Numeli

15 Yehofa ŵapitilisye kuŵecheta ni Mose kuti, 2 “Mŵechete ni Ayisalayeli. Mwasalile jemanjajo kuti, ‘Pachimkayiche m’chilambo changumpa kuti mkatamejecho, 3 soni pachimkapelecheje mbopesi kwa Yehofa syakocha pamoto kutyochela pa ng’ombe kapena pa ngondolo syenu kuti sikaŵe mbopesi sya kaliwungo kambone kakumsangalasya* Yehofa, chinga mbopesi syakutinisya, mbopesi syamkusapeleka pakwanilisya chilanga, mbopesi syamkusapeleka mwakusaka kwenu kapenasoni mbopesi syamkusapeleka pandaŵi ja yisangalalo yenu, 4 mundu pachakapelecheje jimo mwa mbopesi syelesi akapelechejesoni kwa Yehofa utandi wetililiche kuti ukaŵe mbopesi jambeju. Mlingo wakwe ukaŵeje mbali jimo kutyochela pa mbali 10 sya efa jimo.* Utandiwo ukaŵeje wewanganye ni mawuta ga mlingo wakwanila mbali jimo kutyochela pambali mcheche sya hini jimo.* 5 Akapelechejesoni finyo mpela mbopesi jachakumwa. Finyojo mlingo wakwe ukaŵeje mbali jimo kutyochela pa mbali mcheche sya hini jimo. Mkapelecheje finyojo pampepe ni mbopesi jakutinisya kapenasoni mbopesi ja mwanache jwa ngondolo jwamkambako. 6 Kapena naga mkuja kupeleka ngondolo jamkambako, mkapelechejesoni utandi wetililiche kuti ukaŵe mbopesi jambeju. Mlingo wakwe ukaŵeje mbali siŵili kutyochela pa mbali 10 sya efa jimo.* Utandiwo ukaŵeje wewanganye ni mawuta ga mlingo wakwanila mbali jimo kutyochela pa mbali sitatu sya hini jimo.* 7 Pachimkapelecheje yeleyi mkapelechejesoni finyo mpela mbopesi jachakumwa jakola kaliwungo kambone kakumsangalasya* Yehofa. Finyojo mlingo wakwe ukaŵeje mbali jimo kutyochela pa mbali sitatu sya hini jimo.

8 “‘Nambo naga mkuja kupeleka kwa Yehofa ng’ombe jamkambako kuti jikaŵe mbopesi jakutinisya kapena kuti jikaŵe mbopesi jakupeleka pakukwanilisya chilanga chapadela chamwatesile kapenasoni kuti jikaŵe mbopesi jamkamulano, 9 pamkupeleka ng’ombe jamkambakojo mkapelechejesoni pampepe ni utandi wetililiche, mlingo wakwe ukaŵeje wakwana mbali sitatu kutyochela pa mbali 10 sya efa jimo* kuti ukaŵe mbopesi jambeju. Utandiwo ukaŵeje wewanganye ni mawuta ga mlingo wakwana hafu ja hini.* 10 Pachimkampelecheje yeleyi, mkapelechejesoni finyo kuti jukaŵe mbopesi jachakumwa jakocha pamoto jakola kaliwungo kambone kakumsangalasya* Yehofa. Finyojo mlingo wakwe ukaŵeje wakwana hafu ja hini. 11 Yeleyi ni yamkusosekwa kuja kutenda pamkupeleka chilango chilichose, chinga ng’ombe jamkambako, ngondolo jamkambako, mwanache jwa ngondolo jwamkambako kapenasoni mbusi. 12 Chinga mkupeleka yilango yilingwa, nambo pachimkapelecheje chilango chilichose mkusosekwa kuja kukuya yeleyi. 13 Yeleyi ni yakusosekwa kuja kutenda Myisalayeli jwalijose pakupeleka mbopesi jakocha pamoto jakola kaliwungo kambone kakumsangalasya* Yehofa.

14 “‘Naga mundu jwamtundu wine jwakutama pasikati penu kapena jwaŵele ali mkutama pasikati penu kwa yaka yejinji, naga akusaka kupeleka mbopesi jakocha pamoto jakola kaliwungo kambone kakumsangalasya* Yehofa, nombenajo akusosekwa kuja kukuya yeleyi. 15 Jemanja ŵamli Ayisalayeli* soni mundu jwamtundu wine jwakutama pasikati penu mkakuyeje malamusi gakulandana. Mkakuyeje malamusiga ku mibado* jenu josope mpaka kalakala. Pakaja kuŵa kulekangana pameso pa Yehofa pasikati pa jemanja ni mundu jwamtundu wine jwakutama pasikati penu. 16 Malamusi soni yiliyose yangumlamula yikakamuleje masengo mwakulandana chinga kwa jemanja kapena jwamtundu wine jwakutama pasikati penu.’”

17 Yehofa ŵapitilisye kuŵecheta ni Mose kuti, 18 “Mŵechetane ni Ayisalayeli. Mwasalile jemanjajo kuti, ‘Pachimkayiche m’chilambo chele changumpa jemanja 19 ni mkutanda kulya yakulya* ya m’chilambocho, mkapelecheje yine mwa yakulya yeleyo kwa Yehofa. 20 Mkapelecheje utandi wangatililika kutyochela pa mbeju syenu syandanda kukomala. Utandiwo mkawupanganyileje mikate jesyungulile jepowole katikati ni kujipeleka mpela yamkusati pakupeleka mbopesi jakutyochela pamalo pakuputila mbeju. 21 Mkapelecheje kwa Yehofa utandi wangatililika welewu kutyochela pa mbeju syenu syandanda kukomala ku mibado jenu josope mpaka kalakala.

22 “‘Sambano mpaka yitendekwe kuti jemanja wosope mlemwisye mwakulepela kukuya malamusi gosopega gele Yehofa ŵamsalile Mose, 23 kugopolela kuti yosope yaŵamlamwile jemanja Yehofa kupitila mwa Mose. Malamusi gelega Yehofa ŵampele jemanja kuti mgakuyeje kutandila palisiku lyaŵampele malamusigo mpaka ku mibado jenu josope jamsogolo. 24 Naga jemanja mlemwisye m’litala lyelelyo mwangamanyilila, jemanja wosope mkapelecheje mwanache jwa ng’ombe jwamkambako kuti jukaŵeje mbopesi jakutinisya jakola kaliwungo kambone kakumsangalasya* Yehofa. Pampepe ni mbopesi jelejo mkapelechejesoni mbopesi jambeju soni mbopesi jachakumwa mwakamulana ni yamkusasosekwa kukuya pakupeleka mbopesi jelejo. Nambosoni mkapelecheje mwanache jwa mbusi jumo kuti jukaŵe mbopesi jaulemwa. 25 Jwakutaga mbopesi akasimasyeje ulemwa wa Ayisalayeli wosope, mwamti pelepo Mlungu tachakululuchila yakulemwa yawo ligongo lyakuti ŵalemwisye mwangamanyilila. Jemanjajo chachakululuchilasoni yakulemwa yawo ligongo lyakuti ŵayiche kwa Yehofa ni mbopesi jakocha pamoto soni ŵayiche pameso pa Yehofa ni mbopesi jawo jaulemwa. 26 Mlungu chachakululuchila Ayisalayeli wosopewo soni ŵandu ŵamitundu jine ŵakutama pasikati pawo, ligongo lyakuti wosopewo ŵalemwisye mwangamanyilila.

27 “‘Nambo naga mundu jumo alemwisye mwangamanyilila, pelepo jwalakwe akajigaleje mbusi jamkolo jangapunda chaka chimo kuti jiŵe mbopesi jakwe jaulemwa. 28 Kaneko jwakutaga mbopesi akasimasyeje ulemwa wa mundu juŵalemwisye mwangamanyilila pameso pa Yehofajo. Pelepo Mlungu chachimkululuchila yakulemwa yakweyo. 29 Myisalayeli jwalijose kapena mundu jwamtundu wine jwakutama pasikati pa Ayisalayeliwo, wosope akakuyeje lilamusi limo lyeleli naga alemwisye mwangamanyilila.

30 “‘Nambo mundu jwalemwisye mwamelepe, chinga Myisalayeli kapena mundu jwamtundu wine jwakutama pasikati pawo, mundu jwelejo amnyosisye Yehofa mwamti akusosekwa kuwulajidwa kuti akasimanikwasoni pasikati pa ŵandu ŵakwe. 31 Mumwulajeje nditu mundu jwelejo ligongo anyosisye maloŵe ga Yehofa soni akasile lilamusi lyakwe. Mundu jwelejo ajanjeje magambo pa ulemwa wakwewo.’”

32 Sambano Ayisalayeli ali m’chipululu, ŵandu ŵane ŵamsimene mundu jwine ali mkulokotanya sasu palisiku lya Sabata. 33 Ŵanduwo paŵamsimene jwalakwe ali mkulokotanya sasu, ŵamjigele ni kwika najo pameso pa Mose, Aloni soni pameso pa mpingo wosopewo. 34 Jemanjajo ŵamŵisile jwalakwejo mundende ligongo lyakuti chilamusi nganichisalaga chenene yampaka atende ni mundu mpela jwelejo.

35 Kaneko Yehofa ŵamsalile Mose kuti, “Mundujo akusosekwa kuwulajidwa nditu soni mpingo wosopewo umponye maganga jwalakwejo kusa kwa malo gakunjile matenti Ayisalayeli.” 36 Myoyo mpingo wosopewo ŵamjigele jwalakwe ni kwawula najo kusa kwa malo gaŵakunjile matenti gawo. Kweleko ŵamwuleje mwakumponya maganga mpela yaŵatite Yehofa pakumlamula Mose.

37 Yehofa ŵapitilisye kumsalila Mose kuti, 38 “Mŵechetane ni Ayisalayeli. Mwasalile jemanjajo kuti alucheje mbonji mumbali mwa yakuwala yawo, soni atendeje yeleyo ku mibado jawo josope mpaka kalakala. Atotelelejesoni lukonji lwabuluwu mumbesi mwa yakuwala yawo, mwasitandile bonjisyo. 39 ‘Yakuwala yenu yikoleje mbonji syelesi ni chakulinga chakuti pasim’weni simkumbusyeje malamusi gosope ga Yehofa soni kuti mgakuyeje. Jemanja mkakuyaga yakumbila ya mitima jenu soni meso genu ligongo naga mkukuya yeleyo mpaka yimtendekasye kuti mkaŵa ŵakulupichika* kwa une. 40 Yeleyi yichimkamuchisya jemanja kuti mkumbuchileje malamusi gangu gosope soni kuti mgakuyeje ni kuŵa ŵaswela pameso pa Mlungu jwenu. 41 Une ndili Yehofa Mlungu jwenu junamkopwesye jemanja m’chilambo cha Iguputo pakusaka kumlosya kuti une ndili Mlungu jwenu. Une ndili Yehofa Mlungu jwenu.’”