“Puydi Kami Makialayon Pagpiktyur?”
Katapos han ikaduha nga adlaw han usa nga distrito nga kombensyon, hi Josué nga Bethelite ha Mexico namasyada ha syudad han Querétaro. May mag-asawa nga turista, hira Javier ngan Maru nga taga-Colombia, nga naghangyo ha iya nga piktyuran hira. Tungod kay maopay an pamado ni Josué ngan han iya kasangkayan nga Saksi ngan may mga badge hira, an mag-asawa nagpakiana kon tikang hira ha usa nga gradwasyon o iba nga espesyal nga okasyon. Nagsiring hi Josué nga natambong hira hin kombensyon han mga Saksi ni Jehova, ngan gin-imbitar niya an mag-asawa nga tumambong ha sesyon ha Domingo.
An mag-asawa naghunahuna nga makaarawod an pagtambong kay waray hira bado nga maangay ha sugad hito nga okasyon. Bisan pa hito, iginhatag ni Josué ha ira an iya ngaran ngan an numero han telepono han sanga nga opisina diin hiya nag-aalagad.
Waray laumi ni Josué nga paglabay hin upat ka bulan, matawag ha iya hi Javier. Hira nga mag-asawa nakatambong han kombensyon ngan karuyag na nira nga may mga Saksi ni Jehova nga bumisita ha ira ha Mexico City, diin naukoy hira hito nga panahon. Waray pag-iha, nagpa-Bible study na hira Javier ngan Maru ngan tinambong dayon ha mga katirok. Paglabay hin napulo ka bulan, nagin mga magwarali hira. Bisan kon kinahanglan hira bumalhin ha Toronto, Canada, padayon nga nag-uswag hira ha espirituwal ngan nabawtismohan.
Ha urhi, hi Josué nakakarawat hin surat tikang kan Javier nga nagsusumat kon ano an nagpagios ha iya nga karawaton an kamatuoran. “Antes tumambong ha kombensyon, nahisgotan namon nga mag-asawa an amon panginahanglan hin giya han Dios. Han nakita namon nga maopay gud an iyo pamado, naghunahuna kami nga sigurado nga tikang kamo ha espesyal gud nga katirok. Ha kombensyon, naruyagan gud namon an mahigugmaon nga paagi han pagbulig ha amon nga makabiling hin lingkoran, an pagbulig ha amon nga masundan an ginbabasa nga teksto ha Biblia, ngan an paggawi han mga natambong. Baga hin diri importante ha ira an amon pamado sugad nga mga turista.”
Natuman gud kan Josué ini nga ginsiring han maaramon nga hi Hadi Salomon: “Ha aga pagsabwag han imo liso, ngan ha kulop ayaw hawiri an imo kamot; kay diri ka maaram kon hain in mauswag, kon ini ba o adto, o kon hira ba nga duha magpapariho kamaopay.” (Ekles. 11:6) Puydi ka ba magsabwag hin liso pinaagi ha pagsalingabot han mga higayon nga sumatan an iba mahitungod han tiarabot nga kombensyon o pahayag publiko? Bangin gamiton ka ni Jehova basi maaghat an mga nagugutom ngan nauuhaw para han iya giya, pariho kanda Javier ngan Maru.—Isa. 55:1.
[Retrato ha pahina 32]
Tikang ha wala tipatoo: Alejandro Voeguelin, Maru Pineda, Alejandro Pineda, Javier Pineda, ngan Josué Ramírez ha sanga nga opisina ha Mexico