UYesu Umelana Nezilingo

Emva nje kokuba uYesu ebhaptizwe nguYohane, umoya kaThixo umqhubela kwintlango yakwaYuda. Ininzi into ekufuneka ecinge ngayo. Ngoku ebebhaptizwa ‘amazulu aye avuleka.’ (Mateyu 3:16) Ngenxa yaloo nto ukhumbula izinto azifunde nebezenza ezulwini. Ininzi nyhani into ekufuneka ecinge ngayo!

UYesu uhlala entlango iintsuku eziyi-40 imini nobusuku. Ngalo lonke elo xesha akhonto ayityayo. Uthi xa elambe nyhani, kufike uSathana uMtyholi aze amlinge athi: “Ukuba ungunyana kaThixo, yithi kula matye mawabe zizonka.” (Mateyu 4:3) UYesu uyayazi ukuba akanakusebenzisa amandla akhe ukuze azanelise, ngenxa yaloo nto uyamgxotha uSathana.

UMtyholi akancami. Uzama elinye iqhinga. Umsa kweyona ndawo iphakamileyo etempileni aze athi makaziphose ezantsi iingelosi ziza kumsindisa. Kodwa uYesu akazimiselanga ukwenza loo nto. Uyamxelela ukuba iZibhalo zithi kurongo ukulinga uYehova ngaloo ndlela.

Xa emlinga okwesithathu, ngandlela ithile uMtyholi umbonisa “onke amazwe ehlabathi nobutyebi bawo” aze athi: “Ndingakunika zonke ezi zinto ukuba ungaqubuda kum undikhonze nje kube kanye.” Nangoku uYesu akafuni nokuva aze athi: “Hamb’ apha Sathana!” (Mateyu 4:8-10) Akavumi ukulingwa nguSathana kuba uyayazi ukuba nguYehova yedwa omele akhonzwe. Ukhetha ukuhlala ethembekile kuThixo.

Sinokufunda kwezi zilingo nakwindlela uYesu awaphendula ngayo. USathana ngumntu okhoyo ongabonakaliyo ibe ezi vesi zibonisa ukuba balawulwa nguye oorhulumente behlabathi. Ukuba bebengalawulwa nguye ebengazokukwazi ukulinga uYesu ngabo.

Enye into, uMtyholi wathi ulungele ukunika uYesu onke amazwe ehlabathi, ukuba unokuqubuda kuye nje kube kanye. Nathi uMtyholi unokusilinga ngaloo ndlela, mhlawumbi asibonise amathuba okufumana ubutyebi behlabathi, amandla okanye isikhundla esiphezulu. Kuya kusinceda ukulandela umzekelo kaYesu wokuhlala sithembekile kuThixo nokuba silingwa ngantoni! Ukhumbule ukuba uMtyholi wamshiya uYesu kodwa “waqhubeka ekhangela elinye ithuba lokumlinga.” (Luka 4:13) Unokwenza loo nto nakuthi, ngenxa yaloo nto kufuneka simlumkele.