LESSON 54
The Work Wey “the Faithful and Discreet Slave” De Do
Na Jesus be the Head of the Christian congregation. (Ephesians 5:23) Today, Jesus dey heaven, de use the “faithful and discreet slave” to direct e disciples for earth. (Read Matthew 24:45.) Na Jesus Christ choose the “slave” and give the slave the right to make some decision, but the slave must obey Jesus and serve the brothers of Christ. Who be the slave? How the slave de care for us?
1. Who be “the faithful and discreet slave”?
Jehovah don always de use man or small group of men to give direction to e people. (Malachi 2:7; Hebrews 1:1) After Jesus die, the apostles and elders for Jerusalem continue to direct servants of God. (Acts 15:2) As e be that time, today na small group of elders wey them de call Governing Body of Jehovah Witness, de teach servants of God Bible and de direct the preaching work. This group na “the faithful and discreet slave wey [Jesus] don choose.” (Matthew 24:45a) All the members of the Governing Body na anointed Christians wey Jehovah use e spirit anoint, and them de wait to rule with Jesus Christ for heaven when their life don end for this earth.
2. Which kind food the faithful slave de give?
Jesus talk say the faithful slave go “give [their Christian brothers and sisters] food for the correct time.” (Matthew 24:45b) Just as the food wey we de chop de make us strong for body, na so the food—the direction from the Word of God—de give us the power wey we need to hold Jehovah tight and to continue to do the work wey Jesus don give us. (1 Timothy 4:6) We de get this food from our meeting, assembly, and convention, and from our books and videos wey de help us understand wetin God want and de make us tight friend with God.
LEARN MORE THINGS
Learn why we need “the faithful and discreet slave”—the Governing Body.
The Governing Body de teach, de direct and de give help to Jehovah Witness for the whole world
3. Them de arrange how we de do things
The Governing Body de arrange the work of Jehovah Witness them as Jesus de direct them. Na so e be among the Christians for the time of the apostles. Play the VIDEO.
Read 1 Corinthians 14:33, 40, and talk about this question:
How this verses show say Jehovah want make they arrange how e people de do things?
4. Them de arrange how we de do our preaching work
For the time of the apostles, preaching na the work wey dey important pass wey Christians do. Read Acts 8:14, 25, and talk about this questions:
For the time of the apostles, which people direct how they go do the preaching work?
Wetin Peter and John do when other apostles give them direction?
Preaching na the work wey dey important pass wey Governing Body de arrange. Play the VIDEO.
Jesus talk how the preaching work really dey important. Read Mark 13:10, and talk about this questions:
Why the preaching work dey important to the Governing Body?
Why we need make “the faithful and discreet slave” arrange the work wey we de do for the whole world?
5. The faithful slave de give direction to servants of God
The Governing Body de give direction to Christians for the whole world. How them de decide the kind direction wey them go give Christians? Make we see how the governing body for the time of the apostles do this one. Read Acts 15:1, 2, and talk about this questions:
Which matter cause problem for Christians for the time of the apostles?
Who Paul, Barnabas, and other people go meet to settle the problem?
Read Acts 15:12-18, 23-29, and talk about this question:
That time, before governing body make any decision, wetin they go do so that they go know wetin God de think about the matter?—Check verses 12, 15, and 28.
Read Acts 15:30, 31 and 16:4, 5, and talk about this questions:
Wetin the Christians for the time of the apostles do about the decision wey governing body make?
How Jehovah bless them as they obey?
Read 2 Timothy 3:16 and James 1:5, and talk about this question:
Wetin the Governing Body de allow make e guide them when them de make decisions today?
SOME PEOPLE DE TALK SAY: “If you listen to wetin the Governing Body de talk, na people you just de follow.”
Wetin make you dey sure say na Jesus de direct the Governing Body?
WETIN THIS LESSON TEACH
The Governing Body na “the faithful and discreet slave” wey Jesus choose. The Governing Body de direct and teach Christians the truth from Bible.
Wetin You Don Learn
Who choose “the faithful and discreet slave”?
How the Governing Body de care for us today?
You believe say the Governing Body na “the faithful and discreet slave”?
LEARN OTHER THINGS
Learn how the Governing Body de do their work.
“Wetin Be the Governing Body of Jehovah Witness?” (E dey for jw.org)
Learn how the Governing Body de make sure say we de get the correct truth from Bible.
How the members of the Governing Body de feel about the work wey Jesus don give them to do?
How our meetings and conventions de prove say na Jehovah de direct the Governing Body?