A prenspari srefsrefi taki wi e „taki sani nanga wan krin ati”. Wi kan si dati te wi e luku san psa di Filipus tyari en mati Natanael fu go miti Yesus. Aladi a ben de a fosi leisi di Yesus ben miti Natanael, tòg a taki: „Luku, a man disi na trutru wan Israelsma di no e bedrigi sma” (Yoh. 1:47). Natanael ben eerlijk srefi na ini pkinpkin sani. Natanael ben de wan sondusma neleki wi, ma a no ben e hoigri. A ben eerlijk na ini ala sani. Yesus ben lobi dati èn a prèise Natanael tu. Furu fu den sani di kari na ini Psalm 15, abi fu du nanga a fasi fa wi e libi nanga trawan. Te wi e du den sani disi, dan wi e plisi Yehovah. Psalm 15:3 e taki dati wan sma di de na ini Yehovah en tenti ’no e taki ogri-ati lei nanga en mofo, a no e du nowan ogri nanga en kompe èn a no e taki takru sani fu en mati’. Te wi e du den sortu sani dati nanga trawan, dan dati kan hati den firi fu den trutru.​—Yak. 1:26. w24.06 10 ¶7, 9; 11 ¶10

Efu yu sreka bun gi a preikiwroko, dan yu no o frede tumusi fu taki nanga tra sma. Yesus ben yepi den disipel fu en fu sreka bun, fosi a seni den go na ini a preikiwroko (Luk. 10:1-11). Fu di den disipel ben e du san den ben leri fu Yesus, meki den ben man du furu bun sani èn den ben e prisiri trutru. Fa wi kan sreka gi a preikiwroko? Wi musu prakseri san wi wani taki èn baka dati wi musu taki en nanga wi eigi wortu. Wan tra sani di kan yepi wi, na te wi e prakseri tu noso dri fasi fa sma na ini wi kontren ben kan piki wan aksi di wi poti gi den èn wi kan prakseri tu fa wi ben o piki a sma. Te wi e du disi, dan wi no o frede fu taki nanga sma, wi o de rustig èn wi o man taki switi nanga den. w24.04 16 ¶6-7

A moro prenspari reide fu san ede wi e preiki a bun nyunsu, na fu di wi lobi Yehovah Gado nanga a santa nen fu en. Wi e si a diniwroko fu wi leki wan fasi fa wi kan prèise a Gado di wi lobi. Wi e agri nanga wi heri ati taki Yehovah Gado warti fu kisi glori, grani, nanga krakti fu den ret’ati futuboi fu en. Wi e gi en glori nanga grani te wi e gi trawan krinkrin beweisi taki na en „meki ala sani” èn taki wi de na libi fu di na en gi wi libi. Fa wi kan gi Yehovah a krakti fu wi? Wi kan gi en a krakti fu wi te wi e gebroiki wi ten nanga den sani di wi abi fu teki prati na a preikiwroko so furu leki wi man (Mat. 6:33; Luk. 13:24; Kol. 3:23). Fu taki en syatu, wi lobi fu taki fu a Gado di wi lobi. Boiti dati, wi e si en leki wan grani fu ferteri trawan fu a nen fu en èn san a nen dati wani taki. w24.05 17 ¶11