Ekisodo

36 “Besaleli chakamule masengo pampepe ni Oholiyabu ni jwamlume jwalijose jwakumanyilila yindu jwele Yehofa ampele lunda soni mtima wakupikanichisya, ni chakulinga chakuti amanyilile mwampaka akamulile masengo gosope gapajika mwakamulana ni yalamwile Yehofa.”

2 Kaneko Mose ŵamŵilasile Besaleli soni Oholiyabu ni jwamlume jwalijose juŵamanyililaga yindu jwele Yehofa ŵampele mtima walunda, jwalijose juŵasimichisye mumtima mwakwe kuti alipeleche kukamula masengoga. 3 Myoyo jemanjajo ŵajigele kwa Mose yakupeleka yosope yele Ayisalayeli ŵayiche nayo kuti yikamule masengo pa utumiki wapajika. Nambope, Ayisalayeliwo ŵapitilisye kwika ni mbopesi syawo sya ufulusyo lisiku lililyose.

4 Ŵanduwo paŵatandite kukamula masengo gapajikago, wosope ŵakumanyilila kukamula masengo ŵatandite kuyikangana jumo jumo. 5 Soni jemanjajo ŵamsalilaga Mose kuti, “Ŵanduŵatu akwika ni yindu yejinji kupunda winji wa yindu yayikusosekwa pamasengo gele Yehofa ŵalamwile ŵandu kuti akamule.” 6 Myoyo Mose ŵalamwile kuti ŵasalile ŵandu wosope ŵakutama m’matenti kuti, “Jemanja Ayisalayeli, ngamkusosekwa kwika nayosoni yindu yine yakamuchisya pamasengo gakukunga chitenti cha Mlungu.” Ni maloŵe gelega, ŵanduwo ŵalesile kwika nayosoni yindu yine. 7 Yindu yaŵapelecheyo yaliji yakwanila pamasengo gosope gagasosekwaga kutendekwa mwamti yine yasigele.

8 Myoyo ŵandu wosope ŵakumanyilila chenene kukamula masengo, ŵakunjile chitenti cha Mlungu pakamulichisya masengo nguwo 10 syakunjila chitenti syakupanganya ni ulusi weluche chenene, ulusi wabuluwu, ubweya* wakwawulila ku uchejewu soni ulusi wechejewu mnope. Jwalakwe* ŵajambwile panguwosyo yiwulili ya akelubi. 9 Ulewu wa nguwo jilijose waliji makono* 28 soni m’chijipi mwakwe mwaliji makono mcheche. Ukulu wa nguwo syosyopesyo waliji wakulandana. 10 Kaneko jwalakwe ŵasilumbikenye nguwo syakwana msano kuti siŵe mpela nguwo jimo, soni nguwo msano sinesyo ŵasilumbikenyesoni pampepe. 11 Panyuma pakwe jwalakwe jwapanganyisyesoni ngonji syepote sya ulusi wabuluwu, ni kusitaŵilila mumbali mwa nguwo jimpepe chakumbesi kusyesyene kwajilumbikanile ni nguwo jijakwe. Jwalakwe ŵatesilesoni yakulandanayo ni nguwo jine jakumbesi kusyesyene kwaŵalumbikenye ni nguwo jinejo. 12 Ŵapanganyisye ngonji syepote syakwana 50 ni kusitaŵilila munguwo jimo. Nambosoni ŵapanganyisye ngonji sine syepote syakwana 50 ni kusitaŵilila mumbali mwa nguwo jinejo. Ŵasipanganyisye m’litala lyakuti silolegane pamalo gakulumbikanila. 13 Pambesi pakwe jwalakwe ŵapanganyisyesoni yakolechela yagolide yakwana 50 soni ŵalumbikenye nguwo sya chitenticho pakamulichisya masengo yakolechelayo kuti nguwosyo silumbikane ni kuŵa chinguwo chimo cha chitenti cha Mlungu.

14 Kaneko jwalakwe ŵapanganyisyesoni nguwo sya ubweya wa mbusi kuti siŵe pamsakasa wa chitenti cha Mlungu. Ŵapanganyisye nguwo syakwana 11. 15 Ulewu wa nguwo jilijose waliji makono 30 soni m’chijipi mwakwe mwaliji makono mcheche. Ukulu wa nguwo 11 syosopesyo waliji wakulandana. 16 Kaneko jwalakwe ŵasilumbikenye pampepe nguwo syakwana msano, soni nguwo 6 sinesyo ŵasilumbikenyesoni pampepe. 17 Jwalakwe ŵapanganyisyesoni ngonji syepote syakwana 50 ni kusitaŵilila mumbali mwa nguwo jajaliji kumbesi kusyesyene kwasyalumbikanile nguwo siŵilisyo. Ni ŵapanganyisyesoni ngonji sine syepote syakwana 50 ni kusitaŵilila mumbali mwa nguwo jine ja chitenticho jajalumbikene ni nguwo jijakwe jila. 18 Ŵapanganyisyesoni yakolechela ya kopa yakwana 50 kuti alumbikanyile nguwosyo ni kuŵa chinguwo chimo cha chitenti.

19 Jwalakwe ŵapanganyisyesoni chakuwunichila chitenticho cha mapende ga ngondolo gepache mtundu wechejewu soni penani pakwe ŵaŵisile chakuwunichila chine cha mapende ga kausi.*

20 Ŵapanganyisyesoni mafelemu ga chitenti cha Mlungu ga chitela cha akesha* ni kugajimika mumbali mwa chitenticho. 21 Ulewu wa felemu jilijose waliji makono 10 soni m’chijipi mwakwe mwaliji mkono umo ni hafu. 22 Felemu jilijose jakwete tungongolo tuŵili twelumbikane kulitabwa limo. Mwelemu ni muŵagapanganyichisye mafelemu gosope ga chitenti cha Mlungu. 23 Ŵapanganyisyesoni mafelemu gaŵaŵisile kumbali ja kummwela kwa chitenti cha Mlungu. Mafelemugo galiji gakwana 20 soni galolite kummwela. 24 Ŵapanganyisye yakwimichila yasilifa yakwana 40 yaŵajimichile mafelemu 20 gala. Pa yakwimichila yiŵili ŵajimiche felemu jimo jajakwete tungongolo tuŵili, soni felemu jilijose pamafelemu ganego jajakwete tungongolo tuŵili, ŵajijimichesoni pa yakwimichila yiŵili. 25 Mbali jine ja kumpoto kwa chitenticho, jwalakwe ŵapanganyisyesoni mafelemu 20 26 ni yakwimichila yakwe yasilifa yakwana 40. Ŵajimiche felemu jimo pa yakwimichila yiŵili soni felemu jilijose pamafelemu ganego ŵajijimichesoni pa yakwimichila yiŵili.

27 Kumbali ja kungapililolyuŵa kwakuli kunyuma kwa chitenti cha Mlungucho, ŵapanganyisye mafelemu 6. 28 Ŵapanganyisyesoni mafelemu gaŵili kuti gaŵe njalamila sya kunyuma kwa makona ga chitenti cha Mlungucho. 29 Mafelemu gelega ŵagapwatikenye ni mbali siŵili sya matabwa kutyochela pasi mpaka kuja kwika mwinani pajili mbete jandanda. Yeleyi ni yaŵatesile ni mafelemu gosope gaŵiligo gagaliji njalamila siŵili sya m’makona. 30 Myoyo jemanjaji ŵapanganyisye mafelemu 8 ni yakwimichila yakwe yasilifa yakwana 16. Felemu jimo ŵajiŵisile pa yakwimichila yiŵili.

31 Kaneko jwalakwe ŵapanganyisye mbalaŵala sya chitela cha akesha. Mbalaŵala msano syaliji pamafelemu gambali jine ja chitenti cha Mlungu 32 soni mbalaŵala msano sinesyo ŵasiŵisile pamafelemu gane gambali jine ja chitenti cha Mlungucho. Nambosoni chakungapililolyuŵa paliji pana mbalaŵala sine msano sya mafelemu ga kunyuma kwa chitenticho. 33 Kaneko jwalakwe ŵapanganyisye mbalaŵala jajaŵanile mafelemugo pasikati jajatandile kundanda mpaka kumbesi kwa chitenticho. 34 Jwalakwe ŵagapakesye golide mafelemu gosopego soni ŵapanganyisye mbete syagolide kuti siŵe syakuŵanila mbalaŵalasyo, soni mbalaŵala syosopesyo ŵasipakesye golide.

35 Kaneko ŵapanganyisye likatani. Likatanilyo ŵalipanganyisye ni ulusi wabuluwu, ubweya wakwawulila ku uchejewu, ulusi wechejewu mnope soni ulusi weluche chenene. Palikatanipo ŵajambwile yiwulili ya akelubi. 36 Jwalakwe ŵapanganyisye yipilala mcheche ya chitela cha akesha ni kuyipaka golide kuti akolechejepo likatanilyo. Yakoloŵechela yakwe yalijisoni yagolide soni ŵajimiche yipilalayo mu yakwimichila yakwe mcheche yasilifa yila. 37 Kaneko ŵapanganyisyesoni likatani lyakuŵika pamlango wakwinjilila muchitenticho. Likatanilyo ŵalipanganyisye ni ulusi wabuluwu, ubweya wakwawulila ku uchejewu, ulusi wechejewu mnope soni ulusi weluche chenene, 38 pampepe ni yipilala yakwe msano soni yakoloŵechela yakwe. Jwalakwe ŵapachile golide penani pa yipilalayo soni yakulumbikanila yakwe. Nambo yakwimichila msano ya yipilalayo yaliji yakopa.