Ekisodo

25 Kaneko Yehofa ŵamsalile Mose kuti, 2 “Mwasalile Ayisalayeli kuti apeleche yakupeleka kwa une. Mkusosekwa kupochela yakupeleka kutyochela kwa mundu jwalijose jwasimichisye mumtima mwakwe kuti apeleche. 3 Yindu yamkusosekwa kupochela kutyochela kwa jemanjajo yiŵe ayi: golide, silifa, kopa, 4 ulusi wabuluwu, ubweya* wakwawulila ku uchejewu,* ulusi wechejewu mnope, nguwo syambone, ubweya wa mbusi, 5 mapende ga ngondolo gepache mtundu wechejewu, mapende ga kausi,* matabwa ga chitela cha akesha,* 6 mawuta ga nyali, mawuta ga basamu gakupanganyichisya mawuta gakumtaga mundu pakumsagula soni yakununjilisya yakutinisya, 7 maganga ga onekisi soni maganga gane gakuŵika pa chakuwala cha efodi soni pa chakuwala pamtima. 8 Jemanjajo akusosekwa kupanganya malo gakundumichilila une, mwamti une chinjitama pasikati pawo. 9 Mkusosekwa mlinganye chitenti cha Mlungu ni yosope yakuŵika mwelemo. Mlinganye mwakukuya ndendende yindu yosope yangumlosya.

10 “Jemanjaji akusosekwa kupanganya libokosi lya chilanga lya matabwa ga chitela cha akesha. Ulewu wakwe uŵe makono gaŵili ni hafu soni m’chijipi mwakwe muŵe mkono umo ni hafu, nambosoni mkono umo ni hafu kwawula mwinani. 11 Kaneko mkusosekwa kulipakasya libokosilyo golide jwambone mnope kusa ni mkati mwakwe. Soni mkusosekwa kuŵika mkombelo wagolide kusyungulila libokosi lyosopelyo. 12 Mkusosekwa mpanganyesoni mbete syagolide syakwana mcheche ni kusiŵika chapenani pa ngongolo mcheche sya libokosilyo, mbali jimo kuŵe mbete siŵili soni mbali jinejo kuŵesoni mbete siŵili. 13 Mpanganyesoni ndodo syakunyakulila libokosilyo sya chitela cha akesha ni kusipakasya golide. 14 Mjinjisye ndodosyo mu mbete syasili mumbali mwa libokosi sila kuti mnyakulileje libokosilyo. 15 Ndodosyo siŵeje mu mbete sya libokosilyo soni mkasityosyagamo. 16 Mkusosekwa kuŵika mu libokosilyo Umboni wachinampe mmwejo.

17 “Mkusosekwa kulinganya chakuwunichila chagolide jwambone. Chakuwunichilacho chiŵe makono gaŵili ni hafu m’chilewu soni mkono umo ni hafu m’chijipi mwakwe. 18 Mpanganyesoni akelubi ŵaŵili ŵagolide. Mwapanganye akelubiwo mwakutenda kusyana ni kwaŵika penani pa chiwunikocho jwine aku jwine kwineku. 19 Mpanganye akelubiwo ni kwaŵika mumbali siŵili sya libokosilyo. Mkelubi jumo juŵe kumbali aji ja penani pa chiwuniko cha libokosilyo soni mkelubi jwinejo juŵe kumbali jine. 20 Akelubiwo akusosekwa atambasukulile mwinani mapapiko gawo gaŵili kuti mapapiko gawogo gawunichile chiwuniko cha libokosilyo, soni akelubiwo akusosekwa kuti alolegane. Ngope sya akelubiwo sikusosekwa sijinamile pachiwuniko cha libokosilyo. 21 Kaneko chimchisosekwa kuŵika chiwunikocho pa libokosilyo soni mu libokosimo mkusosekwa kuŵikamo Umboni wachinampe mmwejo. 22 Une chinjiwonechela kwa mmwejo pelepo soni chinjiŵechetana ni mmwejo kutyochela pa chakuwunichilacho. Une chinjimmanyisya mmwejo yosope yachinjimlamula kuti mwasalile Ayisalayeli. Chinjimmanyisya yeleyi kutyochela pasikati pa akelubi ŵaŵiliwo ŵali penani pa libokosi lya Umboni.

23 “Mkusosekwasoni kupanganya tebulo ja matabwa ga chitela cha akesha. Ulewu wakwe uŵe makono gaŵili soni m’chijipi mwakwe muŵe mkono umo nambosoni jiŵe mkono umo ni hafu kwawula mwinani. 24 Chimchisosekwa kujipakasya tebulojo ni golide jwambone mnope soni kujiŵichila mkombelo wagolide kusyungulila tebulo josopejo. 25 Mkusosekwa kupanganya litabwa ni kuliŵika kusyungulila tebulo josopejo. Kukandapala kwa litabwalyo kuŵe mpela ligasa* soni mŵiche mkombelo wagolide kusyungulila litabwa lyosopelyo. 26 Mkusosekwasoni kupanganya mbete mcheche syagolide ni kusiŵika mbetesyo m’makona gosope mcheche mwamulumbikanile ngongolo mcheche sya tebulojo. 27 Mbetesyo sikusosekwa siŵandikane mnope ni litabwa lya mumbali lila kuti siŵe mwakwinjisya ndodo syakunyakulila tebulojo. 28 Mpanganyesoni ndodo syakunyakulila tebulojo sya chitela cha akesha ni kusipakasya golide.

29 “Mkusosekwasoni kupanganya mbale syakuŵika patebulopo, makapu gakwe, wulo syakwe soni mbale syakwe syamsimbo syakuti apelecheleje mbopesi sya chakumwa. Mpanganye yindu yosopeyi ni golide jwambone mnope. 30 Ndaŵi syosope chimchisosekwa kuŵika mikate* jakulosya kwa Mlungu patebulojo kuti jiŵeje pameso pakwe.

31 “Mpanganyesoni chakuŵikapo nyali chagolide jwambone mnope. Mpanganye chakuŵikapo nyalicho mwakutenda kusyana. Chakutamila chakwe, lipata lyakwe, nyambi syakwe, masamba gakwe, masipuka gakwe soni maluŵa gakwe gaŵe gakusyanila kumo. 32 Chakuŵikapo nyalicho chikole nyambi mumbali mwakwe syakwana 6. Nyambi sitatu siŵe mbali jine soni nyambi sine sitatusyo siŵe mbali jinejo. 33 Pa nyambi jilijose pakusosekwa paŵe malo gatatu gachigaŵeje ni masamba gakuwoneka mpela maluŵa ga chitela cha alimondi. Penani pa masambago paŵeje masipuka soni maluŵa gakwe mwakuchenganachengana, soni munyambi sinesyo muŵejesoni malo gatatu gachigaŵejesoni ni masamba gakuwoneka mpela maluŵa ga chitela cha alimondi. Penani pa masambago paŵejesoni masipuka soni maluŵa gakwe mwakuchenganachengana. Mwelemu ni mwasikusosechela kuŵela nyambi 6 syosopesyo kutyochela palipata lya chakuŵikapo nyalicho. 34 Mulipata lya chakuŵika nyalicho mukusosekwa muŵeje malo gakwana mcheche gachigaŵeje ni masamba gakuwoneka mpela maluŵa ga chitela cha alimondi. Penani pa masambago paŵeje masipuka soni maluŵa gakwe mwakuchenganachengana. 35 Lisipuka limo liŵe chapasi pa nyambi siŵili syandanda syasikopweche palipatalyo. Lisipuka line liŵe pasikati pa nyambi siŵili syakuyichisya syasikopweche palipatalyo, soni lisipuka linelyo liŵesoni pasi pa nyambi siŵili syakumalisya panyambi syosope syakwana 6 syasikopweche palipatalyo. 36 Masipuka gosopego soni nyambi syosopesyo nambosoni chakuŵika nyali chosopecho chikusosekwa chiŵe chimo chepanganye ni golide jwambone mnope jwakutenda kusyana. 37 Mkusosekwa kupanganya nyali syakwana 7 ni kusiŵika pa chakuŵika nyalicho. Nyalisyo pasipambile chisimulichileje malo gosope gagali kusogolo kwakwe. 38 Yakusimila nyali yakwe soni yakupalila moto yakwe yiŵe yakupanganya ni golide jwambone mnope. 39 Chakuŵika nyalicho mkusosekwa kuchipanganya pampepe ni yindu yeleyi soni chiŵe chagolide jwambone mnope jwakusitopa talente* jimo. 40 Mlolechesye kuti mpanganyisye yosopeyo mwakamulana ni chisyasyo chakwe* chanamlosisye mmwejo mwitumbi mula.