Ngaba Ubusazi?

Ayefumaneka phi amatye axabisekileyo okwenza ubengo lombingeleli omkhulu wakwaSirayeli?

▪ Emva kokuba amaSirayeli endulukile aza angena entlango, uThixo wawanika imiyalelo yokwenza ubengo. (Eksodus 28:15-21) Ubengo lwalunamatye anjengerubhi, topazi, iemeraldi, itokoyize, isafire, iyaspisi, ileshem, iagate, iamethiste, ikrizolite, ianikis nejeyidi.a Ngaba amaSirayeli ayenawo la matye axabisekileyo?

Ngamaxesha okubhalwa kweBhayibhile, abantu babewaxabisa la matye yaye beshishina ngawo. Ngokomzekelo, amaYiputa amandulo, ayewafumana kumazwe akude la matye axabisekileyo namhlanje loo mazwe aziwa njengeIran, iAfghanistan, mhlawumbi kwanaseIndiya. Imigodi yaseYiputa yayivelisa iintlobo ngeentlobo zamatye axabisekileyo. Ookumkani baseYiputa babenegunya lokwemba la matye axabisekileyo kumazwe ababewalawula. Usolusapho uYobhi wachaza indlela abantu awayephila nabo ababebukhangela ngayo ubutyebi emigodini engaphantsi komhlaba. Kwizimbiwa ezazifumaneka ngaphantsi komhlaba, uYobhi ukhankanya ngokukhethekileyo isafire netopazi.—Yobhi 28:1-11, 19.

Ingxelo ye-Eksodus ichaza ukuba amaSirayeli ‘awaphanga izinto zexabiso amaYiputa’ ukumka kwawo. (Eksodus 12:35, 36) Ngoko ke, kunokwenzeka ukuba amaSirayeli awafumana eYiputa la matye enza ngawo ubengo lombingeleli omkhulu.

Kwakutheni ukuze iwayini isetyenziswe njengeyeza ngamaxesha okubhalwa kweBhayibhile?

▪ Komnye wemizekeliso yakhe, uYesu wathetha ngendoda eyayibethwe zizihange. Wathi le ndoda yancedwa ngumSamariya owayibopha amanxeba waza ‘wayigalela ioli newayini.’ (Luka 10:30-34) Xa wayebhalela umhlobo wakhe uTimoti, umpostile uPawulos wamcebisa wathi: “Musa ukuba sasela manzi, kodwa sebenzisa iwayini encinane ngenxa yesisu sakho nokukhathazwa kwakho yimpilo.” (1 Timoti 5:23) Ngaba zombini ezi ndlela zokunyanga eyachazwa nguYesu nanguPawulos zazifanelekile?

Incwadi ethi Ancient Wine iyichaza iwayini “njengethomalalisa iintlungu, isibulala zintsholongwane nozifo zonke.” Mandulo iwayini yayibalulekile ekunyangeni kubantu baseYiputa, kwabaseMesopotamiya nabaseSiriya. IThe Oxford Companion to Wine iyichaza iwayini “njengelona yeza kudala lasetyenziswa ngabantu.” Ngokuphathelele icebiso uPawulos awalinika uTimoti, incwadi ethi The Origins and Ancient History of Wine ibonisa ubunyaniso boku xa isithi: “Iintsholongwane ezibangela utyatyazo ziyafa xa zidityaniswe newayini.” Uphando lwakutshanje lwezamayeza luyakuqinisekisa oku kuba luthi imichiza engaphezu kwama-500 efumaneka kwiwayini iyazinyanga ezi zinto zichazwe ngasentla nezinye ezingakumbi.

[Umbhalo osemazantsi]

[Umfanekiso okwiphepha 26]

Amahlwempu axovula izidiliya, kwingcwaba likaNakht, Thebes, Eyiputa

[Inkcazelo]

Gianni Dagli Orti/The Art Archive at Art Resource, NY