LEKSYON 52
Kon Kay Ano nga Importante an Aton Pamado Ngan Pag-ayos
Karuyag naton ngatanan nga kita an nagpipili kon ano an aton igsusul-ot ngan kon paonan-o kita mag-aayos. Kon susundon naton an pipira nga simple nga mga prinsipyo ha Biblia, labot la nga maisusul-ot naton an aton karuyag, mapapalipay pa naton hi Jehova. Usisahon naton an pipira hito nga mga prinsipyo.
1. Ano nga mga prinsipyo an mabulig ha aton kon nagdidesisyon may kalabotan ha aton pamado ngan pag-ayos?
Kinahanglan magpili kita hin “angayan nga bado, nga may kasadangan ngan maopay nga panhunahuna,” ngan tipigan naton nga limpyo an aton hitsura basi makita han iba an aton “debosyon ha Dios.” (1 Timoteo 2:9, 10) Usisahon naton ini nga upat nga prinsipyo: (1) An aton bado kinahanglan “angayan.” Posible nga napansin mo nga ha mga katirok ha kongregasyon, an katawohan ni Jehova iba-iba an pamado, pero an aton pamado ngan estilo han buhok pirme nagpapakita hin respeto ha Dios nga aton ginsisingba. (2) An pamado nga “may kasadangan” nagpapasabot nga an aton hitsura kinahanglan diri makaaghat hin hingyap ha sekso, ngan diri liwat makadani hin sobra nga atensyon ha aton kalugaringon. (3) Nagpapakita kita hin “maopay nga panhunahuna” kon diri kita nasunod ha tagsa nga uso han pamado ngan pag-ayos. (4) An aton pag-ayos kinahanglan pirme magpakita han aton “debosyon ha Dios,” basi makita han iba nga ginsisingba naton an tinuod nga Dios.—1 Corinto 10:31.
2. Paonan-o an aton pag-ayos makakaapekto ha aton mga igkasi-tumuroo?
Bisan kon may kagawasan kita nga magpili kon ano an aton igsusul-ot, kinahanglan hunahunaon naton an mahimo magin epekto ha iba han aton pag-ayos. Ginhihimo naton an pinakamaopay para diri mapasubo an bisan hin-o, lugod, basi “lipayon . . . an [aton] amyaw para ha iya kaopayan, basi parig-unon hiya.”—Basaha an Roma 15:1, 2.
3. Paonan-o an aton pag-ayos mahimo makaaghat ha iba nga magsingba kan Jehova?
Nangangalimbasog kita pirme nga mamado hin angayan ha tagsa nga okasyon, pero labi na nga ginsisiguro naton nga kaangayan an aton pamado kon naatender kita ha mga katirok ha kongregasyon ngan nakikigbahin ha ministeryo. Diri naton karuyag nga mawara an atensyon han mga tawo ha importante nga mensahe tungod la han aton hitsura. Lugod, karuyag naton nga an aton pag-ayos makaaghat ha iba ha kamatuoran ngan ‘makaadorno ha katutdoan han aton Paratalwas.’—Tito 2:10.
DUGANG NGA USISAHA
Usisaha kon paonan-o naton masisiguro nga an aton pamado ngan pag-ayos angayan ha aton sugad nga mga Kristiano.
An aton pag-ayos mahimo magpakita kon narespeto kita ha mga tawo nga may awtoridad. Bisan kon nakikita ni Jehova an sulod han aton kasingkasing, kinahanglan liwat makita ha aton pag-ayos nga ginrirespeto naton hiya
4. Kon maopay an aton pag-ayos nagpapakita kita hin respeto kan Jehova
Ano an aton pinakaimportante nga rason nga kinahanglan siguruhon naton nga maopay an aton pag-ayos? Basaha an Salmo 47:2, katapos, hisguti niyo ini nga mga pakiana:
Tungod kay nagrirepresentar kita kan Jehova, ano an angay magin epekto hito ha aton pamado?
Para ha imo, importante gud ba an aton pag-ayos kon naatender kita hin mga katirok ngan nakikigbahin ha ministeryo? Kay ano?
5. Kon ano an mabulig ha aton ha pagdesisyon may kalabotan ha aton pamado ngan pag-ayos
Marahalon man an aton mga bado o baratuhon la, kinahanglan magin limpyo ito ngan angayan para ha espisipiko nga mga sitwasyon. Basaha an 1 Corinto 10:24 ngan 1 Timoteo 2:9, 10. Katapos, hisguti niyo kon kay ano nga karuyag naton likyan an pamado nga . . .
diri maayos pagkit-on o sobra kakaswal.
sobra ka-fitting, malaw-ay pagkit-on, o nakakaaghat hin hingyap ha sekso.
Bisan kon an mga Kristiano diri na sakop han Mosaiko nga Balaud, iginpapakita la gihap hito an panhunahuna ni Jehova. Basaha an Deuteronomio 22:5, katapos, hisguti niyo ini nga pakiana:
Kay ano nga angay naton likyan an pamado ngan pag-ayos nga an mga lalaki nagigin babaye pagkit-on o an mga babaye nagigin lalaki pagkit-on?
Basaha an 1 Corinto 10:32, 33 ngan 1 Juan 2:15, 16, katapos, hisguti niyo ini nga mga pakiana:
Kay ano nga angay naton ikonsiderar an aton pag-ayos kon may nalalainan hito ha komunidad o ha kongregasyon?
Ano nga mga estilo han pamado ngan pag-ayos an komon ha iyo lugar?
Ha imo hunahuna, may pipira ba hito nga mga estilo nga diri kaangayan para ha usa nga Kristiano? Kay ano?
Makakapili kita hin iba-iba nga estilo han pamado ngan pag-ayos nga makakapalipay la gihap kan Jehova
AN IBA NASIRING: “Ako an magbubuot kon ano an karuyag ko igsul-ot.”
Nauyon ka ba hito? Kay ano?
SUMARYO
Kon nakakahimo kita hin mag-opay nga desisyon mahitungod ha aton pamado ngan pag-ayos, iginpapakita naton nga ginrirespeto naton hi Jehova ngan an iba.
Repaso
Kay ano nga importante kan Jehova an aton pamado ngan pag-ayos?
Ano nga mga prinsipyo an mabulig ha aton pagdesisyon may kalabotan ha aton pag-ayos?
Paonan-o an aton pag-ayos makakaapekto ha panhunahuna han iba mahitungod ha pagsingba kan Jehova?
DUGANG NGA IMPORMASYON
Hibaroi kon ano an posible hunahunaon han iba mahitungod ha imo tungod han imo pamado.
Hibaroi kon kay ano nga maaramon nga maghunahuna anay antes magpatato.
“Ano an Ginsisiring han Biblia Mahitungod ha mga Tato?” (Web article)
Hibaroi an mga prinsipyo ha Biblia nga makakabulig ha imo nga magkaada balanse nga panhunahuna ha imo pamostura.
Kay Ano nga Sobra Ako nga Nababaraka ha Akon Pamostura? (4:29)
Paonan-o an usa nga babaye nagkaada timbang nga panhunahuna ha desisyon han iba may kalabotan ha pamado ngan pag-ayos?
“An Pamado Ngan Pag-ayos an Akon Nagin Hiparakdolan” (Pagpamata!, Disyembre 22, 2003)