Genesesi

41 Pali papitile yaka yiŵili yamtundu, Falawo ŵasagamile. Musagamisimo jwalakwe ŵaliweni ali ajimi mungulugulu lusulo lwa Nailo. 2 Ali ajimi myoyo, jwalakwe ŵasiweni ng’ombe syakwana 7 syakuwoneka chenene soni syakwimbala sili mkukopoka m’lusulo mula. Ng’ombesyo syaliji mkulya manyasi ga mungulugulu lusulo lwa Nailo lula. 3 Kaneko jwalakwe ŵasiwenisoni ng’ombe sine syakwana 7 syakunyalaya soni syaganda sili mkukopoka mu lusulo lwa Nailo panyuma pa ng’ombe syandanda sila. Ng’ombe syelesi syajimi pambali pa ng’ombe syakwimbala sila mungulugulu lusulo lwa Nailo lula. 4 Pelepo ng’ombe syakunyalaya soni syaganda sila syatandite kulya ng’ombe 7 syakuwoneka chenene soni syakwimbala sila. Pandaŵi jeleji, Falawo ŵajimwiche ku lugono.

5 Kaneko Falawo ŵagonilesoni, ni ŵasagamilesoni sagamisi sine. Mu sagamisimo jwalakwe ŵagaweni masache ga tiligu gakwana 7 gali mkutumbuka pa mpesi umo. Masachego galiji gambone soni gakwimbala. 6 Panyuma pakwe jwalakwe ŵagawenisoni masache gane ga tiligu gakwana 7 gali mkutumbuka panyuma pa gandanda gala. Masachega galiji gaganda soni geŵawucheŵawuche ni mbepo jakutyochela kungopokolyuŵa. 7 Kaneko jwalakwe ŵagaweni masache ga tiligu gaganda gala gali mkumila masache ga tiligu 7 gambone soni gakwimbala gala. Pandaŵi jeleji, Falawo ŵajimwiche ku lugono lwakwe, ni ŵayiweni kuti syaliji sagamisi.

8 Sambano pakwachele, Falawo jwalagasiche mnope mumtima. Myoyo jwalakwe ŵaŵilasile ŵakutaga mbopesi wosope ŵakutenda yamasenga ŵa ku Iguputo soni achalume ŵalunda wosope. Falawo ŵasalile jemanjajo sagamisi syakwesyo. Nambo pangali mundu atamose jumo juŵakombwele kugopolela sagamisi sya Falawosyo.

9 Pelepo jwamkulungwa jwakupelechela mgawo ŵamsalile Falawo kuti, “Une lelo ngusaka sale yakulemwa yangu. 10 Wawo Falawo ŵatumbilile mnope ŵakutumichila ŵawo. Myoyo wawojo ŵambisile une mundende ku nyumba ja jwamkulungwa jwa asilikali ŵakulondela, ŵambisile une pampepe ni jwamkulungwa jwakuteleka mkate. 11 Tuli mundendemo, une ni mjangujo twasagamile chilo chimpepe. Nambo yanasagamile une yakwete ngopolelo jakulekangana ni yaŵasagamile mjangujo. 12 Kundendeko twaliji ni mnyamata jwine jwa Chihebeli juŵalijisoni jwamasengo jwa jwamkulungwa jwa asilikali ŵakulondela. Patwamlondechesye ya sagamisisyo, jwalakwe ŵasasile kugopolela kwa sagamisi sya jwalijose. 13 Yaŵagopolele jwalakwejo, yatendekwe mmomo. Une ŵambuchisye pamasengo gangu, nambo mjangujo ŵamwuleje ni kumkoleka pachitela.”

14 Myoyo Falawo ŵatumile ŵandu kuti akamjigale Yosefe, mwamti ŵanduwo ŵamkopwesye jwalakwe mu ndende mula mwachitemachitema. Yosefe ŵasenjile wumbo syakwe ni kuchenga yakuwala yakwe. Kaneko ŵapite kuja kuwonechela kwa Falawo. 15 Pelepo Falawo ŵamsalile Yosefe kuti, “Une sagamile, nambo pangali jwakukombola kusalila kugopolela kwakwe. Nambo mbikene kuti mmwejo mkusapikana sagamisi ni kukombola kusigopolela.” 16 Pelepo Yosefe ŵamjanjile Falawo kuti, “Une pangali yampaka ndende. Nambo Mlungu ni juchaŵechete yakwamba wawojo Falawo.”

17 Falawo ŵamsalile Yosefe kuti, “Une sagamile. Mu sagamisimo une naliweni ndili njimi mungulugulu Lusulo lwa Nailo. 18 Ndili njimi myoyo, nasiweni ng’ombe syakwana 7 syakuwoneka chenene soni syakwimbala sili mkukopoka mu lusulo mula. Ng’ombesyo syaliji mkulya manyasi ga mungulugulu lusulo lwa Nailo lula. 19 Kaneko nasiwenisoni ng’ombe sine syakwana 7 sili mkukopoka mu lusulomo panyuma pa ng’ombe syandanda sila. Ng’ombesyo syaliji syangali machili, syakunyalaya mnope soni syaganda. Une chipagwile changu nganinasiwoneje ng’ombe syakunyalaya mpela syelesyo mu chilambo chosope cha Iguputo. 20 Kaneko ng’ombe syakunyalaya soni syaganda sila syatandite kulya ng’ombe 7 syakwimbala sila. 21 Nambo ng’ombe syagandasyo pasyalile sijakwesyo, nganisimanyikaga kuti silile chilichose, ligongo syawonekagape kuŵa syakunyalaya mpela musyaŵelele pandanda. Payatendekwe yeleyi une najimwiche.

22 “Panyuma pakwe nagaweni masache ga tiligu gakwana 7 pampesi umo. Masachego galiji gambone soni gakwimbala. 23 Kaneko nagawenisoni masache genyale ga tiligu gakwana 7 gali mkutumbuka panyuma pa gandanda gala. Masachega galiji gaganda soni geŵawucheŵawuche ni mbepo jakutyochela kungopokolyuŵa. 24 Kaneko masache ga tiligu gaganda gala gatandite kumila masache 7 ga tiligu gakwimbala gala. Panyuma pakwe nasalile yeleyi ŵambopesi wosope ŵakutenda yamasenga. Nambo pangali mundu atamose jumo jwakombwele kugopolela sagamisi syangusyo.”

25 Pelepo Yosefe ŵamsalile Falawo kuti, “Sagamisi syosope sya Falawo sili syakulandana, soni ngopolelo jakwe jili jimo. Mlungu jwakuwona amsalile Falawo yindu yele Mlungu msyenejo akusaka kuyitenda. 26 Ng’ombe syambone 7 siŵasiwenisyo sikwimila yaka 7. Nambosoni masache ga tiligu gambone gakwana 7 gaŵagawenigo gakwimilasoni yaka 7. Sagamisisi sili syakulandana soni ngopolelo jakwe jili jimo. 27 Ng’ombe 7 syaganda soni syakunyalaya syasyakopweche panyuma pa ng’ombe syandanda sila, sikwimila yaka 7. Nambosoni masache ga tiligu 7 gangali chilichose soni geŵawucheŵawuche ni mbepo ja kungopokolyuŵa, gakwimila yaka 7 ya sala. 28 Yeleyi yichitendekwa nditu mpela mwanasalilile wawojo Falawo kuti, Mlungu jwakuwona amsalile Falawo yindu yele Mlungu msyenejo akusaka kuyitenda.

29 “Chikuŵe yaka 7 yele chilambo chosope cha Iguputo chichikole yakulya yejinji. 30 Nambo panyuma pa yaka yeleyi, pachiŵasoni yaka yine 7 ya sala. Mu yaka yeleyi yakuti chilambo cha Iguputo chakwete yakulya yejinji yichiliŵalichika, mwamti salajo jichijonanga chilambo chosopecho. 31 Ŵandu ngasakumbuchila ata panandi yakuti m’chilambomo mwapali yakulya yakwanila ligongo lyakuti sala jajichiyikajo jichiŵa jakogoya mnope. 32 Wawo Falawo ŵasiweni sagamisisi kaŵili ligongo lyakuti Mlungu jwakuwona asimichisye kuti ayitende yeleyi, mwamti Mlungu jwakuwonajo chayitende yeleyi pangakaŵapa.

33 “Sambano wawo Falawo amsose mundu jwali jwakulupichika soni jwalunda, soni amŵiche mundujo paudindo wakuti aloleleje chilambo chosope cha Iguputo. 34 Sambano wawo Falawo akusosekwa asagule nduna m’chilambochi kuti silokoteleje mbali jimo pa mbali msano silisyose sya yagowola ya m’chilambo cha Iguputo. Ndunasyo sitendeje yeleyi mu yaka yosope 7 yele chikuŵeje yakulya yejinji. 35 Asisalile ndunasyo kuti silokoteleje yakulya yosope mu yaka yosope yambone yayikwisayo. Soni wawo Falawo ŵalamule jemanjaji kuti alokotele ni kusonganganya tiligu jwejinji. Kaneko amsunje mwakusamala tiligujo m’misinda ja chilambochi ni kumlolelaga. 36 Yakulya yeleyo yichikamuchisya kuti ŵandu ŵa m’chilambochi alyeje kwa yaka yakwana 7 ya sala jele jichitendekwa m’chilambo chosope cha Iguputo, soni yichikamuchisya kuti ŵandu wosope m’chilambochi kupwatikapo yilango yikamala ligongo lya sala.”

37 Falawo pampepe ni ŵamasengo ŵakwe wosope, ŵayiweni kuti nganisyo syelesi syaliji syambone. 38 Myoyo Falawo ŵawusisye ŵamasengo ŵakwewo kuti, “Ana mpaka pasimanikwesoni mundu jwine mpela jweleju jwele msimu wa Mlungu ukumlongolela?” 39 Kaneko Falawo ŵamsalile Yosefe kuti, “Pakuŵa Mlungu ni jwamtendekasisye mmwejo kuti mmanyilile yosopeyi, pangalisoni mundu jwalijose jwali jwakulupichika soni jwalunda mpela mmwejo. 40 Mmwejo chimŵe ŵakulolela nyumba jangu, soni ŵandu wosope champikanileje mmwejo ni mtima wosope. Une chimbe jwamkulungwa kumpunda mmwejo pa umwenyepe basi.”* 41 Falawo ŵapitilisyesoni kumsalila Yosefe kuti, “Mpikane, ngumŵika mmwejo kuti mloleleje chilambo chosope cha Iguputo.” 42 Pelepo Falawo ŵawusile mbete jaumwenye mmyala mwakwe ni kum’wecha Yosefe, soni ŵam’wechiche yakuwala yapenani mnope nambosoni ŵam’wechiche mkufu wagolide m’lukosi mwakwe. 43 Konjechesya pelepo, ŵamkwesisye jwalakwe pa ligaleta* lyaŵili lyauchimbichimbi lyaŵakwete Falawo. Mwamti ŵandu ŵagumilaga pasogolo pakwe ali mkuti, “A·vrékh!”* Mwelemu ni muŵamŵichile jwalakwe kuŵa jwakulolela chilambo chosope cha Iguputo.

44 Kaneko Falawo ŵamsalilesoni Yosefe kuti, “Une ndili Falawo, nambo pangali mundu jwampaka atende chilichose m’chilambo chosope cha Iguputo naga mmwejo nganimumkunda.” 45 Panyuma pakwe Falawo ŵampele Yosefe lina lyakuti Safenati-paneya. Nambosoni ŵampele jwamkongwe lina lyakwe Asenati kuti aŵe ŵamkwakwe. Jwamkongweju ŵaliji mwanache jwa Potifela juŵaliji jwakutaga mbopesi jwa mumsinda wa Oni.* Kaneko Yosefe ŵatandite kulolela chilambo cha Iguputo. 46 Yosefe ŵaliji ni yaka 30 paŵatandaga kumtumichila Falawo, mwenye jwa Iguputo.

Kaneko Yosefe ŵatyosile pameso pa Falawo ni kutanda kuchijendela chilambo chosope cha Iguputo. 47 Kwa yaka 7 yosope yele kwapali yakulya yejinji, chilambocho chapitilisye kukoposya yakulya yejinji mnope. 48 Kwa yaka 7 yosopeyi, Yosefe ŵapitilisye kulokotela yakulya kutyochela m’chilambo cha Iguputocho, mwamti jwalakwe ŵayisungaga yakulyayo m’misinda. Mumsinda uliwose jwalakwe ŵasungaga yakulya yagowele m’migunda jakusyungulila msinda welewo. 49 Yosefe ŵapitilisye kusunga yakulya yejinji, mwamti yatupile mnope mpela mchenga wa m’nyasa. Kaneko ŵalesile kupima yakulyayo ligongo lyakuti yatupile mnope.

50 Mkanichikwane chaka cha sala, Asenati mwanache jwa Potifela, jwakutaga mbopesi jwa ku Oni* jula, ŵamŵelechele Yosefe ŵanache ŵaŵili ŵachalume. 51 Yosefe ŵampele mwanache jwandanda kupagwajo lina lyakuti Manase,* pakuŵa jwalakwe ŵatite, “Mlungu andendekasisye une kuliŵalila yakusawusya yangu yosope soni ŵandu wosope ŵa m’nyumba ja baba ŵangu.” 52 Mwanache jwaŵili ŵampele lina lyakuti Efulayimu,* pakuŵa jwalakwe ŵatite, “Mlungu andendekasisye kola ŵanache m’chilambo cha kulagasika kwangu.”

53 Sambano yaka 7 yagowola yakulya yejinji yila m’chilambo cha Iguputo yamasile. 54 Kaneko yaka 7 ya sala yila yatandite mpela muŵaŵechetele Yosefe mula. Salajo japali m’yilambo yosope. Nambo m’chilambo chosope cha Iguputo mwaliji yakulya. 55 Pambesi pakwe sala jila jajinjile m’chilambo chosope cha Iguputo, mwamti ŵandu ŵatandite kumlilila Falawo kuti ŵape yakulya. Nambo Falawo ŵajangaga Aiguputo wosope kuti, “Mjawule kwa Yosefe, soni mkatende yiliyose yachakamsalile jwalakwejo.” 56 Sala jila jakusile mnope mwamti jaliji palipose pachilambo chosope chapasi. Pelepo Yosefe ŵatandite kuwugula ngokwe syosope syasyaliji pasikati pawo ni kutanda kwasumisya yakulya Aiguputowo. Ŵatesile yeleyi pandaŵi jele sala jayiche pakogoya mnope m’chilambo cha Iguputocho. 57 Nambosoni ŵandu ŵa pachilambo chosope chapasi ŵayikaga ku Iguputo kukusuma yakulya kwa Yosefe. Yaliji myoyo ligongo lyakuti salajo jayiche pakogoya mnope pachilambo chosope chapasi.