Kamadarahog—Mawawara Na ha Kadayonan!
“Namimeligro ha Kamadarahog an Nasud”—The New York Times, Estados Unidos.
“Kamadarahog ha Panimalay”—O Globo, Brazil.
“An Kamadarahog Nagtatarhog han Kababayin-an ha Kalibotan”—The Globe and Mail, Canada.
NIN ulohan nga mga sumat tikang ha Norte ngan Sur Amerika nagpapakita han nakakaguol nga panhitabo ha bug-os nga kalibotan. Sugad han iginsaysay han World Health Organization, “an kamadarahog ha ngatanan nga porma hito nag-uuswag gud ha bag-o nga mga dekada.”
Tagda an pipira makapabaraka nga mga estadistika:
Pamatay. Ha Latin Amerika ngan ha Caribbean, mga 1,250 ka tawo an namamatay ha kamadarahog kada adlaw. Sugad nga resulta, “ha katunga han mga nasud hini nga mga rehiyon, an pagpatay hin tawo amo an ikaduha nangunguna nga hinungdan han kamatayon ha mga batan-on nga edad 15-24.”
Kamadarahog kontra ha kabataan. An pisikal, seksuwal, ngan emosyonal nga pag-abuso ha kabataan amo an mga problema ha bug-os nga kalibotan. Pananglitan, “iginpapasabot han mga surbey han mga adulto ha pipira industriyalisado nga mga nasud nga 10%–15% han kabataan an mga biktima han pag-abuso ha sekso—kadam-an ha ira mga kababayin-an.”
Kamadarahog kontra ha kababayin-an. Katapos mag-imbistigar ha mga pag-abuso ha mga katungod han tawo nga ginbuhat ha bug-os nga kalibotan han 1997, nagsiring an mga parasaliksik nga “an kamadarahog ha panimalay usa han siyahan nga mga hinungdan han kadaot han kababayin-an ha haros tagsa nga nasud ha kalibotan.” (Human Rights Watch World Report 1998) An kamadarahog ha panimalay, nga nagsasarang kondi diri pa naisusumat nga problema, tinatawag na yana nga “an hilom nga krisis han ika-20 ka siglo.”—The Globe and Mail, Canada.
An tuna ‘napuno hin kamadarahog’ sugad ha mga adlaw ni Noe. (Genesis 6:9-12) Kondi ginluwas ni Jehova iton nga “parawali han katadongan” ngan an iya pamilya “han pagpalunupi niya han kalibotan han diri magtinoohon ha Dios.” An Dios magbubuhat han pariho ha aton adlaw. Luluwason niya an ‘mga tawo nga may diosnon nga debosyon’ kon kuhaon na niya an madarahog ngan an maraot ngan himoon ini nga tuna nga paraiso ha iya iginsaad nga bag-o nga kalibotan. (2 Pedro 2:4-9; 3:11-13) Diri ka ba nalilipay ha paghibaro nga an kamadarahog matatapos na ha kadayonan?