Ekisodo

39 Jemanjajo ŵapanganyisye yakuwala yeluche chenene yakusosekwa kuwala pakutumichila ku malo geswela. Ŵapanganyisye yakuwalayo pakamulichisya masengo ulusi wabuluwu, ubweya* wakwawulila ku uchejewu soni ulusi wechejewu mnope. Ŵapanganyisyesoni yakuwala yapajika ya Aloni, mwakamulana ni yele Yehofa ŵamlamwile Mose.

2 Ŵapanganyisye efodi pakamulichisya masengo golide, ulusi wabuluwu, ubweya wakwawulila ku uchejewu, ulusi wechejewu mnope soni ulusi weluche chenene. 3 Ŵamsyanile golide ni kuŵa jwakupyapyala mnope soni ŵamlesenye kuti apetele pampepe ni ulusi wabuluwu, ubweya wakwawulila ku uchejewu, ulusi wechejewu mnope soni ulusi wambone. 4 Ŵapanganyisye nguwo sya m’makoyo syaŵasilumbikenye ku efodijo, mwamti nguwosyo syalumbikene mumbali syosope siŵili sya m’makoyo. 5 Lamba jwakuluka jwakutaŵilila mu efodi ni chakulinga chakuti efodijo jutame chenene m’malo mwakwe ŵampanganyisyesoni pakamulichisya masengo yindu ayi: golide, ulusi wabuluwu, ubweya wakwawulila ku uchejewu, ulusi wechejewu mnope soni ulusi weluche chenene. Ŵatesile yeleyi mwakamulana ni yele Yehofa ŵamlamwile Mose.

6 Kaneko ŵaŵisile maganga ga onekisi pa yakuŵichila yakwe yagolide, soni ŵalembile pamagangapo mena ga ŵanache ŵa Isalayeli mwakutenda kusokola mpela mwakusasokolela pakupanganya chidindo. 7 Ŵagaŵisile magangago m’makoyo mwa chakuwala cha efodicho kuti gaŵe maganga gakwakumbuchilila ŵanache ŵa Isalayeli. Ŵatesile yeleyi mwakamulana ni yele Yehofa ŵamlamwile Mose. 8 Kaneko ŵapanganyisye chakuwala pamtima ni kuchipeta mpela muŵatendele ni efodi. Ŵapanganyisye chakuwalachi pakamulichisya masengo golide, ulusi wabuluwu, ubweya wakwawulila ku uchejewu, ulusi wechejewu mnope soni ulusi weluche chenene. 9 Chakuwalacho pachipindile chaŵaga chakulandana mbali syosope. Jemanjajo ŵapanganyisye chakuwala pamtimacho chele pachipindile m’chilewu mwakwe chaŵaga ligasa* limo soni m’chijipi mwakwe mwaŵaga ligasa limo. 10 Ŵaŵisile maganga pa chakuwala pamtimacho m’misela jakwana mcheche. Pamsela wandanda ŵaŵisile maganga ga lubi, topasi soni emeladi. 11 Pamsela waŵili ŵaŵisile maganga ga takoisi, safilo soni yasipa. 12 Pamsela watatu ŵaŵisile maganga ga lesemu, agate soni ametusito. 13 Pamsela wamcheche ŵaŵisile maganga ga kilisolayiti, onekisi soni yade. Magangago ŵagaŵisile mu yakuŵichila maganga yagolide. 14 Magangago ŵagaŵisile mwakamulana ni mena ga ŵanache 12 ŵa Isalayeli. Menago ŵagalembile mwakutenda kusokola mpela mwakusasokolela pakupanganya chidindo, soni liganga lililyose lyakwete lina lyakwimila mbumba* jimo pa mbumba syosope 12.

15 Kaneko ŵapanganyisye mikufu jagolide jwambone mnope ni kujitaŵilila pa chakuwala pamtimacho. Mikufujo jaliji jepote mpela ngonji. 16 Ŵapanganyisyesoni yakuŵichila maganga yagolide yakwana yiŵili soni mbete siŵili syagolide. Ni ŵasiŵisile mbete siŵilisyo m’makona gaŵili ga chakuwala pamtimacho. 17 Ŵajinjisye ngonji siŵili syagolidesyo mumbete siŵili syasyaliji m’makona mwa chakuwala pamtimacho. 18 Kaneko ngonji siŵilisyo ŵasijinjisye mu yakuŵichila maganga yiŵili yila ni kusitaŵilila kusogolo kwa nguwo ja m’makoyo ja chakuwala cha efodi chila. 19 Ŵapanganyisyesoni mbete siŵili syagolide ni kusiŵika m’makona gane gaŵiligo kusyeto kwa chakuwala pamtima, mwakulolegana ni efodi. 20 Kaneko ŵapanganyisyesoni mbete sine siŵili syagolide ni kusiŵika kusogolo kwa efodijo cha pasi pa nguwo sya m’makoyo, penani pamalo gagalumbikanile lamba ni efodijo. 21 Pambesi pakwe ŵataŵile chakuwala pamtimacho ni lukonji lwabuluwu. Lukonjilo lwapitile mumbete syasyaliji kusyeto kwa chakuwala pamtimacho ni kuja kutaŵila mumbete sya mu efodi. Ŵatesile yeleyi ni chakulinga chakuti chakuwala pamtimacho chitameje pamalo gakwe penani pa efodijo, chapenani pa lamba jula, mwakamulana ni yele Yehofa ŵamlamwile Mose.

22 Kaneko ŵapanganyisye malaja gangali makono ga efodi. Malajago ŵagapanganyisye ni nguwo jiŵajipanganyisye josope ni ulusi wabuluwu. 23 Malajago gakwete malo gewugule chapakatikati mpela lukosi lwa chakuwala cha kungondo chakola maŵamba gachisyano. Malo gewugulego galiji gakuminika mumbali mwakwe ni chakulinga chakuti mumbalimo mukapapukaga. 24 Mumbali mwa malajago ŵapanganyisye yindu ya ulusi wabuluwu yakuwoneka mpela yisogosi, ubweya wakwawulila ku uchejewu soni ulusi wechejewu mnope yaŵayiluchile pampepe. 25 Ŵapanganyisyesoni mabelo gagolide jwambone. Ni ŵagaŵikaga mabelogo pasikati pa yindu yakuwoneka mpela yisogosi yila kusyungulila mumbali mosope mwa malaja gangali makonogo pasikati pa yindu yakuwoneka mpela yisogosi yila. 26 Kaneko ŵaŵisile mabelogo soni yisogosiyo mwakuchenganachengana. Ŵaŵikaga belo kaneko chisogosi, belo kaneko chisogosi, kusyungulila mumbali mosope mwa malaja gangali makonogo gele ŵawalaga pakutumichila mwakamulana ni yele Yehofa ŵamlamwile Mose.

27 Ŵapanganyisyesoni mikanjo ja nguwo syambone ja Aloni ni ŵanache ŵakwe. 28 Ŵapanganyisyesoni nduŵila ja nguwo jambone, mipango jakutaŵa mumtwe ja nguwo syambone, makabudula* ga nguwo sya ulusi weluche chenene, 29 soni lamba jwa nguwo ja ulusi weluche chenene, ulusi wabuluwu, ubweya wakwawulila ku uchejewu soni ulusi wechejewu mnope mwakamulana ni yele Yehofa ŵamlamwile Mose.

30 Pambesi pakwe ŵapanganyisye kachisyano kepwapwatiche kakunyesimila kagolide jwambone mnope kakajimilaga chimanyisyo cheswela cha kulipeleka. Ni ŵalembile maloŵe mwakusokola pakachisyanopo mpela mwakusasokolela pakupanganya chidindo. Ŵalembile maloŵe gakuti, “Yehofa ali msyene ndamo jeswela.” 31 Kaneko ŵajinjisye mu kachisyanoko lukonji lwakupanganya ni ulusi wabuluwu ni chakulinga chakuti ataŵilile panduŵilajo mwakamulana ni yele Yehofa ŵamlamwile Mose.

32 Myoyo masengo gosope gakupanganya chitenti cha Mlungu chachili chitenti chakusimanilana gamasile, mwamti Ayisalayeli ŵatesile yosope yele Yehofa ŵamlamwile Mose. Ŵatesile mmomo.

33 Kaneko ŵayiche nacho kwa Mose chitenti cha Mlungu ni yida yakwe yosope. Yida yakwe yili yakolechela, mafelemu, mbalaŵala, yipilala soni yakwimichila yipilalayo. 34 Ŵayichesoni ni chakuwunichila chitenticho cha mapende ga ngondolo gepache mtundu wechejewu, chakuwunichila chine cha mapende ga kausi,* nguwo ja likatani; 35 libokosi lya Umboni ni ndodo syakwe soni chakuwunichila chakwe; 36 tebulo, yindu yosope yayikusaŵa patebulopo soni mikate* jakulosya kwa Mlungu. 37 Ŵayichesoni ni chakuŵikapo nyali chagolide jwambone pampepe ni nyali syakwe syejale chenene, yida yosope ya chakuŵikapo nyalicho, mawuta ga nyali; 38 malo gakupelechela mbopesi gagolide, mawuta gakumtaga mundu pakumsagula, yakununjilisya yakutinisya, likatani lyakuŵika pamlango wakwinjilila muchitenti; 39 malo gakupelechela mbopesi gakopa ni yisyano yakwe yakopa, ndodo syakwe soni yida yakwe yosope, libeseni ni chakutamichila chakwe. 40 Ŵayichesoni ni nguwo sya mumbali mwa luŵala, yipilala yakwe soni yakwimichila yipilalayo, likatani lya mlango wakwawula ku luŵala, ngonji sya chitenti ni yichili yakwe soni yindu yosope yakukamulichisya masengo pa utumiki wa pa chitenti cha Mlungu chachili chitenti chakusimanilana; 41 yakuwala yeluche chenene yakusosekwa kuwala pakutumichila ku malo geswela, yakuwala yapajika ya Aloni jwali jwakutaga mbopesi soni yakuwala ya ŵanache ŵakwe yakusosekwa kuwala pakutumichila mpela ŵakutaga mbopesi.

42 Ayisalayeli ŵakamwile masengo gosope mwakamulana ni yosope yele Yehofa ŵamlamwile Mose. 43 Mose ali agaweni masengo gosope gaŵakamwile jemanjajo ŵayiweni kuti jemanjajo atesile yosope yele Yehofa ŵalamwile. Kaneko Mose ŵapele upile jemanjajo.