Mga Pakiana Tikang ha mga Magbarasa

Posible ba mapaiwas ha kongregasyon an usa nga Kristiano kon magin maraot na gud an iya nabatasan nga pagkinita hin pornograpiya?

▪ Oo. Ito an hinungdan nga kinahanglan likyan gud naton an ngatanan nga klase hin pornograpiya—barasahon man ito o retrato—ha mga magasin, sine, video, ngan ha Internet.

An pornograpiya makikita ha bisan diin. Nagtitikadamu na an nagkikita hito kay masayon na ito makita ha Internet. An iba, bata man o edaran na, diri tinuyo nga nakakakita hito ha mga Web site. Kondi an iba tinuyo nga namimiling hin mga Web site nga nagpapakita hin pornograpiya. Diri hira nag-aalang pagbuhat hito kay puydi nira ito basahon o kitaon hin sekreto ha balay o ha opisina. Kay ano nga an pornograpiya peligroso ha mga Kristiano?

Hibabaroan naton an usa nga importante nga hinungdan ha pahamangno ni Jesus: “An ngatanan nga nasiplat ha babaye ha pagkaipa ha iya makakapanlibog na ha iya dida ha iya kasingkasing.” (Mat. 5:28) Syempre, husto an seksuwal nga relasyon butnga han mag-asawa ngan naghahatag ito ha ira hin kalipay. (Prob. 5:15-19; 1 Kor. 7:2-5) Kondi diri ito an ginpapabug-atan han pornograpiya. Lugod, iginpapakita hito an seksuwal nga imoralidad nga nakakaaghat han sayop nga panhunahuna nga iginpahamangno ha aton ni Jesus. Salit an pagbasa o pagkita hin pornograpiya supak hini nga sugo han Dios: “Busa pakamatya niyo an iyo mga bahin nga mga tungod ha tuna: pagpakighilawas, pagkamahugaw, pag-abat nga mapaso, maraot nga tinguha, ngan pagkaipa, nga amo an pagsingba ha mga dios-dios.”—Kol. 3:5.

Ano man kon an usa nga Kristiano makausa o makaduha nagkita hin pornograpiya? An iya kahimtang maipapariho ha nagin peligroso nga kahimtang han salmista nga hi Asap, nga nagsiring: “Mahitungod ha akon, gutiay la an akon mga tiil mahibulag; gutiay la an akon mga biksal manhitalindas.” Paonan-o an usa nga Kristiano magkakaada limpyo nga konsensya ngan kamurayawan ha Dios kon nagkikinita hiya hin mga retrato han hubo nga kalalakin-an o kababayin-an o han lalaki ngan babaye nga nagsi-sex? Diri hiya mamumurayaw pariho kan Asap nga nagsiring: “Ha bug-os nga adlaw ginbunalan ako, ngan ha kinaaga ginbadlong ako.”—Sal. 73:2, 14.

Sadang masantop han usa nga Kristiano nga nagkikinita hin pornograpiya nga nakakadaot ito han iya relasyon kan Jehova ngan nagkikinahanglan hiya hin bulig. Makakabulig ha iya an mga tigurang ha kongregasyon: “Kon an usa ka tawo hiagian han iba nga nagtalapas, kamo nga mga espirituhanon, pabalikon unta hiya niyo ha espiritu ha kaaghop; pagtan-aw man ha imo kalugaringon.” (Gal. 6:1) Maihahatag han usa o duha nga tigurang an bulig nga iya ginkikinahanglan, pati na an ‘mga pag-ampo han pagtoo nga makakaluwas ha masakit, ngan papasayloon an iya sala.’ (Jak. 5:13-15) Sugad la nga hi Asap nagpahimulos ha pagpahirani ha Dios, an mga ginbuligan nga umundang ha pagkinita hin pornograpiya nagpahimulos liwat kay nagkaada hira mas maopay nga relasyon kan Jehova.—Sal. 73:28.

Kondi hi apostol Pablo nagsiring nga an iba nga nakasala waray magbasol “ha ira mga kamaghugaw ngan pakighilawas ngan kamagpakimalaw-ay.”a (2 Kor. 12:21) Mahitungod han Griego nga pulong nga iginhubad nga “kamaghugaw,” hi Propesor Marvin R. Vincent nagsiring nga nangangahulogan ito hin kahugawan nga mangil-ad o malaw-ay gud. Makasurubo nga an pipira nga klase hin pornograpiya mas maraot pa gud kay han pagpakita hin mga tawo nga hubo o hin lalaki ngan babaye nga nagsi-sex. May-ada malaw-ay gud ngan mangil-ad nga pornograpiya nga nagpapakita hin homoseksuwalidad (nagsi-sex nga pariho lalaki o pariho babaye), group sex, pakig-sex ha hayop, child pornography, gang rape, brutal nga buhat ha kababayin-an, pakig-sex ha nakagapos, o sadistiko nga pagpasakit. Ha panahon ni Pablo, an iba nga “ginpadulman an ira mga sarabotan” ‘nagkawawad-an han ira pag-abat ngan nagtubyan ha ira kalugaringon ha kalaw-ayan, ha pagbuhat ha ngatanan nga mahugaw ha kahikaw’ o kahakog.—Efe. 4:18, 19.

Gin-unabi liwat ni Pablo an “kahugawan” ha Galasia 5:19. Usa nga eskolar nga taga-Britanya an nagsiring nga mahimo ito mangahulogan han “ngatanan nga diri natural nga kaipa.” May-ada ba Kristiano nga diri mauyon nga an ginhisgotan na nga mga klase hin pornograpiya “diri natural nga kaipa” ngan mangil-ad gud? Ha Galasia 5:19-21 hi Pablo nagsiring nga ‘an mga nagbubuhat’ han sugad nga kahugawan “diri makakapanunod ha ginhadian han Dios.” Salit kon nabatasan na han usa nga Kristiano an pagkinita hin mangil-ad ngan malaw-ay gud nga mga klase hin pornograpiya, bangin ha sulod hin maiha na nga panahon, ngan diri hiya nagbabasol ngan naundang ha pagbuhat hito, kinahanglan paiwason hiya ha kongregasyon basi mapanalipdan ngan magpabilin nga limpyo an kongregasyon.—1 Kor. 5:5, 11.

Maopay na la kay an iba nga nagkinita hin pornograpiya nagpabulig ha mga tigurang ngan naghimo hin dagku nga pagbag-o. Gin-aghat ni Jesus an mga Kristiano ha Sardis: “Pagparig-ona an mga bagay nga nanhibilin pa, nga andam na mamatay, . . . hinumdoman mo kon mationan-o an imo pagkarawat ngan pamati; ngan imo ito tipigan, ngan magbasol ka. Busa kon diri ka mag-agma, . . . diri ka maaram kon ano nga oras an akon ikakanhi ha imo.” (Pah. 3:2, 3) An usa puydi magbasol ngan ‘maagaw ha kalayo,’ siring pa.—Jud. 22, 23.

Kondi mas maopay gud nga an tagsa ha aton magin determinado nga diri madaot han pornograpiya. Oo, kinahanglan magin determinado gud kita nga likyan an ngatanan nga klase hin pornograpiya!

[Footnote]

[Blurb ha pahina 30]

Sadang masantop han usa nga Kristiano nga nagkikinita hin pornograpiya nga nakakadaot ito han iya relasyon kan Jehova ngan nagkikinahanglan hiya hin bulig