Second Corinthians

11 Even as e be like say I dey foolish small, I wish say una never tire for me. But true-true, una never tire for me! 2 I de really care about una* as God de do,* because na me promise to give una to husband to marry una, so that I fit give una as pure* virgin to Christ. 3 But I de fear say somehow, as the snake use im cunning-cunning deceive Eve, them fit spoil una mind to make una stop to do things with all una heart and dey pure* as una suppose be for Christ. 4 Because as e be, if person come and e preach about Jesus apart from the one wey we don preach, or una receive spirit apart from the one wey una don receive, or e preach good news apart from the one wey una don accept, una no de tire for the person. 5 I no think say I don do anything wey show say all those una wonderful apostles better pass me for anything. 6 But even if I no know how to talk, I surely know things. The truth na say we make-am clear to una for every way and for everything.

7 Or I do any bad thing as I put myself down for una to get honor, and as I don preach the good news of God to una with joy for free? 8 I collect* things* wey other congregations give me so that I fit serve una. 9 Even with that one, when I need some things the time wey I dey with una, I no become heavy load for anybody because the brothers wey come from Mac·e·do′ni·a give me all the things wey I need. True-true, for every way I make sure say I no be heavy load to una, and I go continue to do like that. 10 As far as the truth of Christ dey inside me, I no go stop this my boast for all the area for A·cha′ia. 11 For which reason? Na because I no love una? God know say I love una.

12 But the thing wey I de do, I go continue to do-am to stop the excuse of people wey want find reason* to dey equal to us for this things* wey them de boast about. 13 This kind men na lie-lie apostles, workers wey de deceive people and de pretend to be apostles of Christ. 14 And no wonder, Satan de continue to pretend to be angel of light. 15 So e no go surprise person if im servants de still pretend to be servants wey de do wetin correct for God eye. But the way their work be, na so their end go be.

16 I de talk again say: Make nobody think say I dey foolish. But even if una think like that, then make una accept me as person wey dey foolish so that I go fit boast small too. 17 Now I no de talk as person wey de follow the example of the Lord, but I de talk as foolish person wey de boast and trust imself. 18 Since many people de boast with the things of this world,* I go boast too. 19 Una get “sense” sotey una no tire to accept the foolish people with joy. 20 True-true, una no tire for person wey de make una slave, person wey de seize all una property, person wey de take wetin una get, person wey de raise imself up to sitdown ontop una head, and person wey de hit una for face.

21 Na shame for us to talk this thing, since e be like say we de behave like weak people.

But if other people de show the strong heart wey them get—I de talk like foolish person—me too I de show the strong heart wey I get. 22 Them be Hebrew people? I be one of them too. Them be Israel people? I be one of them too. Them be children* of Abraham? I be one of them too. 23 Them be servants of Christ? I answer like mad man, I pass them by far for this one: I don do more work, I don go prison many times pass them, them don beat me plenty times wey person no fit count, and I don nearly die plenty times. 24 Jew people beat me with cane five times, and each time na 39 strokes* them flog me, 25 them beat me with rod three times, them stone me one time, na three different times the ship wey I enter scatter, I stay for big sea one night and one day. 26 I de travel plenty times, I de face danger for river, I de face danger from thief, I de face danger from my own people, I de face danger from the nations, I de face danger for city, I de face danger for wilderness, I de face danger for sea, I de face danger from lie-lie brothers, 27 I do hard work and I struggle, plenty times I no sleep for night, hunger beat me and I no see water drink, plenty times food no dey to chop, cold catch me and I no get enough cloths to wear.*

28 Apart from all this kind things wey I face for outside, e still get wetin de really disturb me everyday: na say I de really worry about all the congregations. 29 Who dey weak, and I no weak? Who don fall, and my heart no burn for inside?

30 If I must boast, I go boast about the things wey show say I dey weak. 31 The God and Papa of the Lord Jesus, the Person wey we suppose praise forever know say I no de lie. 32 For Damascus, the governor wey dey under A·re′tas the king put guards for the city of Damascus to catch me. 33 But them put me for inside one basket* and bring me down from one window for the city wall, and I escape from im hand.