Ngani Syambone Syaŵalembile Luka

1 Ŵandu ŵajinji alinjilile kulemba yindu yosope yayatendekwe yele m’wejisoni tukusayikulupilila mnope. 2 Ŵanesoni ŵaŵayiweni ni meso gawo soni ŵaŵalalichilaga utenga wa Mlungu, ŵatusalile yindu yeleyi. 3 Myoyo, wawo ŵakuchimbichika mnope Che Teofilo, une nayiwungunyisye chenene yindu yosopeyi soni ndili jwakusachilila kuyilemba mwakamulana ni muyatendechele. 4 Ndesile yeleyi ni chakulinga chakuti wawojo asimichisye kuti yindu yaŵalijiganyisye yili yisyesyene.

5 Mu ndaŵi ja Helodi,* mwenye jwa Yudeya, papali jwakutaga mbopesi jwine lina lyakwe Sekaliya jwa mu gulu ja Abiya. Ŵamkwakwe ŵaliji ŵakutyochela mwa ŵanache ŵachakongwe ŵa Aloni, soni lina lyawo lyaliji Elisabeti. 6 Liŵasali lyaliji lyakulungama pameso pa Mlungu, soni lyaliji lyangali chakulemwa ligongo lyakuyaga malamusi gosope soni chilichose chele Yehofa akusasaka kuti mundu atendeje. 7 Nambo jemanjaji nganakola ŵanache, ligongo Elisabeti jwaliji jwangaŵeleka soni wosopeŵa ŵaliji ŵakalambale.

8 Sambano jayiche ndaŵi jakuti Sekaliya akatumichile mpela jwakutaga mbopesi pameso pa Mlungu pandaŵi jele gulu jakwe jatumichilaga. 9 Myoyo mwakamulana ni yaŵatendaga ŵakutaga mbopesi, jakwanile ndaŵi jakuti jwalakwejo ajinjile m’nyumba ja Yehofa kuti akapeleche mbopesi ja yakununjila. 10 Soni ŵandu ŵajinji ŵaliji mkupopela pasa pandaŵi jakupeleka mbopesi ja yakununjilaji. 11 Kaneko lilayika lya Yehofa lyawonechele kwa Sekaliya lili lijimi kumlyo kwa malo gakupelechela mbopesi ja yakununjila. 12 Nambo Sekaliya paŵagambile kuliwona lilayikalyo ŵasimonjile mnope soni woga wamkamwile. 13 Nambope lilayikalyo lyamsalile jwalakwejo kuti, “Mkatenda woga Sekaliya, ligongo Mlungu apikene mapopelo genu gakuchondelela, mwamti ŵamkwenu Elisabeti chachimŵelechela mwanache jwamlume soni chimumpe lina lyakuti Yohane. 14 Mmwejo ni ŵandu ŵajinji chimchisangalala ni kupagwa kwakwe, 15 pakuŵa jwalakwejo chachiŵa jwamkulungwa pameso pa Yehofa. Nambo ngasasosekwa kumwa finyo kapena chakumwa chilichose chaukali, soni msimu weswela uchiŵa ni jwalakwejo atamose mkanapagwe.* 16 Mwanacheju chachakamuchisya Ayisalayeli ŵajinji kuti awujile kwa Yehofa Mlungu jwawo. 17 Nambosoni jwalakwe chachilongolela pasogolo pa Mlungu ali ni machili mpela ga Eliya. Chachitendekasya mitima ja achatati kuŵa mpela ja ŵanache soni chachakamuchisya ŵandu ŵangapikanila kutenda yindu yalunda ni yakulungama. Chachitenda yeleyi ni chakulinga chakuti ŵatendekasye ŵanduwo kuŵa ŵakoseka kumtumichila Yehofa.”

18 Sekaliya ŵalisalile lilayikalyo kuti, “Ana mpaka simichisye chamtuli yeleyi? Unetu ndili jwamkalambale, nombenawo ŵamkwangu ali ŵakalambalesoni.” 19 Lilayikalyo lyamjanjile jwalakwejo kuti, “Une ndili Gabuliyele, soni ngusajima pameso pa Mlungu. Jwalakwejo andumile kuti mbechetane ni mmwejo soni kuti namsalile ngani jamboneji. 20 Nambo ligongo lyakuti nganimkulupilila maloŵe gangu gele gachitendekwa pandaŵi jakwe, chimchileka kuŵecheta soni chimchitama jii mpaka pa lisiku lyele yindu yeleyi yichitendekwa.” 21 Pandaŵiji, ŵandu ŵaliji mkumjembecheyape Sekaliya mwamti ŵasimonjile mnope kuti atemi ndaŵi jelewu m’nyumbajo. 22 Paŵakopweche pasa, jwalakwejo nganakombola kuŵechetana ni ŵanduwo soni jemanjajo ŵamanyilile kuti jwalakwe ayiweni yindu yakusimonjesya m’nyumbajo. Jwalakwe jwaliji mkuŵechetana ni ŵanduwo pakamulichisya masengo makono nambo nganakombolaga kukoposya maloŵe. 23 Masiku gakwe gakutendela utumiki wapajika pagamasile, jwalakwe jwapite kumangwakwe.

24 Pali papite masiku, Elisabeti ŵamkwakwe Sekaliya ŵakwete msigo, soni ŵagambaga kutama pamlango ngatyoka kwa myesi msano. Jwalakwe jwaŵechetaga kuti, 25 “Ayi ni yandendele Yehofa. Jwalakwe angumbuchile soni atyosisye sooni syangu pameso pa ŵandu.”

26 Pajakwanile myesi 6 Elisabeti ali akwete msigo, Mlungu ŵalitumisye lilayika lyakolanjidwa kuti Gabuliyele lila kuti lijawule mu msinda wa Nasaleti ku Galileya. 27 Ŵalitumisye kwa mwali jwine juŵatomeledwe ni jwamlume jwakutyochela m’liŵasa lya Daudi lina lyakwe Yosefe. Mwaliju lina lyakwe lyaliji Maliya. 28 Lilayikalyo palyayiche, lyaŵechete ni mwalijo kuti, “Moni mmwe jwamkongwe jwamkwete upile wekulungwa, Yehofa ali ni mmwejo.” 29 Jwalakwe jwasimonjile mnope ni maloŵe ga lilayikalyo soni jwatandite kuganichisya gopolela kwa moni wa mtundu welewu. 30 Myoyo lilayikalyo lyamsalile jwalakwejo kuti, “Mkatenda woga Maliya, pakuŵa Mlungu amnonyele. 31 Mpikane! Chimchikola msigo mwamti chimchiŵeleka mwanache jwamlume, soni mwanachejo chimumpe lina lyakuti Yesu. 32 Mwanache jweleju chachiŵa jwamkulungwa soni chachikolanjidwa kuti Mwanache jwa Jwakwinani Mnope, mwamti Yehofa Mlungu chachimpa jwalakwejo mpando wa umwenye wa Daudi, atatigwe. 33 Jwalakwe chachilamulila mpela Mwenye panyumba ja Yakobo mpaka kalakala, soni Uchimwene wakwe ngasiwumala.”

34 Nambo Maliya ŵaliwusisye lilayikalyo kuti, “Ana yeleyi yichikomboleka chamtuli pakuŵa nganimba pa ulombela?” 35 Lilayikalyo lyamjanjile jwalakwejo kuti, “Msimu weswela uchiyika pa mmwejo, soni machili ga Jwakwinani Mnope gachiŵa pa mmwejo. Paligongo lyeleli, mwanache juchachipagwajo chachikolanjidwa kuti jwamswela, Mwanache jwa Mlungu. 36 Sonitu mlongo mjenu Elisabeti, jwakusakolanjidwa kuti jwamkongwe jwangaŵeleka jula, apano akwete msigo wa mwanache jwamlume atamose kuti ali jwamkalambale, mwamti awuno uli mwesi wa 6. 37 Yeleyi yitendekwe ligongo lyakuti yaŵechete Mlungu yikusakomboleka.” 38 Pelepo Maliya jwatite, “Unetu ndili kapolo jwa Yehofa! Yaŵecheteyo yitendekwe nditu kwa une.” Kaneko lilayikalyo lyatyosile.

39 Pali papite masiku gamnono, Maliya jwanyakwiche ni kwawula mwachitema ku msinda wa Yuda, mu chigawo* chine cha matumbi. 40 Kweleko jwalakwe ŵayiche kunyumba ja Sekaliya ni ŵapeleche moni kwa Elisabeti. 41 Sambano Elisabeti paŵagambile kupikana moni kutyochela kwa Maliya, mwanache juŵaliji m’matumbo mwakwe jula jwawulukwite, soni msimu weswela wayiche pa Elisabeti 42 mwamti jwatandite kuŵecheta mwagumila kuti, “Mkwete upile mmwejo pa achakongwe wosope, soni jukwete upile mwanache juchachipagwa mwa mmwejo! 43 Yikomboleche wuli kuti une ngole upile wakuti mama ŵa Ambuje ŵangu ayiche kwa une? 44 Pakuŵa panagambile kupikana moni wenu, mwanache jwali m’matumbo mwangu jwawulukwite mwakusangalala. 45 Mkwete upile mmwejo ligongo mwakulupilile yindu yamwapikene, pakuŵa yindu yamwapikene kutyochela kwa Yehofa yichitendekwa nditu.”

46 Pelepo Maliya jwaŵechete kuti, “Umi wangu ukumchimbichisya Yehofa, 47 soni mtima wangu ukusangalala mnope mwa Mlungu jwali Mkulupusyo jwangu, 48 ligongo am’weni kapolo jwakwe jwamkongwe atamose kuti ali jwakutuluka mnope. Nambosoni kutandila apano ŵandu wosope chachingolangaga kuti ndili jwaupile, 49 ligongo Mlungu jwamachili mnopejo andendele yindu yekulungwa, soni lina lyakwe lili lyeswela. 50 Jwalakwejo chachilosya chanasa chakwe mpaka kalakala kwa ŵandu ŵakusamjogopa. 51 Jwalakwe atesile yindu yekulungwa ni mkono wakwe, soni ŵatopwele ŵandu ŵakusalosya m’mitima jawo kuti ali ŵakulikwesya. 52 Ŵatulwisye ŵandu ŵamachili pa mipando ja umwenye ni kwakwesya ŵandu ŵangachimbichika. 53 Ŵajikutisye ŵandu ŵasala ni yindu yambone soni ŵatopwele ŵandu ŵakusichila ali ŵangali chilichose. 54 Jwalakwe amkamuchisye jwakutumichila jwakwe Yisalayeli. Atesile yeleyi pakumbuchila chanasa chakwe 55 chaŵachisasile kuti, kwandaŵi syosope, chachimlosya Abulahamu ni mwanache jwakwe, ŵali achinangolo ŵetu.” 56 Maliya jwatemi ni Elisabeti kwa myesi jitatu soni kaneko jwawujile kumangwakwe.

57 Sambano ndaŵi jakwanile jakuti Elisabeti aŵeleche, ni jwaŵeleche mwanache jwamlume. 58 Ŵandu ŵakuŵandikana nawo soni achalongo achimjakwe ŵapikene yakuti Yehofa amlosisye Elisabeti umbone mtima, mwamti jemanjajo ŵasangalele pampepe ni jwalakwe. 59 Pa lisiku lya 8, jemanjajo ŵayiche kuti amwumbasye mwanachejo, soni ŵasakaga kumpa lina lya babagwe lyakuti Sekaliya. 60 Nambo mamagwe ŵatite, “Lina lyelelyo iyayi! Nambo aŵe Yohane.” 61 Pelepo ŵanduwo ŵamsalile Elisabeti kuti, “Pangali mlongo mjenu amta jumo jwakwete lina lyeleli.” 62 Kaneko jemanjajo ŵawusisye babagwe pakamulichisya masengo makono kuti asale lina lyakusaka kumpa mwanachejo. 63 Myoyo babagwewo ŵaŵilasisye pakuti alembe ni ŵalembile kuti, “Lina lyakwe lili Yohane.” Pelepo ŵandu wosopewo ŵasimonjile mnope. 64 Ndaŵi jijojo Sekaliya jwatandite kuŵecheta mwamti jwatandite kumchimbichisya Mlungu. 65 Pelepo woga wakamwile ŵandu wosope ŵaŵatamaga mwakuŵandikana nawo, soni ŵandu ŵaliji mkuŵecheta yindu yosopeyi mu chigawo chosope cha Yudeya. 66 Ŵandu wosope ŵaŵapikene yeleyi ŵaliwusyaga m’mitima jawo kuti, “Ana mwanache jweleju chachiŵa jwamtuli?” Ŵaliwusyaga yeleyi ligongo machili ga Yehofa galiji pa jwalakwejo.

67 Pelepo msimu weswela wayiche pa Sekaliya babagwe mwamti ŵatandite kulochesya kuti, 68 “Achimbichikwe Yehofa Mlungu jwa Yisalayeli, ligongo ŵakumbuchile ŵandu ŵakwe ni kwapa chikulupusyo. 69 Jwalakwe atupele msengo wachikulupusyo* kutyochela m’nyumba ja Daudi jwakutumichila jwakwe. 70 Atesile yeleyi mwakamulana ni yaŵaŵechete jwalakwejo kupitila mwa ŵakulochesya ŵakwe ŵaswela ŵakala, 71 pakwamba ya kutukulupusya kwa adani ŵetu soni kutukulupusya mmyala mwa wosope ŵakusatuŵenga. 72 Atesilesoni yeleyi pakulosya chanasa chakwe kwa achinangolo ŵetu ŵakala soni pakumbuchila chilanga chakwe cheswela, 73 chachili lumbilo jakwe jaŵatesile kwa nangolo jwetu Abulahamu. 74 Soni kuti, panyuma pakuti atukulupwisye mmyala mwa adani ŵetu, atupe upile wakumtumichila jwalakwe mwangali woga, 75 ni chakulinga chakuti tuŵe ŵakulupichika soni ŵakulungama pameso pakwe ndaŵi syosope. 76 Pakwamba ya mmwejo mwanangu chimchikolanjidwa jwakulochesya jwa Jwakwinani Mnopejo, pakuŵa chimchilongolela pasogolo pa Yehofa kuti mkalinganye matala gakwe, 77 soni kuti mkajiganye ŵandu ŵakwe kuti chakulupuche mwakululuchidwa yakulemwa yawo. 78 Yeleyi yichitendekwa ligongo lya chanasa chekulungwa cha Mlungu jwetu. Ligongo lya chanasa chelechi, tuchilola kuŵala kwakutyochela kwinani kwakuwoneka mpela kundaŵi. 79 Kuŵalako kuchamulichila wosope ŵakutama mu chipi soni ŵali mu m’bulili wa chiwa, soni kuchilongolela sajo syetu mu litala lyamtendele.”

80 Mwanachejo jwakusile ni jwaŵele jwamachili mwa msimu wa Mlungu, soni jwapitilisye kutama m’chipululu mpaka palisiku liŵalilosisye pameso pa Ayisalayeli.