Abantu ‘Abaphuma Kuzo Zonke Iilwimi’ Beva Iindaba Ezilungileyo

“Amadoda alishumi aphuma kuzo zonke iilwimi zeentlanga aya [kuthi]: ‘Siza kuhamba nani, kuba sivile ukuba uThixo unani.’”—ZEKARIYA 8:23.

 1. UYehova wasilungiselela njani isiqalo esifanelekileyo sokushumayela ngeelwimi zeentlanga ezahlukahlukeneyo?

ALIKHO ixesha elalinokufaneleka njengelo lomhla wePentekoste yowama-33 C.E. Kwiiveki ezimbalwa ngaphambi koko, amaYuda nabo baguqukele ebuYudeni eza engumdolomba evela kwiingingqi ezili-15 zoBukhosi baseRoma. Athontelana eYerusalem eze kubhiyozela iPasika. Ngaloo mhla, loo mawaka abantu eva—kungekhona isidubedube esifana neso senzeka kwiBhabheli yamandulo kodwa eva izinto awayeziqonda—kubantu abaqhelekileyo ababezaliswe ngumoya oyingcwele bevakalisa iindaba ezilungileyo ngeelwimi ezininzi ezazithethwa kwiindawo ezazilawula yiRoma. (IZenzo 2:1-12) Eso yaba sisiqalo sebandla lamaKristu nomsebenzi wezizwe ngezizwe wokufundisa ngeelwimi ezininzi owawuza kuqhubeka de kube kulo mhla wethu.

 2. Abafundi bakaYesu ‘babakhwankqisa’ njani abantu beelwimi ezahlukahlukeneyo ababebaphulaphule ngePentekoste yowama-33 C.E.?

² Kusenokwenzeka ukuba, abafundi bakaYesu babethetha isiGrike, ulwimi olwaluxhaphakile ngoko. Babethetha nesiHebhere, ulwimi olwalusetyenziswa etempileni. Noko ke, ngalo mhla wePentekoste, ‘bakhwankqisa’ abantu ngokuthetha iilwimi zomthonyama zabo babephulaphule. Kwazala nkomo ni ke oko? Bachukunyiswa gqitha yinyaniso ababeyiva ithethwa ngolwimi lwabo lweenkobe. Ekupheleni kolo suku, elo qaqobana labafundi landa laba ngaphezu kwama-3 000!—IZenzo 2:37-42.

3, 4. Umsebenzi wokushumayela wanda njani njengoko abafundi babeshiya iYerusalem, elakwaYuda nelaseGalili?

³ Kungekudala emva kweso siganeko sibalaseleyo, kwavela intshutshiso eYerusalem, ibe “abo babechithachithekile balityhutyha ilizwe bevakalisa iindaba ezilungileyo zelizwi.” (IZenzo 8:1-4) Ngokomzekelo, kwiZenzo isahluko 8 sifunda ngoFilipu ekubonakala ukuba wayengumshumayeli wevangeli othetha isiGrike. UFilipu wayeshumayela eSamariya. Washumayela nakwigosa elingumTopiya elasamkelayo isigidimi esiphathelele uKristu.—IZenzo 6:1-5; 8:5-13, 26-40; 21:8, 9.

⁴ Njengoko amaKristu ayefuduka ekhangela ikhusi kwiindawo ezingaphandle kweYerusalem, kwaYuda naseGalili, agagana nolunye ucelomngeni, ukushumayela kubantu bezinye iintlanga neelwimi. Amanye kuloo maKristu asenokuba ayeqhele ukushumayela kumaYuda kuphela. Kodwa umfundi uLuka usichazela oku: “Kwakukho namadoda athile aseSipro naseKirene aweza kwa-Antiyokwe aza athetha nabantu abathetha isiGrike, evakalisa iindaba ezilungileyo zeNkosi uYesu.”—IZenzo 11:19-21.

UThixo Ongakhethi-buso Unesigidimi Sabo Bonke

 5. Ukushunyayelwa kweendaba ezilungileyo kubonisa njani ukuba uYehova akakhethi-buso?

⁵ Oku kuvisisana kakuhle neendlela zikaThixo; umkhethe yinto angenayo kwaphela. Emva kokuba umpostile uPetros encedwe nguYehova watshintsha kwindlela awayebajonga ngayo abantu bezinye iintlanga, ngombulelo wathi: “Ngokuqinisekileyo ndiyaqonda ukuba uThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.” (IZenzo 10:34, 35; INdumiso 145:9) Xa umpostile uPawulos, owayekade engumtshutshisi wamaKristu wavakalisa ukuba ‘ukuthanda kukaThixo kukuba zonke iintlobo zabantu zisindiswe,’ wayiqinisekisa into yokuba uThixo akanalo tu ucalucalulo. (1 Timoti 2:4) Ukungakhethi-buso koMdali kubonakala kwinto yokuba ithemba loBukumkani ulinika bonke abantu amadoda okanye amabhinqa, enoba ngabaluphi na uhlanga, ubuzwe, okanye ulwimi.

6, 7. Ziziphi iziprofeto zeBhayibhile ezaxela kwangaphambili ngokushunyayelwa kweendaba ezilungileyo kubantu bezizwe ngezizwe neelwimi ezahlukahlukeneyo?

⁶ Olu lwando luqhubeka kumazwe ngamazwe lwaxelwa kwakwiinkulungwane ezadlulayo. Ngokutsho kwesiprofeto sikaDaniyeli, “[uYesu] wanikwa ulawulo nesidima nobukumkani, ukuze zonke izizwana neentlanga neelwimi zimkhonze.” (Daniyeli 7:14) Kwaisibakala sokuba eli phephancwadi lipapashwa ngeelwimi ezili-151 lize lisasazwe ehlabathini lonke, ukuze nawe ufunde ngoBukumkani bukaYehova, sibonisa ukuzaliseka kweso siprofeto.

⁷ IBhayibhile yalichaza kwangaphambili ixesha apho abantu beelwimi ezahlukahlukeneyo beya kuva isigidimi sayo esinik’ ubomi. Echaza indlela unqulo lokwenyaniso olwaluza kuba nomtsalane ngayo ebantwini, uZekariya waprofeta wathi: “Ngezo mini ke amadoda alishumi aphuma kuzo zonke iilwimi zeentlanga aya kubamba, ewe, okunene aya kubamba isondo lendoda engumYuda [amaKristu athanjiswe ngomoya, inxalenye “kaSirayeli kaThixo”], esithi: ‘Siza kuhamba nani, kuba sivile ukuba uThixo unani.’” (Zekariya 8:23; Galati 6:16) Ibe xa wayebalisa oko wakubona embonweni, yena umpostile uYohane wathi: “Khangela! ndabona naso isihlwele esikhulu, ekungekho mntu wakwaziyo ukusibala, siphuma kuzo zonke iintlanga nezizwe nezizwana neelwimi, simi phambi kwetrone naphambi kweMvana.” (ISityhilelo 7:9) Siye sazibona ezi ziprofeto zizaliseka!

Ukufikelela Kubantu Bazo Zonke Iintlobo

 8. Yintoni eye yenzeka namhlanje nefuna ukuba senze uhlengahlengiso kumsebenzi wokushumayela?

⁸ Baya besanda abantu abafudukela kwamanye amazwe namhlanje. Le mfuduko ibangelwa kukudibaniselana kwamazwe ehlabathi. Yimidolomba abantu abaye bafuduka kwezo ndawo zithwaxwa yimfazwe noqoqosho besiya kufuna ikhusi namadlelo aluhlaza kwezinye iindawo. Kumazwe amaninzi, ukuthontelana kwabemi basemzini neembacu kuye kwakhokelela ekubeni kusekwe amabandla athetha iilwimi zabo bantu basemzini. Ngokomzekelo, eFinland zingaphezu kwe-120 iilwimi ezithethwa kwelo; ibe zingaphezu kwama-200 eOstreliya. Kwesinye nje isixeko saseUnited States—iSan Diego—kuthethwa iilwimi ezingaphezu kwe-100!

 9. Simele sibujonge njani ubukho babantu abathetha iilwimi ezahlukahlukeneyo kwiindawo esishumayela kuzo?

⁹ Njengabalungiseleli abangamaKristu, ngaba ubukho babo bantu bathetha ezinye iilwimi sibujonga njengomqobo kubulungiseleli bethu? Akunjalo kwaphela! Kunoko, sibujonga njengethuba lokwandisa intsimi esishumayela kuyo—‘amasimi amhlophe alungele ukuvunwa.’ (Yohane 4:35) Sizimisele ukunyamekela abo baxhalabele intswelo yabo yokomoya, kungakhathaliseki ukuba ngabaluphi na uhlanga okanye ulwimi. (Mateyu 5:3) Ngenxa yoko, nyaka ngamnye liyanda inani labantu ‘bazo zonke iilwimi’ ababa ngabafundi bakaKristu. (ISityhilelo 14:6) Ngokomzekelo, ukususela ngoAgasti 2004, eJamani bekushunyayelwa ngeelwimi ezimalunga nama-40. Kwangaxeshanye, eOstreliya iindaba ezilungileyo bezishunyayelwa phantse ngeelwimi ezingama-30, zisuka kwiilwimi ezili-18 ezazisetyenziswa kwiminyaka elishumi edluleyo. EGrisi, amaNgqina kaYehova ebeshumayela kubantu ngeelwimi ezahlukahlukeneyo ezimalunga nama-20. Ehlabathini lonke, amalunga nama-80 ekhulwini amaNgqina kaYehova athetha ezinye iilwimi ezingesiso isiNgesi, olona lwimi luxhaphakileyo kumazwe ngamazwe.

10. Yiyiphi indima edlalwa ngumvakalisi ngamnye ekwenzeni abafundi abantu “beentlanga zonke”?

¹⁰ Ngokwenene, umyalelo kaYesu ‘wokwenza abafundi abantu beentlanga zonke’ uyathotyelwa! (Mateyu 28:19) Ekubeni amaNgqina kaYehova elwamkela ngezandl’ ezishushu olo thumo, kumazwe angama-235 atyhalela phambili esasaza uncwadi ngeelwimi ezingaphezu kwama-400. Nakuba intlangano kaYehova ilungiselela olu ncwadi lufunekayo ukuze kuncedwe abantu, mvakalisi ngamnye woBukumkani umele adlale eyakhe indima ukuze ashumayele isigidimi seBhayibhile ‘kubantu bazo zonke iintlobo’ ngolwimi abalwazi kakuhle. (Yohane 1:7) Oku kutsala ngaxhathalinye kunceda izigidi zabantu beelwimi ezahlukahlukeneyo bazuze iindaba ezilungileyo. (Roma 10:14, 15) Ewe, ngamnye kuthi udlala indima ebalulekileyo!

Ukufeza Olu Celomngeni

11, 12. (a) Yiyiphi imiqobo esijamelana nayo, ibe umoya oyingcwele usinceda njani? (b) Kutheni kudla ngokuba luncedo nje ukushumayela kubantu ngolwimi lwabo?

¹¹ Baninzi abavakalisi boBukumkani abanqwenel’ ukufunda ulwimi olutsha namhlanje, kodwa abalindelanga mmangaliso wesipho somoya kaThixo. (1 Korinte 13:8) Ukufunda ulwimi olutsha akuyondlwan’ iyanetha. Nkqu nabo sele belwazi olo lwimi lutsha kusenokufuneka batshintshe indlela abacinga ngayo nabathetha ngayo ukuze isigidimi seBhayibhile sibangel’ umdla kubantu abathetha olo lwimi baze baphinde babe benemvelaphi nezithethe ezahlukileyo kwezabo. Enye ingxaki kukuba, abaphambukeli badla ngokuba neentloni nokungazithembi; ngoko kufuneka umgudu ukuze wazi indlela abacinga ngayo.

¹² Nakuba kunjalo, umoya oyingcwele usabanceda abakhonzi bakaYehova kwimigudu yabo yokunceda abantu bezinye iilwimi. (Luka 11:13) Kunokusenza sithethe iilwimi ezininzi ngommangaliso, umoya oyingcwele unokukhulisa umnqweno wethu wokuthetha nabantu abangathethi ulwimi lwethu. (INdumiso 143:10) Xa sishumayela okanye sifundisa abantu iBhayibhile ngolwimi abangalwazi ncam basenako ukukuqonda oko sikutshoyo. Kodwa ukuze sifikelele iintliziyo zabo, kudla ngokuba bhetele ukusebenzisa ulwimi lwabo—ulwimi olufikelela iingcamango, umxhelo namathemba abo.—Luka 24:32.

13, 14. (a) Yintoni eyenza abanye baye kushumayela kwiindawo ezithetha olunye ulwimi? (b) Yintoni eyenziwa ngabanye abaye bazincama?

¹³ Abavakalisi boBukumkani abaninzi baye baya kushumayela kwiindawo ezithetha ulwimi lwasemzini xa bebona abantu balapho besamkela inyaniso yeBhayibhile. Abanye batsho bazive benamandla xa inkonzo yabo izisa ucelomngeni yaye ibangela umdla. Iofisi yesebe lamaNgqina kaYehova elikumazantsi eYurophu ithi: “Inkoliso yabo bavela eMpuma Yurophu inxanelwe inyaniso.” Kuhlaziya ngendlela engathethekiyo ukunceda abantu abanomdla ngolo hlobo!—Isaya 55:1, 2.

¹⁴ Noko ke, ukuze siphumelele kulo msebenzi, kufuneka sizimisele yaye sizincame. (INdumiso 110:3) Ngokomzekelo, kukho iqela leentsapho zamaNgqina aseJapan aye ancama ubutofotofo bemizi yawo esezixekweni, afudukela kwiindawo ezikwanti ukuze ancede amaqela abantu baseTshayina abaphambukele kwelo afunde iBhayibhile. Kunxweme olusentshona eUnited States, kukho abavakalisi abahamba ngeemoto zabo kangangeyure okanye ezimbini besiya kuqhuba izifundo zeBhayibhile kwindawo enabantu abathetha isiFilipino. ENorway, kukho isibini esifunda nentsapho evela eAfghanistan. Esi sibini sisebenzisa incwadana enemifanekiso ethi Yintoni UThixo Ayifunayo Kuthi?a yolwimi lwesiNgesi neyolwimi lwaseNorway. Le ntsapho ifunda iziqendu ngesiPersi, ulwimi olubufana nolwimi lwayo lweenkobe isiDari. Baxubusha ngolwimi lwesiNgesi nolwaseNorway. Oko kuzincama nokuvumelana neemeko kuba nomvuzo gqitha xa abo basemzini bezamkela iindaba ezilungileyo.b

15. Singenza njani ukuze sonke sifak’ isandla kulo msebenzi wokushumayela ngeelwimi ezahlukeneyo?

¹⁵ Ngaba ungakwazi ukufak’ isandla kulo msebenzi wenziwa ngentlaninge yeelwimi? Kutheni ungakhangeli nje ukuba ziziphi iilwimi zasemzini ezithethwa kwindawo yakho? Usenokuphatha amaphecana okanye iincwadana ezinemifanekiso ngezo lwimi. Incwadana ethi Good News for People of All Nations, eyakhululwa ngowama-2004 sele iluncedo ekusasazeni ithemba loBukumkani ngesigidimi sayo esilula nesakhayo esibhalwe ngeelwimi ezininzi.—Bona inqaku elithi “Good News for People of All Nations,” kwiphepha 32.

“Nimthande Umphambukeli”

16. Abazalwana abaneembopheleleko bangawubonisa njani umdla kubantu abathetha ulwimi lwasemzini?

¹⁶ Enoba sifunda olunye ulwimi okanye akunjalo, sinako ukufak’ isandla ukuze kufundiswe abemi basemzini abahlala kwindawo yethu. UYehova wayalela abantu bakhe ukuba ‘bamthande umphambukeli.’ (Duteronomi 10:18, 19) Ngokomzekelo, kwesinye isixeko esikhulu esikuMntla Merika, kukho amabandla amahlanu asebenzisa iHolo yoBukumkani enye. Njengokuba kusenziwa kwiiholo ezininzi, amabandla aye atshintshisane ngamaxesha okungena kweentlanganiso zawo rhoqo ngonyaka, nto leyo eyayiza kwenza iintlanganiso eziqhutywa ngesiTshayina zingene ukutshona kwelanga ngeCawa. Noko ke, oku kwakuza kuthetha ukuba abaphambukeli abaninzi abasebenza kwiivenkile zokutyela babeza kuphoswa ziintlanganiso. Ngobubele abadala bamanye amabandla benza uhlengahlengiso ukuze ezo ntlanganiso zesiTshayina zingene kwangethuba ngeCawa.

17. Simele sivakalelwe njani xa kukho abathile abafuna ukuya kunceda iqela elithetha olunye ulwimi?

¹⁷ Abaveleli abanothando bancomela abazalwana noodade abafanelekayo nabanobuchule abafuna ukuya kunceda amaqela ezinye iilwimi. Abafundisi beBhayibhile abanamava ngolo hlobo basenokuba liqhayiya kumabandla abo, kodwa abaveleli banokuvakalelwa ngendlela efanayo nabadala baseListra naseIkoniyo. Abo badala abazange bale noTimoti ukuze ahambahambe noPawulos, nakuba uTimoti wayeliqhayiya kumabandla abo. (IZenzo 16:1-4) Ukongezelela, abo bakhokelayo kumsebenzi wokushumayela abanikezeli ngenxa yokwahluka kwesimo sengqondo, amasiko okanye iindlela abaziphatha ngayo abemi basemzini. Kunoko, bayakwamkela oko baze bakhangele iindlela zokwakha ubuhlobo ngenxa yeendaba ezilungileyo.—1 Korinte 9:22, 23.

18. Nguwuphi umnyango omkhulu ovulekele bonke abantu?

¹⁸ Njengokuba kwaprofetwayo, iindaba ezilungileyo zishunyayelwa “kuzo zonke iilwimi zeentlanga.” Nangoku kusekho amathuba amangalisayo olwando kwiindawo ezinabantu abathetha iilwimi zasemzini. Kukho amawaka abavakalisi abanamava abaye bangena kulo “mnyango omkhulu okhokelela emsebenzini.” (1 Korinte 16:9) Noko ke, kusekuninzi okumele kwenziwe ukuze kuhlakulelwe umdla ongakumbi kwezo ndawo, njengokuba inqaku elilandelayo liza kubonisa.

[Imibhalo esemazantsi]

Ungachaza Na?

• Sinokumxelisa njani uYehova ngokungabi namkhethe kubo bonke abantu?

• Simele sibajonge njani abantu abahlala kwindawo yethu kodwa bengathethi ulwimi lwethu?

• Kutheni kuluncedo nje ukushumayela ebantwini ngolwimi lwabo lweenkobe?

• Sinokubonisa njani ukuba sibakhathalele abantu basemzini abahlala kwiindawo zethu?

[Imaphu/Umfanekiso okwiphepha 23]

(Ukuba ufuna inkcazelo ehlahlelwe kakuhle, yiya kwimpapasho)

IRoma

IKRETE

IASIYA

IFRIGIYA

IPAMFILIYA

IPONTO

IKAPADOKIYA

IMESOPOTAMIYA

IMEDI

IPARTI

IELAM

IARABHIYA

ILIBHIYA

IYIPUTA

KWAYUDA

IYerusalem

[Amanzi]

ULwandle LweMeditera

ULwandle Olumnyama

ULwandle Olubomvu

Persian Gulf

[Umfanekiso]

NgePentekoste yowama-33 C.E., abantu abaphuma kwiingingqi ezili-15 eziphantsi koBukhosi baseRoma beva iindaba ezilungileyo ngeelwimi zabo

[Imifanekiso ekwiphepha 24]

Abemi basemzini abaninzi basabela kakuhle kwinyaniso yeBhayibhile

[Umfanekiso okwiphepha 25]

Isaziso seHolo yoBukumkani esibhalwe ngeelwimi ezintlanu