Second Corinthians

12 I need to boast. E no get gain, but I go talk about the visions from the Lord and the things wey e show me. 2 I know one man wey be one with Christ, wey the Lord just carry-am at once go the third heaven 14 years ago, whether na with im body or no be with im body, I no know, na God know. 3 True-true, I know this kind man—whether na with im body or no be with im body, I no know, na God know. 4 The Lord just carry-am at once go paradise, and e hear words wey person no fit talk and wey person no suppose talk. 5 I go boast about this kind man but I no go boast about myself except for the things wey show say I dey weak. 6 Even if I want boast, I no go dey foolish, because I go talk the truth. But I no want do like that, so that nobody go praise me pass wetin e see for my body or hear from me, 7 just because I see this kind wonderful things wey the Lord show me.

So that I no go carry body up, them give me chuku-chuku for my body, one angel of Satan, make e de slap* me, so that I no go fit carry body up. 8 Three times, I beg the Lord about this thing say make this thing leave me. 9 But e tell me say: “My special favor dey enough for you, because my power de show complete when you dey weak.” So I go really happy to boast about the things wey show say I dey weak, so that the power of Christ fit dey ontop me like tent. 10 So I de enjoy-am when I dey weak, when them de insult me, when I no get things wey I need, when them de suffer me and things hard for me, because of Christ. Because when I dey weak, na that time I de get power.

11 I don dey foolish. Na una force me to be like that, because una suppose to talk good about me. I no do anything wey show say all those una wonderful apostles better pass me for anything, even if I no be anything. 12 True-true, when I dey with una, I show the signs wey prove say I be apostle for the way I really endure and with signs and wonderful things and miracles. 13 How I favor other congregations pass una, apart from say I no become heavy load to una? If na bad thing I do, abeg make una forgive me.

14 See! Na this one be the third time wey I don ready to come meet una, and I no go be heavy load to una. Because no be una property I want, but na una. No be children suppose save for their papa and mama, but na papa and mama suppose save for their children. 15 As for me, I go really happy to spend wetin I get for una, and to surrender myself finish for una.* If I really love una plenty like this, una love for me suppose small pass this one? 16 Even as e be, I no become heavy load for una, but una talk say I do “cunning-cunning” and I “use trick” catch una. 17 I no use una for my own gain through any of the people wey I send to una, I do like that? 18 I encourage Titus and I send the brother together with-am. Titus no use una for im own gain at all, e do like that? We reason for the same way, no be so? We do things for the same way, no be so?

19 Una think say for all this time, we de defend ourself to una? Na for front of God we de talk as people wey be one with Christ. But, my dear brothers and sisters, everything wey we de do na to encourage una. 20 Because I de fear say somehow when I come, I fit no meet una as I for like to meet una, and I fit no be as una for like to see me. But instead, wetin I go see na fight-fight, jealousy, serious vex, people no go dey as one, people go de talk bad against other people, people go de gossip, people go de carry body up, and things go scatter-scatter. 21 Maybe when I come again, my God fit make me shame for front of una, and I fit really dey sad for many people wey don sin before, but them never repent from this things wey them don de do: their dirty life and sex wey no clean* and bad things wey them de open eye do with no shame.*