“Holy Spirit Full Inside All of Them”

 1. How things de be for the Festival of Pentecost?

PLENTY people dey the streets for Jerusalem and them de happy well-well.a Smoke de go up from the altar wey dey the temple as Levites de sing Hallel. (Psalms 113 to 118) One group go first sing one part and the second group go sing the other part to answer them. Visitors come from far-far place like Elam, Mesopotamia, Cappadocia, Pontus, Egypt, and Rome.b Why? Them come celebrate Pentecost, wey them still de call “festival of the first ripe fruits.” (Num. 28:26) Them de do-am every year, when Israel people don stop to harvest barley and start to harvest wheat. Everybody de happy.

 2. Which special things happen for Pentecost 33 C.E.?

² About nine o’clock for one Sunday morning for 33 C.E. around the season wey new leaves de come out, one miracle happen wey people go remember for long time even reach this our time. As the 120 disciples of Jesus gather for one house, at once something just happen. “Them hear one noise from heaven just like strong breeze wey de blow.” (Acts 2:2) The loud sound full the house wey them gather. Then one special thing come happen. Them see something wey be like fire wey get the shape of tongue and one-one come stay ontop each of them.c “Holy spirit full inside all of them” and them start to speak different-different language! As them comot for the house wey them dey, the visitors wey them meet for streets for Jerusalem surprise as the disciples de speak different-different language. “Each person hear im own language as them de speak.”—Acts 2:1-6.

 3. (a) Why we fit talk say Pentecost 33 C.E. na date wey dey important for Jehovah people? (b) When Peter de talk for the day of Pentecost, how e use one of the “keys of the Kingdom”?

³ This thing wey happen really dey important for Jehovah people, because na so the anointed Christian congregation or spiritual Israel start. (Gal. 6:16) Other important things still happen. That day when Peter talk to the people, na the first key among the three “keys of the Kingdom” e use. Each of this keys go open the way for different-different group of people to fit get special blessings from God. (Matt. 16:18, 19) This first key make-am possible for Jew people and proselytes to accept the good news and God use im holy spirit anoint them.d This one make-am possible for them to become part of spiritual Israel and with this one, them get hope to rule as kings and priests with Jesus. (Rev. 5:9, 10) After some time, Samaritans and Gentiles (people wey no be Jew) come get the chance to be part of them. Wetin Christians today fit learn from this important things wey happen for Pentecost 33 C.E.?

 4. How the Christian congregation today continue the work of the congregation wey start for 33 C.E.?

⁴ Na about 120 disciples start the Christian congregation. “All of them gather together for the same place”—for one room for up—and God use holy spirit anoint all of them. (Acts 2:1) Before that day end, thousands of people baptize, and them come be members of the Christian congregation. From that time the organization continue to grow till today! Yes, this group of men and women wey de fear God, wey be the Christian congregation today, na the people wey God de use to preach the “good news of the Kingdom” for “the whole world, so that all the nations go hear-am,” before the end come.—Matt. 24:14.

 5. For the time of the apostles and today, which blessing people de get when them be part of the congregation?

⁵ The Christian congregation go help and encourage people wey be part of the congregation, both anointed Christians and “other sheep” wey later join. (John 10:16) Paul show say e really like the way people for congregation de support each other when e tell Christians for Rome say: “I really want see una, so that I go fit give una some gift from God to make una dey strong. Or, so that we fit encourage each other with our faith, una own and my own.”—Rom. 1:11, 12.

6, 7. For this our time, how the Christian congregation take de preach to people for all the nations as Jesus command?

⁶ Na still the same work wey the Christian congregation do for the time of the apostles e still de do today. The work wey Jesus give im disciples no simple but e sweet. E tell them say: “Make people from all the nations my disciples, make una baptize them for the name of the Papa, the Son and the holy spirit, make una teach them to do all the things wey I don command una.”—Matt. 28:19, 20.

⁷ Today, Jehovah de use the Christian congregation of Jehovah Witness to do the preaching work. Na true say e no easy to preach to people wey de speak different-different language. Even with this one, for language wey pass 1,000, Jehovah people don make many books, magazines and other things to help people learn Bible. If you de go meeting everytime and de follow do the work to preach and make people Jesus disciple, e go make you happy well-well. You follow for the small group of people for the world today wey get the special work to de preach well about Jehovah name!

 8. How the Christian congregation de help us?

⁸ To help you endure and still de happy for this serious hard time, Jehovah God don give you brothers and sisters for the whole world. Paul tell Hebrew Christians say: “Make we de really think about one another, so that we go fit encourage one another to show love and do fine work. And make we no de stop to meet together as some people de do, but make we de encourage one another and de really do this things as una see say the day don de near.” (Heb. 10:24, 25) The Christian congregation na gift from Jehovah, so that you go encourage other people and them go encourage you too. Make your friendship with brothers and sisters for congregation really strong. Make you no ever stop to go Christian meetings!

9, 10. Wetin some people don do so that them go fit preach for another language?

⁹ Imagine how Jew people and people wey don join Jew religion go don happy well-well for Pentecost 33 C.E. E fit be say, many of them fit speak common language like Greek or Hebrew language. But as e come be, “each person hear im own language as them de speak.” (Acts 2:6) Them happy well-well to hear the good news for their own language. Na true say for this our time, Christians no get the special gift to speak language wey them no learn. But many of them still de preach about God Kingdom to people from different-different place wey de speak other language. How them de do-am? Some don learn new language so that them go fit go preach for another country or join congregation for their area wey de use another language preach. Them don see say, many times, e de touch people heart when other people de try to speak their language.

¹⁰ For example, Christine and seven other brothers and sisters learn Gujarati language. When e meet im workmate wey de speak Gujarati language, Christine greet the woman for that language. This one touch the woman heart and e want know why Christine de try to learn language wey hard like Gujarati. Christine use that chance preach to-am well. The woman tell Christine say: “This one show say this your message really dey important.”

11. Wetin we fit do to dey ready to preach the message about God Kingdom to people wey de speak different-different language?

¹¹ True-true, no be all of us fit learn another language. But, all of us fit prepare to preach about the Kingdom to people wey de speak different-different language. How we fit do this one? One way na to use JW Language^® app to learn simple greeting for the language wey many people for your area de speak. You fit still learn some short-short sentence for that language, wey go make people want learn about God. Tell them make them go jw.org, and you fit still show them the different videos and publications wey we get for their language. As we de do like this for our preaching work, we go happy just like our brothers for the apostles time when people from different-different place surprise to hear the good news, ‘each person for im own language.’

12. (a) Wetin prophet Joel don talk about the miracle wey happen for Pentecost 33 C.E.? (b) Why Jesus disciples for the apostles time de expect say wetin Joel talk go happen?

¹² “Peter stand up” to talk to the people wey come from different-different place and wey de speak many different language. (Acts 2:14) E explain to all of them say the miracle wey God do, as e help them to fit speak different-different language, na wetin Joel don talk about when e say: “I go pour my spirit ontop different-different kind of people.” (Joel 2:28) Before Jesus go back to heaven, e tell im disciples say: “I go beg my Papa and e go give una another helper.” Jesus show say the helper na “the spirit.”—John 14:16, 17.

13, 14. How Peter try to reach the hearts of people wey listen to-am and how we fit copy-am?

¹³ Then Peter tell them this strong words: “Make all the people of Israel know true-true say God don make-am Lord and Christ, this Jesus wey una kill for pole.” (Acts 2:36) True-true many of the people wey listen to Peter no dey when them kill Jesus for pole. But, because them come from the nation wey kill Jesus, all of them get hand for im death. Notice say, Peter talk to im fellow Jew people with respect and the way e talk to them touch them for heart. Wetin Peter want na to make the people repent, no be to condemn them. The people vex because of wetin Peter talk? No. Instead, wetin them hear “worry them for heart.” Them ask say: “Wetin we suppose do?” The way Peter talk to them with respect help-am to fit touch their heart and this one move the people to repent.—Acts 2:37.

¹⁴ We fit copy the way Peter talk wey touch people for heart. When we de preach to people, no be everything wey no dey Bible wey them talk we go correct at once. Instead, e better make we talk about things wey we and the person agree. If we start from things wey we and the person agree, we fit help them to understand God Word. Many times, when we teach people things wey dey Bible the way Peter do-am, e go touch people wey get good heart.

15. (a) Wetin Peter talk, and wetin the people do? (b) Why thousands of people wey hear the good news for Pentecost qualify to baptize that same day?

¹⁵ For the day of Pentecost 33 C.E., Peter tell the Jew people and people wey don join Jew religion say: “Make una repent and make each one of una baptize.” (Acts 2:38) Because of this one, about 3,000 people baptize. E fit be say the different-different pool of water wey them use baptize the people dey near or inside Jerusalem.e E mean say them rush baptize when them never ready? Or, children wey their papa and mama na Christian or Bible students fit rush baptize when them never ready? No be so, at all. Remember say, this Jew people and people wey don join Jew religion wey baptize for Pentecost 33 C.E. don already de study the word of God, and them be part of the nation wey be Jehovah people. Another thing be say, them don already de put body well-well for Jehovah work—for example, some of them even travel long distance to fit attend this festival. After them believe say na Jesus Christ God de use to do wetin E get for mind, them ready to continue to serve God—but this time, as people wey don baptize wey de Follow Jesus Christ.

16. How Christians for the apostles time show love wey no de think of only imself?

¹⁶ Jehovah really bless them. Bible talk say: “All the people wey believe the good news dey together and de share everything wey them get with one another. And them de sell things wey them get and their property, and de share the money to everybody according to wetin each person need.”f (Acts 2:44, 45) Na this kind love all true Christians want copy—love wey no de think of only imself.

17. Which things person must do to qualify for baptism?

¹⁷ Before person dedicate imself and baptize, Bible show say e get things wey the person must do. The person must study to know God Word. (John 17:3) E need to show say e get faith and e must repent from im bad way and show say e regret wetin e de do before. (Acts 3:19) Then e must convert, or turn back, and start to do the things wey God want make e do. (Rom. 12:2; Eph. 4:23, 24) The next thing na to pray to give God im life and baptize.—Matt. 16:24; 1 Pet. 3:21.

18. Which kind chance Jesus disciples wey don baptize get?

¹⁸ You don give God your life and baptize as one of Jesus Christ disciple? If your answer na yes, make you thank Jehovah say you get this kind chance. Like Jesus disciples for the time of the apostles wey holy spirit full inside them, Jehovah fit use you for big way to de preach well and do wetin e want!