga hukom liwat hira nga maloloy-on ngan waray ginpapaurog. Kon an usa nga Kristiano nakahimo hin seryoso nga sala, an mga tigurang naniningkamot ha pagbulig ha iya nga maibalik an iya pakigsangkay kan Jehova. Sugad man, gintitipigan nira hin maopay nga limpyo an kongregasyon. (1 Cor. 5:​12, 13; Gal. 6:1) Labaw ha ngatanan, an mga tigurang kilala sugad nga mga paraataman. (1 Ped. 5:​1-3) Nagdudumara hira hin inandam hin maopay nga mga pahayag nga basado ha Biblia, naniningkamot nga makilala an ngatanan ha kongregasyon, ngan nagsi-shepherding. Labot pa hito nga mga toka, an pipira nga tigurang nabulig liwat ha konstruksyon ngan pagmintinar han Kingdom Hall, pag-organisar han kombensyon, ngan ha buruhaton han mga Hospital Liaison Committee ngan Patient Visitation Group. Maduruto gud an mga tigurang ha pagbulig ha aton! w24.10 20 ¶9

Ha Biblia, an pulong nga “pagtubos” nagtutudlok ha paghatag hin kagawasan, o pag-abswelto, nga resulta tungod ha bayad nga lukat. Iginsaysay ito ni apostol Pedro hini nga paagi: “Maaram kamo nga diri pinaagi han nadudunot nga mga butang, pinaagi han silber o bulawan, nga gintagan kamo hin kagawasan [lit., “ginlukat kamo; gintubos kamo”] tikang ha iyo waray pulos nga pagkinabuhi nga iginpasa ha iyo pinaagi han iyo mga kaapoy-apoyan. Lugod pinaagi ito han presyoso nga dugo han Kristo, nga pariho han dugo han kordero nga waray depekto ngan putli.” (1 Ped. 1:​18, 19; ftn.) Tungod han halad-lukat, magkakaada kita kagawasan tikang ha sala ngan kamatayon nga nagriresulta hin duro nga pag-antos. (Roma 5:21) Sigurado, may-ada kita maopay nga rason nga umabat hin daku nga utang nga kaburut-on kan Jehova ngan kan Jesus tungod han pagtubos nga tikang ha presyoso nga dugo, o kinabuhi, ni Jesus. w25.02 5 ¶15-16

Paonan-o kita magigin mabinantayon? Pansina kon ano an aton mahibabaroan tikang ha batan-on nga lalaki nga ginhihisgotan ha Proberbios kapitulo 7. Nakabuhat hiya hin seksuwal nga imoralidad ha usa nga imoral nga babaye. An bersikulo 22 nagsusumat ha aton nga an batan-on “tigda” nga sinunod ha iya. Pero sugad han iginpapakita han nahiuna nga mga bersikulo antes pa hini, naghimo na hiya hin mga desisyon nga hinay-hinay nga nagtugway ha iya nga makasala. Ano an ginhimo hini nga batan-on antes hiya makabuhat hin seryoso nga sala? Siyahan, hito nga gab-i “inagi hiya ha kalye nga hirani ha eskina nga gin-uukyan han [imoral nga] babaye.” Sunod, linakat hiya tipakadto ha iya balay. (Prob. 7:​8, 9) Katapos, han nakita niya an babaye waray hiya lumikay. Lugod, ginpabay-an niya nga hadkan hiya ngan namati samtang nagyayakan hiya parte han iya halad nga ginsasarosaroan, bangin tungod kay karuyag niya nga hunahunaon nga diri hiya maraot nga babaye. (Prob. 7:​13, 14, 21) Kon ginlikyan la unta hinin batan-on an mga peligro nga nagtutugway ha pakasala, iya unta naproteksyonan an iya kalugaringon tikang ha mga pagsulay ngan ha pakasala. w24.07 16 ¶8-9; 19 ¶19

Diri ginkukonsinter ni Jehova an seryoso nga sala ha iya katawohan. Diri niya ginhuhunahuna nga an mga nagbubuhat hin sala nga diri mabinasulon dapat tugotan tungod ha “kalooy” nga magpadayon ha pakig-upod ha iya matinumanon nga mga magsiringba. Maloloy-on hi Jehova, pero diri hiya konsintidor; o diri niya ginpapahamubo an iya mga suruklan. (Jud. 4) Lugod, an pagbuhat hito diri nagpapakita hin kalooy kay mamimeligro an ngatanan ha kongregasyon. (Prob. 13:20; 1 Cor. 15:33) Bisan pa hito, maaram kita nga diri ni Jehova karuyag nga mabungkag an bisan hin-o. Karuyag niya nga matalwas an mga tawo tubtob nga posible. Nagpapakita hiya hin kalooy ha mga nagbabag-o han ira panhunahuna ngan mga buhat ngan naruruyag nga ibalik an ira relasyon ha iya. (Ezek. 33:11; 2 Ped. 3:9) Salit han an lalaki ha Corinto nagbasol ngan ginbayaan an iya makasasala nga buhat, gin-gamit ni Jehova hi apostol Pablo nga isaysay ha kongregasyon nga ito nga lalaki dapat pasayloon ngan i-welcome. w24.08 17 ¶7; 18-19 ¶14-15

Ha parabola mahitungod ha mga karnero ngan ha mga kanding, iginhulagway ni Jesus an paghukom ha mga tawo nga may oportunidad nga sumuporta ha iya dinihogan nga kabugtoan. (Mat. 25:​31-46) Ha “daku nga kasakitan,” maghuhukom hiya kon hin-o an mga karnero o mga kanding antes gud la magtikang an Armagedon. (Mat. 24:21) Sugad la nga iginlalain han paraataman an mga karnero tikang ha mga kanding, ilalain ni Jesus adton maunungon nga nasuporta ha iya dinihogan nga mga sumurunod tikang ha diri nasuporta. Iginpapakita ha tagna han Biblia nga sugad nga pinili nga Hukom ni Jehova, magigin matadong hi Jesus ha iya paghukom. (Isa. 11:​3, 4) Gin-oobserbaran niya an panggawi, disposisyon, ngan panyakan han katawohan—upod na kon paonan-o nira gintatratar an iya dinihogan nga kabugtoan. (Mat. 12:​36, 37) Mahibabaro hi Jesus kon hin-o an sinuporta ha iya dinihogan nga kabugtoan ngan ha ira buruhaton. An usa han pinakaimportante nga mga paagi nga mahihimo han usa nga sugad-karnero amo an pagsuporta ha kabugtoan han Kristo pinaagi ha pagbulig ha ira ha pagsangyaw nga buruhaton. w24.09 20-21 ¶3-4

Masisiguro naton nga tinuod an aton gintotoohan pinaagi ha pagkompara hito ha kon ano an ginsisiring han Biblia. Pananglitan, pansina an sitwasyon han batan-on nga naghuhunahuna kon importante gud ba hiya ha Dios. Kakarawaton na la ba niya dayon nga tama ito? Diri, dapat niya ‘siguruhon an ngatanan nga butang’ pinaagi ha paghibaro han mga panhunahuna ni Jehova mahitungod hito. Samtang ginbabasa naton an Pulong han Dios, aton “nababatian” an pakiistorya ni Jehova ha aton. Pero dapat diri la naton basta basahon an Biblia kon karuyag naton mahibaroan an iya mga baton ha aton mga pakiana. Dapat ipokus naton an aton pagbasa ha Biblia ha topiko nga naghihisgot hito. Mahimo kita mag-research mahitungod hito nga topiko gamit an damu nga garamiton ha pag-aram nga igintatagana han organisasyon ni Jehova. (Prob. 2:​3-6) Mahimo kita mag-ampo nga giyahan kita ni Jehova ha pag-research ngan buligan kita nga mabilngan an iya baton ha aton pakiana. Katapos, mahimo kita mamiling hin mga prinsipyo ha Biblia ngan praktikal nga impormasyon nga aplikado ha aton sitwasyon. w24.10 25 ¶4-5

Diri bibendisyonan ni Jehova an mga pangalimbasog han bisan hin-o nga mapahitas-on o may makikalugaringon nga motibo. (1 Cor. 10:​24, 33; 13:4) May mga panahon nga bisan an pinakaduok nga kasangkayan ni Jesus naghingyap hin mga pribilehiyo pero tungod han sayop nga motibo. Pansina an ginbuhat han duha nga apostol nga hira Santiago ngan Juan. Ginhangyo nira hi Jesus nga tagan hira hin espesyal nga posisyon ha iya Ginhadian. Waray hira kumendasyuni ni Jesus hito nga ira ambisyon. Lugod, ginsidngan niya an iya 12 nga apostol: “An bisan hin-o nga karuyag magin labaw dida ha iyo kinahanglan magserbi ha iyo, ngan an bisan hin-o nga karuyag magin una dida ha iyo kinahanglan magin uripon han ngatanan.” (Mar. 10:​35-37, 43, 44) An mga brother nga nagkakab-ot hin pribilehiyo nga may husto nga motibo—an pagserbi ha iba—magigin bendisyon ha kongregasyon.​—1 Tes. 2:8. w24.11 15-16 ¶7-8

Kon naghihimo hin mga desisyon, an gugma magpapagios ha aton nga unahon an kaopayan han “iba nga tawo” ngan magkaada kasadangan o magin desente. (1 Cor. 10:​23, 24, 32; 1 Tim. 2:​9, 10) Salit magdidesisyon kita nga nagpapakita han aton gugma ngan respeto ha iba. Kon naghihimo ka hin daku nga desisyon, hunahunaa kon ano an kinahanglan basi mabuhat ito. Gintutdoan kita ni Jesus nga ‘kwentahon an magagasto.’ (Luc. 14:28) Salit hunahunaa an magagamit nga kadamu han panahon, an magagasto, ngan an pangalimbasog nga kinahanglan para maglampos an desisyon. Ha pipira nga sitwasyon, puydi mo konsultahon an imo pamilya basi mahibaroan kon ano an dapat nira buhaton para masuportaran an desisyon. Kay ano nga importante ini nga klase han pagplano? Bangin makabulig ito nga makita mo nga may dapat ka himoon nga pipira nga pagbag-o ha imo desisyon o mas praktikal an iba nga opsyon. Kon ginpapabulig mo an imo kapamilya ngan ginpapamatian an ira mga suhestyon, magigin mas andam hira ha pagkooperar ha imo para maglampos an desisyon. w25.01 18-19 ¶14-15

Iginsaysay ni Isaias kon kay ano nga dapat kita ‘magrayhak ngan maglipay’ ha espirituwal nga paraiso. Hi Jehova an naglarang hinin simboliko nga paraiso. (Isa. 65:​18, 19) Diri urusahon nga ginagamit kita ni Jehova nga giyahan an mga tawo nga bumaya ha mga organisasyon hini nga kalibotan, nga diri nagtututdo han kamatuoran mahitungod ha Dios, ngan buligan hira nga magin bahin han aton mahusay nga simboliko nga paraiso! Eksayted kita ha mga bendisyon nga aton napapahimulsan kay aadi kita ha kamatuoran, ngan napapagios kita nga sumatan an iba mahitungod hito. (Jer. 31:12) Malipayon liwat kita ngan eksayted mahitungod ha paglaom nga may-ada kita sugad nga mga residente ha espirituwal nga paraiso. An Biblia nagsasaad nga “magtutukod [kita] hin mga balay ngan maukoy dida hito, ngan magtatanom . . . hin mga urubasan ngan makaon han mga bunga hito. . . . Diri [kita] maniniguro pagtrabaho hin waray la pulos” tungod kay “binendisyonan [kita] ni Jehova.” Nagsasaad hiya ha aton hin kinabuhi nga may seguridad, makalilipay, ngan may tinuod nga katuyoan. Maaram hiya han mga panginahanglan han kada tagsa ngan “[tatagbawon] an hingyap han tagsa nga buhi nga linarang.”​—Isa. 65:​20-24; Sal. 145:16. w24.04 22-23 ¶11-12

Ginhihimo naton hi Jehova nga aton Bato kon nasarig kita hin bug-os ha iya. Nasarig kita nga pinaagi ha pagin masinugtanon ha iya bisan ha magkuri nga panahon, magpapahimulos kita. (Isa. 48:​17, 18) Samtang naieksperyensyahan naton an iya bulig, an aton pagsarig ha iya nadudugangan. Salit mas magigin andam kita ha pag-atubang ha mga problema nga hi Jehova la an makakabulig ha aton. Hi Jehova pariho ha usa nga daku hinduro nga bato, o bukid, nga diri nagbabag-o. An iya personalidad ngan katuyoan diri nagbabag-o. (Mal. 3:6) Han nagrebelde hira Adan ngan Eva kan Jehova, waray niya bag-oha an iya katuyoan para ha katawohan. Sugad han iginsurat ni apostol Pablo, “diri [ni Jehova] igninigar an iya kalugaringon.” (2 Tim. 2:13) Nagpapasabot ini nga anoman an mahitabo o buhaton han iba, diri gud babag-uhon ni Jehova an iya mga kalidad, katuyoan, o mga suruklan. Tungod kay hi Jehova diri gud nagbabag-o, maaram kita nga iya kita bubuligan ha magkuri nga panahon ngan iya tutumanon an iya mga saad ha tiarabot.​—Sal. 62:​6, 7. w24.06 27-28 ¶7-8

Kon may uyab ka, ano an mabulig ha imo ha pagdesisyon kon mag-aasawa ba kamo o diri? Kilalaha hin maopay an kada tagsa. Posible gud nga may nahibaroan ka na nga pipira nga impormasyon mahitungod ha iya antes kamo nagtikang mag-date. Pero yana may higayon ka nga mahibaroan an “sulod nga pagkatawo han kasingkasing.” Nag-uupod ito ha paghibaro hin dugang pa han espirituwalidad, personalidad, ngan panhunahuna han imo potensyal nga maarasawa. Paglabay han panahon, dapat mabaton mo na an masunod nga mga pakiana: ‘Magigin maopay ba hiya nga asawa para ha akon?’ (Prob. 31:​26, 27, 30; Efe. 5:33; 1 Tim. 5:8) ‘Maihahatag ba namon ha kada tagsa an amon panginahanglan ha emosyon? Makakaya ba namon palabyon an kaluyahan han kada tagsa?’ (Roma 3:23) Samtang nakikilala niyo an kada tagsa, hinumdumi ini: An pagin compatible diri ginsusukol ha kon ano kadamu an iyo ginkakaparihoan, lugod, kon paonan-o kamo nag-a-adjust ha iyo mga kaibahan. w24.05 27 ¶5

Hi Hadi David nakasala hin seryoso. Pero han ginkaistorya hiya ni propeta Nathan mahitungod ha iya sala, hi David mapainubsanon nga nagbasol. (Sal. 51:​3, 4, 17, superskripsyon) Hi Hadi Hezekias liwat nakasala kan Jehova. (2 Cron. 32:25) Pero pariho kan David, mapainubsanon nga nagbasol hi Hezekias. (2 Cron. 32:26) Sugad nga resulta gintratar hiya sugad nga matinumanon nga hadi nga “padayon nga ginbuhat . . . an husto.” (2 Hadi 18:3) Ano nga leksyon an aton mahibabaroan? Dapat magbasol kita han aton mga sala ngan buhaton an ngatanan nga aton mahihimo basi malikyan nga mabuhat ito utro. Ano man kon ginsagdonan kita han mga tigurang, bisan ha baga hin gutiay la nga butang? Diri kita dapat umabat nga ginsalikway kita ni Jehova o han mga tigurang. Bisan an mag-opay nga hadi han Israel kinahanglan sagdonan ngan sawayon. (Heb. 12:6) Kon gintatadong kita, dapat (1) mapainubsanon nga karawaton ito, (2) maghimo han ginkikinahanglan nga mga pagbag-o, ngan (3) padayon nga mag-alagad kan Jehova hin bug-os-kasingkasing. Kon magbasol kita ha aton mga sala, papasayloon kita ni Jehova.​—2 Corinto 7:​9, 11. w24.07 21 ¶8; 22 ¶9, 11

Gintatanggal ha kongregasyon an usa nga diri mabinasulon nga nagbubuhat hin sala kon diri niya ginkakarawat an pauroutro nga pagbulig ha iya han mga tigurang nga magbasol. (2 Hadi 17:​12-15) An iya mga buhat nagpapakita nga iya ginpili nga diri sundon an mga suruklan ni Jehova. (Deut. 30:​19, 20) Ipapahibaro ha kongregasyon nga diri na hiya usa han mga Saksi ni Jehova. Diri katuyoan hito nga pahibaro nga pakaalohan hiya. Lugod, ginhihimo ito basi masunod han kongregasyon an ginsusugo han Biblia nga “diri na . . . makig-upod” hito nga tawo, “bisan ha pakig-upod ha pagkaon.” (1 Cor. 5:​9-11) May maopay nga rason kon kay ano nga ginhatag ito nga instruksyon. Hi apostol Pablo nagsurat: “An gutiay nga libadura nakakapatubo han bug-os nga minasa.” (1 Cor. 5:6) An diri mabinasulon nga nagbubuhat hin sala makakapaluya han determinasyon hadton nangangalimbasog nga magkinabuhi uyon ha magtadong nga suruklan ni Jehova.​—Prob. 13:20; 1 Cor. 15:33. w24.08 27 ¶3-4

Ha literal, diri naton maihahatag ha iba an aton kusog. Pero mahimo naton gamiton an aton kusog para ha ira. Pananglitan, puydi naton buligan an mga lagas o may sakit nga kabugtoan ha pagpanginano ha mga buruhaton ha ira balay o ha pagpalit han ira mga kinahanglan. O puydi kita magboluntaryo nga bumulig ha paglimpyo ngan pagmintinar han Kingdom Hall. Ayaw liwat hingalimti nga an aton mga pulong nakakapakusog. May nahuhunahuna ka ba nga mahimo madasig han sinsero nga kumendasyon? May kilala ka ba nga nagkikinahanglan hin pagliaw? Hain man hito nga kahimtang, puydi ka ba mag-una ha pakiistorya hito nga indibiduwal? Puydi mo hiya bisitahon hin personal, tawagan, o kon posible pagpadara hin kard, pag-email, o pag-text. Diri man kinahanglan maopay hinduro an imo iyayakan. An imo halipot ngan simple nga mga pulong nga sinsero bangin amo an ginkikinahanglan gud han imo igkasi-tumuroo basi magpabilin nga matinumanon ha usa pa ka adlaw o basi magin mas maopay an iya inaabat.​—Prob. 12:25; Efe. 4:29. w24.09 28 ¶8-10

Kon ministeryal nga surugoon ka na hin pipira ka panahon, posible nga hirani ka na magin kwalipikado ha pagin tigurang. Mahimo mo ba kab-uton ito nga “maopay nga buhat”? Ano an buruhaton han usa nga tigurang? Nangunguna hiya ha pagsangyaw, maduruto ha pag-shepherding ngan pagtutdo, ngan ginpaparig-on an kongregasyon pinaagi ha pulong ngan buhat. Diri urusahon nga gintatawag han Biblia an maduruto nga mga tigurang nga “regalo nga mga lalaki.” (Efe. 4:8) Paonan-o ka magigin kwalipikado ha pagin tigurang? An kwalipikasyon ha pagin tigurang diri pariho han kwalipikasyon ha sekular nga trabaho. Basi makarawat ha trabaho, kasagaran na nga kinahanglan la nga may-ada ka han mga skill nga ginbibiling han employer. Ha kabaliktaran, kon karuyag mo magin tigurang, diri igo an pagkaada la hin mga skill ha pagsangyaw ngan pagtutdo. Dapat mo maabot an Kasuratanhon nga mga kwalipikasyon para ha mga tigurang nga mababasa ha 1 Timoteo 3:​1-7 ngan Tito 1:​5-9. w24.11 20 ¶1-3