‘NguThixo Okhulisayo!’

“ Lowo utyalayo akalutho nalowo unkcenkceshayo akalutho, kodwa oyinto nguThixo, yena ukhulisayo.”—1 KOR. 3:7.

 1. “Singabasebenzi abangamadlelane kaThixo” ngayiphi indlela?

“SINGABASEBENZI abangamadlelane kaThixo.” Umpostile uPawulos walichaza ngolo hlobo ilungelo esinokulinandipha sonke. (Funda eyoku-1 kwabaseKorinte 3:5-9.) UPawulos wayebhekisela kumsebenzi wokwenza abafundi. Wawufanisa nokutyala nokunkcenkceshela. Ukuze siphumelele kulo msebenzi ubalulekileyo, kufuneka sincediswe nguYehova. UPawulos usikhumbuza ukuba ‘nguThixo okhulisayo.’

 2. Kutheni isibakala sokuba ‘inguThixo okhulisayo’ sisinceda sibe nembono efanelekileyo ngobulungiseleli bethu?

² Eso sibakala sisinceda sithobeke size sibe nembono efanelekileyo ngobulungiseleli bethu. Sinokushumayela size sifundise ngokuzimisela, kodwa ekugqibeleni nguYehova omele azukiswe xa abantu besiba ngabafundi. Ngoba? Ngenxa yokuba enoba singazama kangakanani na, asinakuze siyiqonde ngokupheleleyo indlela olwakheka ngayo ulwalamano lomfundi noThixo yaye asinakululawula. UKumkani uSolomon wayichaza kakuhle le meko xa wathi: “Akuwazi umsebenzi woThixo oyinyaniso, owenza izinto zonke.”—INtshu. 11:5.

 3. Ziziphi izinto ofana ngazo umsebenzi wokutyala imbewu yokoqobo nalowo wokwenza abafundi?

³ Ngaba ukungayiqondi kwethu indlela umntu aba ngumfundi ngayo kwenza umsebenzi wethu ukruqule? Akunjalo. Kunoko kuwenza ubangele umdla. UKumkani uSolomon wathi: “Kusasa hlwayela imbewu yakho, yaye ungasiphumzi isandla sakho de kube ngokuhlwa; kuba akuyazi indawo oya kuphumelela kuyo, enoba kulapha okanye phaya, okanye enoba ziya kulunga zombini ngokufanayo.” (INtshu. 11:6) Eneneni, naxa sityala imbewu yokoqobo, asazi ukuba yiyiphi eza kukhula. Zininzi izinto esingenakuzilawula. Kunjalo nangomsebenzi wokwenza abafundi. UYesu wasibethelela esi sibakala kwimizekeliso yakhe emibini ebhalelwe thina kwisahluko se-4 seVangeli kaMarko. Makhe sibone ukuba singafunda ntoni kule mizekeliso mibini.

Iintlobo Zemihlaba

4, 5. Chaza ngokufutshane umzekeliso kaYesu womhlwayeli owasasaza imbewu.

⁴ Njengokuba kubhalwe kuMarko 4:1-9, xa ethetha ngomhlwayeli ohlwayela imbewu yakhe kwimihlaba eyahlukeneyo uYesu uthi: “Phulaphulani. Khangelani! Umhlwayeli waphuma waya kuhlwayela. Yaye njengoko wayehlwayela, yimbi imbewu yawela ecaleni kwendlela, zeza iintaka zayidla zayigqiba. Enye imbewu yawela kwindawo elulwalwa apho, kambe ke, ingazange ibe nomhlaba omninzi, yaye ngoko nangoko yantshula ngenxa yokungabi nabunzulu bamhlaba. Kodwa lakuphuma ilanga, yagqatswa, yaye ngenxa yokungabi nangcambu yabuna. Enye imbewu yawela phakathi kwameva, akhula ameva aza ayiminxa, yaza ayavelisa siqhamo. Kodwa enye yawela kumhlaba omhle, yakhula, yanda, yavelisa isiqhamo, yathwala ngokuphindwe kangangamashumi amathathu, namashumi amathandathu nekhulu.”

⁵ Kumaxesha okubhalwa kweBhayibhile xa kuhlwayelwa imbewu yayiphoswa ngesandla. Umhlwayeli wayefaka imbewu kumphetho wengubo yakhe okanye esityeni aze aman’ ukuyikha ayijule. Ngoko kulo mzekeliso, umhlwayeli akahlwayeli imbewu yakhe kwimihlaba eyahlukeneyo ngabom. Kunoko, le mbewu ijulwayo yayiwela kwiindawo ezahlukahlukeneyo.

 6. UYesu wawucacisa njani umzekeliso womhlwayeli?

⁶ Asishiywa ebumnyameni ngokuphathelele inkcazelo yalo mzekeliso. UYesu wawucacisa njengoko kubhalwe kuMarko 4:14-20: “Umhlwayeli uhlwayela ilizwi. Le, ngoko, ngabo basecaleni kwendlela apho ilizwi lihlwayelwa khona; kodwa kamsinya nje bakuba belivile uSathana uyafika aze alithabathe ilizwi elalihlwayelwe kubo. Yaye ngokunjalo le ngabo baye bahlwayelwa kwiindawo ezilulwalwa: kamsinya nje bakuba belivile ilizwi, balamkela ngovuyo. Kanti abanangcambu kubo ngokwabo, kodwa bayaqhubeka okwexeshana; bandule ke kamsinya nje kwakuvela imbandezelo okanye intshutshiso ngenxa yelizwi, bakhubeke. Ukanti kukho nenye ehlwayelwa phakathi kwameva; le ngabo baye baliva ilizwi, kodwa amaxhala ale nkqubo yezinto namandla akhohlisayo obutyebi neminqweno yezinye izinto iyangenela ize iliminxe ilizwi, yaye alibi nasiqhamo. Ekugqibeleni, leyo ihlwayelwe kumhlaba omhle ngabo baphulaphula ilizwi baze balamkele kakuhle yaye bathwale isiqhamo ngokuphindwe kangangamashumi amathathu namashumi amathandathu nekhulu.”

 7. Imela ntoni imbewu nemihlaba eyahlukahlukeneyo?

⁷ Phawula ukuba uYesu akathi kusetyenziswe iindidi ezahlukeneyo zembewu. Kodwa uthetha ngodidi olunye lwembewu oluwela kwimihlaba eyahlukahlukeneyo, yaye ngamnye uvelisa iziphumo ezahlukahlukeneyo. Umhlaba wokuqala uqinile, owesibini awukho nzulu, owesithathu uzele ngameva, kanti owesine mhle yaye utyebile. (Luka 8:8) Yintoni imbewu? Sisigidimi soBukumkani esifumaneka kwiLizwi likaThixo. (Mat. 13:19) Zimela ntoni ezi ndidi zahlukahlukeneyo zomhlaba? Ngabantu abasabela ngeendlela ezahlukahlukeneyo.—Funda uLuka 8:12, 15.

 8. (a) Umela bani umhlwayeli? (b) Kutheni abantu besabela ngeendlela ezahlukahlukeneyo kumsebenzi wethu wokushumayela ngoBukumkani?

⁸ Umhlwayeli umela bani? Umela abasebenzi abangamadlelane noThixo, abo bavakalisa iindaba ezilungileyo zoBukumkani. NjengoPawulos noApolo, bayatyala baze bankcenkceshele. Kodwa nangona besebenza nzima, abafumani ziphumo zifanayo. Ngoba? Ngenxa yeemeko ezahlukahlukeneyo zentliziyo kwabo beva esi sigidimi. Kulo mzekeliso, umhlwayeli akanakuzilawula iziphumo. Oku kuthuthuzela gqitha, ingakumbi kubazalwana noodadewethu abathembekileyo abaye bazibhokoxa kangangeminyaka, maxa wambi amashumi eminyaka, kodwa abafumana miphumo mihle kangako kumsebenzi wabo!a Kutheni kuthuthuzela nje?

 9. Yiyiphi inyaniso ethuthuzelayo eyagxininiswa ngumpostile uPawulos nanguYesu?

⁹ Asiyomiphumo yomsebenzi womhlwayeli egqibayo ngokuthembeka kwakhe. UPawulos wayebhekisela koko xa wathi: “Mntu ngamnye uya kwamkela owakhe umvuzo ngokokusebenza kwakhe.” (1 Kor. 3:8) Umntu ufumana umvuzo ngokokusebenza kwakhe, kungekhona ngemiphumo yomsebenzi wakhe. NoYesu wayibethelela le ngongoma kubafundi bakhe xa babevela kushumayela. Babevuya gqitha kuba bethotyelwe naziidemon ngenxa yokusebenzisa igama likaYesu. Besavuya benjalo, uYesu wathi kubo: “Musani ukuba nemihlali ngenxa yoku, kuba oomoya benithobela, kodwa yibani nemihlali ngenxa yokuba amagama enu ebhaliwe emazulwini.” (Luka 10:17-20) Kwanokuba umhlwayeli akaboni miphumo mihle kumsebenzi wakhe, oko akuthethi kuthi uyekelele umxakatho okanye akathembekanga kunabanye. Ngomkhamo omkhulu, imiphumo ixhomekeka kwimeko yentliziyo yalowo uphulaphuleyo. Kodwa ekugqibeleni nguThixo okhulisayo!

Imbopheleleko Abanayo Abo Beva Ilizwi

10. Yintoni egqibayo enoba umntu ova ilizwi uza kufana nomhlaba omhle okanye akunjalo?

¹⁰ Kuthekani ngabo beva ilizwi? Ngaba indlela abaza kusabela ngayo igqitywa kusengaphambili? Akunjalo. Into yokuba baza kufana nomhlaba omhle okanye akunjalo ixhomekeke kubo. Eneneni, ixhomekeke emntwini into yokutshintsha kwentliziyo yomntu ifane nomhlaba omhle okanye ombi. (Roma 6:17) Kumzekeliso wakhe, uYesu wathi, “kamsinya nje bakuba [abanye] belivile” ilizwi, uSathana uyafika aze alithabathe. Kodwa oku akunyanzelekanga ukuba kwenzeke. KuYakobi 4:7, amaKristu akhuthazwa ukuba ‘amchase uMtyholi,’ yaye uya kuwabaleka. UYesu uthi abanye balamkela ngovuyo ilizwi ekuqaleni kodwa bakhubeke ngenxa yokuba ‘bengenangcambu kubo ngokwabo.’ Kodwa abakhonzi bakaThixo babongozwa ukuba ‘bamiliselwe baze bendele kwisiseko’ ukuze bacacelwe ngokucokisekileyo engqondweni ‘koko bukuko ububanzi nobude nokuphakama nobunzulu, baze balwazi nothando lukaKristu olugqwesa ulwazi.’—Efe. 3:17-19; Kol. 2:6, 7.

11. Umntu unokukuphepha njani ukuvumela amaxhala nobutyebi ukuba buliminxe ilizwi?

¹¹ Abanye abeva ilizwi kuthiwa bavumela “amaxhala ale nkqubo yezinto namandla akhohlisayo obutyebi” ukuba angenelele aze aliminxe ilizwi. (1 Tim. 6:9, 10) Banokukuphepha njani oku? Umpostile uPawulos uphendula ngelithi: “Musani ukuba ngabathandi bemali, kunoko yanelani zizinto ezikhoyo. Kuba uthe: ‘Andiyi kuze ndikushiye, ndingayi kuze ndikutyeshele.’”—Heb. 13:5.

12. Kutheni abo bafanekiselwa ngumhlaba omhle bethwala isiqhamo ngomlinganiselo owahlukahlukeneyo?

¹² Ekugqibeleni, uYesu uthi leyo ihlwayelwe kumhlaba omhle ‘ithwala isiqhamo ngokuphindwe kangangamashumi amathathu namashumi amathandathu nekhulu.’ Nakuba abanye abasabelayo kwilizwi besiba neentliziyo ezilungileyo baze bathwale isiqhamo, oko bakwenzayo ekuvakaliseni iindaba ezilungileyo kuyahlukahlukana ngokweemeko zabo. Ngokomzekelo, ukukhula ngeminyaka okanye impilo enkenenkene kunokubasikela umda abanye koko banokukwenza kumsebenzi wokushumayela. (Thelekisa uMarko 12:43, 44.) Nalapha, kusenokuba kuncinane okunokwenziwa ngumhlwayeli okanye angakwazi kuyilawula kwaphela imiphumo yoku, kodwa into enokumvuyisa kukubona uYehova ekhulisa.—Funda INdumiso 126:5, 6.

Umhlwayeli Olalayo

13, 14. (a) Yithi gqaba gqaba ngomzekeliso womntu ohlwayela imbewu. (b) Ngubani ofanekiselwa ngumhlwayeli, ibe yona imbewu ifanekisela ntoni?

¹³ KuMarko 4:26-29 sifumana omnye umzekeliso womhlwayeli othi: “Ubukumkani bukaThixo bunjengaxa umntu ephosa imbewu emhlabeni, aze alale ebusuku avuke emini, ihlume imbewu ize ikhule ibe nde, engayazi indlela okwenzeka ngayo. Kuba umhlaba uvelisa isiqhamo ngokwawo, kuqala iba likhaba, kwandule ke kube yimpontshane, ekugqibeleni kuzale ukudla okuziinkozo kwisikhwebu. Kodwa kamsinya nje sakuba isiqhamo sikuvumela oko, ufaka irhengqa, ngenxa yokuba ixesha lokuvuna lifikile.”

¹⁴ Ngubani umhlwayeli apha? Ezinye iinkonzo zeNgqobhoko zikholelwa ukuba oku kubhekisela kuYesu ngokwakhe. Kodwa kunokutshiwo njani ukuba uYesu uyalala ibe akayazi ukuba ikhula njani na imbewu leyo? Nakanjani na uYesu uyazi kakuhle indlela ekhula ngayo imbewu! Njengalowo sithethe ngaye ngaphambili, nalo umhlwayeli ufanekisela abavakalisi abathile boBukumkani, abo bahlwayela imbewu yoBukumkani ngokushumayela kwabo ngenzondelelo. Imbewu ephoswa emhlabeni lilizwi abalishumayelayo.b

15, 16. Yiyiphi eyona nyaniso ngokukhula kokoqobo nokokomoya okuchazwa nguYesu kumzekeliso womhlwayeli?

¹⁵ UYesu uthi umhlwayeli ‘uyalala ebusuku avuke emini.’ Oku akuthethi kuthi uyayityeshela imbewu yakhe. Kubonisa nje oko kwenzekayo ebomini kubantu abaninzi. Isigama esisetyenziswe apho kule ndinyana sibonisa oko kwenzeka umhla nezolo ebantwini, ukusebenza kwabo emini baze balale ebusuku. UYesu wachaza oko kwenzekayo emva kwexesha lokuhlwayela. Uthi, ‘imbewu iyahluma ize ikhule ibe nde.’ Emva koko wongezelela athi: “Engayazi indlela okwenzeka ngayo.” Eyona ngongoma yakhe apha sisibakala sokuba oku, ‘kuyazenzekela.’c

¹⁶ Yiyiphi eyona ngongoma kaYesu kulo mzekeliso? Phawula ukuba eyona nto igxininiswayo apha kukukhula nendlela okwenzeka ngokuthe ngcembe ngayo oku kukhula. “Kuba umhlaba uvelisa isiqhamo ngokwawo [ngokuthe ngcembe], kuqala iba likhaba, kwandule ke kube yimpontshane, ekugqibeleni kuzale ukudla okuziinkozo kwisikhwebu.” (Marko 4:28) Oku kukhula kwenzeka ngokuthe ngcembe nangokwamanqanaba. Akunakunyanzelwa mntu okanye kukhawuleziswe. Kunjalo ke nangokukhula kokomoya. Ukukhula kwenzeka ngokwamanqanaba njengoko uYehova evumela ukuba inyaniso ikhule entliziyweni yomntu ofanelekayo.—IZe. 13:48; Heb. 6:1.

17. Ngoobani ababa nemihlali xa imbewu ithwala isiqhamo?

¹⁷ Yiyiphi indlela aba nenxaxheba ngayo umhlwayeli “kamsinya nje sakuba isiqhamo sikuvumela oko”? Xa uYehova evumela inyaniso yoBukumkani ikhule ezintliziyweni zabafundi abatsha, ekugqibeleni bafikelela kwinqanaba lokuba benze inkqubela ngenxa yokuthanda kwabo uThixo baze bahlulele ubomi babo kuye. Bafuzisela ukuzahlulela kwabo ngokubhaptizwa emanzini. Abazalwana abaqhubeka besenza inkqubela bekhula ekugqibeleni baye bakwazi ukuthwala iimbopheleleko ebandleni. Isiqhamo soBukumkani siyavunwa ngumhlwayeli wokuqala nangabanye abavakalisi boBukumkani abasenokuba abakhange babandakanyeke ngokobuqu ekuhlwayeleni imbewu eye yavelisa loo mfundi. (Funda uYohane 4:36-38.) Enyanisweni, ‘umhlwayeli nomvuni baba nemihlali kunye.’

Oko Sikufundayo Namhlanje

18, 19. (a) Ukuhlolisisa le mizekeliso kaYesu kuye kwakukhuthaza njani wena? (b) Yintoni eza kuhlolisiswa kwinqaku elilandelayo?

¹⁸ Yintoni esiye sayifunda koku kuhlolisisa kwethu le mizekeliso mibini ikuMarko isahluko 4? Sibona kakuhle ukuba sinomsebenzi esimele siwenze—ukuhlwayela. Asimele sisithele ngesebe lenkawu okanye siphephele ngeengxaki ezisenokuvela zisithintele ekwenzeni lo msebenzi. (INtshu. 11:4) Noko ke, kwangaxeshanye siliqonda kakuhle ilungelo elimangalisayo esinalo lokubalelwa ekubeni ngabasebenzi abangamadlelane noThixo. UYehova nguye okhulisa abantu babe ngabafundi, asikelele imigudu yethu neyabo basamkelayo isigidimi. Siyiqonda kakuhle into yokuba asinakukwazi ukunyanzela nabani na akhule abe ngumfundi. Akukho mfuneko yokuba sidimazeke okanye sityhafe xa abantu bethabatha ixesha ngaphambi kokuba babe ngabafundi okanye bengade babe ngabo. Kuthuthuzela ngokwenene ukwazi ukuba impumelelo yethu ixhomekeke ekuthembekeni kwethu kuYehova nakwilungelo asinike lona lokushumayela ‘iindaba ezilungileyo zobukumkani kube bubungqina kuzo zonke iintlanga.’—Mat. 24:14.

¹⁹ Yintoni enye eyafundiswa nguYesu ngokuphathelele ukukhula kwabafundi abatsha nomsebenzi woBukumkani? Impendulo yalo mbuzo ifumaneka kwimizekeliso ekwezinye iingxelo zeVangeli. Siza kuhlolisisa eminye yale mizekeliso kwinqaku elilandelayo.

Akuyazi Indawo Oya Kuphumelela Kuyo!

“Kusasa hlwayela imbewu yakho, yaye ungasiphumzi isandla sakho de kube ngokuhlwa; kuba akuyazi indawo oya kuphumelela kuyo.”—INTSHU. 11:6.

 1. Kutheni ukubona inkqubo yokukhula kumangalisa yaye kusenza sizive sithobekile?

UMLIMI kufuneka abe nomonde. (Yak. 5:7) Emva kokuhlwayela imbewu, kuye kufuneke ayilinde intshule ize ikhule. Ngokuthe ngcembe xa iimeko zintle, iyantshula emhlabeni. Emva koko iyakhula ibe zizityalo eziba neentloko zokutya. Ekugqibeleni, amasimi omlimi aye alungele ukuvunwa. Kumangalisa ngokwenene ukubona ummangaliso wokukhula! Siziva sithobekile xa sicinga ngowona Mthombo woku kukhula. Ewe, thina singayifaka izichumiso imbewu, size sinkcenkceshele. Kodwa nguThixo kuphela onokuyikhulisa.—Thelekisa eyoku-1 kwabaseKorinte 3:6.

 2. Ziziphi iingongoma awafundisa ngazo uYesu ngokuphathelele ukukhula ngokomoya kwimizekeliso exutyushwe kwinqaku elandulelayo?

² Njengoko kuchaziwe kwinqaku elandulela eli, uYesu wafanisa umsebenzi wokushumayela ngoBukumkani nokuhlwayelwa kwembewu ngumlimi. Kumzekeliso weendidi ezahlukeneyo zemihlaba, uYesu wayigxininisa ingongoma yokuba, nangona umlimi ehlwayela imbewu entle, bubunjani bentliziyo yomntu lowo obuya kugqiba enoba imbewu iya kukhula okanye akunjalo. (Marko 4:3-9) Kumzekeliso womhlwayeli olalayo, uYesu wabalaselisa ingongoma yokuba umlimi akayazi indlela okwenzeka ngayo oku kukhula. Oku kungenxa yokuba ukukhula kubangelwa ngamandla kaThixo, kungekhona imigudu yabantu. (Marko 4:26-29) Ngoku makhe sihlolisise eminye imizekeliso emithathu kaYesu—owokhozo lwemostade, owegwele nowomnatha orhuqwayo.a

Umzekeliso Wokhozo Lwemostade

3, 4. Umzekeliso wokhozo lwemostade ubalaselisa ziphi iingongoma ngokuphathelele isigidimi soBukumkani?

³ Umzekeliso wokhozo lwemostade, nawo ochazwe kuMarko isahluko 4, ubethelela izinto ezimbini: okokuqala, ukukhula okumangalisayo kwesigidimi soBukumkani; okwesibini, ukukhuselwa kwabo basamkelayo esi sigidimi. UYesu wathi: “Singabufanisa nantoni na ubukumkani bukaThixo, okanye siya kubuchaza ngomzekeliso othini? Bunjengokhozo lwemostade, olulolona luncinane kunazo zonke iimbewu ezikhoyo emhlabeni ngexesha lokuhlwayelwa kwalo emhlabeni—kodwa xa sele luhlwayelwe, luyakhula luze lube lukhulu ngakumbi kunayo yonke eminye imifuno yaye luvelisa amasebe amakhulu, kangangokuba iintaka zezulu ziyakwazi ukufumana indawo yokuhlala phantsi komthunzi walo.”—Marko 4:30-32.

⁴ Apha sichazelwa ‘ngokukhula koBukumkani bukaThixo’ njengoko buboniswa kukusasazeka kwesigidimi soBukumkani nokukhula kwebandla lamaKristu ukususela ngePentekoste yowama-33 C.E. ukusa phambili. Ukhozo lwemostade luyimbewu encinane enokumela into encinane gqitha. (Thelekisa uLuka 17:6.) Noko ke, umthi wemostade unokukhula ufikelele kubude obuziimitha ezintathu ukusa kwezintlanu yaye unamasebe awomeleleyo.—Mat. 13:31, 32.

 5. Lakhula kangakanani ibandla lamaKristu ngenkulungwane yokuqala?

⁵ Ukukhula kwebandla lamaKristu kwaqala kancinane ngowama-33 C.E. xa abafundi abamalunga ne-120 bathanjiswa ngomoya oyingcwele. Ngethutyana nje elingephi, eli bandla lincinane labafundi laba namawaka amakholwa (Funda IZenzo 2:41; 4:4; 5:28; 6:7; 12:24; 19:20.) Kwiminyaka nje engamashumi amathathu, inani labavuni lalisele lande kangangokuba umpostile uPawulos waxelela ibandla laseKolose ukuba iindaba ezilungileyo sele ‘zishunyayelwe kwindalo yonke ephantsi kwezulu.’ (Kol. 1:23) Yaba lulwando olumangalisa gqitha olo!

6, 7. (a) Kukuphi ukukhula okuye kwenzeka ukususela ngowe-1914? (b) Kukuphi okunye ukukhula okungakumbi okuya kwenzeka?

⁶ Ukususela ekusekweni koBukumkani bukaThixo ezulwini ngowe-1914, amasebe ‘omthi’ wemostade aye anda ngendlela eyayingalindelwanga. Abantu bakaThixo baye bakubona ngokoqobo ukuzaliseka kwesi siprofeto sikaIsaya: “Omncinane uya kuba liwaka, nophantsi abe luhlanga olunamandla.” (Isa. 60:22) Iqela elincinane labathanjiswa elalishumayela ngoBukumkani ebutsheni benkulungwane yama-20 lalingenalo nofifi lokuba ngowama-2008, kuya kube kukho amaNgqina kaYehova amalunga nezigidi ezisixhenxe esenza lo msebenzi kumazwe angaphezu kwama-230. Kukukhula okumangalisa ngokwenene oku, kufana noko kokhozo lwemostade kumzekeliso kaYesu.

⁷ Ngaba oku kukhula kuphelela apho. Akunjalo. Abalawulwa boBukumkani bukaThixo baya kuzalisa umhlaba wonke ekugqibeleni. Bonke abachasi baya kube betshayelwe. Oku akuyi kwenzeka ngemigudu yabantu kodwa kuya kwenzeka ngokungenelela kweNkosi enguMongami uYehova kwimicimbi yomhlaba. (Funda uDaniyeli 2:34, 35.) Siya kwandula ke sibone ukuzaliseka ngokupheleleyo kwesinye isiprofeto esibhalwe nguIsaya esithi: “Umhlaba ngokuqinisekileyo uya kuzaliswa kukwazi uYehova njengamanzi egubungele ulwandle.”—Isa. 11:9.

 8. (a) Ngoobani abamelwa ziintaka ezikumzekeliso kaYesu? (b) Yintoni esikhuselwa kuyo nangoku?

⁸ UYesu uthi iintaka zezulu ziyakwazi ukufumana indawo yokuhlala ngaphantsi komthunzi wobu Bukumkani. Ezi ntaka azimeli iintshaba zoBukumkani ezizama ukutya imbewu entle, njengokuba kunjalo ngeentaka ezikumzekeliso wendoda eyahlwayela imbewu kwiindidi ezahlukeneyo zomhlaba. (Marko 4:4) Kunoko, kulo umzekeliso iintaka zimela abantu abaneentliziyo ezintle abafuna ukhuseleko kwibandla lamaKristu. Nangoku, aba bayakhuselwa kwimikhwa engcolisayo ngokomoya yeli hlabathi lingendawo. (Thelekisa uIsaya 32:1, 2.) Ngokufanayo, uYehova wafanisa uBukumkani obulawulwa nguMesiya nomthi waza eprofeta wathi: “Ndiya kulifudusela entabeni yendawo ephakamileyo yakwaSirayeli, yaye ngokuqinisekileyo liya kuba namasebe lize livelise isiqhamo libe ngumsedare omkhulu. Yaye phantsi kwawo okunene kuya kuhlala zonke iintlobo zeentaka; ziya kuhlala emthunzini wamahlamvu awo.”—Hez. 17:23.

Umzekeliso Wegwele

9, 10. (a) Yiyiphi ingongoma eyabethelelwa nguYesu kumzekeliso wegwele? (b) EBhayibhileni, igwele lidla ngokumela ntoni, yaye nguwuphi umbuzo esiza kuwuxubusha ophathelele ukubhekisela kukaYesu kwigwele?

⁹ Ukukhula akusoloko kubonakala emehlweni abantu. Kumzekeliso wakhe olandelayo, uYesu ubethelela le ngongoma. Uthi: “Ubukumkani bamazulu bunjengegwele, awalithabathayo umfazi waza walifihla kwimilinganiselo emithathu emikhulu yomgubo, de intlama iphela yabiliswa.” (Mat. 13:33) Limela ntoni eli gwele yaye lidibana njani nokukhula koBukumkani?

¹⁰ EBhayibhileni, igwele lidla ngokumela isono. Umpostile uPawulos wathetha ngolo hlobo ngegwele xa wayethetha ngempembelelo eyonakalisayo yomoni owayekwibandla lamandulo laseKorinte. (1 Kor. 5:6-8) Ngaba apha uYesu wathetha ngegwele elimela ukukhula kwento engathandekiyo?

11. Igwele lalisetyenziswa njani kuSirayeli wamandulo?

¹¹ Ngaphambi kokuphendula loo mbuzo kufuneka siphawule izibakala ezithathu ezisisiseko. Esokuqala, nangona uYehova wayekwalela ukusetyenziswa kwegwele ngexesha lomthendeleko wePasika, maxa wambi wayeyamkela imibingelelo enegwele. Igwele lalisetyenziswa kwiminikelo yombulelo nobudlelane, eyayiyeyokuzithandela kubulelwa intabalala yeentsikelelo zikaYehova. Esi sidlo sasibangela uvuyo kwabo bakhoyo kuso.—Lev. 7:11-15.

12. Yintoni esinokuyifunda kwindlela iBhayibhile efuzisela ngayo izinto ezithile?

¹² Esesibini, nangona eZibhalweni into isenokufuzisela into engathandekiyo maxa wambi, kwaloo nto inye inokumela into eyamkelekileyo ngesinye isihlandlo. Ngokomzekelo, kweyoku-1 kaPetros 5:8, uSathana ufaniswa nengonyama ngenxa yobungozi nenkohlakalo yakhe. Kodwa kwiSityhilelo 5:5, uYesu ufaniswa nengonyama—“iNgonyama yesizwe sikaYuda.” Kwimeko kaYesu, ingonyama ifanekisela inkalipho nokusesikweni.

13. Umzekeliso kaYesu wegwele ubonisa ntoni ngokukhula kokomoya?

¹³ Esesithathu, kumzekeliso wakhe, uYesu akazange athi eli gwele layonakalisa le ntlama, into eyayiza kwenza ingabi nakusetyenziswa. Wathetha nje ngendlela eqhelekileyo yokwenziwa kwesonka. Umfazi wafaka ngabom igwele yaye imiphumo yaba mihle. Eli gwele walifihla emgubeni. Ngaloo ndlela inkqubo yokusebenza kwegwele yafihlwa kulo mfazi. Oku kusikhumbuza ngendoda ehlwayela imbewu ize ilale ebusuku. UYesu wathi ‘iyahluma imbewu ize ikhule ibe nde, [le ndoda] ingayazi indlela okwenzeka ngayo.” (Marko 4:27) Le yindlela elula yokuzekelisa ukukhula okungabonakaliyo komntu ngokomoya! Ekuqaleni sisenokungakuboni oku kukhula, kodwa ekugqibeleni siyayibona imiphumo.

14. Yiyiphi inkalo yomsebenzi wokushumayela efanekiselwa sisibakala sokuba igwele libilisa intlama iphela?

¹⁴ Oku kukhula ngokomoya akwaneli nje ngokufihlakala emehlweni abantu kodwa kutyhutyha ihlabathi liphela. Le yenye inkalo ebethelelwa kulo mzekeliso wegwele. Eli gwele libilisa intlama iphela, yonke “imilinganiselo emikhulu emithathu yomgubo.” (Luka 13:21) Kanye njengegwele, umsebenzi wokushumayela ngoBukumkani ongunozala wolu lwando uye wanda ukusa kwinqanaba lokuba ngoku bube uBukumkani bushunyayelwa “nakwezona nxalenye zikude zomhlaba.” (IZe. 1:8; Mat. 24:14) Lilungelo elimangalisa ngokwenene ukuba negalelo kolu lwando lumangalisayo lomsebenzi woBukumkani.

Umnatha

15, 16. (a) Khawuthi gqaba gqaba ngomzekeliso womnatha. (b) Umnatha umela ntoni yaye lo mzekeliso ubhekisela kweyiphi inkalo yokhula koBukumkani?

¹⁵ Eyona nto ibalulekileyo kunenani labo bathi bangabafundi bakaYesu Kristu kukufaneleka kwabo bafundi. UYesu ubhekisela kule nkalo yokukhula koBukumkani ngokwenza omnye umzekeliso, lowo womnatha. Wathi: “Kwakhona ubukumkani bamazulu bunjengomnatha orhuqwayo othotywa elwandle uze uhlanganise lonke uhlobo lweentlanzi.”—Mat. 13:47.

¹⁶ Umnatha, omela umsebenzi wokushumayela ngoBukumkani, uhlanganisa zonke iindidi zeentlanzi. UYesu uhlabela mgama athi: “Wakuzala bawurholela elunxwemeni baza, bahlala phantsi, baqokelelela ezintle ezityeni, kodwa ezingafanelekanga bazilahla. Kuya kuba njalo ekuphelisweni kwenkqubo yezinto: ziya kuphuma iingelosi zize zahlule abangendawo kwabangamalungisa zibaphose ezikweni lomlilo. Apho kuya kubakho ukulila nokutshixiza kwamazinyo abo.”—Mat. 13:48-50.

17. Ukwahlula ekuthethwa ngako kumzekeliso womnatha ubhekisela kweliphi ixesha?

¹⁷ Ngaba oku kwahlula kubhekisela kumgwebo wokugqibela wezimvu neebhokhwe awathi uYesu uya kubakho xa efika esebuqaqawulini bakhe? (Mat. 25:31-33) Akunjalo. Lowo umgwebo nowokugqibela uya kwenzeka xa uYesu efika ebudeni bembandezelo enkulu. Ngokwahlukileyo, ukwahlula ekuthethwa ngako kumzekeliso womnatha kwenzeka “ekuphelisweni kwenkqubo yezinto.”b Elo xesha, leli kanye siphila kulo—imihla ekhokelela kwimbandezelo enkulu. Wenziwa njani ke ngoku umsebenzi wokwahlula?

18, 19. (a) Umsebenzi wokwahlula wenziwa njani ngoku? (b) Abantu abanyanisekileyo bamele bathabathe liphi inyathelo? (Funda umbhalo osemazantsi.)

¹⁸ Izigidi ngezigidi zeentlanzi zokomfuziselo ezikulwandle loluntu ziye zatsaleleka kwibandla likaYehova namhlanje. Ezinye ziyeza eSikhumbuzweni, ezinye ziza kwiintlanganiso zethu yaye ezinye ziyavuma ukufundisisa iBhayibhile. Kodwa ngaba zonke ezi ntlanzi ziba ngamaKristu okwenene? ‘Zisenokurholelwa elunxwemeni,’ kodwa uYesu usixelela ukuba ‘zezintle’ kuphela eziqokelelelwa ezityeni, zitya ezo ezimela amabandla amaKristu. Ezingafanelekanga ziyalahlwa, ekugqibeleni zifakwa kwiziko lomlilo lokomfuziselo elithetha intshabalalo ezayo.

¹⁹ Kanye njengeentlanzi ezingafanelekanga, abaninzi ababekhe bafundisisa iBhayibhile nabantu bakaYehova baye bayeka. Abanye abanabazali abangamaKristu abakhange bafune ukulandela emanyathelweni kaYesu. Abafuni kwenza isigqibo sokukhonza uYehova okanye emva kokumkhonza kangangethuba baye bayeka.c (Hez. 33:32, 33) Noko ke, kubalulekile ukuba bonke abantu abanyanisekileyo bavume ukuhlanganiselwa kumabandla afana nezitya ngaphambi komhla womgwebo wokugqibela baze bakhuseleke.

20, 21. (a) Sifunde ntoni emva kokuhlolisisa imizekeliso kaYesu ephathelele ukukhula? (b) Yintoni wena ozimisele ukuyenza?

²⁰ Ngoko, sifunde ntoni ekuhlolisiseni kwethu ngokufutshane imizekeliso kaYesu ephathelele ukukhula? Okokuqala, kanye njengokukhula kokhozo lwemostade, kuye kwakho ukwanda okumangalisayo kwezilangazelelo zoBukumkani apha emhlabeni. Ayikho into enokuthintela ukukhula komsebenzi kaYehova! (Isa. 54:17) Ukongezelela, bayakhuselwa ngokomoya abo bafuna “indawo yokuhlala phantsi komthunzi [walo mthi].” Okwesibini, nguThixo okhulisayo. Kanye njengokuba igwele elifihliweyo lisasazeka kuyo yonke intlama, oku kukhula akusoloko kubonakala kwangoko okanye kuqondakala kodwa kuyenzeka! Okwesithathu, kwabo basabela kakuhle asingabo bonke abaye bazingqina befanelekile. Abanye baye bafana neentlanzi ezingafanelekanga ezikumzekeliso kaYesu.

²¹ Noko ke, kukhuthaza gqitha ukubona abaninzi abafanelekayo betsalwa nguYehova. (Yoh. 6:44) Oku kuye kwabangela ulwando olungathethekiyo kumazwe ahlukahlukeneyo. Kumele kuzukiswe uYehova uThixo ngalo lonke olu lwando. Ukubona oku kumele kukhuthaze ngamnye kuthi ukuba athobele esi sibongozo sabhalwa kwiinkulungwane ezadlulayo: “Kusasa hlwayela imbewu yakho . . . , kuba akuyazi indawo oya kuphumelela kuyo, enoba kulapha okanye phaya, okanye enoba ziya kulunga zombini ngokufanayo.”—INtshu. 11:6.