Ana Yisyesyene Yakwe Yakwamba Malayika Yili Yamtuli?

Yehofa akusaka kuti tumanyilile chenene yakwamba malayika. Malayikaga gakusamanyikasoni kuti “ŵanache ŵa Mlungu.” (Genesesi 6:4; Yobu 38:7) Nambo ana Baibulo jikusasala yamtuli yakwamba malayika? Ana malayikaga gakusatenda yindu yamtuli kwa ŵandu? Soni ana malayika gosope gali gambone?

1. Ana malayika gali ŵani?

Yehofa ŵapanganyisye malayika mkanapanganye chilambochi. Mpela mwaŵelele Yehofa, malayikaga gali gangawoneka soni gakusatama kwinani. (Ahebeli 1:14) Malayikaga gali gejinji soni lilayika lililyose likwete ndamo jakulekangana ni lilayika lijakwe. (Chiwunukuko 5:11) Jemanjaji ‘akusapikanila maloŵe ga [Yehofa] soni akusatenda yele yakusiŵalamula.’ (Salimo 103:20) Kalakala, Yehofa ndaŵi sine jwagatumaga malayika kuti gakapeleche utenga, gakakamuchisye ŵandu soni kwakulupusya. Masiku agano, malayika gakusigalongolela Aklistu kwa ŵandu ŵakusaka kulijiganya ya Mlungu.

2. Ana Satana ni yiŵanda yakwe ali ŵani?

Malayika gane nganigaŵa gakulupichika kwa Yehofa. Lilayika lyandanda lyalyamjimuchile Mlungu ‘likusaŵilanjidwa kuti Jwakusakala kapena Satana, jwele ŵalambwisye ŵandu ŵa pachilambo chosope chapasi.’ (Chiwunukuko 12:9) Satana jwasakaga kwalamulila ŵandu, mwamti jwatendekasisye kuti achinangolo ŵetu ŵandanda soni malayika gane amjimuchile Mlungu. Malayika gagamjimuchile Mlunguga gakusamanyika kuti yiŵanda. Ni ligongo lyakwe Yehofa ŵagatopwele malayikaga kwinani ni kugajawusya pachilambo chapasi. Mwamti pachangakaŵapa chagajonanje.—Aŵalanje Chiwunukuko 12:9, 12.

3. Ana Satana ni yiŵanda yakwe akusatusokonasya mwamtuli?

Satana ni yiŵanda yakwe akusiŵasokonasya ŵandu kupitila mu yitendo ya misimu. Yitendoyi jili ndamo jakusakala jakusatenda mundu pakusaka kuti akamulaneje ni misimu jakusakala. Mwachisyasyo, ŵandu ŵane akusajawula kwa ŵandu ŵakulupilila ndondwa, ŵayisango soni asing’anga pakusaka kupata chikamuchisyo. Pele ŵane palwasile akusasosaga chikamuchisyo chakwayana ni yamisimu. Soni ŵane akusiŵalambusyaga achimjawo kuti mpaka aŵechetane ni ŵandu ŵaŵawile. Nambo Yehofa akusatusalila mwamachili kuti, “Mkasimjawula kwa ŵandu ŵakulondola yisango kwa misimu ja ŵandu ŵawe kapena asaŵi.” (Lefitiko 19:31) Jwalakwe akusatusalila yeleyi ni chakulinga chakuti tulichenjele kwa Satana ni yiŵanda yakwe. Jemanjaji ali achimmagongo ŵa Mlungu soni akusasaka kutuwulasya.

KULIJIGANYA YEJINJI

4. Malayika gakusakamuchisya ŵandu kuti alijiganye ya Yehofa

Malayika ga Mlungu gangalalichilaga ŵandu. Mmalo mwakwe gakusigalongolela ŵandu ŵa Mlungu, kwa ŵandu ŵakusaka kulijiganya ya jwalakwe. Aŵalanje Chiwunukuko 14:6, 7, kaneko akambilane yiwusyo ayi:

• Ana ligongo chichi tukusasosekwa chikamuchisyo cha malayika patukulalichila?

• Ana kumanyilila kuti malayika mpaka galongolele kwa ŵandu ŵakusaka kulijiganya Baibulo, kukwalimbikasya chamtuli? Ligongo chichi?

5. Aŵambaleje kutenda yamisimu

Satana ni yiŵanda ali achimmagongo ŵa Yehofa. Nambosoni ali achimmagongo ŵetu. Aŵalanje Luka 9:38-42, kaneko akambilane chiwusyo achi:

• Ana yiŵanda yikusatenda yamtuli kwa ŵandu?

Ngatukusosekwa kunda kuti yiŵanda yitulongoleleje. Aŵalanje Detulonomo 18:10-12, kaneko akambilane yiwusyo ayi:

• Ana yiŵanda yikusakamulichisya masengo matala gapi pakusaka kuti tukamulaneje nayo? Ana kumangwawo kuno ni ndamo syapi syasiwandile panganiji?

• Ana pana umbone uliwose naga tukupikanila Yehofa pakutulekasya kutenda yamisimu? Ligongo chichi akwanga myoyo?

Alolele FIDIYO, kaneko akambilane yiwusyo yakuyichisyayi.

FIDIYO: “Amkaneje Satana” (5:02)

• Ana akuganisya kuti chilisi chaŵamtaŵile mwanache pamkono chaliji chakogoya uli? Ligongo chichi?

• Ana mayiju jwasosekwaga kutenda chichi kuti alichenjele ku yiŵanda?

Ndaŵi syosope Aklistu ŵasyesyene akusaŵambala kutenda ya misimu? Aŵalanje Masengo 19:19 soni 1 Akolinto 10:21, kaneko akambilane chiwusyo achi:

• Ana ligongo chichi yili yakusosekwa konanga chilichose chakwayana ni misimu?

6. Mpaka apunde ngondo jakulimbana ni Satana soni yiŵanda yakwe

Satana ni jwakusalamulila yiŵanda. Nambo malayika gakulupichika gakusalongoleledwa ni Mikaele jwali jwamkulungwa jwa malayika. Lyeleli lili lina line lya Yesu. Ana Mikaele akwete machili gamtuli? Aŵalanje Chiwunukuko 12:7-9, kaneko akambilane yiwusyo ayi:

• Mikaele yimpepe ni malayika gakwe soni Satana ni yiŵanda, ana ni ŵani ŵakwete machili mnope?

• Ana akuganisya kuti ŵakumkuya ŵa Yesu akusosekwa kumjogopaga Satana ni yiŵanda yakwe?

Mpaka akombole kulimbana ni Satana ni yiŵanda yakwe. Aŵalanje Yakobo 4:7, kaneko akambilane chiwusyo achi:

• Ana mpaka atende yamtuli kuti alichenjele kwa Satana soni yiŵanda?

YALIJIGANYISYE

Malayika gakulupichika gakusatukamuchisya. Satana soni yiŵanda yakwe ali achimmagongo ŵa Yehofa. Soni jemanjaji akusiŵasokonasya ŵandu kupitila mu yitendo ya misimu.

Yiwusyo Yakuwilisya

• Ana malayika ga Yehofa gakusigakamuchisya chamtuli ŵandu ŵakusaka kulijiganya ya jwalakwe?

• Ana Satana ni yiŵanda yakwe ali ŵani?

• Ana ligongo chichi ngakusosekwa kutenda yiliyose yakwayana ni ya misimu?

YAKULINGA YINESONI

Alole maumboni gakulosya kuti Yesu ali Mikaele jwamkulungwa jwa malayika.

“Ana Mikaele Jwamkulugwa jwa Malayika Ali Ŵani?” (Ngani ja pa intaneti)

Alole umboni wakulosya kuti Satana nganaŵa ndamo syakusakala syakutenda ŵandu.

“Ana Satana Ali Jusyesyene?” (Ngani ja pa intaneti)

Alole yajwatesile jwamkongwe jwine kuti yiŵanda yikamlagasyaga.

“Jwamanyilile Kuti Umi Wakwe Ukwete Chakulinga” (Sanja ja Mlonda, Julayi 1, 1993)

Alijiganye yakusatenda Satana pakwatendekasya ŵandu kukulupilila misimu.

“Yakuwona Yakwe Pakwamba ya Masenga ni ya Usaŵi” (Litala lya ku Umi Wangamala, mbali 5)