Tinogona kuva nechokwadi chakazara here chekuti Jehovha paanotonga vanhu nguva dzese anoita chisarudzo chakakodzera? Hongu! Sekunyatsonzwisisa kwakaita Abrahamu, Jehovha ndiye “Mutongi wenyika yese” akakwana, akachenjera kupfuura vamwe vese uye ane tsitsi. Akadzidzisa Mwanakomana wake uye akamupa basa rese rekutonga. (Joh. 5:22) Vese vari vaviri, Baba neMwanakomana, vanogona kuona zviri mumwoyo memunhu mumwe nemumwe. (Mat. 9:4) Saka pavachatonga munhu mumwe nemumwe vachaita “zvakarurama”! Ngativimbei naJehovha uye nezvisarudzo zvake zvese. Tinoziva kuti hatina kukodzera kutonga, asi iye akakodzera! (Isa. 55:​8, 9) Saka tinosiyira kutonga kwese kwaari neMwanakomana wake, Mambo anonyatsoratidza matongero akarurama uye tsitsi dzaBaba vake.—Isa. 11:​3, 4. w24.05 7 ¶18-19

Zvinokosha chaizvo kuti tive vanhu vanotaura chokwadi mumwoyo medu. Izvi tinozviona pane zvakaitika Firipi paakaita kuti shamwari yake Natanieri ionane naJesu. Kunyange zvazvo Jesu akanga asati amboonana naNatanieri, Jesu akati: “Onai, muIsraeri wechokwadi asina unyengeri.” (Joh. 1:47) Jesu akanyatsoona kuti Natanieri aiva akatendeseka zvechokwadi. Kungofanana nesu, Natanieri aiva munhu anotadza. Asi ainge akatendeseka pazvinhu zvese asina unyengeri. Jesu akayemura izvozvo, uye zvakaita kuti arumbidze Natanieri. Zvinhu zvakawanda zvakanyorwa muna Pisarema 15 zvatinofanira kuita kuti tifadze Jehovha zvine chekuita nemabatiro atinoita vamwe. Pisarema 15:3 inotaura kuti muenzi mutende raJehovha “haashandisi rurimi rwake kusvibisa zita remumwe, haaitire muvakidzani wake zvakaipa, uye haarevi shamwari dzake.” Kutadza kudzora rurimi rwedu saizvozvo kunogona kukuvadza vamwe chaizvo.—Jak. 1:26. w24.06 10 ¶7, 9; 11 ¶10

Kana ukanyatsogadzirira ushumiri, kakawanda kacho unowedzera kusununguka paunotaura nevamwe. Jesu akabatsira vadzidzi vake kuti vagadzirire asati avatuma kunoparidza. (Ruka 10:​1-11) Sezvo vakashandisa zvavakanga vadzidziswa naJesu, vadzidzi vakafara chaizvo nezvavakakwanisa kuita. Tingagadzirira sei ushumiri? Tinofanira kufunga kuti tingataura sei chokwadi nenzira inonzwisisika tichishandisa mashoko edu. Zvinobatsirawo kugara tafunga nezvezvinhu zviviri kana zvitatu zvinowanzotaurwa nevanhu mundima tobva tafunga kuti tingavapindura sei. Uye patinenge tava kutaura nevanhu, tinogona kuedza kusununguka, kunyemwerera, uye kuva neushamwari. w24.04 16 ¶6-7