STUDY ARTICLE 23
SONG 2 Your Name Na Jehovah
Jehovah Name Dey Important to Us
“‘Una be my witness,’ this na wetin Jehovah talk.”—ISA. 43:10.
WETIN WE GO LEARN?
We go learn wetin we fit do to show say Jehovah name dey holy and say everything wey Satan talk about-am na lie.
1-2. How we know say Jehovah name really dey important to Jesus?
NOTHING dey important to Jesus pass Jehovah name. Na Jesus be the main person wey don make people know Jehovah name. For the article before this one, we learn say Jesus ready to die to fit prove say Jehovah name dey holy and say everything wey Jehovah de do correct. (Mark 14:36; Heb. 10:7-9) And we still learn say after Jesus don rule finish for the end of the One Thousand Years, e go give the kingdom back to im Papa because e want only Jehovah to get the praise. (1 Cor. 15:26-28) All this things show say Jesus really love Jehovah well-well.
2 Jesus come this earth to tell people the things wey Jehovah want make them know. (John 5:43; 12:13) E teach im disciples about Jehovah name. (John 17:6, 26) When e de teach and do miracles, e make-am clear say na Jehovah word e de teach and say na Jehovah give-am the power to fit do the miracles. (John 10:25) And when e pray to Jehovah to protect im disciples, e tell Jehovah make e do-am ‘because of Im [Jehovah] name.’ (John 17:11) E clear say Jehovah name really dey important to Jesus, so how person wey talk say im be Jesus disciple no go know or use Jesus Papa name?
3. Wetin we go talk about for this article?
3 Because we be true Christians wey de copy Jesus example, we really love and value Jehovah name. (1 Pet. 2:21) For this article, we go see why the people wey de preach the “good news of the Kingdom” de answer Jehovah name. (Matt. 24:14) We go still talk about why Jehovah name suppose dey important to each of us.
“PEOPLE WEY GO ANSWER IM NAME”
4. (a) Wetin Jesus tell im disciples before e go heaven? (b) Which question we go talk about?
4 Just before Jesus go heaven, e tell im disciples say: “Una go get power when una receive holy spirit, and una go tell people about me for Jerusalem, for everywhere for Judea and Samaria, and for every corner for the earth.” (Acts 1:8) So Jesus disciples go preach the good news everywhere, no be only for Israel. This one go make-am possible for people for the whole world to fit hear the good news and become Jesus disciple. (Matt. 28:19, 20) But Jesus talk say: “Una go tell people about me.” This one mean say Jesus disciples go only tell people about Jesus, or them still need to know Jehovah and talk about Jehovah to other people? Wetin dey Acts chapter 15 go help us answer this question.
5. How the apostles and elders for Jerusalem show say people need to know Jehovah name? (Still check the picture.)
5 For 49 C.E., the apostles and elders for Jerusalem gather together to talk about wetin people wey no be Jew go need to do to fit be Jesus disciple. For the end of the meeting, James, wey be Jesus brother talk say: “[Peter] don really talk about how God for the first time don remember the people of the nations, to gather from among them, people wey go answer im name.” Which person name James de talk about? James make this one clear when e quote prophet Amos. E talk say: “So that the people wey remain fit use all their heart look for Jehovah together with people of all the nations, people wey de answer my name, na wetin Jehovah talk.” (Acts 15:14-18) Jesus disciples no go only learn about Jehovah, but them go still be people wey de ‘answer Jehovah name.’ This one mean say them go de tell people about God name and people go know them with that name.
The governing body for the apostles time dey one meeting, and for the meeting, them understand say Christians must be people wey de answer Jehovah name (Check paragraph 5)
6-7. (a) Why Jesus come this earth? (b) Wetin be the number one reason why Jesus come this earth?
6 Jesus name mean “Na Jehovah De Save,” and because of Jesus, Jehovah go save everybody wey get faith for Jesus and Jehovah. Jesus come this earth to die because of our sin. (Matt. 20:28) Because of this one, e dey possible for God to forgive our sin and we fit get everlasting life.—John 3:16.
7 But why Jesus need to die for us? Na because of wetin happen for garden of Eden. As we don talk for the article before this one, Adam and Eve no obey Jehovah and because of this one, them no fit live forever again. (Gen. 3:6, 24) But because say this thing wey them do affect their children, Jesus come the earth to save us and to do something wey even dey important pass this one. Satan don talk wicked lie against Jehovah. (Gen. 3:4, 5) So people need to know say wetin Satan talk na lie, and say Jehovah dey holy. And Jesus na the best person to prove this one because e really represent Jehovah well, and e do everything wey Jehovah want make e do.
How person wey talk say im be Jesus disciple no go know or use Jesus Papa name?
8. Wetin all Jesus disciples need to know?
8 All Jesus disciples need to know the Person wey send Jesus to die for them. This Person na Jehovah wey be Jesus Papa. (John 17:3) Apart from this one, them go still need to be people wey de answer Jehovah name just like Jesus. Them go still need to know why e dey important make Jehovah name dey holy. Them need to do this one to fit get everlasting life. (Acts 2:21, 22) So all Jesus disciples need to learn about Jehovah and Jesus. No wonder the last thing wey Jesus talk for im prayer wey dey John 17 na say: “I don make them know your name, and I go still make them know-am, so that them go get the kind love wey you get for me and I go dey as one with them.”—John 17:26.
“UNA BE MY WITNESS”
9. How we fit show say Jehovah name dey important to us?
9 From wetin we don talk, e dey clear say for us to fit be Jesus true disciple, we need to show say Jehovah name dey holy. (Matt. 6:9, 10) We go need to see Jehovah name as the name wey dey important pass for our life. And we need to show this one for the things wey we de do. But wetin we fit do to show say Jehovah name dey holy and to help people see say wetin Satan talk about Jehovah na lie?
10. Wetin Isaiah chapter 42 to 44 talk about? (Isaiah 43:9; 44:7-9) (Still check the picture.)
10 Isaiah chapter 42 to 44, tell us wetin we need to do to show say Jehovah name dey holy. For this place for Bible, e just be like say Jehovah call people wey no de worship-am come court and e tell them say make them prove say their gods dey real. Just as the way them de get witness for court, Jehovah ask if anybody go fit stand to prove say their gods dey real. But nobody fit do this one.—Read Isaiah 43:9; 44:7-9.
We fit show people say Jehovah na the only true God with wetin we de talk and do (Check paragraph 10-11)
11. Wetin Jehovah tell im people for Isaiah 43:10-12?
11 Read Isaiah 43:10-12. Jehovah tell im people say: “Una be my witness, . . . and I be God.” Jehovah ask them this question: “Any other God dey apart from me?” (Isa. 44:8) We get the honor to answer this question. We fit use wetin we de talk and do to show say no other God dey apart from Jehovah. Im name dey important pass any other name. And the way we de live our life fit show say we really love Jehovah even when Satan de try to make things hard for us. If we do all this one, we go de show say Jehovah name dey holy.
12. How wetin dey Isaiah 40:3, 5 happen?
12 Prophet Isaiah still talk say somebody go “prepare Jehovah road.” (Isa. 40:3) How this one happen? John the Baptist prepare road for Jesus, but the truth be say na “Jehovah road” e prepare because na Jehovah send Jesus. (Matt. 3:3; Mark 1:2-4; Luke 3:3-6) Prophet Isaiah still talk say: “The glory of Jehovah go dey clear.” (Isa. 40:5) How e happen? When Jesus come this earth, e do things exactly the way Jehovah want, sotey e just be like say na Jehovah come this earth.—John 12:45.
13. How we fit follow Jesus example?
13 We de copy Jesus example when we de do things wey show say we de support Jehovah. Like Jesus, we be Jehovah Witness. We de answer Jehovah name and we de tell everybody wey we meet the better-better things wey Jehovah don do and the things wey e go do. But to fit do this one well, we still need to let people know about everything wey Jesus do to show say Jehovah name dey holy. (Acts 1:8) Jesus na the number one person wey be Jehovah Witness, and we de follow im example. (Rev. 1:5) But which other thing we fit do to show say Jehovah name dey important to us?
OTHER THINGS WEY WE FIT DO TO SHOW SAY JEHOVAH NAME DEY IMPORTANT TO US
14. As e dey for Psalm 105:3, how we de feel about Jehovah name?
14 We no de shame to use Jehovah name. (Read Psalm 105:3.) Jehovah de really happy when we de boast about im name. (Jer. 9:23, 24; 1 Cor. 1:31; 2 Cor. 10:17) To “boast about Jehovah” mean say we no go shame to use Jehovah name. We de see-am as big honor to de tell other people say Jehovah dey holy and say everything wey e de do, dey correct. Make we no ever shame to tell our classmates, neighbors, people wey we de work with, and other people say we be Jehovah Witness! Satan want make we stop to tell other people about Jehovah name. (Jer. 11:21; Rev. 12:17) In fact, Satan and im false prophets want make people forget Jehovah name. (Jer. 23:26, 27) But because we love Jehovah name, we de happy “from morning go reach night.”—Ps. 5:11; 89:16.
15. Wetin e mean to de call Jehovah name?
15 We de continue to call Jehovah name. (Joel 2:32; Rom. 10:13, 14) Wetin e mean to call Jehovah name? E mean say we go know and use God name. But no be only this one e mean. E still mean say we go need to know Jehovah well, trust-am, and show say we depend on-am to help and direct us. (Ps. 20:7; 99:6; 116:4; 145:18) We go still de tell people about im name and the better-better character wey e get. And we de help them fit change their life, so that them go fit do things the way Jehovah want and live forever.—Isa. 12:4; Acts 2:21, 38.
16. How we fit prove say Satan de lie?
16 We ready to suffer to fit honor Jehovah name. (Jas. 5:10, 11) If we continue to do wetin Jehovah want even if that one go make us suffer, we de prove say Satan de lie. For Job time, when Satan de talk about people wey de serve Jehovah, e talk say: “Na everything wey person get e go give because of im life.” (Job 2:4) So Satan de try to talk say people go serve Jehovah only when things de go well for them, and say if them face problem, them go leave Jehovah. Job show say wetin Satan talk na lie. For this our time, we too fit show say even if things hard us, we no go ever stop to serve Jehovah. We fit dey sure say Jehovah go continue to protect us because of im name.—John 17:11.
17. As e dey for 1 Peter 2:12, which other thing we fit do to honor Jehovah name?
17 We de do everything wey we fit do to honor Jehovah name. (Prov. 30:9; Jer. 7:8-11) Because people know say we be Jehovah Witness, wetin we de do fit make people honor Jehovah name, or e fit make people talk bad about Jehovah name. (Read 1 Peter 2:12.) Because of this one, we want make everything wey we de talk and do, make people praise Jehovah name. If we de do like this, we go fit honor Jehovah name even though say we no dey perfect.
18. Which other way we fit show say Jehovah name dey important to us? (Still check footnote.)
18 Jehovah name dey important to us pass our own name. (Ps. 138:2) Why this one really dey important? Na because sometimes, when we do things wey make Jehovah happy, some people fit no happy and them fit de talk bad-bad things about us.a Them kill Jesus like criminal, but Jesus ready to die like this, so that e go fit honor Jehovah name. Jesus no overworry about wetin other people de think about-am. (Heb. 12:2-4) Wetin dey important to-am, na to do wetin Jehovah want.—Matt. 26:39.
19. How you de feel about Jehovah name, and why you de feel like that?
19 We de happy to be Jehovah servant and we de see-am as big honor to be Jehovah Witness. Because Jehovah name really dey important to us, we de continue to praise Jehovah even if people de talk bad about us. Jehovah name dey important to us pass our own name. So make we continue to de praise Jehovah name no matter any problem wey we de face. When we do like this, we de show say Jehovah name na the most important name for us, just as e be for Jesus.
SONG 10 Make We Praise Our God!
a Even Job wey hold Jehovah tight, start to think of im own name pass Jehovah name when im three friends talk say e de suffer because e don do bad-bad things. When all Job children die and e lose all im property, ‘Job no sin, and e no talk say God don do something wey no correct.’ (Job 1:22; 2:10) But, when Job three friends talk say e de suffer because e don do bad thing, Job start to “talk anyhow.” That time, Job start to defend im name instead of Jehovah name.—Job 6:3; 13:4, 5; 32:2; 34:5.