Chikalata Chakwawula kwa Ahebeli

11 Chikulupi chili kusimichisya kuti yindu yatukwembecheya yichitendekwa, soni chili umboni wakuwonechela chenene kuti yindu yele ngatukuyiwona yipali nditu. 2 Ligongo lyakuti ŵandu ŵakala* ŵakwete chikulupi chelechi, Mlungu ŵalosisye kuti akusangalala nawo.

3 Ligongo lyakola chikulupi, m’weji tukumanyilila kuti Mlungu ŵalamwile kuti chindu chilichose, chakwinani soni pachilambo chapasi chiŵe pamalo gakwe.* Pambesi pakwe, yindu yatukuyiwona yapali kutyochela ku yindu yele ngatukuyiwona.

4 Ligongo lyakola chikulupi, Abele jwapeleche kwa Mlungu mbopesi jambone mnope kupunda ja Kaini, mwamti ligongo lya chikulupi chelecho jwalakwe ŵapochele umboni wakuti ali jwakulungama, pakuŵa Mlungu ŵajitichisye* mbopesi jakwe. Atamose kuti jwalakwejo jwawile, nambo akuŵechetape kupitila mu chikulupi chakwecho.

5 Ligongo lyakola chikulupi, Enoki ŵamsamisye ni chakulinga chakuti akawa chiwa chakupweteka, soni nganawoneka kulikose ligongo Mlungu ŵamsamisye jwalakwejo. Sonitu mkanamsamisye jwalakwe ŵapochele umboni wakumsimichisya kuti ŵatesile yakumsangalasya Mlungu. 6 Kusala yisyene, mundu jwangali chikulupi nganaŵa akombwele kumsangalasya Mlungu, pakuŵa jwalijose jwakwika kwa Mlungu akusosekwa kukulupilila kuti jwalakwe apali nditu. Akusosekwa kukulupililasoni kuti jwalakwejo akusapeleka yindu yambone kwa ŵandu ŵakusamsosasosa ni mtima wosope.

7 Ligongo lyakola chikulupi, Nowa ŵalosisye kuti akusamjogopa Mlungu, mwamti ŵapanganyisye chombo kuti akulupusye liŵasa lyakwe. Ŵatesile yeleyi panyuma pakuti Mlungu amkalamwisye pakwamba ya yindu yayaliji mkaniyiwoneche. Ligongo lyakola chikulupi chelecho jwalakwe jwalosisye kuti chilambochi chili chakuŵajilwa kuchijonanga, soni Mlungu ŵam’weni kuŵa jwakulungama ligongo lya chikulupi chakwecho.

8 Ligongo lyakola chikulupi, Abulahamu ŵapikanile Mlungu paŵamŵilasile kuti akopoche m’chilambo chakwe, mwamti ŵatyosile ni kwawula ku malo gaŵajembecheyaga kuti chachipochela. Jwalakwe ŵanyakwiche atamose kuti nganakumanyililaga kuŵajawulaga. 9 Ligongo lyakola chikulupi, jwalakwe ŵatemi mpela mlendo m’chilambo chiŵajembecheyaga kupochelacho. Jwalakwe ŵatamaga m’matenti pampepe ni Isaki soni Yakobo, ŵaŵaliji ŵakupochela nawo yimpepe yindu yaŵamsalile kuti chachipochela. 10 Jwalakwe ŵaliji mkwembecheya msinda wakola fendeshoni* jisyesyene, msinda wele Mlungu ni juŵawulinganyisye soni kuwutaŵa.

11 Ligongo lyakola chikulupi, nombenajo Sala ŵapochele machili gakuŵeleka mwanache, atamose kuti ŵaliji ali apundile yaka yakuŵelechela, pakuŵa jwalakwe ŵam’weni kuŵa jwakulupichika* Jwele juŵasasile ya chilangacho. 12 Paligongo lyeleli, mundu jumo Abulahamu, jwele juŵaliji mpela kuti awile, jwaŵeleche ŵanache. Jwalakwe jwaŵeleche ŵanache ŵajinji mpela ndondwa syakwinani, soni ŵaliji ŵangaŵalanjika mpela mchenga wa mungulugulu nyasa.

13 Ŵandu wosopeŵa ŵawile ali akwete chikulupi, atamose kuti nganakuwona kukwanilichikwa kwa yindu yiŵajembecheyagayo. Nambo ŵayiweni yinduyo yili pakutalichila soni ŵayipochele. Jemanjaji ŵaŵechetaga pameso pa ŵandu kuti ŵaliji achalendo soni ŵangatamilisya m’chilambocho. 14 Pakuŵa ŵandu ŵakusaŵecheta myiyi akusaŵa ali mkulosya kuti akusosasosa malo gawogawope gakutama. 15 Nambosoni, yikaŵe kuti jemanjaji ŵatamilaga kuganichisya ya kumalo kuŵatyochele, yikaŵele yakomboleka kuwujila. 16 Nambo wosope akusalingalinga kuti apate malo gambone mnope, malo gakwe gali gakwinani. Myoyo, Mlungu jwangatenda sooni jemanjaji pakusala kuti jwalakwejo ali Mlungu jwawo, pakuŵa jwalakwejo alinganyisye msinda kuti uŵe wa jemanjaji.

17 Ligongo lyakola chikulupi, Abulahamu paŵalinjidwe, yaŵele mpela ampeleche kala Isaki kuŵa mbopesi. Yisyene, mundu juŵapochele mwakusangalala maloŵe gakumsalila yindu yachachipochela, jwaliji jwakoseka kumpeleka mwanache jwakwe jumo pejo. 18 Yaŵele myoyo atamose kuti ŵaliji ali amsalile kala kuti, “Ŵanache ŵenu chachipagwa kutyochela mwa Isaki.” 19 Nambo jwalakwe ŵaganisisye ni kuyiwona kuti Mlungu mpaka akombole kumjimusya mwanachejo ku chiwa, mwamti ŵampochele nditu kutyochela ku chiwako m’litala lyakuwanichisya.

20 Ligongo lyakola chikulupi, nombenajo Isaki ŵampele upile Yakobo ni Esawu pakwasalila yindu yayaliji mkwika.

21 Ligongo lyakola chikulupi, Yakobo ali asigele panandi kuwa ŵampele upile mwanache jwalijose jwa Yosefe, soni ŵamtindiŵalile Mlungu ali ajegamile simbo jakwe jakwendela.

22 Ligongo lyakola chikulupi, Yosefe ŵaŵechete ya kutyoka kwa ŵanache ŵa Yisalayeli. Ŵaŵechete yeleyi chakumbesi kwa umi wakwe, soni ŵasasile* yachachisosekwa kutenda ni mawupa gakwe.*

23 Ligongo lyakola chikulupi, achinangolo ŵa Mose ŵakombwele kumsisa jwalakwejo kwa myesi jitatu ali agambile kupagwa. Ŵatesile yeleyi ligongo ŵayiweni kuti mwanachejo ŵaliji jwakusalala mwamti nganajogopa yaŵalamwile mwenye. 24 Ligongo lyakola chikulupi, Mose paŵakusile jwakanile kumanyika mpela mwanache jwa mwanache jwamkongwe jwa Falawo. 25 Jwalakwe ŵasagwile kuti alagasicheje pampepe ni ŵandu ŵa Mlungu mmalo mwakusangalala ni yindu yangatamilisya yaulemwa. 26 Jwalakwe ŵatesile yeleyi ligongo ŵayiweni kuti kulagasika kwakwe mpela Jwakusagulidwa kuli mpela chipanje chapenani mnope kupunda chipanje cha ku Iguputo, pakuŵa jwalakwejo jwaliji mkulolechesya pa yindu yachachipochela. 27 Ligongo lyakola chikulupi, jwalakwejo ŵatyosile ku Iguputo, nambo ngaŵaga ligongo lyakogopa ukali wa mwenye, pakuŵa jwalakwe jwapitilisye kuŵa jwangatenganyika mpela kuti akumwona jwangawonekajo. 28 Ligongo lyakola chikulupi, jwalakwe ŵatesile Pasika soni ŵapakesye nawo myasi pa mafelemu ga matanga ni chakulinga chakuti lilayika lya Mlungu likawulaga* ŵanache ŵawo ŵandanda kupagwa.

29 Ligongo lyakola chikulupi, jemanjajo ŵajombweche Nyasa Jechejewu mpela kuti akupita pamalo gejumu, nambo Aiguputo paŵalinjile kuti ajomboche, nyasajo jamisile wosope.

30 Ligongo lyakola chikulupi, mapupa ga msinda wa Yeliko gagwile panyuma pakuti ŵanduwo ajesile mwakuwusyungulila msindawo kwa masiku 7. 31 Ligongo lyakola chikulupi, Lahabu juŵaliji lihule nganajonasika yimpepe ni ŵandu ŵaŵaliji ŵangapikanila, ligongo lyakuti jwalakwe ŵapochele mwamtendele ŵakusonda.

32 Ana ngusosekwa kusalasoni yisyasyo yine? Pakuŵa ndaŵi chijinondipile kuti mbitilisye kuŵecheta yakwamba Gidiyoni, Balaki, Samusoni, Yefita, Daudi, soni Samuyele ni ŵakulochesya ŵane. 33 Ligongo lyakola chikulupi, jemanjaji ŵagagomeche mauchimwene, ŵatesile yachilungamo, Mlungu ŵasalile yindu yachachipochela, ŵawugele pakamwa pa masimba, 34 ŵasimisye machili ga moto, soni ŵakulupwiche ŵandu paŵasakaga kwawulaga ni upanga. Ŵaliji ŵangali machili nambo ŵapochele machili, ŵaŵele ŵakulimbangana pa ngondo, soni ŵagagomeche magulu ga ngondo gagayiche kukwajimuchila. 35 Achakongwe ŵapochele achalongo achimjawo ŵaŵajimwiche ku chiwa. Ŵalasile mnope mpaka kuwa soni nganakunda kuleka chikulupi chawo kuti ŵagopole. Ŵatesile yeleyi pakusaka kwimuka kwambone mnope. 36 Ŵane ŵalinjidwe mwakwanyosya soni kwakwapula, nambosoni kupunda pelepa, ŵayikene pakwataŵa ni kwaponya m’nyumba sya ukayidi. 37 Ŵawuleje mwakwaponya maganga, ŵane ŵalinjidwe pakusaka kuti aleche chikulupi chawo, soni ŵane ŵakatile pasikati ni macheka. Ŵane ŵawile ni upanga, soni ŵane ŵawalaga mapende ga ngondolo soni ga mbusi. Ŵaliji ŵakulaga, ŵasimanaga ni yakusawusya, soni ŵandu ŵaliji mkwalagasya. 38 Ŵandu ŵeleŵa ŵaliji ŵambone mnope mwamti nganaŵajilanaga ni chilambochi. Ŵaliji mkwendajenda ni kugonaga m’yipululu, m’matumbi, mu mbanga soni m’masimbo.

39 Ŵandu wosopeŵa, Mlungu ŵatendele umboni wakulosya kuti ŵatesile yakumsangalasya jwalakwejo ligongo lya chikulupi chawo. Nambope jemanjajo nganakuwona kukwanilichikwa kwa yindu yiŵasalile kuti chachapa. 40 Yaŵele myoyo ligongo lyakuti Mlungu ŵayiweni chilepe yindu yambone yakuti atupe m’weji, ni chakulinga chakuti jemanjajo aŵe ŵamlama ligongo lya m’weji.