ኵሎም ህዝቢ ኣምላኽ ዜድልዮም ዘበለ መንፈሳዊ ምግብን መምርሕን ዕቝባን ይረኽቡ እዮም። የሆዋ ኣብ መንጎ ኣጋይሹ ኣድልዎ ኸም ዘይገብር ዘርእየሉ ሓደ መገዲ፡ ኣብ ብዘላ ዓለም ዚርከቡ ሰባት ንመጽሓፍ ቅዱስ ኪረኽብዎ ኸም ዚኽእሉ ብምግባር እዩ። ቅዱሳት ጽሑፋት ኣብ ፈለማ ብሰለስተ ቛንቋታት፡ ማለት ብእብራይስጥን ብኣራማይስጥን ብግሪኽኛን እዩ ተጻሒፉ። እሞ ደኣ እቶም ነቲ በዅሪ ቛንቋታት ኬንብቡ ዚኽእሉ ሰባት ካብቶም ነቲ ቛንቋታት ዘይክእልዎ ሰባት ንላዕሊ ምስ የሆዋ ዝጠበቐ ርክብ ኣለዎምዶ፧ የብሎምን። (ማቴ. 11:25) ስምረት የሆዋ ምርካብ፡ ኣብ ደረጃ ዓለማዊ ትምህርትና ወይ ኣብ ናይ ቋንቋ ኽእለትና ዚምርኰስ ኣይኰነን። የሆዋ ንምሁራት ጥራይ ዘይኰነስ፡ ኣብ ብዘላ ምድሪ ንዚርከቡ ልዑል ትምህርቲ ንእተማህሩ ዀነ ንዘይተማህሩ ሰባት እዩ ጥበቡ ዚህብ። እቲ ብድራኸ መንፈስ እተጻሕፈ ቓሉ መጽሓፍ ቅዱስ ናብ ኣሽሓት ቋንቋታት ተተርጒሙ ኣሎ። ስለዚ፡ ኣብ ብዘላ ዓለም ዚርከቡ ሰባት ካብ ትምህርትታቱ ኺጥቀሙ፡ ብኸመይ ፈተውቱ ኪዀኑ ኸም ዚኽእሉ እውን ኪምሃሩ ይኽእሉ እዮም።—2 ጢሞ. 3:16, 17። w24.06 6-7 ¶13-15

እቲ የሱስ ተነብይዎ ዝነበረ፡ ስርዓት ኣይሁድ ዜብቅዓሉ ግዜ ይቐርብ ነይሩ እዩ። ክርስትያናት ነቲ ዝተረፈ ግዜ፡ ከም እምነትን ተጻዋርነትን ዝኣመሰለ ባህርያት ብምምዕባል፡ ርእሶም ንምድላው ኪጥቀሙሉ ነይርዎ። (እብ. 10:25፣ 12:1, 2) ንዓና እውን ካብቲ እቶም እብራውያን ክርስትያናት ዘሕለፍዎ ዚብርትዕ ጸበባ ይጽበየና ኣሎ። (ማቴ. 24:21፣ ራእ. 16:14, 16) ንገለ ኻብቲ የሆዋ ነቶም ክርስትያናት ዝሃቦም፡ ንዓና እውን ኪጠቕመና ዚኽእል ግብራዊ ምኽሪ ንመርምር። ሃዋርያ ጳውሎስ ንኣመንቲ ብጾቱ ኣብ ቃል ኣምላኽ ኣዕሚቖም ኪዅዕቱ ኣተባብዖም። (እብ. 5:14–6:1) ብቕዱሳት ጽሑፋት እብራይስጢ ገይሩ ኸኣ፡ ኣምልኾ ክርስትና ኻብ ኣይሁድነት ከም ዚበልጽ ኣረድኦም። ኣብ ሓቂ ዘለዎም ፍልጠትን ዓሚቝ ምርዳእን እናወሰኸ እንተ ኸይዱ፡ ምእንቲ ኸይታለሉ ናይ ሓሶት ትምህርትታት ኬለልዩን ኪነጽጉን ከም ዜዕጥቖም ጳውሎስ ይፈልጥ ነይሩ እዩ። w24.09 8-9 ¶2-3፣ 10 ¶6

ደቀ መዛሙርቲ የሱስ ምትብባዕ የድልዮም ነበረ። ስለምንታይ፧ ምኽንያቱ ገሊኦም ኣባይቶም፡ ገሊኦም ስድራ ቤቶም፡ ገሊኦም ከኣ ስራሖም ሓዲጎም፡ ብምሉእ ግዜኦም ንየሱስ ይስዕብዎ እዮም ነይሮም። (ማቴ. 19:27) ገሊኦም ከኣ ደቀ መዛሙርቲ የሱስ ስለ ዝዀኑ፡ ካብ ማሕበረ ሰብ ተሰጒጐም እዮም ነይሮም። (ዮሃ. 9:22) የሱስ እቲ ተስፋ እተገብረሉ መሲሕ ምዃኑ ስለ ዝኣመኑ፡ መስዋእቲ ኪኸፍሉ ፍቓደኛታት እዮም ነይሮም። (ማቴ. 16:16) የሱስ ምስ ተቐትለ ግና ተስፋኦም ጸልመተ፡ ልቦም እውን ተሰብረ። የሱስ፡ ናይ ደቀ መዛሙርቱ ጓሂ ኸም ምልክት መንፈሳዊ ድኽመት ገይሩ ኣይኰነን ርእይዎ፡ ንቡር ሓዘን ምዃኑ ተረዲእዎ ነይሩ እዩ። ስለዚ ኸኣ ኣብታ ኻብ ሞት ዝተንስኣላ መዓልቲ ኣትሒዙ ኼተባብዖም ጀመረ። ንኣብነት፡ ንማርያም መግደላዊት ኣብ ጥቓ እቲ መቓብር ኰይና ኽትበኪ ኸላ ተራእያ። (ዮሃ. 20:11, 16) ካብ ኤማሁስ እትብሃል ቍሸት ንዝመጹ ኽልተ ኻብ ደቀ መዛሙርቱ ተራእዮም። ንሃዋርያ ጴጥሮስ እውን ተራእዮ። w24.10 13 ¶5-6