Sarig kan Jehova, an Dios han Ngatanan nga Pagliaw
“Darayawon an Dios ngan an Amay han aton Ginoo Jesu-Kristo, an Amay han ngatanan nga pagkalooy ngan Dios han ngatanan nga paglipay.”—2 KOR. 1:3.
1. Anoman an aton edad, ano an ginkikinahanglan naton ngatanan?
TIKANG ha aton katawo, naabat kita nga ginkikinahanglan naton an pagliaw. An usa nga minasus-an nagtutuok basi ipahibaro ha aton nga kinahanglan hiya liawon. Bangin ginugutom hiya o karuyag magpakugos. Bisan kon daku na kita, kasagaran na nga nagkikinahanglan pa gihapon kita hin pagliaw. Labi na nga ginkikinahanglan naton ini kon aada kita ha magkuri nga kahimtang.
2. Ano an saad ni Jehova ha mga nasarig ha iya?
2 Kasagaran na nga naliliaw kita han aton kapamilya ngan kasangkayan. Kondi may mga kahimtang nga an hinungdan han aton kasákit diri masusolusyonan hin tawo. An Dios gud la an makakaliaw ha aton anoman kakuri an aton kahimtang. An iya Pulong nagpapasarig ha aton: “Hi Jehova hirani ha ira ngatanan nga nagsasangpit ha iya . . . Hiya liwat makakabati han ira singgit.” (Sal. 145:18, 19) Oo, “an mga mata ni Jehova ngadto ha mga magtadong, ngan binubuka niya iton iya talinga ngadto ha ira singgit.” (Sal. 34:15) Pero kon karuyag naton nga buligan ngan liawon kita han Dios, kinahanglan sumarig kita ha iya. Iginpatin-aw ito han salmista nga hi David han hiya nagkanta: “Hi Jehova . . . an hitaas nga kuta nga pangarayopan han mga tinalumpigos. An hitaas nga kuta ha mga oras han kakurian; ngan hira nga nagpapakilala han imo ngaran mananarig ha imo; kay ikaw, Jehova, waray mo igsikway an nakikigkita ha imo.”—Sal. 9:9, 10.
3. Paonan-o igin-ilustrar ni Jesus an gugma ni Jehova ha Iya katawohan?
3 Birilhon kan Jehova an mga nagsisingba ha iya. Iginpatin-aw ini ni Jesus han hiya nagsiring: “Di ba an lima nga mga tamsihay iginbaligya hin upat nga daku? Ngan bisan an usa ha ira waray hikalimti ha atubangan han Dios. Kondi bisan an mga buhok ha iyo mga ulo naihap na ngatanan. Ayaw kahadlok: kamo muromahal han damu nga mga tamsihay.” (Luk. 12:6, 7) Pinaagi kan propeta Jeremias, hi Jehova nagsiring ha mga Israelita: “Ako nahigugma ha imo han gugma nga dayon; busa ha mahigugmaon nga pagpaid akon ka kinabig.”—Jer. 31:3.
4. Kay ano nga makakasarig kita ha mga saad ni Jehova?
4 An pagsarig kan Jehova ngan ha katumanan han iya mga saad makakaliaw ha aton ha panahon han kasákit. Salit kinahanglan magkaada kita pagsarig ha Dios nga pariho han iginpahayag ni Josue, nga nagsiring: “Waray usa nga butang nga nakawang ha ngatanan nga mag-opay nga butang nga kan Jehova nga iyo Dios iginyakan mahitungod ha iyo; an ngatanan natuman para ha iyo, waray usa nga butang nga nakawang hini.” (Jos. 23:14) Dugang pa, makakasiguro kita nga bisan kon nag-aantos kita tungod han magkuri nga kahimtang yana, “an Dios matinumanon” ngan diri gud niya papabay-an an iya maunungon nga mga surugoon.—Basaha an 1 Korinto 10:13.
5. Kay ano nga maliliaw naton an iba?
5 Gintawag ni Pablo hi Jehova nga “Dios han ngatanan nga paglipay,” o pagliaw. Nangangahulogan ito nga liliawon ni Jehova an mga nasasákit o nasusubo. (Basaha an 2 Korinto 1:3, 4.) An aton langitnon nga Amay diri mapupugngan han bisan ano o bisan hin-o salit mabubuhat niya an bisan ano nga ginkikinahanglan ha pagliaw ha mga nahigugma ha iya. Salit maliliaw liwat naton an aton mga igkasi-tumuroo nga “aada ha bisan ano nga kagol-anan.” Mahihimo naton ito “pinaagi han paglipay nga iginlipay ha aton han Dios.” Oo, waray gud kapariho an abilidad ni Jehova ha pagliaw ha mga nasasákit!
Mga Hinungdan han Kasákit
6. Ano an pipira nga hinungdan han kasákit?
6 Nagkikinahanglan kita hin pagliaw ha damu nga kahimtang. Usa han nangunguna nga mga hinungdan han kasubo amo an kamatay han usa nga hinigugma, labi na an kamatay han hinigugma nga padis o anak. Bangin magkinahanglan liwat hin pagliaw an usa nga biktima hin diskriminasyon. An maluya nga panlawas, kalagas, kapobrehan, mga problema ha pag-asawa, o magraot nga panhitabo ha kalibotan mahimo magin hinungdan han kasákit.
7. (a) Ha panahon han kasákit, kay ano nga nagkikinahanglan kita hin pagliaw? (b) Ano an mahimo buhaton ni Jehova ha pagtambal han ‘ruba ngan nadugmok’ nga kasingkasing?
7 Ha panahon han kasákit, bangin magkinahanglan kita hin pagliaw tungod kay naaapektohan an aton kasingkasing, hunahuna, emosyon, kahimsog, ngan bisan an aton pagtoo. Pananglitan, tagda an kasingkasing. An Pulong han Dios nasiring nga an aton kasingkasing mahimo ‘maruba ngan madugmok.’ (Sal. 51:17, NW) Hini nga kahimtang, makakabulig gud hi Jehova, kay “gintatambal niya an may mga ruba nga kasingkasing, ngan ginpuputos niya an ira mga samad.” (Sal. 147:3) Bisan ha magkuri gud nga sitwasyon, maliliaw han Dios an aton nasasákit nga kasingkasing kon mag-aampo kita ha iya nga may bug-os nga pagtoo ngan susundon an iya mga sugo.—Basaha an 1 Juan 3:19-22; 5: 14, 15.
8. Kon naguguol an aton hunahuna, paonan-o kita mabubuligan ni Jehova?
8 An aton hunahuna kasagaran na nga nagkikinahanglan hin pagliaw tungod kay mahimo ito maguol hinduro tungod han iba-iba nga pagsari. Ini nga mga pagsari bangin diri naton maiilob ha aton la kalugaringon nga kusog. Kondi an salmista nagkanta: “Ha kadam-an ha akon pamurubuot ha sulod ko, an imo mga pagliaw nakalipay ha akon kalag.” (Sal. 94:19) Dugang pa, hi Pablo nagsurat: “Diri kamo magkabaraka hin bisan ano nga bagay; kondi ha ngatanan nga bagay tungod ha pag-ampo ngan pangamuyo upod an pagpasalamat ipahibaro niyo ha atubangan han Dios an iyo mga pinangangaro. Ngan an kamurayawan han Dios, nga labaw ha ngatanan nga hibabroan, magbabantay ha iyo mga kasingkasing ngan ha iyo mga hunahuna kan Kristo Jesus.” (Fil. 4:6, 7) An pagbasa ngan pagpamalandong han Kasuratan makakaliaw gud ha aton naguguol nga hunahuna.—2 Tim. 3:15-17.
9. Ano an makakabulig ha aton kon naaapektohan kita han negatibo nga mga emosyon?
9 Usahay, bangin manluya kita hinduro salit masayon kita maapektohan han negatibo nga mga emosyon. Bangin inaabat naton nga diri naton matutuman an usa nga Kasuratanhon nga responsabilidad o pribilehiyo ha pag-alagad. Hini nga sitwasyon, maliliaw ngan mabubuligan liwat kita ni Jehova. Ha pag-ilustrar: Han ginpili hi Josue nga manguna ha mga Israelita ha pakig-away ha gamhanan nga mga nasud, ginsidngan ni Moises an katawohan: ‘Magpakabaskog kamo ngan magmaisugon, ayaw kahadlok o ayaw patarhog ha ira: kay hi Jehova nga iyo Dios, hiya an maupod ha iyo: diri kamo niya kakawangon, o diri man tatalikdan.’ (Deut. 31:6) Ha bulig ni Jehova, nagin malampuson hi Josue ha pagpanguna ha katawohan han Dios ngadto ha Tuna nga Iginsaad ngan ha pagpirde ha ngatanan nira nga kaaway. Antes hito, ginbuligan liwat ni Jehova hi Moises ha sugad hito nga paagi han nakadto hira ha Dagat nga Pula.—Eks. 14:13, 14, 29-31.
10. Kon an magraot nga kahimtang nakakaapekto ha aton kahimsog, ano an makakabulig ha aton?
10 An magraot nga kahimtang mahimo makaapekto ha aton kahimsog. Syempre, an masustansya nga pagkaon, igo nga pagpahuway ngan ehersisyo, ngan pagin limpyo makakabulig ha aton nga magin mahimsog. An pagpamalandong ha ginsisiring han Biblia mahitungod ha tidaraon may maopay liwat nga epekto ha aton kahimsog. Salit kon may-ada kita problema, makakabulig an paghinumdom han naeksperyensyahan ni Pablo ngan han iya makapadasig nga mga pulong: “Ginsusuok kami paluyoluyo, kondi waray kami kapipiit; nanhipausa kami, kondi waray kawad-i hin paglaom; mga gintitimaraot kami, kondi waray babayai; ginpulindag kami, kondi waray magkahihibang.”—2 Kor. 4:8, 9.
11. Ano an sadang naton buhaton kon naabat kita nga nagtitikaluya an aton pagtoo?
11 May mga pagsari nga mahimo makaapekto ha aton pagtoo. Hini nga mga kahimtang, mabubuligan liwat kita ni Jehova. An iya Pulong nagpapasarig ha aton: “Hi Jehova nakapot hadton ngatanan nga natutumba, ngan nagpapabangon hadton nanhihipakulob.” (Sal. 145:14) Kon naabat kita nga nagtitikaluya an aton pagtoo, kinahanglan magpabulig kita ha mga tigurang. (Jak. 5:14, 15) Ngan an pirme paghunahuna han aton paglaom nga kinabuhi nga waray kataposan magpaparig-on ha aton ha panahon nga ginsasarihan an aton pagtoo.—Juan 17:3.
Mga Ehemplo han Pagliaw han Dios
12. Paonan-o ginliaw ni Jehova hi Abraham?
12 An usa nga giniyahan nga salmista nagsiring: “Hinumdumi an pulong ngadto ha imo surugoon, kay dida imo [Jehova] ako pinapaglaom. Amo ini an akon liaw ha akon kaguol; kay an imo mga pulong nagbantay hin kinabuhi ha akon.” (Sal. 119:49, 50) Yana, may-ada kita han sinurat nga Pulong ni Jehova, diin mababasa an damu nga ehemplo han pagliaw han Dios. Pananglitan, nabaraka gud hi Abraham han iya hinbaroan nga bubungkagon ni Jehova an Sodoma ngan Gomorra. Iton matinumanon nga patriarka nagpakiana ha Dios: “Imo pagpapanason an mga magtul-id upod han mga magraot?” Ginliaw ni Jehova hi Abraham pinaagi ha pagsaad nga kon may 50 nga magtadong nga tawo ha Sodoma, diri Niya ito bubungkagon. Kondi lima pa ka beses nga nagpakiana hi Abraham kan Jehova: Ano man kon may-ada la 45 nga magtadong nga tawo? 40? 30? 20? 10? Ha kada pagpakiana ni Abraham, may pagpailob ngan pagkabuotan nga nagsaad hi Jehova nga diri bubungkagon an Sodoma. Bisan kon waray ngani magnapulo an magtadong nga tawo didto, ginluwas ni Jehova hi Lot ngan an iya mga anak nga kababayin-an.—Gen. 18:22-32; 19:15, 16, 26.
13. Paonan-o iginpakita ni Hana nga nasarig hiya kan Jehova?
13 An asawa ni Elkana nga hi Hana naghingyap gud nga magkaanak. Pero baog hiya, ngan tungod hito nasubo gud hiya. Igin-ampo niya ito kan Jehova, ngan an hitaas nga saserdote nga hi Eli nagsiring ha iya: “Tagan ka unta han Dios han Israel han imo pinangaro ha iya.” Nakaliaw ito kan Hana, “ngan an iya pangahimo diri na mabidoon.” (1 Sam. 1:8, 17, 18; Maopay nga Sumat) Hi Hana sinarig kan Jehova ngan igintubyan ha Iya an ngatanan. Bisan kon diri hiya maaram han magigin resulta, nagkaada hiya murayaw nga hunahuna. Inabot an panahon nga ginbaton ni Jehova an iya pag-ampo. Nagburod hiya ngan nag-anak hin bata nga lalaki nga iya ginngaranan hin Samuel.—1 Sam. 1:20.
14. Kay ano nga nagkinahanglan hi David hin pagliaw, ngan kan kanay hiya dinaop basi maliaw?
14 Usa pa nga ehemplo han ginliaw han Dios amo hi Hadi David. Hi Jehova “nagtatan-aw han kasingkasing,” salit han ginpili niya hi David nga magin hadi han Israel, maaram hiya nga hi David sinsero ngan maunungon ha tinuod nga pagsingba. (1 Sam. 16:7; 2 Sam. 5:10) Kondi ha urhi, hi David nag-adulteryo upod ni Bat-seba ngan nangalimbasog pagtago han iya sala pinaagi ha pagpapatay ha bana ni Bat-seba. Han nasantop ni David nga daku gud an iya sala, nag-ampo hiya kan Jehova: “Sugad ha kadam-an han imo maghumok nga mga kalooy panasa an akon mga pagsupak. Hugasi ako hin maopay tikang ha akon karat-an, ngan hamisi ako han akon sala. Kay nakilala ako han akon mga pagsupak; ngan an akon sala ha atubangan nakon gihapon.” (Sal. 51:1-3) Nagbasol gud hi David, ngan ginpasaylo hiya ni Jehova. Kondi gin-antos niya an mga resulta han iya sala. (2 Sam. 12:9-12) Bisan pa hito, an kalooy ni Jehova nakaliaw kan David.
15. Ano nga bulig an iginhatag ni Jehova kan Jesus antes gud hiya patayon?
15 Han nakanhi hi Jesus ha tuna, nakaeksperyensya hiya hin damu nga magkuri nga kahimtang. Igintugot han Dios ito nga mga pagsari, ngan hi Jesus nagpabilin nga matinumanon sugad nga hingpit nga tawo nga pirme nasarig kan Jehova ngan nasuporta ha Iya pagkasoberano. Antes gud hi Jesus traydoran ngan patayon, nag-ampo hiya kan Jehova: “Diri pagbuhaton an akon kaburut-on, kondi an imo.” Usa nga anghel an nagpakita kan Jesus ngan nagparig-on ha iya. (Luk. 22:42, 43) Ginliaw, ginparig-on, ngan ginbuligan hiya han Dios hito nga panahon nga ginkinahanglan gud niya ito.
16. Paonan-o kita mabubuligan ni Jehova kon namimeligro an aton kinabuhi tungod han aton pagtoo?
16 Bisan kon mameligro an aton kinabuhi tungod han aton pagtoo, mabubuligan kita ngan bubuligan gud kita ni Jehova nga magpabilin nga matinumanon ha iya. Dugang pa, naliliaw kita han paglaom ha pagkabanhaw. Ngan ginpapamulat gud naton an panahon nga an kataposan nga kaaway, an kamatayon, ‘pagwawad-on na’! (1 Kor. 15:26) An maunungon nga mga surugoon ni Jehova ngan an iba pa nga nagkamatay aada ha iya hingpit nga panumdoman ngan iya babanhawon. (Juan 5:28, 29; Buh. 24:15) An pagtoo ha saad ni Jehova nga pagkabanhaw nagliliaw ha aton ngan naghahatag hin marig-on nga paglaom ha panahon han pagtimaraot.
17. Paonan-o kita ginliliaw ni Jehova kon namamatay an usa nga aton hinigugma?
17 Nakakaliaw gud hibaroan nga an aton mga hinigugma nga nagkamatay na may paglaom nga mabanhaw ha makaruruyag nga bag-o nga kalibotan diin waray na an ngatanan nga hinungdan han kasákit! Ngan pribilehiyo gud han daku nga panon han mga surugoon ni Jehova nga maluluwas ha kabungkagan hinin maraot nga sistema an pagtapo ngan pagtutdo ha mga babanhawon dinhi ha tuna!—Pah. 7:9, 10.
Ha Ilarom Aada an mga Butkon han Dios nga Magpapadayon ha Waray Kataposan
18, 19. Paonan-o ginliliaw han Dios an iya katawohan ha panahon han pagtimaraot?
18 Ha usa nga makaparig-on ngan nakakaliaw nga kanta, ginpasarig ni Moises an mga Israelita: “An waray kataposan nga Dios amo an imo urukyan nga lugar, ngan ha ilarom amo an mga butkon nga waray kataposan.” (Deut. 33:27) Ha urhi, hi propeta Samuel nagsiring ha mga Israelita: “Ayaw kamo simang tikang ha pagsunod kan Jehova, kondi pag-alagad kamo kan Jehova ha bug-os niyo nga kasingkasing. . . . Hi Jehova diri mabaya han iya katawohan tungod . . . han iya harangdon nga ngaran.” (1 Sam. 12:20-22) Kon magpapabilin kita nga matinumanon kan Jehova, diri gud kita niya papabay-an. Pirme niya ihahatag an bulig nga aton ginkikinahanglan.
19 An Dios pirme naghahatag ha iya katawohan han bulig ngan pagliaw nga ira ginkikinahanglan hinin peligroso nga kataposan nga mga adlaw. Sobra usa ka siglo na nga yinukot han aton kabugtoan ha bug-os nga kalibotan an gintitimaraot ngan ginpipriso tungod kay nag-aalagad hira kan Jehova. Ginpapamatud-an han ira mga eksperyensya nga ginliliaw gud ni Jehova an iya katawohan ha panahon han pagsari. Pananglitan, usa nga bugto ha Unyon Sobyet hadto an ginsentensyahan nga mapriso hin 23 ka tuig tungod han iya pagtoo. Bisan pa hito, nakakarawat la gihapon hiya hin espirituwal nga pagkaon nga nagparig-on ngan nagliaw ha iya. Hiya nagsiring: “Hito nga mga panahon, nahibaro ako pagsarig kan Jehova ngan ginparig-on niya ako.”—Basaha an 1 Pedro 5:6, 7.
20. Kay ano nga makakasiguro kita nga diri kita papabay-an ni Jehova?
20 Anoman an mahitabo ha aton ha tidaraon, maopay nga hinumdoman naton an nakakaliaw nga mga pulong han salmista: “Diri ni Jehova isisikway an iya katawohan.” (Sal. 94:14) Bisan kon nagkikinahanglan kita hin pagliaw, pribilehiyo liwat naton nga liawon an iba. Ha sunod nga artikulo, hibabaroan naton kon paonan-o naton maliliaw an mga masurub-on dinhi hinin masamok nga kalibotan.
Ano an Imo Baton?
• Ano an pipira nga hinungdan han kasákit?
• Paonan-o ginliliaw ni Jehova an iya katawohan?
• Kon namimeligro an aton kinabuhi, ano an makakaliaw ha aton?
[Kahon/Mga Retrato ha pahina 25]
KON PAONAN-O AATUBANGON AN MGA KAHIMTANG NGA MAHIMO MAKAAPEKTO HA ATON . . .
▪ kasingkasing Sal. 147:3; 1 Juan 3:19-22; 5:14, 15
▪ hunahuna Sal. 94:19; Fil. 4:6, 7
▪ emosyon Eks. 14:13, 14; Deut. 31:6
▪ kahimsog 2 Kor. 4:8, 9
▪ pagtoo Sal. 145:14; Jak. 5:14, 15