ኣቱም ወለዲ ንውሉድኩም ነቲ ኣብ ፈጣሪ ዘለዎ እምነት ኪጣበቐሉ ኣዳልውዎ። ነቲ ኣብ jw.org ዚወጽእ፡ “መንእሰያት ዚሓትትዎ—ፍጥረትዶ ወይስ ፍልቀት፧” ዘርእስቱ ተኸታታሊ ዓንቀጻት ብሓባር ክትምርምርዎ ትኽእሉ ኢኹም። ድሕሪኡ፡ ውሉድኩም ምስ ሰባት ኣብ ዚዛራረበሉ እዋን፡ ብዛዕባ ህልውና ፈጣሪ ዜረጋግጽ እንታይ ዜእምን መረዳእታ ኺጥቀም ከም ዚኽእል ተመያየጡ። ገሊኦም ጽቡቕ ምይይጥ ንምግባር ፍቓደኛታት እንተ ዀይኖም፡ ቀሊል መረዳእታ ኺጥቀም ኣተባብዓዮ። ንኣብነት፡ ሓደ መማህርቱ፡ “ኣብ ዝርእዮ ነገር ጥራይ እየ ዝኣምን፣ ንኣምላኽ ከኣ ኣይረኣኽዎን” ይብሎ ይኸውን። ሽዑ፡ ሓደ መንእሰይ ክርስትያን፡ “ዋላ ሓደ ሰብ ኣብ ዘይሰፈሮ ዱር ትጐዓዝ ከም ዘለኻ ጌርካ እሞ ሕሰብ። ብወዝቢ ዒላ ትረክብ። እንታይ ኢልካ ምሓሰብካ፧ ዒላ ምርካብካ ጥራይ እኳ ኣስተውዓሊ ህያው ፍጡር ከም ዝዀዓታ ዚሕብር ካብ ኰነ፡ ህልውና ዩኒቨርስ ደኣኸ ብዝያዳ ኸምኡዶ ኣይሕብርን፧” ኢሉ ኺምልስ ይኽእል እዩ። w24.12 18 ¶16

ኣገዳሲ ውሳነታት ንምግባር፡ ኵላትና ደገፍ የድልየና እዩ። መብዛሕትኡ ኻብዚ ደገፍ እዚ፡ ካብ ሽማግለታትን ካብ ካልኦት ብሱላት ክርስትያናትን ክንረኽቦ ንኽእል ኢና። ንሳቶም ብዕድመ ኣመና ዚዓብዩና እንተ ዀይኖም፡ ንምኽሮም ግዜ ኸም ዝሓለፎ ጌርና ተቐላጢፍና ዕሽሽ ክንብሎ የብልናን። የሆዋ ኻብ ዓበይቲ ኽንምሃር ይደልየና እዩ። ካባና ንዝነውሐ ግዜ ስለ ዝነበሩ፡ ዝያዳ ተመክሮን ኣእምሮን ጥበብን ኬጥርዩ ኽኢሎም እዮም። ብግዜ መጽሓፍ ቅዱስ፡ የሆዋ በቶም ብዕድመ ዝደፍኡ እሙናቱ ኣቢሉ ንህዝቡ ኣተባቢዕዎምን ዜድልዮም ምኽሪ ሂብዎምን እዩ። ንኣብነት፡ ሙሴን ዳዊትን ሃዋርያ ዮሃንስን ዝገበርዎ እስከ ንርአ። ንሳቶም ኣብ እተፈላለየ ግዜያትን ኣብ በበይኑ ዅነታትን እዮም ዚነብሩ ነይሮም። ኣብ ኣጋ መወዳእታ ህይወቶም ከኣ፡ ንመንእሰያት ጥበባዊ ምኽሪ ሂቦም እዮም። እዞም ብዕድመ ዝደፍኡ እሙናት፡ ንኣምላኽ እዙዝ ምዃን ዘለዎ ኣገዳስነት ኣጕሊሖም እዮም። መንእሰያት ንኹን ዓበይቲ፡ ካብ ምኽሮም ክንጥቀም ንኽእል ኢና።—ሮሜ 15:4፣ 2 ጢሞ. 3:16። w24.11 8 ¶1-2

ብዘመን ኖህ፡ ኣምላኽ ንደቂ ሰብ፡ ደም ከይበልዑ ኸልኪልዎም እዩ። (ዘፍ. 9:3, 4) ኣብቲ ንእስራኤል ዝሃቦ ሕጊ እውን ነዚ ኽልክል እዚ ደጊምዎ እዩ። ደም ዝበልዐ ዘበለ ሰብ “ካብ ህዝቡ ይመንቈስ” እዩ ተባሂሉ። (ዘሌ. 7:27) የሱስ ነዚ ሕጊ እዚ ሓልይዎ እዩ። (ማቴ. 5:17-19) ስለዚ፡ ነቶም ኣይሁድ ቃል ብቓሉ ስጋኡ ኺበልዑ፡ ኣብ ሰራውሩ ዝነበረ ደሙ እውን ኪሰትዩ ምትብባዕ፡ ፈጺምካ ዘይሕሰብ እዩ ነይሩ። ከምቲ ኣቐዲሙ ምስ ሓንቲ ሳምራዊት ሰበይቲ ኺዛረብ ከሎ ዝገበሮ፡ ምሳልያዊ ኣዘራርባ እዩ ዚጥቀም ነይሩ። ነታ ሰበይቲ፡ “እቲ ኣነ ዝህቦ ማይ . . . ናይ ዘለኣለም ህይወት . . . [ዚህብ] እዩ” ኢሉ እዩ ተዛሪብዋ። (ዮሃ. 4:7, 14) ከምኡ ኺብል ከሎ፡ ቃል ብቓሉ ማይ ብምስታይ ናይ ዘለኣለም ህይወት ከም እትረክብ ኣይኰነን ዚዛረባ ነይሩ። እቶም ኣብ ቅፍርናሆም እተኣከቡ ህዝቢ እውን፡ ቃል ብቓሉ ስጋኡ እንተ በሊዖምን ደሙ እንተ ሰትዮምን ንዘለኣለም ይነብሩ ማለቱ ኣይነበረን። w24.12 9 ¶4-6