You De Show Say You Like the Gifts Wey God Don Give You?

1-2. With wetin Psalm 40:5 talk, which gifts Jehovah don give us, and why we go talk about them for this topic?

JEHOVAH get open hand. Just think of some gifts wey e don give us: the beautiful earth wey we de live, our wonderful brain, and the Bible wey be the Word of God. Because Jehovah don give us this three gifts we get place to live, we fit think and de talk with other people, and we get answer to plenty important question wey we fit ask.​—Read Psalm 40:5.

² For this topic, we go talk small about this three gifts. The more we de think about them, the more we de show say we like them and the more we want make the God wey give us life happy. (Rev. 4:11) And we go know how to help person wey they don deceive say God no dey and the person don believe-am.

OUR WONDERFUL EARTH

3. Why the earth dey different?

³ When we see the way God make the earth, we go see say e really get sense. (Rom. 1:20; Heb. 3:4) No be only our earth de turn round the sun. Other planets wey resemble the earth still de turn round the sun. But the earth dey different because e get everything wey life need to survive.

4. Why we fit talk say the earth better pass any boat wey man make?

⁴ For some ways, our earth be like boat for ontop big river. But some important things make our earth dey different from boat wey people full inside. For example, you think say the people for the boat go fit dey alive for long time if na them de make the air wey them de breath, the food wey them de chop, and the water wey they need? And what if they no fit troway any dirty inside the water? The truth be say, small time, the people for inside the boat go die. But the earth go fit care for billions of people and animals. E de always produce the air, food, and water wey we need. And this important things no de finish. Even as all the dirty still dey for the earth, the earth still dey fine and life still de survive. How e manage be like that? Because of the way Jehovah make the earth, the dirty fit change to better thing wey they fit use again. We go talk small about wetin show say Jehovah get sense for the way e arrange things for the earth make we de always get air to breath and water to use.

5. Why e be say the air wey we de breath enter our body no de finish, and wetin this one show?

⁵ Oxygen na the name of the air or gas wey some things for the earth need so that they fit survive. We dey among the things wey need this air. They talk say the amount of this good air wey man and animal de breath enter their body every year, over plenty. E get the air wey man and animal de breath come out wey they no need. Them de call-am carbon dioxide. But the truth na say man and animal no de fit ever finish the good air for the earth. And the other air wey them de breath come out wey e be like say they no need no de too much for the earth. Why e be like that? Na because Jehovah make different-different plants, both big and small, make them de use the air wey man and animal de breath come out. Then, they go produce the good air wey man and animal need. Because of the way this things arrange well for the earth, we fit de get the air wey we de breath. So we agree with wetin dey Acts 17:24, 25. That verse talk say: “God . . . de give all people life and [air to] breath.”

6. Why water no de finish for the earth, and wetin this one show? (Still check the box “The Way We De Get Water Na Gift From Jehovah.”)

⁶ Because of the position wey the earth dey from the sun, we fit de see water to use. If to say the earth just move go front small, all the water for the earth go turn to air. And the earth go too hot, and e go dey dry sotey no life go fit survive for inside. But if the earth just move go back small from the position wey e dey now, all the water for the earth go block and na only snow and ice block go dey everywhere. Because of the position wey Jehovah put the earth, water de always dey so that life fit survive for the earth. When sun heat water for river and water for land, e de turn-am to air. And when the water don become air, e go gather for sky as cloud. Every year, the amount of water wey the sun de turn to air plenty pass the water for inside all the small river for this earth. After the water don gather for up as cloud, e go stay there for about 10 days before e go fall as rain or snow. As time de go, the water go flow enter the big-big river and other river them. Because of this way wey water de move go up and down, we de always get water for the earth. Na Jehovah make-am like that and this one show say Jehovah get sense and power.​—Job 36:27, 28; Eccl. 1:7.

7. Wetin be some things wey we fit do to show say we like the gift wey Psalm 115:16 talk about?

⁷ How we fit de show say we like our wonderful earth and all the good things for inside? (Read Psalm 115:16.) One way na to always think about the things wey Jehovah don make. This one go make us de thank Jehovah everyday for the good things wey e give us. And we de show say we like the earth when we de do everything wey we fit do to make sure say the place wey we de live dey clean.

OUR WONDERFUL BRAIN

8. Why we fit talk say our brain dey wonderful?

⁸ The way God make our brain dey wonderful. When you dey for inside belle, your brain begin grow the way God don make-am to grow. And every one minute, thousands of some kind small-small things wey them de call cell de form for the part wey the brain dey. Science people talk say, around 100 billion of this special cell dey inside the brain wey mature person get. Na this plenty small-small things wey be cell, de come together to form the brain. The weight of the brain na around one and half kilogram (3.3 pounds). Make we talk small about some wonderful things wey the brain fit do.

9. Wetin show you say as we fit de talk na gift from God?

⁹ The way we de talk na miracle. Just think about wetin de happen when we de talk. For every word wey you talk, your brain go need to direct the way wey around 100 muscles for your throat, tongue, lips, jaw, and chest go move. This muscles get the way them de move, so that the words wey you de talk go come out clear. What about the way we fit de speak different-different language? One book wey they write for 2019 show say new born baby fit know how each word be. This book support wetin plenty science people believe say, they born us for way wey we fit know different-different language and learn them. True-true, as we fit de talk, na gift from God.​—Ex. 4:11.

10. How we fit show say we like as God make us to sabi talk?

¹⁰ Wetin be one way wey we fit show say we like as we fit de talk? Make we de explain to people why we believe say na God make everything if they believe say things just come out by theirself. (Ps. 9:1; 1 Pet. 3:15) This kind people go want make we believe say no be God make the earth and the life for inside. If we use Bible and some of the things wey we don talk about for this topic, we go fit defend our Papa for heaven and explain to people why we dey sure say na Jehovah make heaven and earth if this people go like to listen.​—Ps. 102:25; Isa. 40:25, 26.

11. Wetin be one reason why our brain dey wonderful?

¹¹ The way we de remember things dey wonderful. Before-before, one science person talk say the brain wey person get fit de remember all the things wey they write for inside 20 million big-big books. But now, they don de talk say our brain even fit remember things wey pass that one. Because of the way our brain be, which special thing e fit do?

12. Because we fit learn lesson about how to live life, how this one make us dey different from animals?

¹² For all the things wey God make for this earth, na only people fit de learn lesson for life when they remember and think about wetin don happen to them before. Because of this one, we fit learn better things to guide us for life and change the way we de think and de live. (1 Cor. 6:9-11; Col. 3:9, 10) The truth be say, we fit train our conscience to know how correct thing dey different from wrong thing. (Heb. 5:14) We fit learn how to show love, to feel for people, and to show pity. And we fit know how to treat everybody for the right way like Jehovah.

13. With wetin dey Psalm 77:11, 12, how we suppose to use the gift wey God give us to remember things?

¹³ Wetin be one way wey we fit show say we really like the gift wey we get to remember things? Make we try de remember all the time wey Jehovah don help and comfort us for past. This one go make us dey sure more-more say e go still help us for future. (Read Psalm 77:11, 12; 78:4, 7) Another way na to always remember the good things wey people don do for us and to show say we like wetin they do. Science people don find out say when people de show say they like wetin other people do for them, this one fit make them dey happy. E still good make we copy Jehovah and decide to forget some things. For example, Jehovah fit remember anything wey e want remember, but e de choose to forgive us and forget the mistake wey we make if we repent. (Ps. 25:7; 130:3, 4) And Jehovah want make we de do the same thing for other people when them dey sorry for the pain wey they make us feel because of the thing wey they do.​—Matt. 6:14; Luke 17:3, 4.

14. How we fit show say we like our brain wey God don give us as wonderful gift?

¹⁴ We fit show say we like the brain wey we get as gift when we de use-am de praise the person wey give us. Some people don choose to use their brain to decide wetin good and bad for theirself. But because na Jehovah make us, na normal thing say, the things wey e don decide to be good things and bad things go better pass our own. (Rom. 12:1, 2) When we de obey Jehovah, we go get peace. (Isa. 48:​17, 18) And we go learn wetin Jehovah want make we do with our life. And wetin be that? Na to bring praise to Jehovah wey be our Papa and the Person wey make us, and to make e heart glad.​—Prov. 27:11.

THE BIBLE NA SPECIAL GIFT

15. How the Bible wey God give us as gift show say e love us?

¹⁵ The Bible wey God give us as gift show say e love us. Our Papa for heaven use holy spirit direct men to write Bible because e love us no be small. For inside Bible, Jehovah answer some important questions wey we fit ask, like: Which place we come from, why God make us, and wetin go happen for future? Jehovah want make all e children know the answer to this questions. So e don use men to translate the Bible go plenty language. Today, we fit see the whole Bible or part of-am for more than 3,000 language! Na Bible be the book wey they don translate pass for the whole world and almost everybody get-am. No matter the place wey people de live or the language wey them de talk, plenty of them fit learn wetin dey Bible for their own language.​—Check the box “Bible Come Dey for Many Language for Africa.”

16. With wetin dey Matthew 28:19, 20, how we fit show say we really like Bible?

¹⁶ We fit show say we really like the Bible when we de read-am everyday, de think deep about the things wey e de teach, and de try our best to do wetin we don learn from inside. Apart from that one, we de thank God for the Bible when we de do everything wey we fit do to tell plenty people the things wey Bible talk.​—Ps. 1:1-3; Matt. 24:14; read Matthew 28:19, 20.

17. Which kind gifts we don talk about for this topic, and wetin we go talk about for the next topic?

¹⁷ For this topic, we don talk about some gifts wey God give us, like our beautiful earth wey we de live, our wonderful brain, and Bible. But other gifts dey wey Jehovah don give us wey we no fit see with our eye. For the next topic, we go talk about this better gifts wey we no fit see.