LESSON 53
Make Jehovah Happy With the Kind Things Wey You De Choose to Enjoy Yourself
Jehovah na “happy God.” (1 Timothy 1:11) E want make we dey happy and enjoy our life. Jehovah dey happy when we use some time to rest and enjoy ourself. For this lesson, we go see how we fit use the time wey we want relax to really enjoy ourself and still make Jehovah happy.
1. Wetin we go remember when we de choose wetin we go use enjoy ourself?
Wetin you like to do when you want relax? Some people like to use their time of rest for house—they fit de read book, listen to music, watch film or check internet. Other people like to dey with their friends—they fit de climb mountain, de swim, or de play game. Anyone wey we choose to enjoy ourself with, we go make sure say na wetin “the Lord want.” (Ephesians 5:10) E dey important to know this one because plenty things wey people de choose to use enjoy theirself get things wey Jehovah no like. Things like, fight-fight, things about sex, or about demons. (Read Psalm 11:5.) Wetin fit help us choose good things wey we go use enjoy ourself?
If the friends wey we choose love Jehovah, they go affect us for good way and go still help us to choose good things to enjoy ourself. As we learn for Lesson 48, “when person de follow wise people, e go get sense.” But if we be friend with people wey no love wetin God want, we “go enter problem.”—Proverbs 13:20.
2. Why e dey important make we de control how much time we de use enjoy ourself?
Even if wetin we choose to enjoy ourself with no bad, we need to dey careful about how much time we de use to enjoy ourself. If we no dey careful, we no go get enough time to do the things wey dey important pass. Bible tell us say make we “de use [our] time well.”—Read Ephesians 5:15, 16.
LEARN MORE THINGS
Learn how you fit make good decisions about wetin you go use enjoy yourself.
3. No choose bad thing to enjoy yourself
Why we need to dey careful when we de choose wetin we go use enjoy ourself? Play the VIDEO, and talk about this questions for under.
How the games wey people de do for Rome before, be like the things wey people de use today to enjoy theirself?
For the video, wetin Danny learn about things to use enjoy ourself?
Read Romans 12:9, and talk about this question:
How this verse fit help you to use good things enjoy yourself?
Wetin be some things wey Jehovah no like? Read Proverbs 6:16, 17 and Galatians 5:19-21. After you read each scripture, talk about this question:
Which of this things wey this verses talk you de see for the things wey people de use enjoy theirself today?
How I fit choose good things to enjoy myself?
Ask yourself say:
Wetin? Wetin I de choose get anything wey Jehovah no like?
When? E de take the time wey I suppose use do important things?
Who? Wetin I de choose de make me dey close to people wey no love Jehovah?
E good to try our best to dey far from danger. Na why e good make we dey far from anything wey people de use enjoy theirself wey we suspect say e no good
4. Use your time well
Play the VIDEO, and talk about the question for under.
Na true say the brother no de watch any bad thing, but which problem the brother get?
Read Philippians 1:10, and talk about this question:
How this verse fit help us decide how much time we go use enjoy ourself?
5. Choose good things to enjoy yourself
Na true say some things wey people de use enjoy theirself no de make Jehovah happy, but plenty things dey wey Jehovah no hate wey we fit use enjoy ourself. Read Ecclesiastes 8:15 and Philippians 4:8, and talk about this question:
Which good thing you de like to use enjoy yourself?
You fit use good things to enjoy yourself
SOME PEOPLE DE TALK SAY: “E no bad to enjoy myself with things wey fight-fight, things about sex, or things about demons dey inside, so far as I no de do this things.”
Wetin you go talk?
WETIN THIS LESSON TEACH
Jehovah want make we choose good things to enjoy ourself.
Wetin You Don Learn
Which kind things Christians no go use to enjoy theirself?
Why e good make we dey careful about how much time we de use enjoy ourself?
Why you want choose wetin Jehovah like to enjoy yourself?
LEARN OTHER THINGS
Learn about who suppose choose the things wey we go use enjoy ourself.
“Jehovah Witness De Ban Some Films, Books, or Songs?” (E dey for jw.org)
See how you fit make good decisions about wetin you go use enjoy yourself.
“You De Gain From Wetin You De Use Enjoy Yourself?” (The Watchtower, October 15, 2011)
For the story wey the title na “I Even Stop to Hate People With Different Skin Color,” see why one man change the things wey e de use enjoy e self.
“Bible De Help People Change Their Life” (The Watchtower, February 1, 2010)
See how one mama make good decision about one film wey them de show things about demons inside.
No Enjoy Yourself With Things Wey Get Something to Do With Demons (2:02)