Why Jehovah Witness People No De Celebrate Easter?

Belief wey no correct: People de think say the reason why Jehovah Witness no de celebrate Easter na because them no be Christians.

The truth: We believe say Jesus Christ na our Savior and we de do our best to ‘fit copy im example well.’—1 Peter 2:21; Luke 2:11.

Belief wey no correct: Una no believe say when Jesus die, e come back to life.

The truth: We believe say when Jesus die, God bring-am back to life. We de see this one as one of our main belief as Christians and we de talk about-am well-well for our preaching.—1 Corinthians 15:3, 4, 12-15.

Belief wey no correct: E no concern una say una children no de enjoy theirself when people de celebrate Easter.

The truth: We love our children well-well and we de spend time to teach and train them. And we still de do everything wey we fit do make them de happy.—Titus 2:4.

• E no get any place wey Bible talk say make Christians de celebrate Easter.

• Jesus command Christians make them de remember im death no be im resurrection. We de do the Memorial of Jesus death every year for the date wey e die and we de calculate-am base on the calendar wey people for Bible time use.—Luke 22:19, 20.

• God no want make people de do Easter because things wey concern Easter come from pagan worship. God want make people wey de worship-am ‘worship only-am’ and e hate make people de worship-am with things wey e condemn.—Exodus 20:5; 1 Kings 18:21.

We believe say to celebrate Easter no good because Bible no support-am at all. And Bible advice us say make we no de follow people tradition, but make we de ‘protect the sense wey we get and the mind wey we de use think’. (Proverbs 3:21; Matthew 15:3) As we de tell people wetin we believe about Easter when them ask us about-am, we still de show say we respect the right wey them get to decide wetin them want do about this matter.—1 Peter 3:15.