Lefitiko

19 Yehofa ŵapitilisye kuŵecheta ni Mose kuti, 2 “Mŵechetane ni Ayisalayeli wosope. Mwasalile jemanjajo kuti, ‘Mŵeje ŵaswela, ligongo une Yehofa Mlungu jwenu ndili jwamswela.

3 “‘Mundu jwalijose pasikati penu ŵachimbichisyeje* mamagwe soni babagwe, nambosoni msunjeje masiku gangu ga sabata. Une ndili Yehofa Mlungu jwenu. 4 Mkagalawuchila ku milungu jangali mate nambosoni mkalipanganyichisya milungu jagumba ja chisyano. Une ndili Yehofa Mlungu jwenu.

5 “‘Sambano naga mkupeleka mbopesi jamkamulano kwa Yehofa, mjipelecheje mbopesijo m’litala lyakuti Mlungu amjitichisye. 6 Mlyeje nyama ja mbopesijo palisiku lyamjipeleche nambosoni palisiku lyakuyichisya. Nambo nyama jakusigala mpaka palisiku lyatatu mjitinisyeje pamoto. 7 Naga mundu akulya nyama jakusigalajo palisiku lyatatu, une ngasinajijitichisya mbopesi jelejo ligongo nyama jelejo jili chindu chakunyalaya. 8 Mundu jwalile nyamajo chachijanga magambo gakwe ligongo nganachimbichisya chindu cheswela cha Yehofa. Mundu jwelejo mkusosekwa kumwulaga kuti akasimanikwasoni pasikati pa ŵandu ŵakwe.

9 “‘Pamkutyosya mbeju m’migunda m’chilambo chenucho, mkatyosyaga mbeju syosope syasili mumbali mwa mgunda wenu soni mkawululaga mbeju sya mumgunda mwenu. 10 Nambosoni mkawululaga m’migunda jenu ja mipeleya kapena kulokotanya mipeleya jajigwile pasi mumgunda mwenumo. Mwalecheleje yeleyi ŵandu ŵakulaga nambosoni achalendo. Une ndili Yehofa Mlungu jwenu.

11 “‘Mkajiŵaga, mkalambusyaga, nambosoni mkatendelanaga yindu mwachinyengo. 12 Mkalumbilaga mwaunami pa lina lyangu. Kutenda yeleyi kuli kukamulichisya masengo mwakulemwecheka lina lya Mlungu jwenu. Une ndili Yehofa Mlungu jwenu. 13 Mkamjiŵilaga mjenu mwachinyengo kapenasoni kumjiŵila pakamulichisya masengo machili. Malipilo ga mundu jwaganyu jwenu gakagona ni mmwejo chilo chosope mpaka kundaŵi.

14 “‘Mkamtembelelaga* mundu jwangapikana soni mkaŵikaga chindu chakuŵasya pasogolo pa mundu jwangalola. Mumjogopeje Mlungu jwenu. Une ndili Yehofa Mlungu jwenu.

15 “‘Mkawelusyaga mwangali chilungamo. Mkamnonyelaga mnope mundu jwakusichila ni kutendaga yindu mwalusagu kwa mundu jwakulaga. Mum’welusyeje mjenu mwachilungamo.

16 “‘Mkapitaga mchiŵecheta miseche pasikati pa ŵandu ŵenu. Mkatenda chindu champaka chiŵiche umi* wa mjenu pangosi. Une ndili Yehofa Mlungu jwenu.

17 “‘Mkamŵengaga mlongo mjenu mumtima mwenu. Nambo mmalomwakwe mumjamucheje mjenu ni chakulinga chakuti mkakola magambo pa ulemwa wakwewo.

18 “‘Mkawuchisyaga chakusakala kapena kumsunjila chakulukosi mlongo mjenu. Nambo mmalomwakwe mumnonyeleje mlongo mjenu mpela yamkusati pakulinonyela mwasyene. Une ndili Yehofa Mlungu jwenu.

19 “‘Mpikanileje malamusi gangu. Mkakunda kuti yilango yenu yakulekangana mitundu yikwelane. Mkapandaga mbeju syakulekangana mitundu mumgunda umo nambosoni mkawalaga chakuwala cheluche ni ulusi wakupanganya kutyochela ku yindu yiŵili yakulekangana.*

20 “‘Naga jwamlume agonene ni jwamkongwe jwamasengo jwali pa chitomelo ni jwamlume jwine, nambo jwamkongwejo ali jwakuti nganaŵe kumwombola kapena kumgopola, pelepo jemanjajo akusosekwa kupochela chilango.* Nambope ngakusosekwa kuwulajidwa ligongo lyakuti jwamkongwejo ŵaliji mkanaŵe kumgopola. 21 Jwamlumejo akusosekwa kwika najo ngondolo jamkambako ja mbopesi jakwe jamagambo kwa Yehofa kumlango wa chitenti chakusimanilana. 22 Jwakutaga mbopesi ajigaleje ngondolo jamkambako ja mbopesi jamagambojo ni kujipeleka kwa Yehofa pakusimasya ulemwa watesile mundujo, mwamti ulemwa watesile jwalakwe uchikululuchidwa.

23 “‘M’chilambo chamkwawulacho pachimkapande chitela cha yisogosi kuti mlyeje, yisogosi ya m’chitela chelecho mkayiwoneje kuŵa yangaswejela soni mkayiŵambaleje. Mkayiŵambaleje yisogosi yeleyo kwa yaka yitatu. Mkajaga kulya yisogosi yeleyo. 24 M’chaka chamcheche, yisogosi yeleyo yikaŵeje yeswela soni mkayipelecheje kwa Yehofa mwakusangalala. 25 Kaneko m’chaka chamsano, mkalyeje yisogosi ya m’chitela chelecho, mwamti yeleyi yichitendekasya kuti yagowola yenu yiŵe yejinji. Une ndili Yehofa Mlungu jwenu.

26 “‘Mkalyaga nyama jili jana myasi.

“‘Mkatendaga yisango kapena yamasenga.

27 “‘Mkasenga wumbo syakutuluchila m’majeje kapena kuyepula* ndewu syenu.

28 “‘Mkalikatagakataga pachilu chenu pandaŵi jamkulila malilo, nambosoni mkalilembagalembaga* pachilu penu. Une ndili Yehofa Mlungu jwenu.

29 “‘Mkamchembulusyaga mwanache jwenu jwamkongwe mwakumtendekasya kuŵa lihule. Mŵambaleje yeleyi ni chakulinga chakuti chilambocho chikasakala ni ndamo ja uhule soni chikagumbala ni ndamo jakulijasilila.

30 “‘Msunjeje masiku gangu ga sabata nambosoni mchimbichisyeje* mnope malo gangu geswela. Une ndili Yehofa Mlungu jwenu.

31 “‘Mkagalawuchilaga kwa ŵandu ŵakuŵecheta ni misimu, nambosoni mkawusyaga lunda kwa ŵandu ŵakutenda yisango. Mŵambaleje yeleyi kuti akamtendekasya kuŵa ŵangaswejela. Une ndili Yehofa Mlungu jwenu.

32 “‘Mpelecheje uchimbichimbi pameso pa mundu jwakwete wuli, nambosoni mumpeje ulemu mundu jwamchekulupe. Mumjogopeje Mlungu jwenu. Une ndili Yehofa Mlungu jwenu.

33 “‘Naga mundu jwamtundu wine akutama m’chilambo chenu, ngamkusosekwa kumlagasya. 34 Mundu jwamtundu wine jwakutama pasikati penu mumwoneje mpela jumo jwa ŵandu ŵa mtundu wenu, soni mumnonyeleje mpela mwamkusalinonyelela mwachimsyene. Mkaliŵalilaga kuti jemanjasoni mwaliji achalendo m’chilambo cha Iguputo. Une ndili Yehofa Mlungu jwenu.

35 “‘Pamkulinga ulewu wa chindu kapena usito wa chindu kapenasoni mkulinga yindu ya mesimesipe, mkakamulichisyaga masengo mlingo wachinyengo. 36 Mkamulichisyeje masengo masikelo gakuŵajilwa, mlingo wakuŵajilwa wakulinjila yindu yausito, mlingo wakuŵajilwa wa efa* nambosoni mlingo wakuŵajilwa wa hini.* Une ndili Yehofa Mlungu jwenu junamkopwesye m’chilambo cha Iguputo. 37 Myoyo mpikanileje malamusi gangu gosope soni yosope yanamlamwile. Mkusosekwa mkuyeje yeleyi. Une ndili Yehofa Mlungu jwenu.’”